Kapitulo Siete

Kon Ano ang Matun-an Naton Gikan sa Pagpahanugot Sang Dios sa Kalautan

1, 2. (a) Kon ginpatay gilayon ni Jehova ang mga rebelde sa Eden, paano kuntani ini nakaapektar sa aton? (b) Anong mahigugmaon nga mga kahimusan ang ginhimo ni Jehova para sa aton?

“DIUTAY kag makapasubo ang mga adlaw sang mga tuig sang akon kabuhi,” siling ni patriarka Jacob. (Genesis 47:9) Subong man, si Job nagsiling nga ang tawo “malip-ot sing kabuhi kag puno sing kagamo.” (Job 14:1) Kaangay nila, ang kalabanan sa aton nakaeksperiensia sing mga kabudlayan, mga inhustisya, kag mga trahedya pa gani. Apang, ang aton pagkabun-ag indi inhustisya sa bahin sang Dios. Matuod, wala kita sing himpit nga hunahuna kag lawas kag sing Paraiso nga ginpuy-an anay nanday Adan kag Eva. Apang ano abi kon ginpatay sila gilayon ni Jehova sang nagrebelde sila? Bisan pa wala na kuntani sing bisan ano nga balatian, kasubo, ukon kamatayon, wala man kuntani sing tawhanon nga rasa. Kuntani wala na kita matawo. Sing maluluy-on, ginpahanugutan sang Dios sanday Adan kag Eva sa pagpanganak, bisan pa nga nakapanubli sila sing di-kahimpitan. Kag paagi kay Cristo, si Jehova naghimo sing kahimusan agod matigayon naton liwat ang nadula ni Adan​—ang kabuhi nga walay katapusan sa paraiso nga duta.​—Juan 10:10; Roma 5:12.

² Daw ano ka makapalig-on nga paabuton naton nga magkabuhi sing dayon sa bag-ong kalibutan nga ang palibot isa ka Paraiso, diin wala na sing balatian, kasubo, kasakit, kag kamatayon, subong man sing malauton! (Hulubaton 2:​21, 22; Bugna 21:​4, 5) Apang gikan sa rekord sang Biblia, nahibaluan naton nga bisan pa ang aton kaluwasan importante gid sa aton kag kay Jehova, may isa pa ka butang nga mas importante nga nadalahig.

Bangod Sang Iya Daku nga Ngalan

3. Ano ang nadalahig may kaangtanan sa katumanan sang katuyuan ni Jehova para sa duta kag katawhan?

³ Ang ngalan sang Dios nadalahig sa katumanan sang iya katuyuan may kaangtanan sa duta kag katawhan. Ina nga ngalan, Jehova, nagakahulugan sing “Ginapahanabo Niya nga Mangin Amo.” Gani ang iya ngalan nagalakip sang iya reputasyon subong ang Bug-os Uniberso nga Soberano, ang nagahimo kag nagatuman sang Iya katuyuan, kag ang Dios sang kamatuoran. Bangod sang posisyon ni Jehova, ang paghidait kag kaayuhan sang bug-os nga uniberso nagakinahanglan nga hatagan ang iya ngalan kag ang bisan ano man nga nalakip sa sini sing bug-os nga pagtahod nga takus sa sini kag nga ang tanan magatuman sa iya.

4. Ano ang nalakip sa katuyuan ni Jehova para sa duta?

⁴ Sa tapos gintuga si Adan kag si Eva, ginhatagan sila ni Jehova sing hilikuton. Gin-athag niya nga ang iya katuyuan indi lamang ang paggahom sa bug-os nga duta​—sa amo pasangkaron ang mga dulunan sang Paraiso​—kundi puy-an ini sang ila mga kaliwatan. (Genesis 1:28) Mapaslawan bala ini nga katuyuan bangod sang ila sala? Daw ano gid nga kahuy-anan sa ngalan sang labing gamhanan nga si Jehova kon indi niya matuman ang iya katuyuan para sa sining duta kag katawhan!

5. (a) Kon kaunon sang nahaunang mga tawo ang kahoy sang ihibalo sang maayo kag malain, san-o sila mapatay? (b) Paano gintuman ni Jehova ang iya pulong sa Genesis 2:17 samtang ginatahod ang iya katuyuan tuhoy sa duta?

⁵ Ginpaandaman ni Jehova si Adan kag si Eva nga kon lapason nila kag kaunon ang kahoy sang ihibalo sang maayo kag malain, mapatay sila “sa adlaw” nga magkaon sila. (Genesis 2:17) Suno gid sa iya ginpamulong, ginsukot sila ni Jehova sa adlaw mismo sang ila pagpakasala kag ginhatag ang pamatbat nga kamatayon. Gikan sa pagtamod sang Dios, si Adan kag si Eva napatay sadto gid nga adlaw. Apang, agod matuman ang iya katuyuan tuhoy sa duta, gintugutan sila ni Jehova nga makapamilya antes sila mapatay. Apang, bangod ang 1,000 ka tuig isa ka adlaw sa Dios, sang napatay si Adan sa edad nga 930 ka tuig, sa sulod gihapon ini sang isa ka “adlaw.” (2 Pedro 3:8; Genesis 5:3-5) Gani napamatud-an ang pagkamaminatud-on ni Jehova may kaangtanan sa kon san-o ipadapat ang silot, kag ang iya katuyuan para sa duta wala mapaslawan bangod sang ila kamatayon. Apang sa sulod sang pila ka tion, ang di-himpit nga mga tawo, pati na ang mga malauton, gintugutan nga magkabuhi.

6, 7. (a) Suno sa Exodo 9:​15, 16, ngaa ginapahanugutan ni Jehova nga magpadayon ang kalautan sa sulod sang pila ka tion? (b) Sa bahin ni Paraon, paano ginpakita ang gahom ni Jehova, kag paano ginpakilala ang Iya ngalan? (c) Ano ang magaresulta kon ang karon nga malauton nga sistema laglagon?

⁶ Ang ginsiling ni Jehova sa manuggahom sang Egipto sang mga adlaw ni Moises nagapakita sing dugang kon ngaa ginpahanugutan sang Dios nga magpadayon ang kalautan. Sang wala magsugot si Paraon nga palakton ang mga kaanakan sang Israel gikan sa Egipto, wala sia gilayon ginlaglag ni Jehova. Ang Napulo ka Kalalat-an ginpadangat sa pungsod, nga nagpakita sang gahom ni Jehova sa makatilingala nga mga paagi. Sang magpaandam tuhoy sa ikapito nga kalalat-an, nagsiling si Jehova kay Paraon nga mahapos lamang kuntani para sa Iya nga papason si Paraon kag ang iya katawhan gikan sa nawong sang duta. “Apang, ang matuod,” siling ni Jehova, “bangod sini gintipigan ko ikaw nga buhi, agod ipakita sa imo ang akon gahom kag agod mapahayag ang akon ngalan sa bug-os nga duta.”​—Exodo 9:​15, 16.

⁷ Sang ginluwas ni Jehova ang mga Israelinhon, ang iya ngalan nakilal-an gid sing lapnag. (Josue 2:​1, 9-11) Karon, paglipas sang halos 3,500 ka tuig, ang ginhimo niya anay wala malipatan. Indi lamang ang personal nga ngalan nga Jehova ang ginpahayag kundi ang kamatuoran man tuhoy sa Isa nga nagadala sini nga ngalan. Ginpalig-on sini ang reputasyon ni Jehova subong ang Dios nga nagatuman sang iya mga saad kag nagapanghikot para sa iya mga alagad. (Josue 23:14) Ginpakita sini nga bangod sang iya labing gamhanan nga gahom, wala sing butang nga makabalabag sa iya katuyuan. (Isaias 14:​24, 27) Busa makasalig kita nga sa dili madugay magapanghikot sia para sa iya matutom nga mga alagad paagi sa paglaglag sa bug-os nga malauton nga sistema ni Satanas. Ini nga pagpakita sang labing gamhanan nga gahom kag ang himaya nga mahatag sini sa ngalan ni Jehova indi gid pagkalimtan. Ang mga benepisyo mangin walay katapusan.​—Ezequiel 38:23; Bugna 19:​1, 2.

‘O Pagkadalom Sang Kaalam Sang Dios!’

8. Ano nga mga butang ang ginapalig-on ni Pablo nga binagbinagon naton?

⁸ Sa iya sulat sa mga taga-Roma, si apostol Pablo nagpautwas sing pamangkot: “May inhustisya bala sa Dios?” Maathag sia nga nagsabat: “Indi gid ina matabo!” Nian ginpadaku niya ang kaluoy sang Dios kag ginpatalupangod ang ginsiling ni Jehova sa pagpahanugot kay Paraon nga magkabuhi pa sing madugaydugay. Ginpakita man ni Pablo nga kita nga mga tawo kaangay sang daga sa kamot sang maninihon. Nian sia nagsiling: “Karon, kon ang Dios, walay sapayan nga may kabubut-on nga ipakita ang iya kaakig kag ipakilala ang iya gahom, nagbatas nga may daku nga pagpailob sa mga suludlan sang kaakig nga ginhimo nga takus sa kalaglagan, agod mapahibalo niya ang kamanggaran sang iya himaya sa mga suludlan sang kaluoy, nga ginhanda niya nga daan para sa kahimayaan, nga amo, kita, nga gintawag niya indi lamang gikan sa mga Judiyo, kundi gikan man sa mga pungsod, ano karon?”​—Roma 9:14-24.

9. (a) Sin-o ang “mga suludlan sang kaakig nga ginhimo nga takus sa kalaglagan”? (b) Ngaa nagpakita si Jehova sing daku nga pagkamainantuson sa atubangan sang mga nagapamatok sa iya, kag ano ang katapusan nga resulta para sa kaayuhan sang tanan nga nagahigugma sa iya?

⁹ Sugod sang pagrebelde sa Eden, ang bisan sin-o nga nagpamatok kay Jehova kag sa iya mga kasuguan nangin “mga suludlan sang kaakig nga ginhimo nga takus sa kalaglagan.” Sa bug-os nga tion sugod sadto, si Jehova nagpakita sing pagkamainantuson. Ginyaguta sang mga malauton ang ginhimo niya, ginhingabot nila ang iya mga alagad, kag ginpatay pa ang iya Anak. Nagpakita sing daku nga pagpugong, ginhatagan ni Jehova sing nagakaigo nga tion ang tanan nga tinuga nga makita sing bug-os ang makahalalit nga mga resulta sang pagrebelde batok sa Dios kag sang paggahom sang tawo nga hilway sa iya. Sa amo man nga tion, ang kamatayon ni Jesus naghatag sing paagi agod maluwas ang matinumanon nga katawhan kag agod ‘malaglag ang mga binuhatan sang Yawa.’​—1 Juan 3:8; Hebreo 2:​14, 15.

10. Ngaa ginpahanugutan ni Jehova ang mga malauton sa naglipas nga 1,900 ka tuig?

¹⁰ Sa sulod sang kapin sa 1,900 ka tuig sugod sang pagkabanhaw ni Jesus, ginpahanugutan pa ni Jehova ang “mga suludlan sang kaakig,” ginpaiway ang ila kalaglagan. Ngaa? Bangod ginahanda niya ang mangin mga kaupod ni Jesucristo sa iya langitnon nga Ginharian. May kadamuon sila nga 144,000, kag sila ang “mga suludlan sang kaluoy” nga ginsiling ni apostol Pablo. Una, ang mga indibiduwal gikan sa mga Judiyo gin-agda nga mangin katapo sining langitnon nga klase. Sang ulihi gin-agda sang Dios ang Gentil nga mga pungsod. Wala ginpilit ni Jehova ang bisan sin-o sa ila nga mag-alagad sa iya. Apang sa tunga sang mga nag-apresyar sang iya mahigugmaon nga mga aman, ginhatagan niya ang iban sing pribilehiyo nga mangin kaupod nga mga manuggahom sang iya Anak sa langitnon nga Ginharian. Ang paghanda sa sining langitnon nga klase halos natapos na karon.​—Lucas 22:29; Bugna 14:1-4.

11. (a) Ano nga grupo ang nagabenepisyo karon gikan sa pagkamainantuson ni Jehova? (b) Paano makabenepisyo ang mga patay?

¹¹ Apang paano naman ang mga pumuluyo sa duta? Ginhimo man nga posible sang pagkamainantuson ni Jehova nga matipon ang “dakung kadam-an” gikan sa tanan nga pungsod. Minilyon ang ila kadamuon karon. Nangako si Jehova nga ining dutan-on nga klase makalampuwas sa katapusan sining sistema kag may paglaum nga magkabuhi sing walay katapusan sa paraiso nga duta. (Bugna 7:​9, 10; Salmo 37:29; Juan 10:16) Sa gintalana nga tion sang Dios, ang kadam-an sang mga patay banhawon kag hatagan sing kahigayunan nga mangin dutan-on nga mga sakop sang langitnon nga Ginharian. Ang Pulong sang Dios nagtagna sa Binuhatan 24:15: “May pagkabanhaw sang mga matarong kag mga di-matarong.”​—Juan 5:​28, 29.

12. (a) Ano ang natun-an naton tuhoy kay Jehova bangod sang pagpahanugot niya sang kalautan? (b) Ano ang imo ginabatyag sa paglubad ni Jehova sining mga hulusayon?

¹² May inhustisya bala sa sini tanan? Wala, bangod paagi sa pagpaiway niya sa paglaglag sa mga malauton, ukon sa “mga suludlan sang kaakig,” ginapakitaan sang Dios sing kaawa ang iban, nahisanto sa iya katuyuan. Ginapakita sini kon daw ano sia ka maluluy-on kag mahigugmaon. Subong man, bangod may tion kita nga makita ang katumanan sang iya katuyuan, madamo kita sing matun-an tuhoy kay Jehova. Nagadayaw kita sa nanuhaytuhay nga mga bahin sang iya personalidad nga ginpasundayag​—ang iya katarungan, ang iya kaluoy, ang iya pagkamainantuson, ang iya daku nga kaalam. Ang maalamon nga paglubad ni Jehova sa hulusayon tuhoy sa bug-os uniberso nga pagkasoberano​—ang iya kinamatarong sa paggahom—​magapabilin sing dayon subong isa ka pamatuod sa kamatuoran nga ang iya paagi sang paggahom amo ang pinakamaayo. Upod kay apostol Pablo, makasiling kita: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon!”​—Roma 11:33.

Kahigayunan Agod Mapakita ang Aton Debosyon

13. Kon nagaantos kita, ano nga kahigayunan ang ginahatag sa aton, kag ano ang makabulig sa aton agod mangin maalamon sa sini?

¹³ Madamo sang mga alagad sang Dios ang yara sa mga kahimtangan nga dapat antuson. Ang ila pag-antos nagapadayon bangod wala pa malaglag sang Dios ang mga malauton kag wala pa ang gintagna nga pagpasag-uli sa katawhan. Dapat bala kita maghinakit sa sini? Ukon tamdon bala naton ining mga kahimtangan subong mga kahigayunan agod makigbahin sa pagpamatuod sa Yawa nga isa ka butigon? Mapalig-on kita nga himuon ini kon dumdumon naton ang hanuot nga pangabay: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” (Hulubaton 27:11) Si Satanas, ang isa nga nagayaguta kay Jehova, nagsumbong nga kon ang mga tawo madulaan sing materyal ukon mag-antos sing pisikal nga kapipit-an, basulon nila ang Dios, kag pakamalauton pa gani sia. (Job 1:9-11; 2:​4, 5) Ginapahalipay naton ang tagipusuon ni Jehova kon, paagi sa aton katutom sa iya walay sapayan sang mga kabudlayan, ginapakita naton nga indi ini matuod sa aton bahin.

14. Kon magsalig kita kay Jehova kon ginatilawan, ano nga mga kaayuhan ang matigayon naton?

¹⁴ Kon magsalig kita kay Jehova kon ginatilawan, mapalambo naton ang hamili nga mga kinaiya. Halimbawa, bangod sang mga butang nga gin-antos ni Jesus, “nakatuon sia sang pagkamasinulundon” sa paagi nga wala pa gid niya anay mahibaluan. Makatuon man kita gikan sa aton mga pagtilaw amo nga mapalambo naton ang pagkamainantuson, pagkamabinatason, kag ang tudok nga apresasyon sa matarong nga mga dalanon ni Jehova.​—Hebreo 5:​8, 9; 12:11; Santiago 1:2-4.

15. Samtang mapailubon naton nga ginabatas ang kabudlayan, paano ang iban makabenepisyo?

¹⁵ Makita sang iban ang aton ginahimo. Bangod sang naagihan naton tungod sang aton gugma sa pagkamatarong, maapresyar sa ulihi sang pila sa ila kon sin-o ang matuod nga mga Cristiano karon. Kag paagi sa pagpakig-upod sa aton sa pagsimba, matigayon nila ang mga pagpakamaayo sang kabuhi nga walay katapusan. (Mateo 25:34-36, 40, 46) Luyag ni Jehova kag sang iya Anak nga ang tawo may amo sini nga kahigayunan.

16. Paano ang aton pagtamod sa personal nga kabudlayan naangot sa paghiusa?

¹⁶ Daw ano kaayo kon tamdon naton bisan ang mabudlay nga mga kahimtangan subong mga kahigayunan agod mapakita ang aton debosyon kay Jehova kag makapakigbahin sa pagtuman sang iya kabubut-on! Ang paghimo naton sini makahatag sing pamatuod nga nahiusa gid kita sa Dios kag kay Cristo. Nangamuyo si Jesus kay Jehova para sa tanan nga matuod nga mga Cristiano, nga nagasiling: “Nagapangabay ako, indi lamang tungod sini [ang iya suod nga mga disipulo], kundi tungod man sa mga magatuo sa akon paagi sa ila pulong; agod nga sila tanan mangin isa, subong nga ikaw, Amay, nahiusa sa akon kag ako nahiusa sa imo, agod sila man mahiusa sa aton.”​—Juan 17:​20, 21.

17. Ano ang masaligan naton kon matutom kita kay Jehova?

¹⁷ Kon matutom kita kay Jehova, padyaan niya kita sing bugana. Ang iya Pulong nagasiling: “Magpakalig-on kamo, nga di-mationg, nga madamo pirme sing ginahimo sa hilikuton sang Ginuo, kay nahibaluan ninyo nga ang inyo pagpangabudlay may kaangtanan sa Ginuo indi walay pulos.” (1 Corinto 15:58) Ini man nagasiling: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan.” (Hebreo 6:10) Ang Santiago 5:11 nagasiling: “Yari karon! Ginapahayag naton nga malipayon ang mga nagbatas. Nabatian ninyo ang pagbatas ni Job kag nakita ang resulta nga ginhatag ni Jehova, nga si Jehova tuman ka mapinalanggaon sa paghigugma kag pagkamaluluy-on.” Ano ang resulta para kay Job? “Tuhoy kay Jehova, ginpakamaayo niya ang kaulihian ni Job sing labi pa sangsa iya pamuno.” (Job 42:10-16) Huo, si Jehova “manugpadya sadtong hanuot nga nagapangita sa iya.” (Hebreo 11:6) Kag daw ano nga padya ang mapaabot naton​—kabuhi nga walay katapusan sa paraiso nga duta!

18. Ano ang mahanabo sa ulihi sa masakit nga mga handumanan naton?

¹⁸ Dulaon sang paggahom sang Ginharian sang Dios ang tanan nga halit nga ginhimo sa tawhanon nga pamilya sa nagligad nga linibo ka tuig. Ang kalipay sa sina nga tion magalabaw sa bisan ano nga pag-antos naton karon. Indi kita pagtublagon sang bisan anong malain nga mga handumanan sang nagligad nga pag-antos. Amat-amat nga dulaon sang makapalig-on nga mga panghunahuna kag mga hilikuton sa adlaw-adlaw sang mga tawo sa bag-ong kalibutan ang masakit nga mga handumanan. Si Jehova nagsiling: “Nagatuga ako sing bag-ong mga langit [isa ka bag-ong panguluhan sang langitnon nga Ginharian sa ibabaw sang katawhan] kag bag-ong duta [isa ka matarong nga tawhanon nga katilingban]; kag ang nagligad nga mga butang indi na pagdumdumon, ni mag-utwas pa ini sa tagipusuon. Apang magkasadya kamo, kag magkalipay sing dayon sa akon ginatuga.” Huo, sa bag-ong kalibutan ni Jehova, ang mga matarong makasiling: “Ang bug-os nga duta nagpahuway na, nangin malinong. Ang mga tawo nagsinadya nga may mga singgit sang kalipay.”​—Isaias 14:7; 65:17, 18.

Repaso nga Paghinun-anon

• Samtang ginapahanugutan ang kalautan, paano nagakaigo nga ginpakita ni Jehova ang daku nga pagtahod sa iya ngalan?

• Paano ang pagpahanugot sang Dios sa “mga suludlan sang kaakig” nagpaposible nga makadangat sa aton ang iya kaluoy?

• Ano ang dapat naton panikasugan nga makita sa mga kahimtangan may kaangtanan sa personal nga pag-antos?

[Mga retrato sa pahina 67]

“Ginpakamaayo [ni Jehova] ang kaulihian ni Job sing labi sangsa iya pamuno”