Kapitulo Beinte

Dumduma Gid Pirme ang Adlaw ni Jehova

1. Sang una mo natun-an nga malapit na madula ang mga kasubo sa sining daan nga sistema, ano ang ginbatyag mo?

ANG isa sang una nga mga butang nga natun-an mo sa Biblia amo ang katuyuan ni Jehova nga himuon nga paraiso ang bug-os nga duta. Sa sining bag-o nga kalibutan, ang inaway, krimen, kaimulon, balatian, pag-antos, kag kamatayon madula na. Bisan ang mga patay banhawon. Daw ano ka makalilipay nga palaabuton! Ang pagkalapit sini tanan ginapadaku sang pamatuod nga ang di-kitaon nga presensia ni Cristo subong nagagahom nga Hari nagsugod sang 1914 kag sugod sadto yara na kita sa katapusan nga mga adlaw sining malauton nga kalibutan. Sa hingapusan nga bahin sining katapusan nga mga adlaw, laglagon ni Jehova ining karon nga sistema sang mga butang kag paluntaron ang ginsaad nga bag-ong kalibutan!

2. Ano ang “adlaw ni Jehova”?

² Ginatawag sang Biblia ining nagapakari nga tion sang paglaglag nga “adlaw ni Jehova.” (2 Pedro 3:​10) Ini ang “adlaw sang kaakig ni Jehova” batok sa bug-os nga kalibutan ni Satanas. (Sofonias 2:3) Ang talipuspusan sini amo ang “inaway sang daku nga adlaw sang Dios nga Labing Gamhanan . . . , nga ginatawag sa Hebreo Har–​Magedon [Armagedon],” nga sa sini ang “mga hari sang bug-os napuy-an nga duta” laglagon. (Bugna 16:14, 16) Ginapakita bala sang imo pagkabuhi ang imo pagsalig nga ining “adlaw ni Jehova” malapit na?​—Sofonias 1:​14-​18; Jeremias 25:33.

3. (a) San-o magaabot ang adlaw ni Jehova? (b) Ngaa mapuslanon nga wala ginsugid ni Jehova ang “adlaw ukon oras”?

³ Wala ginasugid sa aton sang Biblia ang eksakto nga petsa sang pagkari ni Jesucristo subong ang Manuglaglag ni Jehova batok sa sistema sang mga butang ni Satanas. “Nahanungod sa sinang adlaw ukon oras wala sing nakahibalo, bisan ang mga anghel sa langit ukon ang Anak, kundi ang Amay,” siling ni Jesus. (Marcos 13:32) Ang sin-o man nga wala gid sing gugma kay Jehova mahimo nga magapaisol sang adlaw ni Jehova kag magamasako sa sekular nga mga paghimud-os. Apang ang tunay nga nagahigugma kay Jehova magaalagad sa iya sing bug-os kalag, walay sapayan kon san-o man mag-abot ang katapusan sining malauton nga sistema.​—Salmo 37:4; 1 Juan 5:3.

4. Ano ang ginsiling ni Jesus subong paandam?

⁴ Sa pagpaandam sa mga nagahigugma kay Jehova, si Jesus nagasiling: “Magpabilin kamo nga nagabantay, magpabilin kamo nga nagamata, kay wala ninyo mahibalui kon san-o ang gintalana nga tion.” (Marcos 13:33-​37) Ginalaygayan niya kita nga indi naton pagtugutan ang pag-inom kag pagkaon ukon ang “mga kabalaka sa kabuhi” nga magkuha sing daku sang aton igtalupangod amo nga malimtan naton ang pagkaserioso sang tion.​—Lucas 21:34-​36; Mateo 24:37-​42.

5. Subong sang ginpaathag ni Pedro, ano ang mahanabo sa adlaw ni Jehova?

⁵ Ginlaygayan man kita ni Pedro nga dumdumon gid pirme “ang presensia sang adlaw ni Jehova, nga paagi sini ang mga langit bangod nga nasunog maupos kag ang mga elemento nga bangod sa sobra nga init matunaw.” Ang tanan nga tawhanon nga panguluhan​—“mga langit”—​laglagon, subong man ang malauton nga tawhanon nga katilingban​—“duta”—​kag ang “mga elemento” sini, ang mga ideya kag mga buluhaton sining malaut nga kalibutan, subong sang panimuot sini nga nahamulag sa Dios kag sang imoral kag materyalistiko nga pagkabuhi sini. Buslan ini sang “bag-ong mga langit [langitnon nga Ginharian sang Dios] kag sang bag-ong duta [bag-ong dutan-on nga katilingban]” nga sa sini “magapuyo ang pagkamatarong.” (2 Pedro 3:​10-13) Ining makalaglag-sa-kalibutan nga mga hitabo magasugod sing hinali kag sa wala ginapaabot nga adlaw kag oras.​—Mateo 24:44.

Mangin Alisto Pirme sa Tanda

6. (a) Tubtob sa ano nga kasangkaron ang sabat ni Jesus sa pamangkot sang iya mga disipulo naaplikar sa katapusan sang Judiyong sistema? (b) Ano nga mga bahin sang sabat ni Jesus ang nagapatalupangod sang mga hitabo kag mga panimuot kutob sang 1914 padayon?

⁶ Bangod sang mga tion nga ginakabuhian naton, dapat naton hibaluon sing maayo ang mga detalye sang kabilugan nga tanda nga nagapakilala sang katapusan nga mga adlaw​—ang “katapusan sang sistema sang mga butang.” Dumduma nga sang ginsabat ni Jesus ang pamangkot sang iya mga disipulo, nga narekord sa Mateo 24:3, ang pila sang ginlaragway niya sa mga bersikulo 4 tubtob 22 may yara diutay nga katumanan sa Judiyong sistema sa ulot sang 33 kag 70 C.E. Apang ang tagna may yara daku nga katumanan sa panag-on sugod sang 1914, ang tion sang “presensia [ni Cristo] kag sang katapusan sang sistema sang mga butang.” Ginasugiran kita sang Mateo 24:23-​28 sang mahanabo kutob sang 70 C.E. tubtob sa tion sang presensia ni Cristo. Ang mga butang nga ginalaragway sa Mateo 24:29–25:46 matabo sa tion sang katapusan.

7. (a) Ngaa dapat kita personal nga mangin alisto kon paano ginatuman sang karon nga mga kahimtangan ang tanda? (b) Sabta ang mga pamangkot sa katapusan sining parapo, nga ginapakita kon paano natuman ang tanda kutob sang 1914.

⁷ Dapat kita personal nga mangin mapanilagon sa mga hitabo kag sa mga panimuot nga nagatuman sang tanda. Ang pag-angot sini nga mga butang sa tagna sang Biblia magabulig sa aton agod dumdumon naton pirme ang adlaw ni Jehova. Magabulig man ini sa aton nga mangin maayo sa pagkumbinsi kon nagapaandam sa iban nga malapit na ina nga adlaw. (Isaias 61:​1, 2) Sa sini nga katuyuan, repasuhon naton ang masunod nga mga pamangkot nga nagapatalupangod sang mga bahin sang tanda, subong narekord sa Mateo 24:7 kag Lucas 21:10, 11.

Sa anong tumalagsahon nga mga paagi natuman ang gintagna nga pagtindog sang ‘pungsod batok sa pungsod kag ginharian batok sa ginharian’ sugod sang 1914? Tuhoy sa mga inaway, ano ang natabo sugod sadto?

Sang 1918, ano nga piste ang nagkutol sing mas madamo nga kabuhi sangsa Bug-os Kalibutan nga Inaway I? Walay sapayan sang ihibalo sang tawo sa medisina, ano nga mga balatian ang nagapatay gihapon sa minilyon?

Sa anong kasangkaron naapektuhan ang duta sang kakulang sing mga pagkaon walay sapayan sang mga pag-uswag sa siensia sang nagligad nga siglo?

Ano ang nagakumbinsi sa imo nga indi ang kinaandan na nga pagkabuhi ang ginalaragway sang 2 Timoteo 3:​1-5, 13, kundi ang malain nga mga kahimtangan nga naggrabe samtang nagahingapos ang katapusan nga mga adlaw?

Pagpainpain sa mga Tawo

8. (a) Subong nga ginlaragway sa Mateo 13:24-​30, 36-​43, sa ano pa gin-angot ni Jesus ang katapusan sang sistema sang mga butang? (b) Ano ang kahulugan sang ilustrasyon ni Jesus?

⁸ May iban pa nga importante nga mga hitabo nga ginaangot si Jesus sa katapusan sang sistema sang mga butang. Ang isa sini amo ang pagpainpain sa “mga anak sang ginharian” gikan sa “mga anak sang isa nga malauton.” Ginpatalupangod ini ni Jesus sa iya parabola tuhoy sa uma sang trigo nga ginsab-ugan sing gamhon sang kaaway. Ang “trigo” sa iya ilustrasyon nagarepresentar sa matuod nga hinaplas nga mga Cristiano. Ang “mga gamhon” amo ang mga nagapangangkon nga mga Cristiano apang napamatud-an nga “mga anak sang isa nga malauton” bangod nagapanguyapot gihapon sila sa kalibutan nga ginagamhan sang Yawa. Ginapain sila gikan sa “mga anak sang ginharian [sang Dios]” kag ginatandaan para sa kalaglagan. (Mateo 13:24-​30, 36-​43) Natabo gid bala ini?

9. (a) Pagkatapos sang Bug-os Kalibutan nga Inaway I, anong daku nga pagpainpain sa tanan nga nagapangangkon nga mga Cristiano ang natabo? (b) Paano ang hinaplas nga mga Cristiano naghatag sing pamatuod nga sila ang matuod nga mga alagad sang Ginharian?

⁹ Pagkatapos sang Bug-os Kalibutan nga Inaway I, ginpainpain ang tanan nga nagapangangkon nga Cristiano sa duha ka klase: (1) Ang mga klero sang Cristiandad kag ang ila mga sumulunod, nga nagsakdag sing mabaskog sa Liga de Nasyones (karon Nasyones Unidas) samtang nagapanguyapot gihapon sing hugot sa ila pungsudnon nga katutom, kag (2) ang matuod nga mga Cristiano sa tapos-gira nga dag-on, nga nagsakdag sing bug-os sa Mesianikong Ginharian sang Dios, indi sa mga pungsod sining kalibutan. (Juan 17:16) Ginpamatud-an nila nga matuod sila nga mga alagad sang Ginharian sang Dios paagi sa pagbantala ‘sining maayong balita sang Ginharian’ sa bug-os nga duta. (Mateo 24:14) Kag ano ang mga resulta?

10. Ano ang nahauna nga resulta sang hilikuton sa pagbantala sing Ginharian?

¹⁰ Una, gintipon ang nagkalabilin sining mga hinaplas sang espiritu sang Dios, nga may paglaum nga mangin kaupod si Cristo subong bahin sang langitnon nga Ginharian. Bisan pa naalaplaag sila sa mga pungsod, nahiusa sila sa organisasyon. Ang pagtapos sa pagpat-in sa sining mga hinaplas malapit na.​—Bugna 7:3, 4.

11. (a) Anong hilikuton sa pagtipon ang nagapadayon, kag nahisanto sa anong tagna? (b) Ano ang kahulugan sang katumanan sining tagna?

¹¹ Nian, sa pagtuytoy ni Cristo, ginsugdan ang pagtipon sa “dakung kadam-an . . . gikan sa tanan nga pungsod kag tribo kag katawhan kag hambal.” Amo ini ang nagahuman sa “iban nga mga karnero” nga makalampuwas sa “dakung kapipit-an” pasulod sa bag-ong kalibutan sang Dios. (Bugna 7:​9, 14; Juan 10:16) Ining hilikuton nga pagbantala sing Ginharian sang Dios sa wala pa mag-abot ang katapusan nagapadayon tubtob sa karon. Sing mainunungon, ang dakung kadam-an sang iban nga mga karnero, nga karon nagadamo sing minilyon, nagabulig sa hinaplas nga nagkalabilin sa pagbantala sa importante gid nga mensahe sang Ginharian. Ini nga mensahe mabatian sa tanan nga pungsod.

Ano ang Mahanabo sa Ulihi?

12. Daw ano pa nga pagpanaksi ang himuon antes mag-abot ang adlaw ni Jehova?

¹² Ang tanan nga pamatuod nagapakita nga yari na kita sa hingapusan nga bahin sang katapusan nga mga adlaw kag nga ang adlaw ni Jehova malapit na. Apang may mga tagna pa bala nga matuman antes sining makakulugmat nga adlaw? Huo. Una, ang pagpainpain sa katawhan may kaangtanan sa Ginharian nga hulusayon wala pa matapos. Sa iban nga mga lugar diin may daku nga pagpamatok sa sulod sang mga tinuig, nagadamo didto karon ang bag-ong mga disipulo. Bisan sa mga duog nga wala ginabaton sang mga tawo ang maayong balita, ang kaluoy ni Jehova ginapakita paagi sa aton pagpanaksi. Gani, padayuna ini nga hilikuton! Ginapasalig kita ni Jesus nga kon matapos na ang hilikuton, magaabot ang katapusan.

13. Subong sang narekord sa 1 Tesalonica 5:​2, 3, anong talalupangdon pa nga hitabo ang mahanabo, kag ano ang kahulugan sini sa aton?

¹³ Ang isa pa ka importante gid nga tagna sang Biblia nagatagna: “Sa tion nga sila magsiling: ‘Paghidait kag kalig-unan!’ nian hinali nga kalaglagan ang magaabot sa ila sa gilayon subong sang kasakit sang pag-anak sang isa ka babayi nga nagadala; kag indi sila nga mas-a makalikaw.” (1 Tesalonica 5:​2, 3) Wala pa mahibaluan kon paano iproklamar ang “paghidait kag kalig-unan.” Apang indi gid ini magakahulugan nga nalubad na sang mga lider sang kalibutan ang mga problema sang katawhan. Ang mga pirme nagadumdom sang adlaw ni Jehova indi mapatalang sini nga proklamasyon. Nahibaluan nila nga pagkatapos gid sini, ang hinali nga kalaglagan magaabot.

14. Ano nga mga hitabo ang mahanabo sa dakung kapipit-an, kag sa ano nga pagpasunod?

¹⁴ Sa pamuno sang dakung kapipit-an, ang mga manuggahom magaliso batok sa Babilonia nga Daku, ang bug-os kalibutan nga emperyo sang butig nga relihion, kag laglagon sia. (Mateo 24:21; Bugna 17:15, 16) Pagkatapos sina, ang mga pungsod magaliso batok sa mga nagasakdag sang pagkasoberano ni Jehova, sa amo mapukaw ang kasingkal ni Jehova batok sa politikal nga mga panguluhan kag sa ila mga sumalakdag, nga magaresulta sa ila bug-os nga kalaglagan. Amo ina ang Armagedon nga talipuspusan sang dakung kapipit-an. Nian, si Satanas kag ang iya mga demonyo itagbong sa kadadalman, sa amo indi na makaimpluwensia sa katawhan. Ini ang magahinakop sang adlaw ni Jehova nga sa amo nga tion ang iya ngalan bayawon.​—Ezequiel 38:18, 22, 23; Bugna 19:11–​20:3.

15. Ngaa indi maalamon nga mangatarungan nga malayo pa ang adlaw ni Jehova?

¹⁵ Ang katapusan sining sistema magaabot sing eksakto sa tion, suno sa iskedyul sang Dios. Indi ini magpalantang. (Habacuc 2:3) Tandai nga ang kalaglagan sang Jerusalem sang 70 C.E. hinali nga nag-abot, sang wala ini ginpaabot sang mga Judiyo, sang naghunahuna sila nga nagligad na ang katalagman. Kag kamusta naman ang dumaan nga Babilonia? Gamhanan ini anay, masinaligon, kag nakutahan sing dalagku nga mga pader. Apang napukan ini sa isa ka gab-i. Gani, ang hinali nga kalaglagan magaabot man sa karon malauton nga sistema. Kon mag-abot ini, kabay nga masapwan kita nga nahiusa sa matuod nga pagsimba, nga ginadumdom gid pirme ang adlaw ni Jehova.

Repaso nga Paghinun-anon

• Ngaa importante nga dumdumon gid pirme ang adlaw ni Jehova? Paano naton ini mahimo?

• Paano kita personal nga naapektuhan sa ginahimo nga pagpainpain sa katawhan?

• Ano pa ang mahanabo antes magsugod ang adlaw ni Jehova? Gani, ano dapat ang personal nga ginahimo naton?

[Mga retrato sa pahina 180, 181]

Sa dili madugay ang katapusan nga mga adlaw matapos paagi sa paglaglag sa sistema ni Satanas