Mga Pamatan-on—Ano ang Himuon Ninyo sa Inyo Kabuhi?

“LUYAG ko matigayon ang pinakamaayo gikan sa akon kabuhi.” Amo ang siling sang isa ka dalagita. Walay duhaduha nga amo man ang luyag mo. Apang paano mo matigayon ang “pinakamaayo” gikan sa kabuhi? Ayhan magasiling ang media kag ang imo mga katubotubo, kag bisan gani ang imo mga manunudlo, nga matigayon mo ini kon madinalag-on ka​—⁠may daku nga suweldo kag maayo nga karera!

Apang, nagapaandam ang Biblia sa mga pamatan-on nga ang paghingamo sa materyal nga kadalag-an isa lamang ka “paglagas sa hangin.” (Manugwali 4:4) Ang isa ka rason amo nga pila lamang ka pamatan-on ang nagamanggaranon kag nagabantog. Kag masami nga nagakapaslawan lamang sila. “Daw kaangay ini sang walay unod nga kahon,” siling sang isa ka pamatan-on nga taga-Britanya nga naghingamo sang isa ka mataas nga karera. “Kon buksan mo ini, wala ikaw sing makita.” Matuod nga bangod sang isa ka trabaho, mahimo kon kaisa nga magmanggaranon ka kag magbantog. Apang indi sini mahatag ang imo “espirituwal nga kinahanglanon.” (Mateo 5:3) Isa pa, ang 1 Juan 2:​17 nagapaandam nga “ang kalibutan nagataliwan.” Bisan pa magmadinalag-on ka sa kalibutan, indi ini magdugay.

Sa amo, ang Manugwali 12:1 nagapalig-on sa mga pamatan-on: “Dumduma ang imo Manunuga samtang bata ka pa.” (Today’s English Version) Huo, ang pinakamaayo nga paagi nga magamit mo ang imo kabuhi amo ang pag-alagad kay Jehova nga Dios. Apang, dapat anay nga mangin kalipikado ka sa pag-alagad sa Dios. Paano mo mahimo ini? Kag ano ang nadalahig sa pag-alagad sa Dios?

Kon Paano Mangin Isa ka Saksi ni Jehova

Una anay, dapat may handum ka nga mag-alagad sa Dios​​—⁠kag ini nga handum indi awtomatiko, bisan pa mga Cristiano ang imo mga ginikanan. Dapat ka magpalambo sing personal nga kaangtanan kay Jehova. “Makabulig ang pangamuyo agod makapalambo ka sing personal nga kaangtanan kay Jehova,” siling sang isa ka dalagita.​​—⁠Salmo 62:⁠8; Santiago 4:8.

Ginapadaku sang Roma 12:2 ang isa pa ka tikang nga dapat mo himuon. Ini nagasiling: ‘Pamatud-i ninyo sa inyo kaugalingon ang maayo kag kalahamut-an kag himpit nga kabubut-on sang Dios.’ Natabo na bala sa imo nga nagaduhaduha ka sa pila ka butang nga gintudlo sa imo? Kon amo, sunda ang laygay sang Biblia, kag ‘pamatud-i sa imo kaugalingon ’ nga matuod ining mga butang! Magpanalawsaw ka. Basaha ang Biblia kag ang mga publikasyon pasad sa Biblia. Apang ang pagtuon tuhoy sa Dios indi lamang paggamit sa imo hunahuna. Pamalandungi ang imo ginabasa agod magtudok ini sa imo malaragwayon nga tagipusuon. Nian, magalambo ang imo gugma sa Dios.​​—⁠Salmo 1:​2, 3.

Masunod, tinguhai nga isugid ang imo natun-an, ayhan sa imo mga kaeskwela. Ang pagbantala sa balay-balay amo ang masunod nga tikang. Ayhan kon kaisa may masumalang ka nga kaeskwela samtang nagabantala ka, kag mahimo nga mahuya ka sa primero. Apang ginapalig-on kita sang Biblia nga ‘indi pag-ikahuya ang maayong balita.’ (Roma 1:16) Nagadala ka sing mensahe sang kabuhi kag paglaum! Ngaa abi mahuya ka?

Kon ang imo mga ginikanan mga Cristiano, mahimo nga nakaupod ka na sa ila sa sining hilikuton. Apang makahimo ka bala sing kapin pa sangsa mag-upod-upod lamang sa ila ukon magpahamtang lamang sing mga magasin kag mga tract? Makapakighambal ka bala nga ginagamit ang Biblia sa pagtudlo sa tagbalay? Kon indi pa, magpabulig ka sa imo mga ginikanan ukon sa isa ka hamtong nga katapo sang kongregasyon. Tinguhai nga makalipikar ikaw subong isa ka di-bawtismado nga manugbantala sing maayong balita!

Sa ulihi, mapahulag ka nga idedikar ang imo kaugalingon​​—⁠nagapanumpa sa Dios nga alagdon mo sia sugod sa sina nga tion. (Roma 12:1) Apang, ang pagdedikar sang imo kaugalingon indi isa ka pribado lamang nga butang. Ginaobligar sang Dios ang tanan nga ‘magpahayag sing dayag para sa kaluwasan.’ (Roma 10:10) Sa tion sang bawtismo, nagahimo ka anay sing berbal nga pagpahayag sang imo pagtuo. Dayon nagapabawtismo ka sa tubig. (Mateo 28:​19, 20) Ang matuod, ang bawtismo isa ka serioso nga tikang. Apang indi mag-isol bangod ginabatyag mo nga basi indi ka makapadayon. Kon magsandig ka sa Dios para sa kusog, hatagan niya ikaw sing “gahom nga labaw sa kinaandan” agod buligan ka nga makatindog sing malig-on.​​—⁠2 Corinto 4:⁠7; 1 Pedro 5:⁠10.

Sa tion sang bawtismo, mangin isa ikaw sa mga Saksi ni Jehova. (Isaias 43:10) Dapat may daku ini nga epekto sa kon paano mo gamiton ang imo kabuhi. Ang pagdedikar nagadalahig sing ‘pagsikway sa imo kaugalingon.’ (Mateo 16:24) Ayhan sikwayon mo ang pila ka personal nga mga tulumuron kag mga ambisyon kag ‘pangitaon anay ang ginharian sang Dios.’ (Mateo 6:33) Sa amo, ang pagdedikar kag pagpabawtismo nagadul-ong sa madamo nga kahigayunan agod mahimo ini. Binagbinagon naton ang pila sini.

Mga Kahigayunan sa Pag-alagad sa Dios Sing Bug-os Tion

● Ang pagpayunir amo ang isa ka kahigayunan. Ang payunir nga manugbantala isa ka huwaran nga bawtismado nga Cristiano nga nagahinguyang sing indi magnubo sa 70 ka oras kada bulan sa pagbantala sing maayong balita. Ang paghinguyang sing dugang nga tion sa latagon magapauswag sang imo kalantip sa pagbantala kag pagpanudlo. Madamo nga payunir ang nakabatyag sing kalipay nga nabuligan nila ang ila mga estudyante sa Biblia nga mangin bawtismado nga mga Saksi. Ano nga sekular nga trabaho ang subong sini ka makakulunyag kag makalilipay?

Ang kalabanan nga payunir nagatrabaho sing part-time agod may inuggasto para sa ila mga kinahanglanon. Madamo ang nagaplano para sa sini nga salabton paagi sa pagtuon sing isa ka trabaho sa eskwelahan ukon gikan sa ila mga ginikanan. Kon sa banta mo kag sang imo mga ginikanan mas maayo nga magpadayon ikaw sa pagtuon pagkagradwar mo sa hayskul, pat-ura nga ang imo motibo, indi ang daku nga suweldo, kundi agod masuportahan mo ang imo ministeryo kag ayhan agod makaalagad ka subong bug-os tion nga ministro.

Apang, indi sa sekular nga trabaho nasentro ang kabuhi sang isa ka payunir kundi sa iya ministeryo​​—⁠ang pagbulig sa iban nga makatigayon sing kabuhi! Ngaa indi himuon nga isa ka personal nga tulumuron ang pagpayunir? Ang pagpayunir masami nga nagadul-ong sa iban pa nga mga pribilehiyo. Halimbawa, ang iban nga mga payunir nagasaylo sa mga duog diin mas kinahanglan ang mga manugbantala sang Ginharian. Ang iban naman nagatuon sing dumuluong nga lenguahe kag nagaalagad sa lokal nga kongregasyon nga nagagamit sing dumuluong nga lenguahe ukon bisan sa iban nga pungsod. Huo, ang pagpayunir isa ka makapaladya nga dalanon sang pagkabuhi!

● Ang pagmisyonero isa pa ka kahigayunan. Sugod sang 1943 ang Watchtower Bible School of Gilead nag-aman sa kalipikado nga mga payunir sing isa ka ekselente nga kurso sa paghanas para sa pagkamisyonero. Ang mga nakagradwar ginpadala subong bug-os tion nga mga manugbantala sa iban nga mga pungsod. Sa madamo sini nga kadutaan, mabudlay ang kahimtangan sang pagkabuhi, gani kinahanglanon gid ang maayong panglawas kag maayong resistensia sa pagmisyonero. Walay sapayan sini, makakulunyag kag makaalayaw ang kabuhi sang mga misyonero.

● Ang Ministerial Training School gintukod agod hanason ang kalipikado nga soltero nga mga gulang kag mga ministeryal nga alagad. Ang maid-id nga walo ka semana nga kurso nagakobre sing mga tema subong sang mga salabton sang mga gulang kag mga ministeryal nga alagad, pag-organisar, kag paghambal sa publiko. Ang iban ginaasayn nga mag-alagad sa ila kaugalingon nga pungsod. Ang iban naman ginapadala sa iban nga pungsod.

● Ang pag-alagad sa Bethel nagadalahig sang pag-alagad subong boluntaryo sa isa sang mga sanga sang mga Saksi ni Jehova. Ang iban nga mga katapo sang pamilya Bethel direkta nga nagaalagad sa pag-imprinta sing mga literatura sa Biblia. Ang iban naman nagasuporta paagi sa pagmentinar sa mga tinukod kag mga kasangkapan ukon pag-atipan sa pisikal nga mga kinahanglanon sang pamilya Bethel. Ang tanan nga hilikuton diri sagrado nga mga pribilehiyo sang pag-alagad kay Jehova. Dugang pa, ang mga nagaalagad sa Bethel nalipay sa paghibalo nga ang bisan ano nga ginahimo nila, nagahatag sing benepisyo sa ila madamo nga kauturan sa bug-os nga kalibutan.

Kon kaisa ang mga utod nga may pinasahi nga mga kalantip ginaagda nga mag-alagad sa Bethel. Apang, ang kalabanan ginahanas pag-abot nila diri. Wala sila nagaalagad sa Bethel para sa materyal nga daug kundi kontento na sila sa ginaaman nga pagkaon, puluy-an, kag diutay nga bulig para sa personal nga kagastuhanan. Ginlaragway sang isa ka pamatan-on nga katapo sang pamilya Bethel ang iya pag-alagad sing subong sini: “Kanami gid diri! Mabudlay ang rutina, apang nakabaton ako sing madamo nga pagpakamaayo sa pag-alagad diri.”

● Ang pag-alagad sa iban nga pungsod nagatugot sa isa nga makapakigbahin sa pagtukod sing mga pasilidad sa mga sanga kag sing mga Kingdom Hall. Ginatawag nga internasyonal nga mga alagad, nagalakbay sila sa iban nga mga pungsod agod magbulig sa pagtukod nga hilikuton. Isa ini ka porma sang sagrado nga pag-alagad, kaanggid sa hilikuton sang mga nagpatindog sang templo ni Solomon. (1 Hari 8:​13-​18) Pareho lang ang mga kahimusan sa pag-atipan sa internasyonal nga mga alagad kag sa pamilya Bethel. Ang pag-alagad sining kauturan sa sini nga sahi sang pagpanghikot para sa kadayawan ni Jehova isa gid ka pribilehiyo!

Alagda si Jehova Sing Bug-os Kalag

Ang pag-alagad kay Jehova amo ang pinakamaayo nga paagi sa paggamit sang imo kabuhi. Ngaa indi mo himuon nga tulumuron ang pag-alagad sa Dios sing bug-os tion? Hambali ang bug-os tion nga pag-alagad upod sa imo mga ginikanan, sa inyo lokal nga mga gulang, kag sa inyo manugtatap sa sirkito. Kon interesado ka sa Ministerial Training School, tambungi ang miting para sa potensial nga mga aplikante nga ginahiwat sa tion sang sirkito nga asambleya.

Matuod, mahimo nga indi tanan makalipikar ukon makaalagad sing bug-os tion. Kon kaisa, bangod sang mga problema sa lawas, pinansial nga mga kahimtangan, kag mga obligasyon sa pamilya, limitado lamang ang mahimo sang isa. Walay sapayan sini, dapat pamatian sang tanan nga dedikado nga Cristiano ang sugo sang Biblia: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Luyag ni Jehova nga himuon mo ang imo labing masarangan suno sa ginatugot sang imo kahimtangan. Gani bisan ano man ang imo kahimtangan, himua ang pag-alagad kay Jehova nga amo ang sentro sang imo kabuhi. Magpahamtang sing realistiko nga teokratikong mga tulumuron. Huo, “dumduma ang imo Manunuga samtang bata ka pa”​​—⁠kag pakamaayuhon ka sing dayon bangod ginhimo mo ini!

Luwas kon tuhay ang ginapakita, ang tanan nga binalikwat sa Biblia naggikan sa New World Translation of the Holy Scriptures.