Dapat Bala Kita Magpahambog?

ANO ang kahulugan sang pagpahambog? Nahibaluan mo bala?⁠— Yari ang isa ka halimbawa. Natilawan mo na bala ang isa ka butang nga indi ka sagad? Ayhan naghampang ka sing football. Ukon ayhan naghampang ka sing marka-una. May nagkadlaw bala sa imo kag nagsiling, “Ha! Ha! Ha! Mas maayo ako sangsa imo”?⁠— Ti, ini nga tawo nagapahambog.

Ano ang mabatyagan mo kon ginahimo ini sang iban? Naluyagan mo bala ini?⁠— Kon amo, ano sa banta mo ang ginabatyag sang iban kon ginapahambog mo ang imo kaugalingon?⁠— Maayo bala nga magsiling ka sa isa ka tawo, “Mas maayo ako sangsa imo”?⁠— Naluyagan bala ni Jehova ang mga tawo nga nagahimo sina?⁠—

Ang Daku nga Manunudlo may nakilal-an nga mga tawo nga pagdumdom nila mas maayo sila sangsa iban. Nagapahambog ukon nagapabugal sila sang ila kaugalingon kag ginatamay nila ang iban. Gani isa ka adlaw gin-istoryahan sila ni Jesus agod ipakita nga sayop gid ang magpahambog. Mamati kita.

Ang sugilanon amo ang tuhoy sa isa ka Fariseo kag sa isa ka manugsukot sing buhis. Ang mga Fariseo relihioso nga mga manunudlo nga nagapangangkon nga mas matarong ukon mas balaan sila sangsa iban. Ang Fariseo sa sugilanon ni Jesus nagkadto sa templo sang Dios sa Jerusalem agod mangamuyo.

Si Jesus nagsiling nga ang isa ka manugsukot sing buhis nagkadto man sa templo agod mangamuyo. Ginakaugtan sang kalabanan nga tawo ang mga manugsukot sing buhis. Nagapati sila nga nagapangdaya ang mga manugsukot sing buhis. Kag matuod gid man nga madamo nga manugsukot sing buhis ang indi bunayag.

Sa templo, ang Fariseo nagpangamuyo sa Dios sing subong sini: ‘O Dios ko, nagapasalamat ako sa imo nga indi ako makasasala kaangay sang iban nga tawo. Wala ako nagapangdaya ukon nagahimo sing malain. Indi ako kaangay sinang manugsukot sing buhis. Isa ako ka matarong nga tawo. Nagapuasa ako sing makaduha kada semana agod may kapin ako nga tion sa pagpamalandong tuhoy sa imo. Kag ginahatag ko sa templo ang ikanapulo sang tanan ko nga kinitaan.’ Ang Fariseo nagdumdom gid nga mas maayo sia sangsa iban, indi bala?⁠— Kag ginsambit man niya ini sa Dios.

Apang ang manugsukot sing buhis indi subong sini. Wala gani sia magtangla sa langit sang nangamuyo sia. Nagtindog lamang sia sa malayo nga nagaduko. Naghinulsol gid ang manugsukot sing buhis sa iya mga sala, kag ginpukpok niya ang iya dughan sa kasubo. Wala niya ginsugiran ang Dios kon daw ano sia kaayo. Sa baylo, sia nangamuyo: ‘O Dios ko, kaluy-⁠i ako nga isa ka makasasala.’

Sa banta mo, sin-o sa sining duha ka tawo ang kalahamut-an sa Dios? Ang Fariseo bala, nga naghunahuna nga sia tuman gid kaayo? Ukon ang manugsukot sing buhis bala, nga naghinulsol sa iya mga sala?⁠—

Si Jesus nagsiling nga ang manugsukot sing buhis amo ang kalahamut-an sa Dios. Ngaa? Nagpaathag si Jesus: ‘Bangod ang tagsa nga nagapakita nga daw mas maayo sia sangsa iban nga tawo paubson. Apang sia nga manubo sa iya kaugalingon nga panulok pataason.’​​—⁠Lucas 18:​9-​14.

Ano nga leksion ang ginatudlo ni Jesus sa iya sugilanon?⁠— Ginatudlo niya nga sayop ang maghunahuna nga mas maayo kita sangsa iban. Mahimo nga magsiling kita nga indi kita amo sini, apang paagi sa aton panghulaghulag, mahimo nga ginapakita naton nga amo sini ang aton ginahunahuna. Nahimo mo na bala ini?⁠— Binagbinaga si apostol Pedro.

Sang ginsilingan ni Jesus ang iya mga apostoles nga sila tanan magabiya sa iya kon dakpon sia, si Pedro nagpahambog: ‘Bisan pa ang tanan magabiya sa imo, indi gid ako magbiya sa imo!’ Apang nagsala si Pedro. Tuman gid ang iya pagsalig sa iya kaugalingon. Ginbayaan niya si Jesus. Apang, nagbalik sia, subong sang matun-an naton sa Kapitulo 30 sini nga libro.​​—⁠Mateo 26:31-​33.

Binagbinagon naton ang isa ka modernong-adlaw nga halimbawa. Ayhan ikaw kag ang imo kabutho ginpamangkot sa eskwelahan. Ano kon mas maabtik ka magsabat? Sa pagkamatuod, malipay ka kon nahibaluan mo ang mga sabat. Apang mainayuhon bala nga ipaanggid mo ang imo kaugalingon sa isa nga indi maabtik sa pagsabat?⁠— Husto bala nga ipakita mo nga mas maayo ka kag ang imo kabutho indi?⁠—

Amo sini ang ginhimo sang Fariseo. Nagpahambog sia nga mas maayo sia sangsa manugsukot sing buhis. Apang ang Daku nga Manunudlo nagsiling nga sayop ang Fariseo. Matuod nga ang isa ka tawo mahimo nga mas maayo mag-obra sangsa iban. Apang wala ini nagakahulugan nga mas maayo gid sia nga tawo.

Gani kon mas madamo kita sing nahibaluan sangsa iban, dapat bala kita magpahambog?⁠— Hunahunaa ini. Kita bala ang naghimo sang aton utok?⁠— Indi, ang Dios amo ang naghatag sing utok sa tagsatagsa sa aton. Kag ang kalabanan sang mga butang nga nahibaluan naton, natun-an man naton sa iban. Mahimo nabasa naton ini sa libro. Ukon ayhan may isa nga nagsugid sini sa aton. Bisan pa kita mismo ang nakalubad sa isa ka problema, paano naton ini nahimo?⁠— Huo, paagi sa paggamit sa utok nga ginhatag sang Dios sa aton.

Kon ang isa nagatinguha gid, ang maayo nga himuon mo amo ang palig-unon sia. Sugiri sia nga naluyagan mo ang iya ginhimo. Ayhan mabuligan mo pa sia nga mapauswag ini. Amo ini ang luyag mo nga himuon sang iban sa imo, indi bala?⁠—

Ang iban nga mga tawo mas makusog sangsa iban. Ano kon mas makusog ka sangsa imo utod nga lalaki ukon utod nga babayi? Rason bala ini nga magpahambog ka?⁠— Indi gid. Ang aton ginakaon amo ang nagapakusog sa aton. Kag ang Dios amo ang nagahatag sing silak sang adlaw kag sing ulan kag sing iban pa nga mga butang agod magtubo ang aton kalan-on, indi bala?⁠— Kon amo, ang Dios ang dapat naton pasalamatan kon nagakusog kita.​​—⁠Binuhatan 14:​16, 17.

Wala sing isa sa aton ang luyag mamati sa isa nga nagapahambog sang iya kaugalingon, indi bala?⁠— Dumdumon naton ang mga tinaga ni Jesus: ‘Ang luyag mo nga himuon sang iban sa imo, himua man sa ila.’ Kon himuon naton ini, indi gid kita mangin kaangay sa Fariseo nga nagpahambog sang iya kaugalingon sa sugilanon nga ginsugid sang Daku nga Manunudlo.​​—⁠Lucas 6:⁠31.

Isa ka bes may nagtawag kay Jesus nga maayo. Nagsiling bala ang Daku nga Manunudlo nga, ‘Huo, maayo ako’?⁠— Wala. Sa baylo, sia nagsiling: “Wala gid sing maayo, luwas sa isa, ang Dios.” (Marcos 10:18) Bisan pa himpit ang Daku nga Manunudlo, wala sia magpabugal sang iya kaugalingon. Sa baylo, ginpatungod niya ang tanan nga pagdayaw sa iya Amay, nga si Jehova.

Gani, may mapabugal bala kita?⁠— Huo, may yara. Mapabugal naton ang aton Manunuga, si Jehova nga Dios. Kon makita naton ang isa ka matahom nga pagtunod sang adlaw ukon ang iban pa nga makatilingala nga gintuga sang Dios, makasiling kita sa iban, ‘Ang aton dalayawon nga Dios, si Jehova, ang naghimo sini!’ Mangin handa kita sa tanan nga tion nga isugid ang nahanungod sa dalagku nga mga butang nga ginhimo ni Jehova kag himuon pa niya sa palaabuton.