Kon Ngaa Indi Kita Dapat Magbinutig

HALIMBAWA nagsiling ang isa ka bata nga babayi sa iya iloy: “Huo, mapauli ako dayon sa tapos sang klase.” Apang wala sia magpauli dayon kundi naghampang pa anay upod sa iya mga abyan kag pagkatapos nagsiling sia sa iya iloy: “Ginhawiran pa ako sang amon manunudlo pagkatapos sang klase.” Husto bala nga isiling ini?⁠—

Ukon ayhan ang isa ka bata nga lalaki nagsiling sa iya amay: “Indi ako ang nagsipa sang bola sa sulod sang balay.” Apang ano kon sia matuod? Sayop bala ang magsiling nga indi sia ang naghimo sini?⁠—

Ginpakita sa aton sang Daku nga Manunudlo ang husto nga himuon. Sia nagsiling: ‘Ang inyo pulong nga Huo magakahulugan sing Huo, kag ang inyo Indi, Indi; kay ang bisan ano nga indi subong sini nagagikan sa isa nga malauton.’ (Mateo 5:37) Ano ang buot silingon ni Jesus sa sini?⁠— Nga dapat naton himuon ang ginasiling naton.

May isa ka sugilanon sa Biblia nga nagapakita kon daw ano ka importante nga isugid ang matuod. Tuhoy ini sa duha ka tawo nga nagsiling nga mga disipulo sila ni Jesus. Tan-awon naton kon ano ang natabo.

Pagligad sang halos duha ka bulan sa tapos napatay si Jesus, madamo nga tawo gikan sa malayo nga mga duog ang nagkadto sa Jerusalem para sa isa ka importante nga piesta sang mga Judiyo nga gintawag Pentecostes. Si apostol Pedro naghatag sing isa ka matahom nga pamulongpulong diin ginsugiran niya ang mga tawo tuhoy kay Jesus, nga ginbanhaw ni Jehova. Amo ini ang una nga tion nga madamo sang nagkadto sa Jerusalem ang nakabati tuhoy kay Jesus. Luyag nila karon nga makahibalo sing dugang pa. Gani, ano ang ginhimo nila?

Nagtener pa sila sangsa ila ginpaabot. Apang pagligad sang pila ka tion, ang iban sa ila naubusan sing kuwarta, kag nagakinahanglan sing bulig agod makabakal sing pagkaon. Luyag sang mga disipulo sa Jerusalem nga buligan ang mga bisita. Gani, madamo sa ila ang nagbaligya sang ila pagkabutang kag gindala ang kuwarta sa mga apostoles ni Jesus. Nian ginhatag sang mga apostoles ang kuwarta sa mga nagakinahanglan sini.

Si Ananias kag ang iya asawa nga si Safira, nga mga katapo sang Cristianong kongregasyon sa Jerusalem, nagbaligya sang ila uma. Wala sila ginsugo nga ibaligya ini. Ila ini desisyon. Apang indi ang gugma sa bag-o nga mga disipulo ni Jesus ang nagpahulag sa ila nga himuon ini. Ang matuod, luyag magpakunokuno ni Ananias kag ni Safira nga maayo sila nga mga tawo. Gani namat-od sila sa pagsiling nga ihatag nila ang kabug-usan nga kuwarta agod ibulig sa iban. Apang ang matuod bahin lamang sini ang ihatag nila. Ano ang masiling mo sa sini?⁠—

Bueno, nakigkita si Ananias sa mga apostoles. Ginhatag niya ang kuwarta sa ila. Sa pagkamatuod, nahibaluan sang Dios nga wala niya ginhatag ang kabug-usan nga kuwarta. Gani ginbuyagyag sang Dios kay apostol Pedro nga nagbinutig si Ananias.

Nian si Pedro nagsiling: ‘Ananias, ngaa gintugutan mo si Satanas nga ipahimo ini sa imo? Ikaw ang tag-iya sang uma. Indi mo kinahanglan nga ibaligya ini. Kag bisan sa tapos mo mabaligya ang uma, ikaw gihapon ang magdesisyon kon anhon mo ang kuwarta. Apang ngaa nagapakunokuno ka nga ginhatag mo ang kabug-usan nga kuwarta samtang bahin lamang sini ang ginhatag mo? Bangod sini nagabinutig ka, indi lamang sa amon, kundi sa Dios.’

Isa ini ka serioso nga butang. Nagbinutig si Ananias! Lain ang iya ginhimo sa iya ginsiling. Nagpakunokuno sia. Ginasugiran kita sang Biblia kon ano ang masunod nga natabo. Ini nagasiling: ‘Sang mabatian ang ginsiling ni Pedro, natumba si Ananias kag napatay.’ Ginpahanabo sang Dios nga mapatay si Ananias! Pagkatapos sini, ang iya bangkay gindala sa guwa kag ginlubong.

Pagligad sang mga tatlo ka oras, nagsulod man si Safira. Wala sia makahibalo kon ano ang natabo sa iya bana. Gani ginpamangkot sia ni Pedro: ‘Ginbaligya bala ninyo nga duha ang uma sa kantidad nga ginhatag ninyo sa amon?’

Si Safira nagsabat: ‘Huo, ginbaligya namon ang uma sa sina lamang nga kantidad.’ Apang binutig ini! Gintago nila ang iban nga kuwarta nga binaligyaan sa uma. Gani ginpahanabo sang Dios nga mapatay man si Safira.​—⁠Binuhatan 5:​1-​11.

Ano ang dapat matun-an naton gikan sa natabo kay Ananias kag kay Safira?⁠— Ginatudluan kita sini nga ang Dios wala maluyag sa mga butigon. Luyag niya nga maghambal kita pirme sing matuod. Apang madamo nga tawo ang nagasiling nga wala sing malain sa pagbinutig. Sa banta mo husto bala sila?⁠— Nahibaluan mo bala nga ang kabangdanan sang tanan nga balatian, kasakit, kag kamatayon sa duta amo ang isa ka pagbinutig?⁠—

Dumduma, ang Yawa nagbinutig sa una nga babayi nga si Eva. Ginsingganan niya si Eva nga indi sia mapatay kon lalison niya ang Dios kag magkaon sing prutas nga siling sang Dios indi niya dapat pagkaunon. Nagpati si Eva sa Yawa kag ginkaon niya ang prutas. Nahaylo man niya si Adan sa pagkaon sini. Gani, nangin makasasala sila, kag ang tanan nila nga mga anak nabun-ag nga mga makasasala. Kag bangod makasasala sila, ang tanan nga mga anak ni Adan nagaantos kag nagakapatay. Paano nagsugod ini tanan nga pag-antos kag kabudlayan?⁠— Paagi sa isa ka binutig.

Amo kon ngaa si Jesus nagsiling nga ang Yawa ‘butigon kag amay sang kabutigan’! Sia ang una nga nagbinutig. Kon ang isa nagabinutig, ginahimo niya ang una nga ginhimo sang Yawa. Dapat naton ini dumdumon kon ginasulay kita nga magbinutig.​—⁠Juan 8:⁠44.

San-o ikaw ginasulay nga magbinutig?⁠— Indi bala kon nakahimo ka sing indi husto?⁠— Bisan pa indi mo paghungdon, mahimo nga makabuka ka sing isa ka butang. Kon pamangkuton ka tuhoy sini, masiling ka bala nga nabuka ini sang imo utod? Ukon mapakunokuno ka bala nga wala ka sing hinalung-ong sa natabo?⁠—

Ano kon dapat mo himuon ang imo homework, apang wala mo matapos? Masiling ka bala nga natapos mo ini, bisan pa wala gali?⁠— Dapat naton dumdumon si Ananias kag si Safira. Wala nila ginsugid ang bug-os nga kamatuoran. Kag ginpakita sang Dios kon daw ano ini kalain paagi sa pagpahanabo nga mapatay sila.

Gani bisan ano man ang himuon naton, ginapalain lamang naton ang kahimtangan kon magbinutig kita, kag indi gani kita dapat maghambal sing hapaw lamang nga kamatuoran. Ang Biblia nagasiling: “Maghambal sing kamatuoran.” Nagasiling man ini: “Indi kamo magbutig sa isa kag isa.” Si Jehova pirme nagahambal sing kamatuoran, kag ginapaabot niya nga amo man ang himuon naton.​—⁠Efeso 4:​25; Colosas 3:9.