Importante Gid Bala ang Imo Ginapatihan?
Sa banta mo, may katuyuan bala ang kabuhi? Ang ebolusyonista nga si William B. Provine nagsiling: “Ang aton natun-an sa ebolusyon may daku nga epekto sa aton, kay nagaimpluwensia ini sa aton pagtamod sa kabuhi.” Ano ang iya konklusion? “Nasapwan ko nga wala sing matuod nga katuyuan ang uniberso ukon ang kabuhi sang tawo.”32
Binagbinaga ang kahulugan sina nga pinamulong. Kon wala sing katuyuan ang kabuhi, nian wala ini sing pulos. Ang kapuslanan lamang sang imo kabuhi amo ang paghimo sing maayo kag ayhan pagpasa sang imo mga kinaiya sa masunod nga henerasyon. Madula ka sing dayon sa tion sang kamatayon. Ang imo utok nga may ikasarang sa paghunahuna, pagpangatarungan, kag pagpamalandong sa katuyuan sang kabuhi, mahimo nga natabuan gid lang.
Indi lamang amo sina. Madamo sang nagapati sa ebolusyon ang nagapangangkon nga wala sing Dios ukon indi sia magpasilabot sa mga tawo. Kon amo sini, ang aton palaabuton nasandig lang sa mga pulitiko, mga maalam, kag mga lider sang relihion. Kon binagbinagon naton ang nagligad nga rekord sini nga sahi sang mga tawo, mahimo nga magapadayon gihapon ang kagamo, pag-ilinaway, kag korapsion nga nagapaantos sa mga tawo. Kon matuod gid man ang ebolusyon, may rason kita sa pagkabuhi suno sa halambalanon nga: “Magkaon kita kag mag-inom, kay buas mapatay kita.”—1 Corinto 15:32.
Sa kabaliskaran, ginatudlo sang Biblia: “Sa [Dios] yara ang tuburan sang kabuhi.” (Salmo 36:9) Ini nga mga pinamulong may daku nga epekto sa aton.
Kon matuod ang ginasiling sang Biblia, may kahulugan gid ang kabuhi. May mahigugmaon nga katuyuan ang aton Manunuga para sa tanan nga gusto magtuman sa iya kabubut-on. (Manugwali 12:13) Ini nga katuyuan nagalakip sang saad nga kabuhi sa isa ka kalibutan nga wala sing kagamo, pag-ilinaway, korapsion, kag bisan kamatayon.—Salmo 37:10, 11; Isaias 25:6-8.
May maayo nga rason ang minilyon ka tawo sa bilog nga duta sa pagpati nga ang pagtuon parte sa Dios kag pagtuman sa iya amo lamang ang nagahatag sing kahulugan sa kabuhi! (Juan 17:3) Ini nga pagpati may mabakod gid nga basihan. Maathag gid ang pamatuod—ang kabuhi gintuga.