LEKSION 6
Ano ang Paglaum sang mga Patay?
1. Ano ang maayong balita parte sa mga patay?
Pag-abot ni Jesus sa Betania nga malapit sa Jerusalem, apat na ka adlaw nga napatay ang iya abyan nga si Lazaro. Nagkadto si Jesus sa lulubngan upod sa mga utod ni Lazaro nga sanday Marta kag Maria. Sang ulihi, nagdugok ang madamo nga tawo. Hunahunaa ang kalipay nanday Marta kag Maria sang ginbanhaw ni Jesus si Lazaro.—Basaha ang Juan 11:21-24, 38-44.
Nahibaluan na ni Marta ang maayong balita parte sa mga patay. Nakahibalo sia nga banhawon ni Jehova ang mga patay agod mabuhi liwat sa duta.—Basaha ang Job 14:14, 15.
2. Ano ang kahimtangan sang mga patay?
Ang Dios nagsiling kay Adan: “Bangod yab-ok ka, sa yab-ok ka man magabalik.”—GENESIS 3:19.
Gintuga ang mga tawo halin sa yab-ok. (Genesis 2:7; 3:19) Indi kita mga espiritu nga nagakabuhi sa undanon nga lawas, gani kon mapatay kita wala sing bahin sa aton nga padayon nga nagakabuhi. Kon mapatay kita, ang aton utok patay man kag ang aton panghunahuna nagakadula. Amo nga sang nabanhaw si Lazaro, wala sia sing nasugid parte sa iya kamatayon, kay ang mga patay wala gid sing nahibaluan.—Basaha ang Salmo 146:4; Manugwali 9:5, 6, 10.
Ginapaantos bala sang Dios ang mga tawo sa kalayo kon mapatay sila? Suno sa Biblia, ang mga patay wala gid sing nahibaluan, gani ang pagpati nga ginapaantos ang mga tawo sa kalayuhon nga impierno maathag nga isa ka butig nga panudlo nga nagapasipala sa Dios. Ang ideya mismo sang pagpaantos sa mga tawo makangilil-ad gid sa iya.—Basaha ang Jeremias 7:31.
Tan-awa ang video nga Ano ang Kahimtangan sang mga Patay?
3. Makaistorya bala sa aton ang mga patay?
Ang mga patay indi makahambal ukon makabati. (Salmo 115:17) Pero may pila ka malaut nga anghel, kag mahimo sila makig-istorya sa mga tawo kag magpakunokuno nga sila ang napatay nga mga tawo. (2 Pedro 2:4) Indi gid gusto ni Jehova nga mamangkot kita sa mga patay.—Basaha ang Deuteronomio 18:10, 11.
4. Sin-o ang banhawon?
Minilyon ka tawo nga napatay ang banhawon kag mabuhi sila liwat sa duta. Bisan ang pila nga wala nakakilala sa Dios nga nakahimo sing malain banhawon man.—Basaha ang Lucas 23:43; Binuhatan 24:15.
Ang mga banhawon makatuon sing kamatuoran parte sa Dios kag magtuo kay Jesus paagi sa pagtuman sa iya. (Bugna 20:11-13) Kon maghimo sila sing maayo, mabuhi sila sing wala katapusan sa duta.—Basaha ang Juan 5:28, 29.
5. Ano ang ginasugid sa aton sang pagkabanhaw parte kay Jehova?
Ginhatagan sang Dios sing paglaum ang mga patay paagi sa pagpadala sang iya Anak agod mapatay para sa aton. Gani ang pagkabanhaw nagasugid sa aton parte sa gugma kag wala tupong nga kaayo ni Jehova. Kon banhawon na ang mga patay, sin-o ang gusto mo gid nga makita?—Basaha ang Juan 3:16; Roma 6:23.