Ano ang Maayong Balita Parte sa Relihion?

1. Ang tanan bala nga relihion maayo?

May sinsero gid nga mga tawo sa tanan nga relihion. Maayo gid nga balita nga nakita sang Dios ini nga mga tawo kag nagaulikid sia sa ila. Pero makapasubo nga gingamit ang relihion sa malain nga katuyuan. (2 Corinto 4:3, 4; 11:13-15) Suno sa mga balita, nadalahig ang pila ka relihion sa terorismo, pagpamatay sang rasa, inaway, kag pag-abuso sa mga kabataan. Nasubuan gid sa sini ang sinsero nga mga tawo nga nagatuo sa Dios!​—Basaha ang Mateo 24:3-5, 11, 12.

Ang matuod nga relihion nagahimaya sa Dios, samtang ang butig nga relihion wala nagapahamuot sa iya. Nagatudlo ini sang mga ideya nga wala sa Biblia, lakip na ang butig nga panudlo parte sa Dios kag sa mga patay. Pero gusto ni Jehova nga mahibaluan sang mga tawo ang kamatuoran parte sa iya.​—Basaha ang Ezequiel 18:4; 1 Timoteo 2:3-5.

2. Ano ang maayong balita parte sa relihion?

Ang Dios indi gid madayaan sang mga relihion nga nagapangangkon nga nagahigugma sa iya pero ang matuod nagahigugma sa kalibutan ni Satanas. (Santiago 4:4) Ang tanan nga butig nga relihion ginapatuhuyan sang Pulong sang Dios nga “Babilonia nga Daku.” Ang Babilonia amo ang dumaan nga siudad diin nagsugod ang butig nga relihion pagkatapos sang Baha sang panahon ni Noe. Sa indi madugay, laglagon sang Dios ang relihion nga nagalimbong kag nagapigos sa mga tawo.​—Basaha ang Bugna 17:1, 2, 5, 16, 17; 18:8.

May maayo pa nga balita. Indi man pagpabay-an ni Jehova ang sinsero nga mga tawo nga ara sa butig nga mga relihion sa bilog nga kalibutan. Ginatipon niya ina nga mga tawo paagi sa pagtudlo sa ila sang kamatuoran.​—Basaha ang Miqueas 4:2, 5.

3. Ano ang dapat himuon sang sinsero nga mga tawo?

Nagaulikid si Jehova sa mga tawo nga nagahimo sang husto kag maayo. Ginapalig-on niya sila nga maggua sa butig nga relihion. Ang mga tawo nga nagahigugma sa Dios handa nga maghimo sing mga pagbag-o agod pahamut-an sia.​—Basaha ang Bugna 18:4.

Sang unang siglo, sang mabatian sang sinsero nga mga tawo ang maayong balita sa mga apostoles, ginbaton nila ini sing malipayon. Natun-an nila kay Jehova ang bag-o nga paagi sang pagkabuhi. Isa ini ka mas malipayon nga kabuhi nga may katuyuan kag paglaum. Maayo sila nga halimbawa sa aton karon bangod ginbaton nila ang maayong balita paagi sa pag-una kay Jehova sa ila kabuhi.​—Basaha ang 1 Tesalonica 1:8, 9; 2:13.

Ginabaton ni Jehova sa iya pamilya sang mga sumilimba ang mga naggua halin sa butig nga relihion. Kon batunon mo ang mahigugmaon nga imbitasyon ni Jehova, mangin abyan ka niya, mangin bahin ka sang bag-o kag mahigugmaon nga pamilya sang mga sumilimba ni Jehova, kag matigayon mo ang kabuhi nga wala sing katapusan.​—Basaha ang Marcos 10:29, 30; 2 Corinto 6:17, 18.

4. Paano paluntaron sang Dios ang kalipay sa bilog nga duta?

Ang palaabuton nga paghukom batok sa butig nga relihion isa ka maayong balita. Magadala ini sing paumpaw sa mga ginapigos sa bilog nga duta. Indi na gid mapatalang kag mabahinbahin sang butig nga relihion ang mga tawo. Ang tanan mahiusa na sa pagsimba sa lamang matuod nga Dios.​—Basaha ang Bugna 18:20, 21; 21:3, 4.