Ngaa May Organisasyon ang Dios?

1. Ngaa gin-organisar sang Dios ang dumaan nga Israel?

Gin-organisar sang Dios ang mga kaliwat sang patriarka nga si Abraham nga mangin isa ka pungsod kag ginhatagan sila sing mga kasuguan. Ini nga pungsod gintawag niya nga “Israel” kag gintugyan sa ila ang matuod nga pagsimba kag ang iya pulong. (Salmo 147:19, 20) Gani ang mga tawo sa tanan nga pungsod makabenepisyo sa Israel.​—Basaha ang Genesis 22:18.

Ginpili sang Dios ang mga Israelinhon nga mangin iya mga saksi. Ang ila kasaysayan nagapakita kon paano nagabenepisyo ang mga tawo sa pagtuman sa mga kasuguan sang Dios. (Deuteronomio 4:6) Gani paagi sa mga Israelinhon, makilala sang iban ang matuod nga Dios.​—Basaha ang Isaias 43:10, 12.

2. Ngaa gin-organisar ang matuod nga mga Cristiano?

Sang ulihi, nadula sang Israel ang pabor ni Jehova, kag gin-islan niya ina nga pungsod sang Cristianong kongregasyon. (Mateo 21:43; 23:37, 38) Sa karon, sa baylo sang mga Israelinhon, ang matuod nga mga Cristiano amo na ang mga saksi ni Jehova.​—Basaha ang Binuhatan 15:14, 17.

Gin-organisar ni Jesus ang iya mga sumulunod nga magbantala kag magtudlo sa mga tawo sa tanan nga pungsod agod mangin mga disipulo. (Mateo 10:7, 11; 24:14; 28:19, 20) Ini nga hilikuton malapit na matapos karon, sa hingapusan sang sistema sang mga butang. Subong pa lang natabo nga ginhiusa ni Jehova sa matuod nga pagsimba ang minilyon halin sa tanan nga pungsod. (Bugna 7:9, 10) Ginaorganisar man ang matuod nga mga Cristiano agod palig-unon kag buligan ang isa kag isa. Sa bilog nga kalibutan, palareho ang ila programa sa pagtuon sa Biblia sa ila mga pagtilipon.​—Basaha ang Hebreo 10:24, 25.

3. Paano nagsugod ang organisasyon sang mga Saksi ni Jehova karon?

Sang dekada 1870, ginpangita liwat sang gamay nga grupo sang mga estudyante sang Biblia ang madugay na nadula nga mga kamatuoran sa Biblia. Nahibaluan nila nga gin-organisar ni Jesus ang Cristianong kongregasyon agod magbantala, gani ginsugdan nila ang pagbantala sang Ginharian sa madamo nga pungsod. Sang 1931, ginbaton nila ang ngalan nga mga Saksi ni Jehova.​—Basaha ang Binuhatan 1:8; 2:1, 4; 5:42.

4. Paano ginaorganisar ang mga Saksi ni Jehova?

Sang unang siglo, ang Cristiano nga mga kongregasyon sa madamo nga lugar nakabenepisyo sa nagadumala nga hubon nga nagpasakop kay Jesus bilang Ulo sang kongregasyon. (Binuhatan 16:4, 5) Sa karon, nakabenepisyo man ang mga Saksi ni Jehova sa bilog nga kalibutan sa Nagadumala nga Hubon sang eksperiensiado nga mga gulang. Ginatatap nila ang mga sanga talatapan sang mga Saksi ni Jehova nga nagabadbad, nagaimprinta, kag nagapanagtag sang mga publikasyon nga ginagamit sa pagtuon sa Biblia sa sobra 600 ka lenguahe. Paagi sini, nagahatag sing pagpalig-on kag panuytoy base sa Kasulatan ang Nagadumala nga Hubon sa sobra 100,000 ka kongregasyon sa bilog nga kalibutan. Sa kada kongregasyon, may kalipikado nga mga lalaki nga nagaalagad bilang mga gulang ukon mga manugtatap. Ginaatipan sini nga mga lalaki sing mahigugmaon ang panong sang Dios.​—Basaha ang 1 Pedro 5:2, 3.

Ang mga Saksi ni Jehova organisado sa pagbantala sang maayong balita kag pagtudlo sa mga tawo agod mangin mga disipulo. Pareho sa mga apostoles, nagabantala man kami sa mga balay. (Binuhatan 20:20) Nagatanyag man kami sing pagtuon sa Biblia sa mga sinsero nga mahigugmaon sa kamatuoran. Pero indi lamang isa ka organisasyon ang mga Saksi ni Jehova. Isa kami ka pamilya nga may mahigugmaon nga Amay. Nagahigugmaanay kami subong mag-ulutod. (2 Tesalonica 1:3) Bangod naorganisar ang katawhan ni Jehova sa pagpahamuot sa Dios kag sa pagbulig sa iban, sila ang pinakamalipayon nga pamilya sa duta.​—Basaha ang Salmo 33:12; Binuhatan 20:35.