Sin-o Gid ang Nagagahom sa Kalibutan?

ANG GINASILING SANG BIBLIA

“Ang bug-os nga kalibutan yara sa gahom sang isa nga malauton.”—1 Juan 5:19, Bag-ong Kalibutan nga Badbad.

“Ang Anak sang Dios nagkari, agod gub-on ang mga binuhatan sang Yawa.”—1 Juan 3:8.

ANO ANG MABULIG SINI SA IMO?

Maintiendihan mo kon ngaa madamo sing problema sa kalibutan.—Bugna 12:12.

May rason ka sa pagpati nga ang aton kalibutan mangin mas maayo pa.—1 Juan 2:17.

MAPATIHAN GID BALA NATON ANG GINASILING SANG BIBLIA?

Huo, ari ang tatlo ka rason:

• Mapukan ang paggahom ni Satanas. Pursigido gid si Jehova nga tapuson ang paggahom ni Satanas sa katawhan. Nagsaad sia nga ‘laglagon niya ang Yawa’ kag dulaon ang tanan nga halit nga nahimo ni Satanas.—Hebreo 2:14.

• Ginpili sang Dios si Jesucristo nga maggahom sa kalibutan. Kabaliskaran gid si Jesus sa mapintas kag sakon nga manuggahom sini nga kalibutan. Parte sa paghari ni Jesus, ang Dios nagsaad: “Kaluy-an niya ang kubos kag ang imol . . . Luwason niya sila sa pagpamigos kag sa pagpamintas.”—Salmo 72:13, 14.

• Ang Dios wala nagabutig. Ang Biblia nagsiling: “Imposible nga magbutig ang Dios.” (Hebreo 6:18) Kon magsaad si Jehova, sigurado gid ini nga matuman! (Isaias 55:10, 11) “Ang manuggahom sini nga kalibutan tabugon.”—Juan 12:31.