Watchtower ONLINE NGA LIBRARY
Watchtower
ONLINE NGA LIBRARY
Hiligaynon
  • BIBLIA
  • PUBLIKASYON
  • MITING
  • kr kap. 12 p. 118-131
  • Gin-organisar sa Pag-alagad sa “Dios sang Paghidait”

Wala ang video nga ginpili mo.

Sorry, may error sa pag-load sang video.

  • Gin-organisar sa Pag-alagad sa “Dios sang Paghidait”
  • Nagagahom ang Ginharian sang Dios!
  • Mga subtitulo
  • Pareho nga Materyal
  • “Itangdo Ko ang Paghidait Subong Imo mga Manugdumala”
  • Kon Paano Ginagiyahan sang Cristo ang Kongregasyon
  • “Mangin mga Halimbawa sa Panong”
  • Kon Paano Ginabantayan sang mga Gulang ang Panong sang Dios Karon
  • Ang Nag-uswag nga Pagdumala Nagapabakod sang Paghiusa sa Katawhan sang Dios
  • Mga Manugtatap nga Nagabantay sa Panong
    Organisado sa Paghimo sang Kabubut-on ni Jehova
  • Mangin Matinumanon sa mga Nagapanguna sa Inyo
    Ang Lalantawan Nagabantala sang Ginharian ni Jehova—1989
  • Mga Manugbantay, Iluga ang Pinakamaayo nga mga Manugbantay
    Ang Lalantawan Nagabantala sang Ginharian ni Jehova—2013
  • Paano Naorganisar ang Kongregasyon?
    Magkabuhi sing Wala Katapusan!—Interactive nga Pagtuon sa Biblia
Mangita sing Iban Pa
Nagagahom ang Ginharian sang Dios!
kr kap. 12 p. 118-131

KAPITULO 12

Gin-organisar sa Pag-alagad sa “Dios sang Paghidait”

POKUS SANG KAPITULO

Amat-amat nga gin-organisar ni Jehova ang iya katawhan

1, 2. Ano ang pagbag-o sa Zion’s Watch Tower sang Enero 1895, kag ano ang reaksion sang mga utod?

SANG nabaton sang makugi nga Estudyante sang Biblia nga si John A. Bohnet ang iya kopya sang Zion’s Watch Tower nga Enero 1895, nanamian gid sia sa iya nakita. Bag-o ang kober sini. May larawan ini sang parola nga nagaiwag sa madulom nga langit sa maunos nga dagat. Ang pahibalo sa magasin parte sa sining bag-o nga desinyo gintig-uluhan nga “Ang Aton Bag-o nga Bayo.”

2 Bangod sini, ginsulatan ni Brother Bohnet si Brother Russell. “Nalipay gid ako sa aton bag-o nga magasin,” siling niya. “Kanami sang hitsura sini.” Ang isa pa ka matutom nga Estudyante sang Biblia nga si John H. Brown nagsulat man parte sa kober: “Makakuha gid ini sing atension. Mabakod gid ang pundasyon sang parola, bisan pa ginahampas ini sang mabaskog nga mga balod.” Ining kober amo ang una nga pagbag-o nga nakita sang aton kauturan sina nga tuig—pero ginsundan pa ini. Sang Nobiembre may natun-an sila nga isa pa ka daku nga pagbag-o. Sa liwat, nagadalahig ini sang maunos nga dagat.

3, 4. Ano nga problema ang ginpatalupangod sa Watch Tower sang Nobiembre 15, 1895, kag anong daku nga pagbag-o ang ginpahibalo?

3 Ang malawig nga artikulo nga ginbalhag sa Watch Tower sang Nobiembre 15, 1895, nagsambit sang problema: May kaangay unos nga kagamo nga nagaguba sa paghidait sang paghiliutod, ukon organisasyon, sang mga Estudyante sang Biblia. Nagakamog pirme ang mga utod kon sin-o dapat ang lider sa lokal nga kongregasyon. Para buligan ang mga utod nga matadlong ining pagpaindisanay, ginpaanggid sang artikulo ang organisasyon sa isa ka barko. Dayon prangka sini nga ginbaton nga ang mga nagapanguna napaslawan sa paghanda sa kaangay barko nga organisasyon sa pag-atubang sa mga unos. Ano ang dapat himuon?

4 Ang artikulo nagsiling nga ginapat-od sang sangkol nga kapitan nga may mga salbabida sa barko kag ang mga tripulante kahibalo sang himuon kon may mag-abot nga unos. Sing kaanggid, dapat man pat-uron sang mga nagapanguna sa organisasyon nga ang tanan nga utod handa sa pag-atubang sa maunos nga mga kahimtangan. Para mahimo ina, ginpahibalo sang artikulo ang daku nga pagbag-o. Ginsugo sini nga sa gilayon, “sa tagsa ka company, dapat magpili sing gulang” nga “‘magadumala’ sa panong.”—Binu. 20:28.

5. (a) Ngaa ang una nga kahimusan parte sa mga gulang suno gid sa tion nga tikang? (b) Ano nga mga pamangkot ang aton binagbinagon?

5 Ining una nga kahimusan parte sa mga gulang suno gid sa tion nga tikang para pabakuron ang kongregasyon. Nakabulig ini sa aton mga kauturan nga makalampuwas sa dalagku nga balod nga tuga sang Bug-os Kalibutan nga Inaway I. Sang masunod nga mga tinuig, may dugang pa nga organisasyonal nga mga pagbag-o nga nakabulig sa katawhan sang Dios nga mas masangkapan sa pag-alagad kay Jehova. Ano nga tagna sang Biblia ang nadalahig sa sini? Anong organisasyonal nga mga pagbag-o ang imo nasaksihan? Paano ka nakabenepisyo sa sini?

“Itangdo Ko ang Paghidait Subong Imo mga Manugdumala”

6, 7. (a) Ano ang kahulugan sang Isaias 60:17? (b) Ano ang ginapakita sang tinaga nga “mga manugdumala” kag “mga manughatag sing buluhaton”?

6 Suno sa nabinagbinag naton sa Kapitulo 9, gintagna ni Isaias nga padamuon ni Jehova ang iya katawhan. (Isa. 60:22) Pero, indi lang ini ang saad ni Jehova. Sa sina man nga tagna, nagsiling sia: “Sa baylo sang saway magadala ako sing bulawan, kag sa baylo sang salsalon magadala ako sing pilak, sa baylo sang kahoy, saway, kag sa baylo sang bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” (Isa. 60:17) Ano ang kahulugan sini nga tagna? Paano ini naaplikar subong?

Ini nga pag-ilis indi pagbag-o halin sa malain pakadto sa maayo, kundi halin sa maayo pakadto sa mas maayo

7 Ang tagna nagasiling nga ang isa ka materyales islan sang lain. Pero talupangda nga ini nga pag-ilis indi pagbag-o halin sa malain pakadto sa maayo, kundi halin sa maayo pakadto sa mas maayo. Ang pag-ilis sang saway pakadto sa bulawan isa ka pag-uswag, amo man sa iban pa nga materyales nga ginsambit. Gani, paagi sa sini nga ilustrasyon, gintagna ni Jehova nga ang kahimtangan sang iya katawhan amat-amat nga magauswag. Ano ang ginapatuhuyan sini nga pag-uswag? Ang mga tinaga nga “mga manugdumala” kag “mga manughatag sing buluhaton,” nagapakita nga may amat-amat nga pag-uswag sa paagi sang pag-atipan kag pag-organisar sa katawhan ni Jehova.

8. (a) Sin-o ang nagpahanabo sa mga pag-uswag nga ginsambit ni Isaias? (b) Paano kita nakabenepisyo sa sining mga pagbag-o? (Tan-awa man ang kahon nga “Mapainubuson nga Ginbaton Niya ang Pagtadlong.”)

8 Sin-o ang nagpahanabo sa sining pag-uswag? Si Jehova nagsiling: “Magadala ako sing bulawan, . . . magadala ako sing pilak, . . . kag itangdo ko ang paghidait.” Gani, ang organisasyonal nga mga pagbag-o sa kongregasyon natabo, indi bangod sa panikasog sang tawo, kundi bangod kay Jehova. Kag sugod sang naggahom si Jesus subong Hari, ginpahanabo ni Jehova ining mga pag-uswag paagi sa iya Anak. Paano kita nakabenepisyo sa sining mga pagbag-o? Ini nga teksto nagsiling man nga ining mga pagbag-o magaresulta sa “paghidait” kag “pagkamatarong.” Samtang ginabaton naton ang panuytoy sang Dios kag nagahimo kita sing mga pagbag-o, may paghidait sa tunga naton. Dayon, ang gugma sa pagkamatarong magapahulag sa aton nga alagaron si Jehova, nga ginalaragway ni apostol Pablo subong “ang Dios sang paghidait.”—Fil. 4:9.

9. Ano ang pundasyon sang pagkaorganisado kag paghiusa sa kongregasyon, kag ngaa?

9 Si Pablo nagsiling man parte kay Jehova: “Ang Dios indi Dios sang kagamo, kundi sang paghidait.” (1. . .Cor. 14:33) Talupangda nga wala ginpatuhay ni Pablo ang kagamo sa pagkaorganisado, kundi sa paghidait. Ngaa? Binagbinaga ini: Ang pagkaorganisado wala pirme nagaresulta sa paghidait. Halimbawa, ang isa ka grupo sang mga soldado mahimo magmartsa sing organisado padulong sa patag-awayan. Pero ang ila organisado nga pag-abante nagaresulta sa inaway, indi sa paghidait. Gani, subong mga Cristiano, gusto naton ini dumdumon: Ang bisan ano nga organisasyon nga wala napasad sa paghidait marumpag gid sa ulihi. Pero kon ang organisasyon napasad sa diosnon nga paghidait nagapadayon ini. Gani nagapasalamat gid kita nga ang aton organisasyon ginagiyahan kag ginapuro sang “Dios nga nagahatag sing paghidait”! (Roma 15:33) Ang paghidait nga halin sa Dios amo ang pundasyon sang pagkaorganisado kag matuod nga paghiusa nga mabatyagan subong sa aton mga kongregasyon sa bilog nga kalibutan.—Sal. 29:11.

10. (a) Ano nga mga pagbag-o ang natabo sa aton organisasyon sang una? (Tan-awa ang kahon nga “Kon Paano Nag-uswag ang Paagi sang Pagdumala.”) (b) Ano nga mga pamangkot ang aton binagbinagon?

10 Ang kahon nga “Kon Paano Nag-uswag ang Paagi sang Pagdumala” nagapakita sang mapuslanon kag organisado nga mga pagbag-o nga natabo sa aton organisasyon sang una. Pero ano nga mga pagbag-o ‘halin sa saway pakadto sa bulawan’ ang ginpahanabo ni Jehova sining karon lang paagi sa aton Hari? Paano ining mga pagbag-o sa pagdumala nagpabakod sang paghidait kag paghiusa sang mga kongregasyon sa bilog nga kalibutan? Paano ini nakabulig sa imo sa pag-alagad sa “Dios sang paghidait”?

Kon Paano Ginagiyahan sang Cristo ang Kongregasyon

11. (a) Ano nga pagbag-o ang resulta sang pag-usisa sa Kasulatan? (b) Ano ang determinado nga himuon sang mga katapo sang nagadumala nga hubon?

11 Halin sang 1964 asta 1971, gindumalahan sang nagadumala nga hubon ang maid-id nga pagtuon sa Biblia para usisaon, upod sa iban pa nga topiko, kon paano nagpanghikot ang unang siglo nga Cristianong kongregasyon.a Ginapakita sa sining pagtuon nga ang mga kongregasyon sadto ginadumalahan sang hubon sang mga gulang kag indi sang isa lang ka gulang, ukon manugtatap. (Basaha ang Filipos 1:1; 1 Timoteo 4:14.) Sang nahangpan nila ining punto, narealisar sang nagadumala nga hubon nga ginagiyahan sila sang ila Hari nga si Jesus, sa paghimo sing mga pagbag-o sa pag-organisar sa katawhan sang Dios—kag determinado gid ang mga katapo sang nagadumala nga hubon nga magpasakop sa direksion sang Hari. Gilayon nila nga ginpatuman sa organisasyon ang kahimusan parte sa mga gulang nga ginapakita sa Kasulatan. Ano ang pila ka pagbag-o nga ginhimo sa temprano sang dekada 1970?

MAPAINUBUSON NGA GINBATON NIYA ANG PAGTADLONG

NALAKIP sa Finnish nga edisyon sang Abril 1, 1916, nga Watch Tower ang sulat ni Brother Russell sa pila ka utod sa Scandinavia, upod na si Brother Kaarlo Harteva. Ginsulatan sila ni Brother Russell: “Ginapalig-on namon kamo, pinalangga nga mga utod, nga magbalik sa kamatuoran kag sa hilikuton sa sini nga panahon.” Ngaa ginhimo ini ni Brother Russell?

Si Kaarlo Harteva

Si Kaarlo Harteva

Si Brother Harteva natawo sang 1882 kag isa sa pinakauna nga Estudyante sang Biblia sa Finland. Nabawtismuhan sia sang Abril 1910, kag sang tig-ilinit sang 1912, gintangdo sia ni Brother Russell sa pagbalhag sang Finnish nga Watch Tower. Maayo ang dalagan sini asta sang Bug-os Kalibutan nga Inaway I. Si Brother Harteva nagsulat sa Disiembre 1, 1914, nga Watch Tower: “Bangod sa problema sa ekonomiya, . . . indi kami makapasalig nga amo gihapon kadamo nga pahina sang Watch Tower ang ibalhag namon sing regular sini nga tuig.” Pero sang 1915, para makatipon sing pundo, naghimo si Brother Harteva sang isa ka kooperatiba nga gintawag Ararat, kag nagbalhag sing magasin nga amo sini ang ngalan.

Samtang nagakonsentrar si Brother Harteva sa iya bag-o nga asosasyon kag bag-o nga magasin, lain nga utod ang nangin editor sang Finnish nga Watch Tower. Ang Ararat nga magasin nagabalhag sing base sa Biblia nga mga artikulo pero may mga topiko man ini parte sa natural nga pagbulong kag sa bag-o gin-imbento nga lenguahe nga Esperanto. Wala magdugay, nadula ang pokus sang mga utod sa maathag nga mga panudlo sang kamatuoran. Bangod sa kabalaka ni Brother Russell sa ila espirituwalidad, ginpangabay niya si Brother Harteva kag ang iban pa nga “magbalik sa kamatuoran.”

Ano ang reaksion ni Brother Harteva? Ginbalhag niya ang sulat ni Brother Russell sa Ararat, pati ang iya sabat. Si Brother Harteva nangayo sing pasaylo, kag nagsiling: “Himuon ko ang akon masarangan para matadlong ini.” Dayon, sa katapusan nga gua sang Ararat, nangayo liwat sing pasaylo si Brother Harteva kag nagdugang pa: “Panikasugan ko na gid nga maghalong sa tanan nga aspekto sang kamatuoran.” Indi kaangay sang pila ka ginboto nga gulang sadto, mapainubuson nga ginbaton ni Kaarlo Harteva ang pagtadlong.

Sang ulihi, gintangdo liwat si Brother Harteva nga editor sang Finnish nga Watch Tower kag branch overseer. Gintungdan niya ini asta sang 1950. Natapos niya ang iya dutan-on nga kabuhi sang 1957 nga matutom kay Jehova kag sa kamatuoran. Huo, ang mga mapainubuson nga nagabaton sang pagtadlong sang ila Hari nga si Jesus, ginapuro kag ginapakamaayo ni Jehova.

12. (a) Ano nga pagbag-o ang ginhimo sa nagadumala nga hubon? (b) Ipaathag kon paano naorganisar subong ang Nagadumala nga Hubon. (Tan-awa ang kahon nga “Kon Paano Ginatatap sang Nagadumala nga Hubon ang mga Intereses sang Ginharian.”)

12 Ang una nga pagbag-o ginpatuman sa nagadumala nga hubon mismo. Sadto, ina nga grupo sang hinaplas nga mga lalaki ginatapuan sang pito lang ka miembro sang board of directors sang Watch Tower Bible and Tract Society of Pennsylvania. Pero sang 1971, ang nagadumala nga hubon ginhimo nga 11 kag wala na gintawag nga board of directors. Ang mga miembro sini nagkabig sang ila kaugalingon nga alalangay kag nagabulosbulos sila sa pag-tsirman kada tuig sing alphabetical order.

13. (a) Ano nga kahimusan ang ginpatuman sa sulod sang 40 ka tuig? (b) Ano ang ginhimo sang Nagadumala nga Hubon sang 1972?

13 Ang masunod nga pagbag-o nag-apektar sa tanan nga kongregasyon. Sa ano nga paagi? Halin sang 1932 asta 1972, isa lang ka utod ang nagadumala sa kongregasyon. Inang utod ginatawag nga service director asta sang 1936. Pero, gin-islan ini sang company servant, dayon nangin congregation servant, kag sang ulihi manugtatap sang kongregasyon. Ining gintangdo nga mga utod makugi nga nagtatap sa espirituwal nga kinahanglanon sang panong. Sa masami, ang manugtatap sang kongregasyon nagahimo sing desisyon nga wala na ginapamangkot ang iban nga alagad sa kongregasyon. Pero sang 1972, ang Nagadumala nga Hubon naghanda sing dalan para sa isa ka daku nga pagbag-o. Ano ang nadalahig sa sini?

14. (a) Anong bag-o nga kahimusan ang ginpatuman sang Oktubre 1, 1972? (b) Paano ginaaplikar sang koordenitor sang hubon sang mga gulang ang laygay sang Filipos 2:3?

14 Sa baylo nga isa lang ka utod ang magadumala, ang iban nga utod nga kalipikado man base sa Kasulatan mahimo na itangdo sing teokratiko para mag-alagad subong Cristianong mga gulang. Magahuman sila sang hubon sang mga gulang nga magadumala sang lokal nga kongregasyon. Ining bag-o nga kahimusan ginpatuman sang Oktubre 1, 1972. Sa karon, ang koordenitor sang hubon sang mga gulang nagatamod sa iya kaugalingon, indi subong ang pinakaimportante nga gulang, kundi subong “kubos.” (Luc. 9:48) Daw ano gid nga pagpakamaayo ining mapainubuson nga mga lalaki sa bug-os kalibutan nga paghiliutod!—Fil. 2:3.

Maathag nga ang aton maalamon nga Hari nag-aman gid sa iya mga sumulunod sing kinahanglanon nga mga manugbantay sa nagakaigo nga tion

15. (a) Ano ang mga benepisyo sa kahimusan nga ang mga kongregasyon may hubon sang mga gulang? (b) Ano ang nagapakita nga ang aton Hari maalamon?

15 Ang kahimusan sa pagtululunga sang salabton sa mga miembro sa hubon sang mga gulang isa gid ka daku nga pag-uswag. Binagbinaga ining tatlo ka benepisyo: Una kag labaw sa tanan, ini nga kahimusan nagabulig sa tanan nga gulang—bisan ano man ka bug-at sang ila salabton sa kongregasyon—nga dumdumon pirme nga si Jesus amo ang Ulo sang kongregasyon. (Efe. 5:23) Ikaduha, subong sang ginasiling sang Hulubaton 11:14: “May kadalag-an kon madamo sing manuglaygay.” Kon ginahinun-anunan sang mga gulang ang espirituwal nga kaayuhan sang kongregasyon kag ginabinagbinag ang panugda sang kada isa, ginabuligan sila nga makadesisyon suno sa mga prinsipio sang Biblia. (Hulu. 27:17) Ginapakamaayo ni Jehova ining mga desisyon, kag nagamadinalag-on ini. Ikatlo, kon mas madamo ang kalipikado nga mga gulang, mapun-an sang organisasyon ang nagadaku nga kinahanglanon para sa mga lalaki nga magadumala kag magatatap sa kongregasyon. (Isa. 60:3-5) Hunahunaa—ang kadamuon sang kongregasyon sa bilog nga kalibutan nagdamo halin sa sobra 27,000 sang 1971 asta sa sobra 113,000 sang 2013! Maathag nga ang aton maalamon nga Hari nag-aman gid sa iya mga sumulunod sing kinahanglanon nga mga manugbantay sa nagakaigo nga tion.—Miq. 5:5.

KON PAANO NAG-USWAG ANG PAAGI SANG PAGDUMALA

  • 1881​—Para makontak nila ang mga Estudyante sang Biblia sa isa ka lugar, ginpangabay ni Brother Russell ang mga nagatipon sing regular nga pahibaluon ang talatapan sang Watch Tower kon diin sila nagatipon.

  • 1895​—Ang tanan nga kongregasyon ginsilingan nga magpili sing utod nga makaalagad subong gulang.

  • 1919​—Sa kada kongregasyon, ang service director ginatangdo sing teokratiko sang sanga talatapan. Nalakip sa iya mga salabton ang pag-organisar sang pagbantala kag pagpalig-on sa iban nga makigbahin sa ministeryo. Ang iban nga gulang wala nagsuportar sa kahimusan nga may service director.

  • 1932​—Gindula ang tuigan nga pagboto sa mga gulang. Sa baylo, ang kongregasyon nagaboto sang komite sang pag-alagad nga ginatapuan sang mga utod nga makugi sa pagbantala kag nagakabuhi sa bag-o nga ngalan nga Mga Saksi ni Jehova. Ang isa sa ila, nga ginaboto sang kongregasyon, ginatangdo sang Sosiedad ukon sanga talatapan nga mangin service director.

  • 1937​—Ang mga utod nga bahin sang daku nga kadam-an puede na mangin katapo sang komite sang pag-alagad upod sa iban nga hinaplas.

  • 1938​—Ginbaton sang kongregasyon ang resolusyon nga ang tanan nga congregation servant itangdo na sing teokratiko. Nag-untat na ang demokratiko nga pagboto sa kongregasyon.

Para sa dugang nga impormasyon parte sa pag-uswag sang pag-organisar, tan-awa ang Jehovah’s Witnesses—Proclaimers of God’s Kingdom, pahina 204-235.

Kongregasyon nga nagahimo sang tuigan nga pagboto sa mga gulang sang dekada 1920

“Nagaboto kami sing gulang paagi sa pagbayaw sang tuo nga kamot. Dayon, may isa ka utod nga nagaisip sang boto.”—Sister Rose Swingle, Chicago, Illinois, U.S.A.

“Mangin mga Halimbawa sa Panong”

16. (a) Ano ang salabton sang mga gulang? (b) Paano gintamod sang mga Estudyante sang Biblia ang laygay ni Jesus nga ‘bantayan ang karnero’?

16 Sang panahon sang mga Estudyante sang Biblia, nahangpan na sang mga gulang nga salabton nila nga buligan ang ila mga masigkatumuluo nga magpabilin nga mga alagad sang Dios. (Basaha ang Galacia 6:10.) Sang 1908, ginbinagbinag sa Watch Tower ang laygay ni Jesus: “Bantayi ang akon magagmay nga mga karnero.” (Juan 21:15-17) Ginsilingan sang artikulo ang mga gulang: “Importante gid nga pabaloran naton sa aton tagipusuon ang sugo sang Agalon parte sa panong, kag kabigon naton nga daku gid nga pribilehiyo nga pakaunon kag atipanon ang mga sumulunod sang Ginuo.” Sang 1925, ginpadaku liwat sang Watch Tower ang importansia sang pag-alagad subong manugbantay paagi sa pagpahanumdom sa mga gulang: “Ang simbahan sang Dios iya ginapanag-iyahan, . . . kag manabat sa iya ang tanan nga may pribilehiyo nga alagaran ang ila kauturan.”

17.Paano ginbuligan ang mga manugtatap nga mangin sangkol nga mga manugbantay?

17 Paano ginbuligan sang organisasyon ang mga gulang nga pauswagon ang ila ikasarang sa pagbantay halin sa ‘salsalon pakadto sa pilak’? Paagi sa paghanas. Sang 1959, ginhiwat ang una nga Kingdom Ministry School para sa mga manugtatap. Sa isa sini ka sesyon, ginbinagbinag ang topiko nga “Paghatag sing Personal nga Atension.” Ang mga utod nga may katungdanan ginpalig-on nga “maghimo sing iskedyul sa pagduaw sa mga manugbantala sa ila puluy-an.” Ginpresentar sa sesyon ang lainlain nga paagi kon paano himuon nga makapalig-on ini nga pagduaw. Sang 1966, ginsugdan ang bag-o nga Kingdom Ministry School. Ginbinagbinag sini ang topiko nga “Importansia sang Pagbantay nga Hilikuton.” Ano ang panguna nga punto sa sini nga sesyon? Ang mga nagapanguna “dapat mag-atipan sing mahigugmaon sa panong sang Dios, pero indi nila dapat pagpabay-an ang kinahanglanon sang ila panimalay kag ang pagministeryo.” Sang nagligad lang nga tinuig, madamo pa nga eskwelahan sang mga gulang ang ginhiwat. Ano ang resulta sining padayon nga paghanas nga gin-aman sang organisasyon ni Jehova? Sa karon, may linibo na ka kalipikado nga mga lalaki nga nagaalagad subong espirituwal nga manugbantay sa Cristianong kongregasyon.

Klase sang Kingdom Ministry School sa Pilipinas sang 1966

Kingdom Ministry School sa Pilipinas sang 1966

18. (a) Anong mabug-at nga salabton ang gintugyan sa mga gulang? (b) Ngaa palangga gid ni Jehova kag ni Jesus ang mapisan nga mga gulang?

18 Ang Cristianong mga gulang gintangdo ni Jehova paagi sa aton Hari nga si Jesus para magtungod sang isa ka mabug-at nga hilikuton. Ano ini? Ang pagtuytoy sa mga karnero sang Dios sa sining pinakamabudlay nga tion sa kasaysayan. (Efe. 4:11, 12; 2 Tim. 3:1) Palangga gid ni Jehova kag ni Jesus ang mapisan nga mga gulang bangod ginatuman sining mga lalaki ang laygay sang Kasulatan: “Bantayi ninyo ang panong sang Dios nga yara sa inyo pag-atipan . . . sing kinabubut-on . . . , sing malangkagon . . . , mangin mga halimbawa sa panong.” (1 Ped. 5:2, 3) Binagbinagon naton ang duha sa madamo nga paagi kon paano ang Cristianong mga manugbantay mga halimbawa sa panong kag makabulig gid sa paghidait kag kalipay sang kongregasyon.

“NAGDAYAW GID KAMI”

ISA ka misyonero nga mag-asawa sa Asia ang gin-asayn sa kongregasyon nga wala gid nagauswag sa madamo nga tinuig. Natalupangdan nila nga ang mga utod didto mahigugmaon pero wala nagasunod sa mga instruksion sang organisasyon. Sang nangin suod na ang mga misyonero sa mga utod, amat-amat nga gintadlong sang misyonero ang mga kahimusan sang kongregasyon suno sa pamaagi sang katawhan ni Jehova sa bug-os nga kalibutan. Ano ang resulta? Sa sulod sang duha lang ka tuig, nagdoble ang nagatambong, nagabantala na ang mga bag-uhan, kag sobra 20 ang nabawtismuhan. “Nagdayaw gid kami,” siling sang mag-asawa. “Sobra gid ang pagpakamaayo ni Jehova sa amon! Ang mga resulta sang pag-aplikar sa mga instruksion sang organisasyon sang Dios naghatag gid sing kalipay sa tanan sa kongregasyon.”

Kon Paano Ginabantayan sang mga Gulang ang Panong sang Dios Karon

19. Ano ang ginabatyag naton kon updan kita sang mga gulang sa ministeryo?

19 Una, ang mga gulang nagapanghikot upod sa mga katapo sang kongregasyon. Si Lucas nagsiling parte kay Jesus: “Naglibot sia sa mga siudad kag mga baryo, nga nagabantala sing maayong balita sang Ginharian sang Dios. Kaupod niya ang 12 ka apostoles.” (Luc. 8:1) Subong nga si Jesus nagbantala upod sa iya mga apostoles, ang huwaran nga mga gulang karon nagapanghikot man upod sa ila masigkatumuluo sa pagbantala. Nahibaluan nila nga paagi sa sini, makabulig sila sa espirituwal nga kapagros sang kongregasyon. Ano ang ginabatyag sang mga miembro sang kongregasyon sa sini nga mga gulang? Si Jeannine, isa ka sister nga sobra 80 anyos nagsiling: “Kon kaupod ko ang gulang sa ministeryo, may kahigayunan ako nga maistorya sia kag makilala pa gid.” Si Steven, nga mga 35 anyos nagsiling: “Kon ginaupdan ako sang gulang sa pagbantala, nabatyagan ko nga gusto niya ako buligan. Nalipay gid ako sa pagbaton sini nga bulig.”

Nakita sang manugbantay ang nadula kag nagaisahanon nga karnero sa isa ka mabagyuhon nga gab-i

Subong sang manugbantay nga nagapangita sang nadula nga karnero, ginapangita man sang mga gulang ang mga napahilayo sa kongregasyon

20, 21. Paano mailog sang mga gulang ang manugbantay sa parabola ni Jesus? Maghatag sing halimbawa. (Tan-awa man ang kahon nga “Maayo nga Resulta sang Semanal nga Pagbisita.”)

20 Ikaduha, ginahanas sang organisasyon ni Jehova ang mga gulang nga kabalak-an ang mga napahilayo sa kongregasyon. (Heb. 12:12) Ngaa dapat buligan sang mga gulang ining mga nagluya sa espirituwal, kag paano nila ini himuon? Makita naton ang sabat sa parabola ni Jesus parte sa manugbantay kag sa nadula nga karnero. (Basaha ang Lucas 15:4-7.) Sang natalupangdan sang manugbantay nga nadula ang isa niya ka karnero, ginpangita niya ini nga daw amo lang ini ang iya karnero. Paano mailog sang Cristianong mga gulang karon ang halimbawa sining manugbantay? Subong nga ginkabig sang manugbantay nga hamili ang nadula nga karnero, nagapabilin man nga hamili sa mga gulang ang mga napahilayo sa kongregasyon. Ginatamod nila ang indibiduwal subong nadula nga karnero kag indi uyang lang sa tion. Isa pa, subong nga ang manugbantay nagdesisyon nga “pangitaon ang isa nga nadula tubtob makita niya ini,” ang mga gulang nagatinguha man nga pangitaon kag buligan ang mga nagluya.

21 Ano ang ginhimo sang manugbantay sa parabola sang nakita niya ang karnero? Ginhakwat niya ini, ‘ginpas-an,’ kag gindala sa panong. Sing kaanggid, ang tinagipusuon nga kabalaka sang gulang mahimo man magpalig-on sa isa nga nagluya sa espirituwal kag magbulig sa iya nga magbalik sa kongregasyon. Amo ini ang natabo kay Victor, isa ka utod sa Africa nga wala na nagpakig-upod sa kongregasyon. Nagsiling sia: “Sa walo ka tuig nga indi ako aktibo, ang mga gulang wala nag-untat sa pagpakig-angot sa akon.” Ano gid ang nagpahulag sa iya? Ginpaathag niya: “Isa ka adlaw, ang gulang nga si John nga klasmeyt ko sa Pioneer Service School, nagduaw sa akon nga dala ang amon mga retrato sa PSS. Ginpahanumdom sini ang makalilipay nga mga tion sang nagaalagad pa ako kay Jehova amo nga ginhandum ko ini liwat.” Wala madugay pagkatapos sang pagduaw ni John, nagbalik si Victor sa kongregasyon. Sa karon, nagaalagad na sia subong payunir. Huo, ang mainulikdon nga Cristianong mga gulang makadugang gid sa aton kalipay.—2 Cor. 1:24.b

Duha ka brother nga nagbisita sing mainabyanon sa isa ka tigulang kag indi aktibo nga brother

MAAYO NGA RESULTA SANG SEMANAL NGA PAGBISITA

BANGOD sa ila handum nga buligan ang nadula nga mga karnero, ginbinagbinag sang mga gulang sa isa ka kongregasyon sa United States kon ano ang ila mahimo. Nakita nila nga mga 30 ka indibiduwal nga tinuig na nga nag-untat sa pag-alagad kay Jehova ang nagaistar gihapon sa teritoryo sang ila kongregasyon. Ang kalabanan sa ila tigulang na.

Si Alfredo, ang isa sa mga gulang, nagkuha sang ila mga ngalan kag ginduaw sila. “Kada Biernes sang aga, nagapanuktok ako sa balay sang isa ka indi aktibo,” siling niya. Kon buksan sia sang indi aktibo, ginaistorya niya ini sing relaks kag ginapakita ang iya kabalaka. Ginasilingan niya ang utod nga wala gid nalipatan sang kongregasyon ang ila maayo nga buhat para sa Ginharian ni Jehova. Si Alfredo nagsiling, “Sang ginsilingan ko ang isa ka tigulang nga indi aktibo kon pila ang iya oras kag napahamtang nga magasin sa katapusan niya nga report sang 1976, naghibi gid ang utod.” Ginabasa man ni Alfredo ang Lucas 15:4-7, 10 sa iya mga ginaduaw, kag dayon ginapamangkot sila, “Ano ang nagakatabo kon magbalik sa kongregasyon ang nadula nga karnero? Si Jehova, si Jesus, kag ang mga anghel, nagakalipay—daw sa ano bala?”

Duha ka tuig na nga ginatinguhaan ni Alfredo nga buligan ang mga indi aktibo. Ano ang resulta sang iya panikasog? Nalipay sia kay duha ka utod ang nabuligan niya nga magpakig-upod liwat sa kongregasyon. Regular na sila karon nga nagatambong kada Domingo. “Sang nagtambong na sila sa Kingdom Hall, ako naman ang naghibi,” siling niya nga nagayuhum. “Bisan pa nagatambong na ining mga indi aktibo,” dugang niya, “ginakadtuan ko gihapon sila kada Biernes kay ginsilingan nila ako nga ginakalangkagan gid nila ang akon semanal nga pagbisita—kag amo man sini ang akon ginabatyag!”

Ang Nag-uswag nga Pagdumala Nagapabakod sang Paghiusa sa Katawhan sang Dios

22. Paano ginapabakod sang pagkamatarong kag paghidait ang paghiusa sang Cristianong kongregasyon? (Tan-awa man ang kahon nga “Nagdayaw Gid Kami.”)

22 Subong sang nabinagbinag naton, gintagna ni Jehova nga ang pagkamatarong kag paghidait padayon nga magauswag sa katawhan sang Dios. (Isa. 60:17) Ini nga mga kinaiya nagapabakod sang paghiusa sa mga kongregasyon. Paano? Parte sa pagkamatarong, ang “Dios isa gid lang nga Jehova.” (Deut. 6:4) Ang iya matarong nga mga talaksan sa mga kongregasyon sa isa ka pungsod indi tuhay sa mga kongregasyon sa iban nga pungsod. Ang iya mga talaksan sang husto kag sala isa lang, kag pareho ini “sa tanan nga kongregasyon sang mga balaan.” (1 Cor. 14:33) Maathag nga magauswag lamang ang kongregasyon kon ginaaplikar sini ang mga talaksan sang Dios. Parte sa paghidait, indi lang gusto sang Hari nga maagom sang kongregasyon ang paghidait kundi mangin “makihidaiton” man sila. (Mat. 5:9) Gani, “tinguhaan naton nga himuon ang mga butang nga nagadala sing paghidait.” Solbaron naton gilayon ang mga indi paghangpanay nga mahimo mag-utwas sa tunga naton. (Roma 14:19) Sa sining paagi, makabulig kita sa paghidait kag paghiusa sang aton kongregasyon.—Isa. 60:18.

23. Subong mga alagad ni Jehova, ano ang ginaagom naton karon?

23 Sang Nobiembre 1895, sang ginpahibalo sang Watch Tower ang una nga kahimusan parte sa mga gulang, ginpabutyag man sang nagadumala nga mga utod ang ila handum. Ano ini? Ginahandum nila kag ginapangamuyo nga ining bag-o nga kahimusan magabulig sa katawhan sang Dios nga “madasig nga mahiusa sa pagtuo.” Kon balikan naton ang mga tinuig, makita naton nga ang amat-amat nga pagbag-o sa pagdumala nga ginpahanabo ni Jehova paagi sa aton Hari nagpabakod gid sa paghiusa sang aton pagsimba. (Sal. 99:4) Subong resulta, ang tanan nga katawhan ni Jehova sa bilog nga kalibutan karon malipayon samtang nagalakat “sa pareho nga espiritu,” nagasunod “sa pareho nga mga tikang,” kag nagaalagad sing “nahiusa” sa “Dios sang paghidait.”—2 Cor. 12:18; basaha ang Sofonias 3:9.

a Ang mga resulta sining maid-id nga pagtuon ginbalhag sa libro nga Aid to Bible Understanding.

b Tan-awa ang artikulo nga “Cristianong mga Gulang—‘Masigkamanugpangabudlay Para sa Aton Kalipay,’” sa Enero 15, 2013, nga Lalantawan.

Daw Ano ka Matuod ang Ginharian sa Imo?

  • Anong organisasyonal nga mga pag-uswag ang ginpahanabo sang Ginharian?

  • Paano ang mga pagbag-o sa pagdumala sang kongregasyon nakabulig sa imo sa pag-alagad sa “Dios sang paghidait”?

  • Ano ang ginhambal ukon ginhimo sang isa ka gulang nga nakadugang sa imo kalipay?

  • Paano ka personal nga makabulig sa paghidait kag paghiusa sang kongregasyon?

Miting sang Nagadumala nga Hubon sang mga Saksi ni Jehova

Wala pa tuo: Gerrit Lösch, Geoffrey Jackson, Samuel Herd, Guy Pierce, Mark Sanderson, David Splane, Anthony Morris III, Stephen Lett

KON PAANO GINATATAP SANG NAGADUMALA NGA HUBON ANG MGA INTERESES SANG GINHARIAN

ANG Nagadumala nga Hubon sang mga Saksi ni Jehova ginahuman sang hinaplas nga mga alagad ni Jehova nga Dios. Bilang grupo, sila ang “matutom kag mainandamon nga ulipon.” Responsibilidad nila ang pag-aman sang espirituwal nga pagkaon, paghatag sing direksion, kag pagpanguna sa pagbantala sang Ginharian sa bilog nga kalibutan.—Mat. 24:14, 45-47.

Ang Nagadumala nga Hubon nagamiting kada semana, sa masami kon Mierkoles. Nagabulig ini sa ila nga magpanghikot sing nahiusa. (Sal. 133:1) Ang mga miembro sang Nagadumala nga Hubon nagaalagad man sa lainlain nga komite. Ang kada komite may kaugalingon nga responsibilidad sa pagtatap sa mga intereses sang Ginharian. Ari ang sumaryo sang ila mga responsibilidad.

  • Mga kauturan nga nagabuligay para maatipan sang Cristianong paghiliutod

    Coordinators’ Committee

    Ang mga utod nga nagaalagad sa sini nga komite amo ang nagatatap sa legal nga mga butang kag nagagamit sang media kon kinahanglanon para mapaathag sing sibu ang aton mga pagtuluuhan. Sila man ang nagapanghikot kon may mga kalamidad, paghingabot, kag iban pa nga emerhensia nga nagaapektar sa paghiliutod sa bisan diin nga bahin sang kalibutan.

  • Mga miembro sang pamilya Bethel nga nagahimo sang ila sarisari nga asaynment

    Personnel Committee

    Ini nga komite ang gintugyanan sa pagdumala sa mga kahimusan para sa pisikal kag espirituwal nga kaayuhan kag kinahanglanon sang mga katapo sang pamilya Bethel sa bilog nga kalibutan. Sila ang nagadumala sa pagpili kag pag-agda sa bag-o nga mga miembro sang pamilya Bethel kag ang nagasabat sa ila mga pamangkot parte sa pag-alagad sa Bethel.

  • Isa ka Bethelite nga nagabulig sa pag-imprinta kag pagpadala sang base sa Bibia nga mga literatura

    Publishing Committee

    Amo ini ang nagadumala sa pag-imprinta kag pagpadala sang mga literatura sang Biblia sa bilog nga kalibutan. Sila man ang nagadumala sang mga imprintahan kag mga propiedad nga ginapanag-iyahan kag ginagamit sang mga korporasyon sang mga Saksi ni Jehova, pati na ang pagpanukod sa bilog nga kalibutan, lakip ang pagpanukod sang mga Kingdom Hall. Ginapat-od nila nga ginagamit sa pinakamaayo nga paagi ang mga ginaamot para sa hilikuton sang Ginharian.

  • Isa ka brother nga nagahanda kag naga-research sa iya lamesa

    Service Committee

    Ang mga utod sa sini nga komite amo ang nagatatap sa tanan nga bahin sang pagbantala kag mga butang nga nagaapektar sa mga kongregasyon, manugbantala, payunir, gulang, nagalakbay nga manugtatap, kag mga misyonero. Sila ang nagadumala sa hilikuton sang mga Hospital Liaison Committee, kag madamo pa nga butang.

  • Isa ka brother nga nagapamulongpulong sa plataporma

    Teaching Committee

    Ini nga komite ang nagatatap sa mga instruksion nga ginaaman sa mga asembleya, kombension, kag mga miting sang kongregasyon. Nagadumala man ini sang Gilead School, School for Kingdom Evangelizers, Pioneer Service School, kag iban pa nga eskwelahan. Ini man nga komite ang nagadumala sa paghanda sang Ang Aton Cristianong Pagkabuhi kag Pagministeryo—Workbook Para sa Miting kag sa paghimo sang mga audio kag video program.

  • Sarisari nga pormat sang publikasyon, lakip ang jw.org nga website

    Writing Committee

    Ang mga utod nga nagaalagad sa sini nga komite amo ang nagadumala sa paghanda sang espirituwal nga pagkaon sa nasulat kag elektroniko nga porma para sa mga masigkatumuluo kag sa publiko. Amo man ini ang nagamentinar sang Web site sang organisasyon kag nagadumala sa pagbadbad nga hilikuton sa bug-os nga duta. Isa pa, ini nga komite amo ang nagasabat sa mga pamangkot parte sa kahulugan sang kasulatan kag mga punto sa aton mga publikasyon.

    Hiligaynon Publications (1980-2025)
    Mag-log Out
    Mag-log In
    • Hiligaynon
    • I-share
    • Mga preference
    • Copyright © 2025 Watch Tower Bible and Tract Society of Pennsylvania
    • Mga Kasugtanan sa Paggamit
    • Privacy Policy
    • Privacy Settings
    • JW.ORG
    • Mag-log In
    I-share