Pagbenepisyo sa Teokratikong Pagpasakop

AGOD mahimo naton sing organisado ang kabubut-on ni Jehova, kinahanglan nga magpasakop kita kay Jehova, ang Soberano sang Uniberso. Ginakilala naton ang pagkaulo sang iya Anak sa Cristianong kongregasyon kag ginasunod man naton ang prinsipio sang pagkaulo sa iban nga bahin sang aton kabuhi. Ang tanan nga nadalahig makabenepisyo sa teokratikong pagpasakop.

² Ang prinsipio sang pagpasakop sa ginpahamtang nga awtoridad ginpakilala sa katawhan sa hardin sang Eden. Ginlakip ini sa sugo sang Dios sa Genesis 1:28 kag 2:16, 17. Ang mga sapat dapat magpasakop sa tawo, kag si Adan kag Eva dapat magpasakop sa kabubut-on kag awtoridad sang Dios. Ang pagtuman sa sini nga awtoridad magaresulta sa paghidait kag kahim-ong. Ang prinsipio sang pagkaulo ginpadaku sang ulihi sa 1 Corinto 11:3. Si apostol Pablo nagsulat: “Luyag ko nga mahibaluan ninyo nga ang Cristo amo ang ulo sang tagsa ka lalaki; ang lalaki amo ang ulo sang babayi; ang Dios amo ang ulo sang Cristo.” Ginapakita sini nga sa sining kabug-usan nga kahimusan, ang tanan magluwas kay Jehova dapat magpasakop sa pagkaulo.

³ Ang kalabanan nga tawo karon wala nagakilala ukon nagasunod sa prinsipio sang pagkaulo. Ngaa? Nagsugod ini sa Eden sang ang mga ginikanan sang katawhan hungod nga wala magpasakop sa soberano nga pagkaulo sang Dios. (Gen. 3:4, 5) Apang, wala nila matigayon ang daku pa nga kahilwayan. Sa baylo, nangin sakop sila sang malauton nga espiritu nga tinuga, si Satanas nga Yawa. Ang una nga pagrebelde naghamulag sang katawhan sa Dios. (Col. 1:21) Subong resulta, ang kalabanan sang katawhan karon yara gihapon sa gahom sang isa nga malauton.—1 Juan 5:19.

⁴ Sang matun-an naton ang kamatuoran sang Pulong sang Dios kag gin-aplikar ini, wala na kita sa impluwensia ni Satanas. Subong dedikado kag bawtismado nga mga Saksi, ginbaton naton si Jehova subong Soberano sang aton kabuhi. Nagaugyon kita kay Hari David, nga nagkilala kay Jehova subong “labaw sa tanan.” (1 Cron. 29:11) Huo, mapainubuson naton nga ginasiling: “Kilalaha ninyo nga si Jehova amo ang Dios. Sia ang naghimo sa aton, kag sia ang nagapanag-iya sa aton. Kita ang iya katawhan kag ang karnero sang iya halalban.” (Sal. 100:3) Ginakilala naton nga gamhanan si Jehova kag takus sang aton bug-os nga pagpasakop, kay gintuga niya ang tanan nga butang. (Bug. 4:11) Subong mga ministro sang matuod nga Dios, ginasunod naton si Jesucristo, nga nagpahamtang sing himpit nga halimbawa sang pagpasakop sa Dios.

⁵ Ano ang natun-an ni Jesus sa mga butang nga gin-antos niya samtang yara sia sa duta? Ang Hebreo 5:8 nagasabat: “Bisan pa anak sia, nakatuon sia sang pagkamatinumanon sa mga butang nga iya gin-antos.” Huo, si Jesus padayon nga nagpasakop sing matutom sa iya Amay sa langit bisan sa mabudlay nga kahimtangan. Dugang pa, si Jesus wala maghimo sing isa ka butang sa iya kaugalingon lamang. Wala sia maghambal sang iya lamang ideya; ukon nagpangita sang iya kaugalingon nga himaya. (Juan 5:19, 30; 6:38; 7:16-18) Sa iya ministeryo, nalipay sia sa paghimo sa kabubut-on sang iya Amay, bisan pa nga nagresulta ini sang pagpamatok kag paghingabot sa iya. (Juan 15:20) Walay sapayan sini, si Jesus nagpasakop sa Dios. “Nagpaubos sia” tubtob sa “kamatayon sa usok sang pag-antos.” Ang resulta sang iya bug-os nga pagpasakop kay Jehova makapaladya sa madamo nga paagi, nga nagresulta sa wala sing katapusan nga kaluwasan sa katawhan, pagbayaw sa iya, kag kahimayaan sa iya Amay.—Fil. 2:5-11; Heb. 5:9.

MGA BAHIN SANG TEOKRATIKONG PAGPASAKOP

⁶ Kon nagapasakop kita sa Dios paagi sa paghimo sang iya kabubut-on, malikawan naton ang madamo nga kabalaka kag kapaslawan nga naeksperiensiahan sang mga wala nagapasakop sa pagkasoberano ni Jehova. Ang aton kaaway, ang Yawa, padayon nga nagaluyong sa pagtukob sa aton. Maluwas kita sa sining malauton kon pamatukan naton sia kag magpaubos sa atubangan ni Jehova paagi sa kinabubut-on nga pagpasakop sa Iya.—Mat. 6:10, 13; 1 Ped. 5:6-9.

⁷ Sa Cristianong kongregasyon, ginakilala naton ang pagkaulo sang Cristo kag ang awtoridad nga ginhatag sini sa “matutom kag mainandamon nga ulipon.” Nagaapektar ini sa aton panimuot kag paggawi sa isa kag isa. Ang pagpasakop sa kahimusan sang Dios sa kongregasyon magapahulag sa aton nga tumanon ang Pulong sang Dios sa tanan nga aspekto sang aton pagsimba. Nagalakip ini sang aton ministeryo, pagtambong kag pagpakigbahin sa mga miting, sang aton kaangtanan sa mga gulang, kag sa aton pagkooperar sa mga kahimusan sang organisasyon.—Mat. 24:45-47; 28:19, 20; Heb. 10:24, 25; 13:7, 17.

⁸ Ang aton pagpasakop sa Dios nagaamot sa paghidait, kalig-unan, kag kahim-ong sang Cristianong kongregasyon. Ang mga kinaiya ni Jehova makita sa iya diosnon nga mga sakop. (1 Cor. 14:33, 40) Ang aton eksperiensia sa organisasyon ni Jehova nagpahulag sa aton agod ipabutyag ang balatyagon nga kaanggid kay Hari David. Pagkatapos makita ang kinatuhayan sang mga alagad ni Jehova kag sang mga malauton, si David malipayon nga nagsiling: “Malipayon ang katawhan nga ang ila Dios amo si Jehova!”—Sal. 144:15.

⁹ Sa kahimusan sang pag-asawahay kag pamilya, “ang lalaki amo ang ulo sang babayi.” Sa amo man nga tion, ang mga lalaki dapat magpasakop sa Cristo, kag ang ulo naman sang Cristo amo ang Dios. (1 Cor. 11:3) Ang mga asawa dapat magpasakop sa ila bana, kag ang mga anak dapat magpasakop sa ila mga ginikanan. (Efe. 5:22-24; 6:1) Magaluntad ang paghidait kon ginasunod sang tagsa ka katapo sang pamilya ang prinsipio tuhoy sa pagkaulo.

¹⁰ Dapat mangin mahigugmaon ang bana subong ulo kaangay sang Cristo. (Efe. 5:25-29) Kon wala niya ginaabusuhan ukon ginapatumbayaan ang iya pagkaulo, ang iya asawa kag kabataan malipay sa pagpasakop sa iya. Katungdanan sang asawa nga mangin kabulig ukon kaupod. (Gen. 2:18) Paagi sa mapinasensiahon nga pagsuportar kag pagtahod sa iya bana, matigayon niya ang kahamuot sang iya bana kag magahatag ini sing kadayawan sa Dios. (1 Ped. 3:1-4) Kon ginasunod sang mga mag-asawa ang laygay sang Biblia tuhoy sa pagkaulo, nagapahamtang sila sing halimbawa para sa ila kabataan tuhoy sa pagpasakop sa Dios.

¹¹ Ang aton pagpasakop sa Dios makaapektar man sa kon paano naton ginatamod ang “mas mataas nga mga awtoridad” nga ‘ginbutang sang Dios sa ila nagkalainlain nga palangakuan.’ (Roma 13:1-7) Subong masinulundon sa kasuguan nga mga banwahanon, ang mga Cristiano nagabayad sing buhis. Ginahatag nila “sa Cesar ang mga butang nga iya sang Cesar, apang sa Dios ang mga butang nga iya sang Dios.” (Mat. 22:21) Dugang pa, ang mga kahimusan sa pagkobre sang teritoryo nagasunod sa naaplikar nga data protection laws ukon sa mga kasuguan sa pagkuha kag paggamit sang personal nga mga impormasyon. Bangod nagapasakop kita kag nagatuman sa tanan nga ginpahamtang nga awtoridad nga wala nagasupak sa matarong nga mga kasuguan ni Jehova, mapatuhoy naton ang aton panikasog kag magamit ang aton kusog sa importante nga hilikuton nga pagbantala.—Mar. 13:10; Binu. 5:29.

¹² Ang teokratikong pagpasakop makaapektar sa tanan nga aspekto sang kabuhi. Paagi sa mata sang pagtuo, makita naton ang adlaw nga ang tanan nga katawhan magapasakop kay Jehova nga Dios. (1 Cor. 15:27, 28) Pakamaayuhon gid kag kahamut-an ang mga malipayon nga nagakilala sa pagkasoberano ni Jehova, samtang nagapabilin sila nga nagapasakop sa iya sa wala sing katubtuban!