Isa ka Nahiusa nga Paghiliutod

SI Jehova nga Dios nagapakig-angot sa pungsod sang Israel subong iya katawhan sa halos 1,500 ka tuig. Pagkatapos sini ‘ginbaton na sang Dios ang indi mga Judiyo, agod makapili sia halin sa ila sang katawhan nga tawgon sa iya ngalan.’ (Binu. 15:14) Ang katawhan nga nagadala sang ngalan ni Jehova mangin mga saksi niya, nga nahiusa sa hunahuna kag buhat bisan diin man sila nagapuyo sa duta. Ini nga paghiusa sang katawhan para sa ngalan sang Dios amo ang katumanan sang ginsugo ni Jesus sa iya mga sumulunod: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo.”—Mat. 28:19, 20.

² Paagi sa pagdedikar sang imo kaugalingon kay Jehova kag pagpabawtismo, nangin disipulo ka ni Jesucristo. Bahin ka sang nahiusa kag bug-os kalibutan nga paghiliutod sang mga Cristiano, nga wala nagatugot nga mabahinbahin bangod sang kinatuhayan sa pungsod, tribo, ukon tindog sa pangabuhi. (Sal. 133:1) Subong resulta, ginahigugma mo kag ginatahod ang imo Cristiano nga kaupdanan sa kongregasyon. Ang pila sa ila posible nga tuhay sing rasa, nasyonalidad, ukon tinun-an kag mahimo nga wala mo sadto maluyagan bangod sini nga kinatuhayan. May utudnon ka nga gugma nga mas mabakod pa sangsa bisan ano nga relasyon, sa katilingban man, sa relihion, ukon sa pamilya.—Mar. 10:29, 30; Col. 3:14; 1 Ped. 1:22.

MGA PAGBAG-O SA PANGHUNAHUNA

³ Kon ang iban nabudlayan sa paglandas sang ila sayop nga opinyon tuhoy sa rasa, pulitika, katilingban, ukon iban pa, mahimo nila dumdumon ang Judiyo nga mga Cristiano sadto, nga naglandas sang ila negatibo nga pagtamod sa relihion sang mga tawo nga naghalin sa iban nga pungsod. Sang ginsugo si Pedro nga magkadto sa puluy-an sang Romano nga senturion nga si Cornelio, mainayuhon nga ginhanda ni Jehova si Pedro sa sini nga asaynment.—Binuhatan, kapitulo 10.

⁴ Sa isa ka palanan-awon, si Pedro ginsugo nga mag-ihaw kag magkaon sing mga sapat nga sa kasuguan sang mga Judiyo indi matinlo. Sang namatok si Pedro, ang tingog halin sa langit nagsiling sa iya: “Indi na pagtawga nga nadagtaan ang mga butang nga natinluan na sang Dios.” (Binu. 10:15) Ini nga pagpasilabot sang Dios kinahanglan agod mahanda ni Pedro ang iya panghunahuna sa asaynment nga batunon niya, nga amo ang pagduaw sa isa ka tawo sang mga pungsod. Sang ginatuman niya ang sugo ni Jehova, si Pedro nagsiling sa mga nagtipon: “Nahibaluan gid ninyo nga indi tugot sa kasuguan sang mga Judiyo nga makig-upod ukon magpalapit ang isa ka Judiyo sa isa ka tawo nga tuhay sing rasa, apang ginpakita sa akon sang Dios nga indi ko dapat kabigon nga nadagtaan ukon indi matinlo ang bisan sin-o nga tawo. Gani wala gid ako magpamatok sang ginpatawag ninyo ako nga magkadto diri.” (Binu. 10:28, 29) Pagkatapos sini, nasaksihan ni Pedro ang pamatuod sang kahamuot ni Jehova kay Cornelio kag sa iya panimalay.

⁵ Si Saulo sang Tarsus, nga isa ka Fariseo nga may mataas sing tinun-an, dapat magpaubos kag makig-upod sa mga indi niya anay luyag pakig-updan. Kinahanglan pa gani niya magbaton sing panuytoy halin sa ila. (Binu. 4:13; Gal. 1:13-20; Fil. 3:4-11) Mahanduraw naton ang mga pagbag-o nga natabo sa panghunahuna sang mga tawo kaangay nanday Sergio Paulo, Dionisio, Damaris, Filemon, Onesimo, kag iban pa sang ginbaton nila ang maayong balita kag nangin mga disipulo ni Jesucristo.—Binu. 13:6-12; 17:22, 33, 34; Filem. 8-20.

PAGHUPOT SANG ATON INTERNASYONAL NGA PAGHIUSA

⁶ Wala sing duhaduha nga ang gugma sang kauturan sa inyo kongregasyon nagbulig sa imo nga maganyat kay Jehova kag sa iya organisasyon. Nakita mo ang maathag nga tanda sang gugma nga nagapakilala sa matuod nga mga disipulo ni Jesucristo, subong sang ginsiling niya: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Kag labi pa gid nga naapresyar mo si Jehova kag ang iya organisasyon sang marealisar mo nga ang gugma sa inyo kongregasyon isa lamang ka halimbawa sang gugma nga nagaluntad sa bug-os kalibutan nga paghiliutod. Naeksperiensiahan mo ang katumanan sang tagna sang Biblia tuhoy sa pagtipon sa mga tawo sa katapusan nga mga adlaw agod simbahon si Jehova nga may paghidait kag paghiusa.—Miq. 4:1-5.

⁷ Bangod sang madamo nga rason nga nagapabahinbahin sa karon, sin-o ang magahunahuna nga posible mahiusa ang mga tawo halin “sa tanan nga pungsod kag tribo kag katawhan kag hambal”? (Bug. 7:9) Binagbinaga ang kinatuhayan sang mga tawo sa katilingban nga may abanse nga teknolohiya kag sang mga may kinaraan nga kustombre sang tribo. Binagbinaga ang mga inaway sa relihion sa tunga sang mga tawo nga pareho sing rasa kag pungsod. Sa paglapnag sang nasyonalismo, ang mga tawo labi pa karon nga nabahinbahin sa pulitika. Kag kon binagbinagon mo ang daku nga kinatuhayan sa pangabuhi kag ang madamo pa nga nagapabahinbahin nga rason, ang paghiusa sa mga indibiduwal halin sa tanan nga pungsod, lenguahe, grupo, kag klase sa indi mabugto nga higot sang gugma kag paghidait isa ka milagro nga mahimo lamang sang Labing Gamhanan nga Dios.—Zac. 4:6.

⁸ Apang ini nga paghiusa matuod gid, kag sang nangin dedikado ka kag bawtismado nga Saksi ni Jehova, nangin bahin ka sini. Karon nga nagabenepisyo ka na sa sini nga paghiusa, may katungdanan ka nga huptan ini. Mahimo ini paagi sa pagsunod sa ginasiling ni apostol Pablo sa Galacia 6:10: “Samtang may kahigayunan kita, himuon naton ang maayo sa tanan, ilabi na sa aton mga masigkatumuluo.” Ginasunod man naton ini nga laygay: “Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo, samtang ginapangita ninyo indi lamang ang inyo personal nga kaayuhan, kundi ang iya man sang iban.” (Fil. 2:3, 4) Mientras ginahanas naton ang aton kaugalingon nga tamdon ang aton kauturan subong sang pagtamod ni Jehova sa ila kag indi suno sa kon ano sila sa gua, padayon naton nga matigayon ang mahidaiton kag malipayon nga kaangtanan sa ila.—Efe. 4:23,24.

PAGKABALAKA SA ISA KAG ISA

⁹ Subong sang nagakaigo nga pag-ilustrar ni apostol Pablo sa aton, ang tanan nga yara sa kongregasyon wala nabahinbahin kundi nagakabalaka sa isa kag isa. (1 Cor. 12:14-26) Mahimo nga malayo kita sa aton kauturan sa bilog nga kalibutan, apang nagakabalaka gihapon kita sa ila kaayuhan. Kon ang pila naton ka kauturan ginahingabot, tanan kita nagakalisod gid. Kon ang iban nagakinahanglan ukon nangin biktima sang kalamidad ukon inaway ukon kinagamo-sibil, ang tanan nga kauturan nagapangita gid sing mga paagi sa pagbulig sa espirituwal kag sa materyal.—2 Cor. 1:8-11.

¹⁰ Dapat naton tanan ipangamuyo ang aton kauturan kada adlaw. Ang iban ginasulay sa paghimo sing malain. May mga nagaantos nga ayhan nahibaluan sang tanan. Ang iban naman ginapamatukan sang mga kaupod sa trabaho kag sang nabahinbahin nga panimalay nga mahimo wala naton mahibaluan. (Mat. 10:35, 36; 1 Tes. 2:14) Ginakabalak-an naton ini tanan bangod bahin kita sang bug-os kalibutan nga paghiliutod. (1 Ped. 5:9) Lakip sa aton ang mga nagapangabudlay sa pag-alagad kay Jehova, nga nagapanguna sa pagbantala nga hilikuton kag sa mga kongregasyon. Yara man ang mga may katungdanan sa pagdumala sang hilikuton sa bug-os nga kalibutan. Ang tanan nagakinahanglan sang aton mga pangamuyo, kay paagi sini ginapakita naton ang aton gugma kag matuod nga interes sa ila, bisan pa nga mahimo wala kita sing personal nga mabulig sa ila.—Efe. 1:16; 1 Tes. 1:2, 3; 5:25.

¹¹ Bangod sang tanan nga kagamo sa duta sa sining katapusan nga mga adlaw, ang katawhan ni Jehova dapat mangin handa sa pagbulig sa isa kag isa. Kon kaisa, bangod sang mga kalamidad kaangay sang linog kag baha, nagakinahanglan sang paghimo sing daku nga panikasog kag kahimusan agod makahatag sing materyal nga bulig. Ang unang siglo nga mga Cristiano nagpahamtang sing maayo nga halimbawa sa sini. Sa pagdumdom sa laygay ni Jesus, ang mga disipulo sa Antioquia malipayon nga nagpadala sing materyal nga mga dulot sa kauturan sa Judea sang may tiggulutom. (Binu. 11:27-30; 20:35) Si apostol Pablo nag-organisar sing hilikuton sa pagbulig agod ang tanan mahimo sing mahim-ong. (2 Cor. 9:1-15) Sa karon, kon ang aton kauturan ginabudlayan kag nagakinahanglan sing materyal nga bulig, ang organisasyon kag indibiduwal nga Cristiano nagabulig gilayon kag nagahatag kon ano ang kinahanglanon.

NAPAIN SA PAGHIMO SANG KABUBUT-ON NI JEHOVA

¹² Ang aton nahiusa kag bug-os kalibutan nga paghiliutod naorganisar sa paghimo sang kabubut-on ni Jehova. Sa sini nga tion, kabubut-on niya nga ang maayong balita sang Ginharian ibantala sa bug-os nga duta subong panaksi sa tanan nga pungsod. (Mat. 24:14) Samtang ginahimo naton ini, kabubut-on ni Jehova nga pirme kita maggawi nahisanto sa iya mataas nga mga talaksan sa moral. (1 Ped. 1:14-16) Tanan kita dapat mangin handa sa pagpasakop sa isa kag isa kag sa pagpalapnag sang maayong balita. (Efe. 5:21) Indi ini ang tion sa pagpangita sang aton personal nga interes, kundi para unahon ang Ginharian sang Dios sa aton kabuhi. (Mat. 6:33) Ang pagdumdom sa sini samtang nagapanghikot nga nahiusa tungod sa maayong balita makapahalipay gid karon kag magadul-ong sa wala sing katapusan nga mga pagpakamaayo.

¹³ Subong mga Saksi ni Jehova, pinasahi gid kita, napain kita sa iban subong matinlo nga katawhan, nga makugi nga nagaalagad sa aton Dios. (Tito 2:14) Ang aton pagsimba kay Jehova amo ang naghimo sa aton nga tuhay. Wala lamang kita nagapanghikot upod sa aton kauturan sa bug-os nga duta kundi nagahambal man kita sang isa ka lenguahe sang kamatuoran kag nagapanghikot sing nahisanto sa kamatuoran nga ginahambal naton. Gintagna ini ni Jehova paagi sa iya manalagna nga si Sofonias: “Tudluan ko ang tanan nga katawhan nga maghambal sing putli nga lenguahe, agod nga sila tanan magtawag sa ngalan ni Jehova, kag magsimba sa iya sing nahiusa.”—Sof. 3:9.

¹⁴ Dayon gin-inspirar ni Jehova si Sofonias agod ilaragway ang bug-os kalibutan nga paghiliutod nga nangin matuod karon: “Ang mga nabilin sa Israel indi maghimo sing malain; indi sila magbutig ukon maghambal sing malimbungon; magakaon sila kag magahigda, kag wala sing magapahadlok sa ila.” (Sof. 3:13) Bangod nahangpan naton ang Pulong sang kamatuoran ni Jehova kag ginbag-o naton ang aton hunahuna kag ginpahisanto ang aton paggawi sa mga talaksan ni Jehova, nakapanghikot kita sing nahiusa. Nahimo naton ang mga butang nga daw imposible sa pagtamod sang tawo. Huo, pinasahi gid kita nga katawhan, ang katawhan sang Dios, nga nagapadungog sa iya sa bug-os nga duta.—Miq. 2:12.