Sin-o ang Dios?

1, 2. Ano ang pirme ginapamangkot sang mga tawo?

MADAMO gid sing pamangkot ang mga bata. Bisan ginapaathag mo na sa ila, nagapamangkot sila gihapon sing, ‘Ngaa?’ Kag kon masabat mo na sila, mamangkot pa gid sila, ‘Pero ngaa?’

² Bata man kita ukon may edad na, may mga pamangkot gid kita. Mahimo mamangkot kita kon ano ang aton kaunon, suksukon, ukon baklon. Ukon basi may mga pamangkot man kita parte sa kabuhi kag sa palaabuton. Pero kon indi naton makita ang insakto nga mga sabat sa sini, mahimo nagauntat na kita sa pagpangita sing mga sabat.

3. Ngaa madamo ang nagapensar nga indi nila makita ang sabat sa ila importante nga mga pamangkot?

³ May sabat bala ang Biblia sa aton importante nga mga pamangkot? Para sa iban may ara, pero pamatyag nila kabudlay intiendihon sang Biblia. Nagapamensar sila nga ang mga manunudlo lang kag mga pari ang makahatag sing sabat. Kag ang iban naman nahuya mag-ako nga wala sila nakahibalo sang sabat. Ano sa banta mo?

4, 5. Ano ang importante mo nga mga pamangkot? Ngaa dapat mo pangitaon ang mga sabat?

⁴ Mahimo gusto mo masabat ang mga pamangkot, pareho sang: Ano ang katuyuan sang akon kabuhi? Ano ang matabo sa akon kon mapatay ako? Ano nga klase sang persona ang Dios? Si Jesus nga kilala nga Manunudlo nagsiling: “Padayon kamo sa pagpangayo, kag kamo pagahatagan; padayon kamo sa pagpangita, kag kamo makakita; padayon kamo sa pagpanuktok, kag kamo pagabuksan.” (Mateo 7:7) Indi mag-untat asta makita mo ang masaligan nga mga sabat.

⁵ Huo, kon ‘magpadayon ka sa pagpangita,’ makita mo ang mga sabat sa Biblia. (Hulubaton 2:1-5) Indi ini mabudlay intiendihon. Makahatag ini sa imo sing malipayon nga kabuhi subong kag maayo nga paglaum sa palaabuton. Istoryahan naton ang isa ka pamangkot nga ginapaligban gid sang madamo.

NAGAULIKID BALA ANG DIOS SA ATON UKON MAPINTAS SIA?

6. Ngaa madamo ang nagabatyag nga wala nagaulikid ang Dios sa ila pag-antos?

⁶ Para sa madamo, wala nagaulikid ang Dios sa aton. Kay pamatyag nila indi tani amo sini ang kalibutan kon nagaulikid sia. Bisan diin lang may mga inaway, pagdinumtanay, kag grabe nga kasubo. Nagamasakit ang mga tawo, nagaantos, kag nagakapatay. Ang iban nagapamensar, ‘Kon nagaulikid ang Dios sa aton, ngaa wala niya gindula ang tanan nga pag-antos?’

7. (a) Paano ginatudluan sang mga lider sang relihion ang mga tawo nga mapintas ang Dios? (b) Ngaa sigurado kita nga indi ang Dios ang balasulon sa malain nga nagakatabo?

⁷ Kon kaisa, ginatudluan sang mga lider sang relihion ang mga tawo nga mapintas ang Dios. Kon may malain nga matabo, nagasiling sila nga pagbuot ini sang Dios, nga amo ini ang gusto niya. Daw pareho lang nga ginabasol nila ang Dios. Pero ginatudluan kita sang Biblia nga ang Dios wala gid nagahimo sang malain. Ang Santiago 1:13 nagasiling nga ang Dios wala nagatilaw paagi sa malain nga mga butang. Nagasiling ini: “Kon ang isa yara sa pagtilaw, indi sia magsiling: ‘Ginatilawan [ukon, ginatestingan] ako sang Dios.’ Kay ang Dios indi matilawan paagi sa malaut [ukon, malain] nga mga butang kag wala man sia nagatilaw sa kay bisan sin-o.” Buot silingon, bisan wala ginpunggan sang Dios ang malain nga hitabo, indi sia ang naghimo sini. (Basaha ang Job 34:10-12.) Binagbinagon naton ang isa ka halimbawa.

8, 9. Ngaa sala nga basulon ang Dios sa aton mga problema? Maghatag sing halimbawa.

⁸ Imadyina nga may isa ka soltero nga ara pa sa poder sang iya mga ginikanan. Palangga gid sia sang iya amay kag gintudluan sia kon paano maghimo sing maayo nga mga desisyon. Sang ulihi, nagrebelde sia sa iya amay kag naglayas. Naghimo sia sing malain kag pirme lang nagaentra sa gamo. Basulon mo bala ang amay sa natabo kay wala niya ginpunggan ang iya bata sang naglayas ini? Siempre indi! (Lucas 15:11-13) Pareho sa sina nga amay, wala man ginpunggan sang Dios ang mga tawo sang ginpili nila nga magrebelde sa iya kag maghimo sang malain. Gani dapat naton dumdumon nga kon may malain nga matabo, indi ang Dios ang naghimo sini. Sala gid nga basulon ang Dios.

⁹ May maayo nga rason ang Dios kon ngaa wala niya ginpunggan nga matabo ang malain nga mga butang. Matun-an mo sa Kapitulo 11 kon ano ang ginasiling sang Biblia parte sa sini. Pero makasiguro ka nga palangga kita sang Dios kag indi sia ang balasulon sa aton mga problema. Ang matuod, sia lamang ang makasolbar sini.—Isaias 33:2.

10. Ngaa makasalig kita nga dulaon sang Dios ang tanan nga halit nga ginhimo sang malain nga mga tawo?

¹⁰ Ang Dios balaan. (Isaias 6:3) Ang tanan niya nga ginahimo putli, matinlo, kag maayo. Gani makasalig kita sa iya. Indi amo sina ang mga tawo. Kon kaisa, makahimo sila sang malain. Kag bisan ang pinakatampad nga manuggahom indi makadula sang halit nga ginhimo sang malain nga mga tawo. Wala sing tawo nga may gahom pareho sa Dios. Masarangan gid sang Dios nga dulaon ang halit nga ginhimo sang malain nga mga tawo, kag gusto gid niya ini himuon. Dulaon niya sing dayon ang mga malain.—Basaha ang Salmo 37:9-11.

ANO ANG GINABATYAG SANG DIOS SA PAG-ANTOS SANG MGA TAWO?

11. Ano ang ginabatyag sang Dios sa imo pag-antos?

¹¹ Ano ang ginabatyag sang Dios sa nagakatabo sa kalibutan kag sa imo naeksperiensiahan subong? Ang Biblia nagatudlo sa aton nga ang Dios “mahigugmaon sa katarungan [ukon, hustisya].” (Salmo 37:28) Gani, importante sa iya kon ano ang insakto kag sala. Indi niya gusto nga nagaantos ang mga tawo. Ang Biblia nagasiling nga “nasubuan gid ang iya tagipusuon” sang nakita niya ang malain nga ginahimo sang mga tawo sadto. (Genesis 6:5, 6) Wala nagbag-o ang Dios. (Malaquias 3:6) Ang Biblia nagasiling nga nagaulikid gid ang Dios sa imo.—Basaha ang 1 Pedro 5:7.

12, 13. (a) Ngaa ginapalangga kag ginaulikdan naton ang iban, kag ano ang aton ginabatyag sa pag-antos sa kalibutan? (b) Ngaa makasalig kita nga dulaon sang Dios ang tanan nga pag-antos kag inhustisya?

¹² Nagasiling man ang Biblia nga gintuga kita sa larawan sang Dios. (Genesis 1:26) Buot silingon, gintuga kita sang Dios nga may pareho nga kinaiya sa iya. Gani kon nasubuan ka kon may nagaantos, mas labi na gid ang Dios! Ngaa makasiling kita sini?

¹³ Ang Biblia nagatudlo sa aton nga “ang Dios gugma.” (1 Juan 4:8) Ang tanan nga ginahimo sang Dios bangod sa gugma. Nagahigugma kita kay ang Dios nagahigugma. Pamensara ini: Kon may gahom ka, dulaon mo bala ang tanan nga pag-antos kag inhustisya sa kalibutan? Sigurado gid, kay palangga mo ang mga tawo. Kamusta naman ang Dios? Bangod may gahom sia kag palangga gid niya kita, dulaon niya ang tanan nga pag-antos kag inhustisya. Makasalig ka nga ang tanan nga ginpromisa sang Dios nga ginsambit sa umpisa sini nga libro, matabo gid! Pero para saligan mo pa gid ini nga mga promisa, dapat kilalahon mo pa gid ang Dios.

GUSTO SANG DIOS NGA MAKILALA MO SIA

14. Ano ang ngalan sang Dios, kag ngaa dapat naton ini gamiton?

¹⁴ Kon gusto mo makig-abyan sa isa ka tawo, ano ang una mo nga ginasugid sa iya? Ang imo ngalan. May ngalan bala ang Dios? Madamo nga relihion ang nagasiling nga ang iya ngalan amo ang Dios ukon Ginuo, pero indi ini mga ngalan. Mga titulo lamang ini pareho sang “hari” ukon “presidente.” Ginsugiran kita sang Dios nga ang iya ngalan amo si Jehova. Ang Salmo 83:18 nagasiling: “Kabay nga mahibaluan sang mga tawo nga ikaw, nga ang ngalan amo si Jehova, ikaw lamang ang Labing Mataas sa bug-os nga duta.” Linibo ka beses nga gingamit sang mga manunulat sang Biblia ang ngalan sang Dios. Gusto ni Jehova nga mahibaluan mo ang iya ngalan kag gamiton ini. Ginsugid niya ang iya ngalan sa imo para mangin abyan mo sia.

15. Ano ang kahulugan sang ngalan nga Jehova?

¹⁵ Ang ngalan sang Dios nga Jehova nagakahulugan nga matuman niya ang tanan niya nga promisa kag katuyuan. Wala sing makapugong sa iya. Si Jehova lamang ang may kinamatarong nga maggamit sini nga ngalan.a

16, 17. Ano ang kahulugan sang (a) “Labing Gamhanan”? (b) “Hari nga dayon”? (c) “Manunuga”?

¹⁶ Sa nabasa na naton, ang Salmo 83:18 nagsiling parte kay Jehova: “Ikaw lamang ang Labing Mataas.” Ang Bugna 15:3 nagsiling man: “Daku kag makatilingala ang imo mga binuhatan, Jehova nga Dios, ang Labing Gamhanan. Matarong kag matuod ang imo mga dalanon, Hari nga dayon.” Ano ang buot silingon sang titulo nga “Labing Gamhanan”? Buot silingon, nga si Jehova ang pinakagamhanan sa uniberso. Kag ang titulo nga “Hari nga dayon” nagakahulugan nga asta san-o ara gid sia. Ang Salmo 90:2 nagpaathag nga wala sia sing ginsuguran kag wala sing katapusan. Dalayawon gid ini!

¹⁷ Si Jehova lamang ang Manunuga. Ang Bugna 4:11 nagsiling: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” Huo, ang mga anghel sa langit, mga bituon sa kahawaan, mga prutas, kag mga isda sa dagat, ginhimo tanan ni Jehova!

POSIBLE KA BALA MANGIN ABYAN NI JEHOVA?

18. Ngaa nagabatyag ang pila nga imposible sila mangin abyan sang Dios? Ano ang ginasiling sang Biblia parte sini?

¹⁸ Kon mabasahan sang mga tawo ang dalayawon nga mga kinaiya ni Jehova, nahadlok sila kag nagapamensar, ‘Gamhanan katama ang Dios, mataas, kag malayo, ngaa ulikdan pa niya ako?’ Pero amo bala ina ang gusto sang Dios nga mabatyagan naton? Indi. Gusto ni Jehova nga mangin malapit kita sa iya. Ang Biblia nagasiling nga ang Dios “indi . . . malayo sa tagsa sa aton.” (Binuhatan 17:27) Gusto sang Dios nga mangin malapit ka sa iya, kag nagpromisa sia nga “magapalapit sia sa [imo].”—Santiago 4:8.

19. (a) Paano ka mangin abyan sang Dios? (b) Ano nga mga kinaiya ni Jehova ang nanamian mo gid?

¹⁹ Paano ka mangin abyan sang Dios? Si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Kon padayon ka nga magtuon, mas makilala mo pa gid si Jehova kag si Jesus. Kag mahimo matigayon mo ang kabuhi nga wala sing katapusan. Halimbawa, natun-an naton nga “ang Dios gugma.” (1 Juan 4:16) Pero indi lang amo ina ang iya maayo nga mga kinaiya. Siling sang Biblia, si Jehova “maluluy-on kag mainawaon, indi dali maakig kag bugana sa mainunungon nga gugma kag kamatuoran.” (Exodo 34:6) Si Jehova “maayo kag handa sa pagpatawad.” (Salmo 86:5) Ang Dios mapinasensiahon kag mainunungon. (2 Pedro 3:9; Bugna 15:4) Matun-an mo pa gid ining matahom nga mga kinaiya samtang ginabasa mo ang parte sa iya sa Biblia.

20-22. (a) Paano ka mangin malapit sa Dios bisan indi mo sia makita? (b) Ano ang himuon mo kon punggan ka sang iban nga magtuon sa Biblia?

²⁰ Paano ka mangin malapit sa Dios kay indi mo sia makita? (Juan 1:18; 4:24; 1 Timoteo 1:17) Kon mabasa mo ang parte kay Jehova sa Biblia, mas makilala mo pa gid sia bilang matuod nga Persona. (Salmo 27:4; Roma 1:20) Samtang nagadamo ang imo natun-an parte kay Jehova, mas palanggaon mo pa gid sia kag mangin mas malapit ka sa iya.

²¹ Maintiendihan mo nga si Jehova amo ang aton Amay. (Mateo 6:9) Ginhatagan niya kita sang kabuhi, kag gusto man niya ang pinakamaayo para sa aton. Amo ina ang gusto sang mapinalanggaon nga amay para sa iya kabataan. (Salmo 36:9) Huo, ginatudluan kita sang Biblia nga posible ka mangin abyan ni Jehova. (Santiago 2:23) Imadyina, si Jehova ang Manunuga sang uniberso, kag gusto niya makig-abyan sa imo!

²² Mahimo punggan ka sang iban nga magtuon sa Biblia. Nahadlok sila kay basi islan mo ang imo relihion. Pero indi sila pagpasugti nga punggan ka nga mangin abyan ni Jehova. Kay man, sia ang pinakamaayo mo nga Abyan.

23, 24. (a) Ngaa dapat padayon ka nga mamangkot? (b) Ano ang matun-an naton sa masunod nga kapitulo?

²³ Samtang ginatun-an mo ang Biblia, mahimo may indi ka maintiendihan. Indi mahuya mamangkot ukon magpabulig. Ginsilingan kita ni Jesus nga dapat mapainubuson kita, pareho sang mga bata. (Mateo 18:2-4) Kag madamo sing pamangkot ang mga bata. Gusto sang Dios nga makita mo ang mga sabat. Gani, tun-i sing maayo ang Biblia para masigurado mo nga ang imo ginatun-an matuod.—Basaha ang Binuhatan 17:11.

²⁴ Ang pagtuon sa Biblia amo ang pinakamaayo nga paagi nga matun-an mo ang parte kay Jehova. Sa masunod nga kapitulo, matun-an naton kon ngaa pinasahi gid ang Biblia sangsa iban nga libro.