Dapat Bala Ako Magdedikar sa Dios kag Magpabawtismo?

1. Ano mahimo ang hunahunaon mo pagkatapos mo matun-an ini nga libro?

MADAMO ka sing natun-an nga kamatuoran sa Biblia sa imo pagtuon sini nga libro, pareho sang promisa sang Dios nga kabuhi nga wala sing katapusan, ang sitwasyon sang patay, kag ang paglaum nga pagkabanhaw. (Manugwali 9:5; Lucas 23:43; Juan 5:28, 29; Bugna 21:3, 4) Mahimo nagatambong ka na sa mga miting sang mga Saksi ni Jehova kag nagapati nga matuod ang ila pagsimba. (Juan 13:35) Mahimo nga ginatinguhaan mo nga mangin suod kay Jehova, kag nakadesisyon ka na nga mag-alagad sa iya. Gani mahimo maghunahuna ka, ‘Ano ang himuon ko para makaalagad sa Dios?’

2. Ngaa gusto sang Etiopianhon nga magpabawtismo?

² Amo ini ang ginpamensar sang isa ka Etiopianhon sang panahon ni Jesus. Wala madugay sa tapos ginbanhaw si Jesus, ginbantalaan sang disipulo ni Jesus nga si Felipe ina nga tawo. Ginpamatud-an sa iya ni Felipe nga si Jesus amo ang Mesias. Natandog gid ang Etiopianhon sa iya natun-an, amo nga nakasiling sia dayon: “Tan-awa! May tubig diri; ano ang nagapugong sa akon sa pagpabawtismo?”—Binuhatan 8:26-36.

3. (a) Ano ang ginsugo ni Jesus sa iya mga sumulunod? (b) Paano dapat bawtismuhan ang isa?

³ Maathag nga ginatudlo sang Biblia nga kon gusto mo mag-alagad kay Jehova, dapat ka magpabawtismo. Ginsilingan ni Jesus ang iya mga sumulunod: “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila.” (Mateo 28:19) Nagpakita si Jesus sing halimbawa sa sini kay sia mismo nagpabawtismo. Wala lang sia ginwisikan sing tubig sa ulo, kundi ginpasalop sia sa tubig. (Mateo 3:16) Subong, kon ang isa ka Cristiano bawtismuhan, ginatum-oy ukon ginapasalop sia sa tubig.

4. Ano ang ginapakita sang imo pagpabawtismo sa iban?

⁴ Ang imo pagpabawtismo nagapakita sa iban nga gusto mo gid mangin abyan ang Dios kag mag-alagad sa iya. (Salmo 40:7, 8) Gani mahimo magpalibog ka, ‘Ano ang dapat ko himuon para mabawtismuhan?’

IHIBALO KAG PAGTUO

5. (a) Ano anay ang dapat mo himuon antes ka bawtismuhan? (b) Ngaa dapat ka magtambong sa Cristianong mga miting?

⁵ Antes ka bawtismuhan, dapat mo anay kilalahon si Jehova kag si Jesus. Ginahimo mo na ina paagi sa pagtuon sa Biblia. (Basaha ang Juan 17:3.) Pero indi ina bastante. Ang Biblia nagasiling nga dapat “mapuno [ka] sing sibu nga ihibalo” parte sa kabubut-on ni Jehova. (Colosas 1:9) Makabulig sa imo ang mga miting sang mga Saksi ni Jehova para mangin suod ka pa gid kay Jehova. Amo nga dapat magtambong ka sa sini sing regular.—Hebreo 10:24, 25.

6. Daw ano kadamo ang dapat mo mahibaluan parte sa Biblia antes ka mabawtismuhan?

⁶ Pero wala ginapaabot ni Jehova nga mahibaluan mo gid ang tanan sa Biblia antes ka bawtismuhan. Wala sia nagpaabot nga mahibaluan gid sang Etiopianhon ang tanan antes mabawtismuhan. (Binuhatan 8:30, 31) Wala sing katapusan ang aton pagtuon parte sa Dios. (Manugwali 3:11) Pero para mabawtismuhan ka, dapat mo anay tun-an kag batunon bisan ang panguna lang nga mga panudlo sang Biblia.—Hebreo 5:12.

7. Paano ka nabuligan sang imo pagtuon sa Biblia?

⁷ Ang Biblia nagasiling: “Kon wala sing pagtuo imposible nga mapahamut-an ang Dios.” (Hebreo 11:6) Gani dapat may pagtuo ka antes mabawtismuhan. Ginasilingan kita sang Biblia nga sang nabatian sang mga taga-Corinto sang una ang mga panudlo sang mga sumulunod ni Jesus, “nagtuo [sila] kag nagpabawtismo.” (Binuhatan 18:8) Amo man sini sa imo pagtuon sing Biblia. Nakabulig ini sa imo nga magtuo sa mga promisa sang Dios kag sa halad ni Jesus, nga makaluwas sa aton sa sala kag kamatayon.—Josue 23:14; Binuhatan 4:12; 2 Timoteo 3:16, 17.

ISUGID SA IBAN ANG MGA KAMATUORAN SA BIBLIA

8. Ano ang magapahulag sa imo nga isugid sa iban ang imo natun-an?

⁸ Samtang nagadamo ang imo natun-an sa Biblia kag nakita mo nga nakabulig ini sa imo, magabakod pa gid ang imo pagtuo. Magapahulag ini sa imo nga isugid sa iban ang imo natun-an. (Jeremias 20:9; 2 Corinto 4:13) Pero sin-o ang dapat mo sugiran?

9, 10. (a) Sin-o ang puede mo masugiran sang imo mga natun-an? (b) Ano ang dapat mo himuon kon gusto mo na magbantala upod sa kongregasyon?

⁹ Mahimo gusto mo isugid ang imo natun-an sa imo pamilya, mga abyan, tupad-balay, ukon sa imo mga upod sa obra. Maayo ina, pero dapat pirme ka malulo kag mapinalanggaon kon nagaistorya sa ila. Sa ulihi, puede ka na makaupod sa kongregasyon sa pagbantala. Kon sa banta mo handa ka na, puede mo istoryahon ang Saksi nga nagatuon sa imo sa Biblia nga gusto mo mag-upod sa pagbantala. Kon nakita niya nga handa ka na kag ginasunod mo ang mga talaksan sa Biblia, updan ka niya nga istoryahon ang duha ka gulang sa kongregasyon.

¹⁰ Ano ang inyo istoryahan? Istoryahon ka sang mga gulang para hibaluon kon naintiendihan mo kag nagapati ka sa panguna nga mga panudlo sang Biblia, kon makita sa imo pagkabuhi nga ginasunod mo ang ginasiling sang Biblia, kag kon bala gusto mo gid mangin isa sa mga Saksi ni Jehova. Dumduma nga ginaatipan sang mga gulang ang tanan nga miembro sang kongregasyon, pati na ikaw, gani indi ka mahadlok nga makig-istorya sa ila. (Binuhatan 20:28; 1 Pedro 5:2, 3) Pagkatapos ka maistorya sang mga gulang, pahibaluon ka nila kon puede ka na makabantala upod sa kongregasyon.

11. Ngaa dapat ka maghimo sing mga pagbag-o antes magbantala upod sa kongregasyon?

¹¹ Mahimo ipaathag sa imo sang mga gulang nga kinahanglan mo pa maghimo sing mga pagbag-o antes makaupod sa pagbantala upod ang kongregasyon. Ngaa dapat mo himuon ina nga mga pagbag-o? Kay kon nagaistorya kita sa iban parte sa Dios, ginadala naton ang ngalan ni Jehova kag dapat kita magkabuhi nga nagapadungog sa iya.—1 Corinto 6:9, 10; Galacia 5:19-21.

MAGHINULSOL KAG MAGBAG-O

12. Ngaa dapat maghinulsol ang tanan nga tawo?

¹² May dapat ka pa himuon antes mabawtismuhan. Si apostol Pedro nagsiling: “Maghinulsol kamo kag magbag-o agod mapatawad ang inyo mga sala.” (Binuhatan 3:19) Ano ang buot silingon sang paghinulsol? Ang pagbatyag sing kasubo sa sala mo nga nahimo. Halimbawa, kon imoral ang imo pagkabuhi, dapat ka maghinulsol. Kag bisan pa ginatinguhaan mo gid nga himuon ang insakto, dapat ka gihapon maghinulsol, kay kita tanan makasala kag dapat kita mangayo sing kapatawaran sa Dios.—Roma 3:23; 5:12.

13. Ano ang buot silingon sang “magbag-o”?

¹³ Pero bastante na bala nga masubuan ka sa imo nahimo nga sala? Indi. Nagsiling si Pedro nga dapat ka “magbag-o.” Buot silingon, dapat untatan mo na ang indi maayo nga paggawi kag himuon kon ano ang insakto. Sa pag-ilustrar, imadyina nga nagabiyahe ka pakadto sa lugar nga wala mo pa makadtuan. Dayon, narealisar mo nga nagtalang ka gali. Ano ang himuon mo? Sigurado nga mahinay ka, mapundo, maliso, kag pangitaon ang insakto nga dalan. Amo man sini sa imo pagtuon sa Biblia, mahimo marealisar mo nga may dapat ka gali bag-uhon sa imo paggawi. Mangin handa sa paghimo sing mga pagbag-o kag himua kon ano ang insakto.

IDEDIKAR ANG IMO KAUGALINGON

14. Paano mo idedikar ang imo kaugalingon sa Dios?

¹⁴ Antes ka mabawtismuhan may importante pa nga tikang nga dapat mo himuon, ang pagdedikar sang imo kaugalingon kay Jehova. Isa ini ka pangamuyo nga nagapromisa ka nga sia lamang ang imo simbahon kag unahon mo sa imo kabuhi ang pagtuman sang iya kabubut-on.—Deuteronomio 6:15.

15, 16. Ano ang nagapahulag sa isa nga magdedikar sang iya kaugalingon sa Dios?

¹⁵ Ang aton promisa nga si Jehova lamang ang aton alagaron daw pareho sa promisa mo sa isa nga sia lamang ang imo palanggaon sa bilog mo nga kabuhi. Imadyina ang lalaki kag babayi nga naganobyahanay. Samtang ginakilala sing maayo sang lalaki ang babayi, mas palanggaon niya sia kag gusto niya nga pangasaw-on sia. Bisan pa serioso ini nga desisyon, handa ang lalaki nga batunon ang responsibilidad kay palangga niya ang babayi.

¹⁶ Samtang ginakilala mo si Jehova, ginapalangga mo sia, kag gusto mo gid nga alagaron sia. Mapahulag ka sini nga mangamuyo nga nagapromisa nga alagaron mo sia. Ang Biblia nagasiling nga ang gusto magsunod kay Jesus dapat ‘magpanghiwala sang iya kaugalingon.’ (Marcos 8:34) Ano ang buot silingon sini? Dapat nga unahon mo sa imo kabuhi ang pagtuman kay Jehova. Mas importante ang gusto ni Jehova sangsa imo mga handum kag tulumuron.—Basaha ang 1 Pedro 4:2.

INDI MAHADLOK SA KAPASLAWAN

17. Ngaa ang iban wala nagdedikar kay Jehova?

¹⁷ Ang iban wala nagdedikar kay Jehova kay nahadlok sila nga indi nila mahimo ang ila promisa nga mag-alagad sa iya. Indi nila gusto nga mapaslaw si Jehova, ukon mahimo sila magrason nga kon indi sila magdedikar, indi sila manabat kay Jehova sa ila ginahimo.

18. Ano ang makabulig sa imo nga madaug ang kahadlok nga basi indi mo matuman si Jehova?

¹⁸ Ang imo pagpalangga kay Jehova magabulig sa imo nga madaug ang kahadlok nga indi sia matuman. Kag bangod palangga mo sia, tinguhaan mo nga tumanon ang imo ginpromisa sa iya. (Manugwali 5:4; Colosas 1:10) Wala ka nagapensar nga mabudlay tumanon ang kabubut-on ni Jehova. Si apostol Juan nagsulat: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”—1 Juan 5:3.

19. Ngaa indi ka dapat mahadlok nga idedikar ang imo kaugalingon kay Jehova?

¹⁹ Indi kinahanglan nga mangin perpekto ka para makadedikar kay Jehova. Wala sia nagapaabot sang indi naton masarangan. (Salmo 103:14) Buligan ka niya para mahimo mo ang husto. (Isaias 41:10) Magsalig kay Jehova sa bug-os mo nga tagipusuon, kag “tadlungon niya ang imo mga banas.”—Hulubaton 3:5, 6.

DAYAG NGA PAGPAHAYAG PARA SA KALUWASAN

20. Ano ang dapat mo himuon pagkatapos mo madedikar ang imo kaugalingon sa Dios?

²⁰ Handa ka na bala nga idedikar ang imo kaugalingon kay Jehova? Pagkatapos mo madedikar ang imo kaugalingon kay Jehova, handa ka na para sa masunod nga tikang. Dapat ka magpabawtismo.

21, 22. Paano mo himuon ang pangpubliko nga pagpahayag sang imo pagtuo?

²¹ Hambala ang koordenitor sang hubon sang mga gulang sa inyo kongregasyon nga gindedikar mo na ang imo kaugalingon kay Jehova kag gusto mo na magpabawtismo. Magaasayn sia sang mga gulang nga magarebyu sa imo parte sa panguna nga mga panudlo sang Biblia. Kon magsiling sila nga puede ka na mabawtismuhan, pahibaluon ka nila nga puede ka na bawtismuhan sa masunod nga asembleya ukon kombension sang mga Saksi ni Jehova. Sa asembleya, may pamulongpulong nga nagapaathag parte sa bawtismo. Pamangkuton sang humalambal ang mga magapabawtismo sing duha ka simple nga pamangkot. Ang pagsabat mo sa sina nga mga pamangkot amo ang pangpubliko nga pagpahayag sang imo pagtuo.—Hebreo 4:14.

²² Dayon bawtismuhan ka na. Ipasalop ka sa tubig. Ang pagbawtismo sa imo nagapakita sa iban nga gindedikar mo na ang imo kaugalingon kay Jehova kag isa ka na sa mga Saksi ni Jehova.

KON ANO ANG BUOT SILINGON SANG IMO BAWTISMO

23. Ano ang buot silingon nga bawtismuhan ka “sa ngalan sang Amay kag sang Anak kag sang balaan nga espiritu”?

²³ Nagsiling si Jesus nga dapat bawtismuhan ang iya mga disipulo “sa ngalan sang Amay kag sang Anak kag sang balaan nga espiritu.” (Basaha ang Mateo 28:19.) Ano ang buot silingon sini? Dapat mo kilalahon ang awtoridad ni Jehova kag ang papel ni Jesus sa katuyuan sang Dios pati na kon paano ginagamit sang Dios ang iya balaan nga espiritu para matuman ang iya kabubut-on.—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Ano ang ginasimbulo sang bawtismo? (b) Ano ang binagbinagon naton sa katapusan nga kapitulo?

²⁴ Importante gid ang ginasimbulo sang bawtismo. Ang pagpasalop sa imo sa tubig, nagakahulugan nga napatay, ukon nagbiya, ka na sa imo pagkabuhi sadto. Ang pagbutwa mo sa tubig, nagapakita nga sugdan mo na ang bag-o nga pagkabuhi nga nagahimo sang kabubut-on sang Dios. Nagapakita ini nga magaalagad ka na kay Jehova. Dumduma man nga wala ka nagdedikar sa tawo, sa organisasyon, ukon sa buluhaton. Nagdedikar ka sang imo kabuhi kay Jehova.

²⁵ Ang imo dedikasyon makabulig sa imo nga mangin suod nga abyan sang Dios. (Salmo 25:14) Indi buot silingon nga maluwas ka na kay nabawtismuhan ka. Si apostol Pablo nagsulat: “Padayon ninyo nga panikasugi ang inyo kaugalingon nga kaluwasan nga may kahadlok kag pagkurog.” (Filipos 2:12) Ang bawtismo umpisa pa lang. Pero ano ang himuon mo para padayon ka nga mangin suod kay Jehova? Sabton ini sa katapusan nga kapitulo sini nga libro.