Dumduma ang Asawa ni Lot

Nag-upod si Lot sa iya tiyo nga si Abraham sa duta sang Canaan. Sang ulihi, nagdamo ang mga sapat ni Abraham kag ni Lot amo nga gutok na sila sa lugar nga ila ginaistaran. Ginsilingan ni Abraham si Lot: ‘Indi puede nga maupdanay kita sa isa lang ka lugar. Palihug, una ka pili kon diin mo gusto magkadto.’ Maayo gid nga tawo si Abraham kay ginpauna niya pili si Lot, indi bala?

Nakakita si Lot sang isa ka manami nga lugar malapit sa siudad nga ginatawag Sodoma. Madamo sing tubig kag hilamon didto. Gani amo ini ang iya ginpili kag nagsaylo sila sang iya pamilya didto.

Malain katama ang mga tawo sa Sodoma kag ang katupad nga siudad sini nga Gomorra. Ang matuod, malain gid sila katama amo nga nagdesisyon si Jehova nga laglagon ini nga mga siudad. Pero gusto luwason sang Dios si Lot kag ang iya pamilya, gani nagsugo sia sing mga anghel para hambalan sila: ‘Dalia ninyo! Gua kamo sa sini nga siudad! Kay laglagon ini ni Jehova.’

Wala dayon naghalin si Lot. Nagpadugaydugay pa sia. Gani gin-uyatan sang mga anghel si Lot, pati na ang iya asawa, kag duha ka bata nga babayi kag ginpadalidali sila sa paggua sa siudad, kag ginsilingan: ‘Magdalagan kamo, agod indi kamo mapatay! Indi kamo magbalikid. Kay kon magbalikid kamo, mapatay kamo!’

Sang nag-abot sila sa siudad nga ginatawag Zoar, ginpaulan ni Jehova sing kalayo kag asupre sa Sodoma kag Gomorra. Nalaglag gid ang duha ka siudad. Wala nagtuman kay Jehova ang asawa ni Lot kay nagbalikid sia, gani nangin haligi sia nga asin! Pero si Lot kag ang iya duha ka bata naluwas bangod nagtuman sila kay Jehova. Siguro nasubuan gid sila kay wala nagtuman ang asawa ni Lot. Pero nalipay sila kay namati sila sa sugo ni Jehova.