Nakuha ni Jacob ang Palanublion

Si Isaac 40 anyos sang ginpangasawa niya si Rebeca. Palangga gid sia ni Isaac. Sang ulihi, may kapid sila nga bata nga pareho nga lalaki.

Ang magulang amo si Esau, kag ang manghod si Jacob. Nanamian si Esau magtener sa gua, kag sagad sia mangayam ukon mangdakop sing mga sapat. Pero nanamian si Jacob magtener sa balay.

Sadto nga tion, ang subang nga bata nga lalaki amo ang ginahatagan sing mas malapad nga duta kag mas madamo nga kuarta kon mapatay ang iya tatay. Ginatawag ina nga palanublion. Sa pamilya ni Isaac, palanublion man nila nga mangin bahin sang mga ginpromisa ni Jehova kay Abraham. Ginbalewala ni Esau ina nga mga promisa, pero nabal-an ni Jacob nga importante gid ini.

Isa ka bes, nagpauli si Esau nga kapoy katama halin sa bilog nga adlaw nga pagpangayam. Napanimahuan niya ang ginaluto ni Jacob kag nagsiling: ‘Ginagutom ako! Hatagi ako sinang mapula nga linaga!’ Si Jacob nagsiling: ‘Sige, pero ipromisa anay nga akon na lang ang imo palanublion.’ Nagsiling si Esau: ‘Ano ang pulos sa akon sang palanublion? Sige imo na lang ina. Gusto ko magkaon.’ Sa banta mo, maayo bala ang ginhimo ni Esau? Indi gid. Ginbaylo ni Esau ang isa ka importante katama nga butang sa isa lang ka yahong nga linaga.

Sang tigulang na gid katama si Isaac, tion na ini nga ihatag niya ang pagpakamaayo sa subang nga bata nga lalaki. Pero ginbuligan ni Rebeca ang manghod nga si Jacob nga makuha ang pagpakamaayo. Sang nabal-an ini ni Esau, naakig gid sia kag gusto niya patyon ang iya kapid. Gusto proteksionan ni Isaac kag ni Rebeca si Jacob, gani ginsilingan nila sia: ‘Magkadto ka kag magtener sa utod sang imo nanay nga si Laban, asta nga madula ang kaakig ni Esau.’ Ginpamatian ni Jacob ang ginhambal sang iya mga ginikanan para indi sia mapatay ni Esau.