Ang Una nga Tatlo ka Kalalat-an

Ang mga Israelinhon ginpilit nga magtrabaho sing todo bilang mga ulipon. Ginpakadto ni Jehova si Moises kag si Aaron sa Paraon para isugid ini nga mensahe: ‘Palakta ang akon katawhan para masimba nila ako sa kamingawan.’ Bugalon nga nagsabat ang Paraon: ‘Wala ako labot kon ano ang ginsiling ni Jehova, kag indi ko pagpalakton ang mga Israelinhon.’ Dayon ginpabudlayan pa gid sang Paraon ang mga Israelinhon. Gintudluan ni Jehova sing leksion ang Paraon. Kabalo ka bala kon paano? Nagpadala sia sing Napulo ka Kalalat-an sa Egipto. Ginsilingan ni Jehova si Moises: ‘Wala namati ang Paraon sa akon. Buas sa aga, makadto sia sa Suba Nilo. Kadtui sia kag hambala nga bangod wala niya ginpalakat ang akon katawhan, ang tanan nga tubig sang Nilo mangin dugo.’ Nagtuman si Moises kag ginkadtuan niya ang Paraon. Nagatan-aw ang Paraon sang ginhampak ni Aaron ang Nilo sang iya baston, kag ang suba nangin dugo. Nagbaho ang suba, napatay ang mga isda, kag indi na nila mainom ang tubig sa Nilo. Pero wala gihapon ginpalakat sang Paraon ang mga Israelinhon.

Pagligad sang pito ka adlaw, ginpabalik ni Jehova si Moises sa Paraon agod magsiling: ‘Kon indi mo pagpalakton ang akon katawhan, ang Egipto mapuno sing mga paka.’ Gin-alsa ni Aaron ang iya baston, kag napuno sing paka ang Egipto. Nakita sang mga tawo nga may mga paka sa ila balay, sa ila kuarto, kag sa ila yahong. May mga paka bisan diin! Ginsilingan sang Paraon si Moises nga makitluoy kay Jehova nga pauntaton na ang kalalat-an. Nagpromisa ang Paraon nga palakton na niya ang mga Israelinhon. Gani, ginpauntat ni Jehova ang kalalat-an, kag gintumpok sang mga Egiptohanon ang patay nga mga paka. Nagbaho ang Egipto. Pero sa liwat, wala ginpalakat sang Paraon ang katawhan.

Dayon ginsilingan ni Jehova si Moises: ‘Hampakon ni Aaron ang duta sang iya baston, kag ang yab-ok mangin mga hamlok, ukon gamay nga mga langaw nga nagapangagat.’ Dayon, bisan diin lang may mga hamlok. Ang pila sa katawhan sang Paraon nagsiling sa iya: ‘Ini nga kalalat-an naghalin sa Dios.’ Pero wala gihapon ginpalakat sang Paraon ang mga Israelinhon.