Wala Nila Gintuman ang Ila Promisa

Si Jehova nagsiling kay Moises: ‘Magtaklad ka sa bukid. Isulat ko ang akon mga kasuguan sa tapitapi nga mga bato kag ihatag ini sa imo.’ Nagtaklad si Moises sa bukid kag nagtener didto sing 40 ka adlaw kag gab-i. Sang didto sia, ginsulat ni Jehova ang Napulo ka Sugo sa duha ka tapitapi nga bato kag ginhatag ini kay Moises.

Pagligad sang pila ka tion, abi sang mga Israelinhon ginbayaan na sila ni Moises. Nagsiling sila kay Aaron: ‘Gusto namon nga may manguna sa amon. Himui kami sang dios!’ Si Aaron nagsiling: ‘Ihatag sa akon ang inyo mga bulawan.’ Gintunaw niya ang mga bulawan kag ginhimo ini nga estatwa sang tinday nga baka. Ang mga tawo nagsiling: ‘Ini nga tinday amo ang aton Dios nga nagpagua sa aton sa Egipto!’ Ginsimba nila ang tinday nga bulawan, kag nagsinadya sila. Sala bala ang ila ginhimo? Huo, kay nagpromisa sila nga si Jehova lamang ang ila simbahon. Pero subong, wala nila gintuman ang ila promisa.

Nakita ni Jehova ang nagakatabo, gani ginsilingan niya si Moises: ‘Magbalik ka sa katawhan. Wala sila nagtuman sa akon kag nagsimba sila sa butig nga dios.’ Nanaug si Moises sa bukid dala ang duha ka tapitapi.

Sang lapit na si Moises sa katawhan, nabatian niya nga nagakinanta sila. Dayon nakita niya nga nagasaot sila kag nagayaub sa tinday nga baka. Naakig gid si Moises. Ginlampos niya ang duha ka tapitapi kag nabuka ini. Ginguba niya dayon ang estatwa. Dayon ginpamangkot niya si Aaron: ‘Paano ka nakumbinsi sang mga tawo nga himuon ining malain nga butang?’ Si Aaron nagsabat: ‘Indi ka maakig. Kilala mo ini nga mga tawo. Gusto nila sang dios, gani gintunaw ko ang ila mga bulawan sa kalayo kag naggua ining tinday nga baka!’ Wala ini dapat ginhimo ni Aaron. Nagtaklad liwat si Moises sa bukid kag nakitluoy kay Jehova nga patawaron ang katawhan.

Ginpatawad ni Jehova ang mga handa magtuman sa iya. Nakita mo bala kon daw ano ka importante nga magsunod ang mga Israelinhon sa pagpanguna ni Moises?