Ang Tabernakulo Para sa Pagsimba

Sang ara si Moises sa Bukid Sinai, ginsilingan sia ni Jehova nga maghimo sing pinasahi nga tolda nga ginatawag tabernakulo. Ang mga Israelinhon magasimba kay Jehova sa tabernakulo. Masaylosaylo nila ini kon diin sila magkadto.

Si Jehova nagsiling: ‘Hambala ang katawhan nga mag-amot para makahimo sing tabernakulo.’ Ang mga Israelinhon naghatag sing bulawan, pilak, saway, malahalon nga mga bato, kag mga alahas. Naghatag man sila sing mga tela nga linen, hilo, panit sang mga sapat, kag iban pa. Tama kadamo sang ila ginhatag amo nga nagsiling si Moises sa ila: ‘Tama na ini! Untati na ninyo ang pag-amot.’

Madamo nga lalaki kag babayi nga sagad mag-obra ang nagbulig sa paghimo sang tabernakulo. Ginhatagan sila ni Jehova sing kaalam sa pag-obra. May nagahimo sing hilo, nagahimo sing tela, ukon nagaburda sa sini. Ang iban nagaporma sing bato, nagaporma sing bulawan, ukon nagatigib sing kahoy.

Ginsunod sang mga tawo ang instruksion ni Jehova sa pagpatindog sang tabernakulo. Naghimo sila sing matahom nga kurtina para maseparar ang tabernakulo sa duha ka bahin, ang Balaan kag ang Labing Balaan. Sa Labing Balaan makita ang kaban sang katipan, nga ginhimo sa akasya nga kahoy kag bulawan. Sa Balaan naman makita ang bulawan nga kandelero, kag ang halaran para sa sinunog nga incienso. Sa luwang may ara sing saway nga labador kag daku nga halaran. Ang kaban sang katipan nagapahanumdom sa mga Israelinhon sang ila promisa nga tumanon si Jehova. Kabalo ka bala kon ano ang katipan? Pinasahi ini nga promisa.

Ginpili ni Jehova si Aaron kag ang iya kabataan nga lalaki para mangin mga saserdote sa tabernakulo. Sila ang magaatipan sini kag diri man sila mahalad kay Jehova. Ang mataas nga saserdote nga si Aaron lamang ang puede magsulod sa Labing Balaan. Nagasulod sia diri sing makaisa lang kada tuig agod maghalad para sa iya mga sala, mga sala sang iya pamilya, kag mga sala sang bilog nga pungsod sang Israel.

Natapos sang mga Israelinhon ang tabernakulo pagligad sang isa ka tuig halin sang paggua nila sa Egipto. Gani, may lugar na sila para sa pagsimba kay Jehova.

Ginpuno ni Jehova ang tabernakulo sang iya himaya kag ginbutangan sing panganod ang ibabaw sini. Kon ang panganod ara sa ibabaw sang tabernakulo, ang mga Israelinhon indi dapat maghalin. Pero kon magpaibabaw ang panganod, nakahibalo sila nga tion na nga maghalin sila. Hukson nila ang mga bahin sang tabernakulo, dal-on ini, kag magsunod sa panganod.