Naghambal ang Asno ni Balaam

Halos 40 ka tuig na ang mga Israelinhon sa kamingawan. Madamo sila sing napierde nga mabakod nga mga siudad. Nagkampo sila sa kapatagan sang Moab sa sidlangan sang Suba Jordan, kag manugsulod na sila sa Ginsaad nga Duta. Kinulbaan ang hari sang Moab nga si Balak kay basi agawon nila ang iya pungsod. Gani gin-agda niya si Balaam nga magkadto sa Moab para sumpaon ang mga Israelinhon.

Pero ginsilingan ni Jehova si Balaam: ‘Indi mo dapat pagsumpaon ang mga Israelinhon.’ Gani wala nagkadto si Balaam. Gin-agda sia liwat ni Hari Balak kag gintanyagan nga ihatag sa iya ang bisan ano nga gusto niya. Pero wala gihapon nagpasugot si Balaam. Dayon ang Dios nagsiling: ‘Puede ka makakadto, pero ihambal mo lang ang isiling ko sa imo.’

Nagsakay si Balaam sa iya asno kag nagkadto sa Moab. Plano niya nga sumpaon ang mga Israelinhon bisan pa ginsilingan sia ni Jehova nga indi. Tatlo ka beses nga nagpakita ang anghel ni Jehova sa dalan. Indi makita ni Balaam ang anghel, pero makita ini sang iya asno. Sa una nga bes, nagliko ang asno. Ikaduha, nagpangalihid ang asno sa pader amo nga naipit ang tiil ni Balaam. Sang ulihi, nagluko ang asno sa tunga sang dalan. Sa kada tion nga matabo ini, ginahanot ni Balaam ang asno.

Pagkatapos sang ikatlo nga tion, ginpahambal ni Jehova ang asno. Ang asno namangkot kay Balaam: ‘Ngaa ginahanot mo ako?’ Si Balaam nagsiling: ‘Kay ginatunto mo ako. Kon may espada lang ako, patyon ko gid ikaw.’ Ang asno nagsiling: ‘Madugay mo na ako ginasakyan. Nahimo ko na bala ini sa imo sang una?’

Dayon gintugutan ni Jehova nga makita ni Balaam ang anghel. Ang anghel nagsiling: ‘Ginhambalan ka ni Jehova nga indi mo pagsumpaon ang Israel.’ Si Balaam nagsiling: ‘Nakasala ako. Mapauli na ako.’ Pero ang anghel nagsiling: ‘Puede ka makakadto sa Moab, pero ihambal mo lang ang isiling ni Jehova sa imo.’

Nakatuon bala sing leksion si Balaam? Wala. Pagkatapos sadto, tatlo ka beses nga gintinguhaan ni Balaam nga sumpaon ang Israel, pero imbes nga sumpaon sila, pagpakamaayo ang ginpahambal ni Jehova sa iya. Sang ulihi, ginsalakay sang mga Israelinhon ang Moab, kag ginpatay si Balaam. Indi bala nga mas maayo kuntani kon namati si Balaam kay Jehova sa umpisa pa lang?