Ginpili ni Jehova si Josue

Tigulang na gid katama si Moises pagligad sang madamo nga tuig nga pagpanguna niya sa mga Israelinhon. Si Jehova nagsiling sa iya: ‘Indi ikaw ang magadala sang mga Israelinhon sa Ginsaad nga Duta. Pero ipakita ko ini sa imo.’ Dayon nangabay si Moises kay Jehova nga magpili sing bag-o nga lider nga magaatipan sa katawhan. Nagsiling si Jehova sa iya: ‘Kadtui si Josue kag hambala nga sia ang akon ginpili.’

Ginsilingan ni Moises ang pungsod nga dali na lang sia mapatay kag ginpili ni Jehova si Josue nga manguna sa ila pasulod sa Ginsaad nga Duta. Dayon nagsiling si Moises kay Josue: ‘Indi ka magkahadlok. Buligan ka ni Jehova.’ Wala madugay pagkatapos sina, nagtaklad si Moises pakadto sa ibabaw sang Bukid Nebo, kag didto ginpakita ni Jehova sa iya ang duta nga ginsaad Niya kanday Abraham, Isaac, kag Jacob. Si Moises napatay sa edad nga 120 anyos.

Si Jehova nagsiling kay Josue: ‘Tabok ka sa Suba Jordan kag kadto ka sa Canaan. Buligan ko ikaw pareho sa pagbulig ko kay Moises. Dapat mo basahon ang akon Kasuguan kada adlaw. Indi ka magkahadlok. Magpakaisog ka. Lakat kag himua ang ginsugo ko sa imo.’

Ginpakadto ni Josue ang duha ka espiya sa siudad sang Jerico. Mahibaluan naton ang natabo didto sa masunod nga istorya. Sang nagbalik sila, ginreport nila nga maayo gid ini nga tion nga magkadto sa Canaan. Pagkadason nga adlaw, ginsilingan ni Josue ang pungsod nga maghimos kag magpreparar sa paglakat. Dayon ginpauna niya sa Suba Jordan ang mga saserdote nga nagadala sang kaban sang katipan. Nagabaha ang suba. Pero pagtapak sang mga tiil sang mga saserdote sa tubig, nag-untat ang pag-ilig sang suba, kag naghubas ang tubig! Naglakat ang mga saserdote pakadto sa tunga sang suba kag nagtindog didto samtang nagatabok ang bilog nga pungsod sang Israel. Sa banta mo, nadumduman bala nila ang ginhimo ni Jehova sa Pula nga Dagat bangod sini nga milagro?

Pagligad sang madamo nga tinuig, nakaabot gid man ang mga Israelinhon sa Ginsaad nga Duta. Makahimo na sila sing mga balay kag mga siudad. Makatanom na sila sing mga uyas, mga ubas, kag mga prutas. Madamo sing maayo nga butang nga makaon kag mainom sa Ginsaad nga Duta amo nga gintawag ini nga duta nga nagailig ang gatas kag dugos.