Gintago ni Rahab ang mga Espiya

Sang ang Israelinhon nga mga espiya nagkadto sa siudad sang Jerico para manilag didto, nagtener sila sa balay sang babayi nga si Rahab. Nabal-an ini sang hari sang Jerico gani nagpadala sia sing mga soldado sa balay ni Rahab. Gintago ni Rahab ang duha ka espiya sa atop kag gintudlo niya sa lain nga direksion ang mga soldado. Nagsiling sia sa mga espiya: ‘Buligan ko kamo kay nahibaluan ko nga ginabuligan kamo ni Jehova kag mapierde ninyo ang siudad. Palihug magpromisa kamo sa akon nga luwason ninyo ang akon pamilya.’

Ang mga espiya nagsiling kay Rahab: ‘Ginapromisa namon nga wala sing bisan sin-o nga mahalitan sa sulod sang imo balay.’ Nagsiling sila: ‘Ihigot ang pula nga lubid sa imo bintana, kag indi mahalitan ang imo pamilya.’

Ginpapanaug ni Rahab ang mga espiya sa iya bintana paagi sa lubid. Nagkadto sila sa kabukiran kag nanago didto sing tatlo ka adlaw antes magbalik kay Josue. Dayon nagtabok ang mga Israelinhon sa Suba Jordan kag nagpreparar sa pagsalakay sa siudad. Ang Jerico amo ang una nga siudad nga ila nasakop. Ginsilingan sila ni Jehova nga maglibot sa siudad sing makaisa kada adlaw sa sulod sang anom ka adlaw. Sa ikapito nga adlaw, makapito ka beses sila nga nagmartsa palibot sa siudad. Dayon ginhuyop sang mga saserdote ang ila mga budyong, kag ang mga soldado nagsinggit sing tama katunog. Narumpag ang mga pader sang siudad! Pero ang balay ni Rahab nga ara sa pader wala naguba. Naluwas si Rahab kag ang iya pamilya bangod nagsalig sia kay Jehova.