Ginpierde ni Gideon ang mga Midianhon

Pagligad sang tion, gintalikdan naman liwat sang Israel si Jehova kag nagsimba sa butig nga mga dios. Sa sulod sang pito ka tuig, ginakawat sang mga Midianhon ang mga sapat sang mga Israelinhon kag ginahalitan ang ila mga pananom. Para makapalagyo ang mga Israelinhon sa mga Midianhon, nagapanago sila sa mga kueba kag sa kabukiran. Nakitluoy sila kay Jehova nga luwason sila. Gani, nagpadala si Jehova sing anghel sa bataon nga lalaki nga si Gideon. Ang anghel nagsiling: ‘Ginpili ka ni Jehova para mangin maisog nga soldado.’ Si Gideon namangkot: ‘Paano ko maluwas ang Israel? Indi ko ina masarangan.’

Paano masigurado ni Gideon nga sia ang ginpili ni Jehova? Nagbutang sia sing balahibo sang karnero sa duta kag nagsiling kay Jehova: ‘Kon ang balahibo mabasa sang tun-og buas sa aga, pero ang duta mamala, masigurado ko nga ako ang gusto mo nga magluwas sa Israel.’ Pagkaaga, basa katama ang balahibo pero mamala ang duta! Dayon nagsiling si Gideon nga mangin mamala naman ang balahibo pagkadason nga aga pero basa naman ang duta. Sang natabo ini, nakumbinsi si Gideon nga sia ang ginpili ni Jehova. Gintipon niya ang iya mga soldado para makig-away sa mga Midianhon.

Ginsilingan ni Jehova si Gideon: ‘Padaugon ko ang mga Israelinhon. Pero bangod madamo ka sing soldado, basi maghunahuna ka nga kamo ang nagpadaug sa inaway. Hambali sila nga ang bisan sin-o nga nahadlok magpauli na.’ Gani nagpauli ang 22,000 ka soldado, kag 10,000 ang nabilin. Dayon nagsiling si Jehova: ‘Madamo gihapon ang mga soldado. Pakadtua sila sa sapa kag paimna sila didto. Ang mga nagabantay sa mga kaaway samtang nagainom amo lang ang magaupod sa imo.’ Pero 300 lang sa ila ang nagabantay samtang nagainom. Nagpromisa si Jehova nga bisan diutay lang sila, pierdihon nila ang 135,000 ka soldado sang mga Midianhon.

Pagkagab-i, si Jehova nagsiling kay Gideon: ‘Subong na ang tion nga salakayon ninyo ang mga Midianhon!’ Ginhatagan ni Gideon ang iya mga soldado sing mga budyong kag daku nga mga tibod nga may mga sulo sa sulod. Ginsilingan niya sila: ‘Tan-awa ninyo ako, kag sunda ninyo ang akon himuon.’ Ginpatunog ni Gideon ang iya budyong, ginbuka ang iya tibod, ginbayaw ang iya sulo, kag nagsinggit: ‘Ang espada ni Jehova kag ni Gideon!’ Amo man sini ang ginhimo sang iya 300 ka soldado. Hinadlukan ang mga Midianhon kag nagpinalagyo sila. Nagsalasala sila kag sila mismo ang nagpinatyanay. Sa liwat, ginbuligan ni Jehova ang mga Israelinhon nga mapierde ang ila mga kaaway.