Nangamuyo si Hana nga Hatagan Sia sing Bata nga Lalaki

Ang Israelinhon nga si Elkana may duha ka asawa, si Hana kag si Penina. Pero mas palangga niya si Hana. Pirme ginapakanubo ni Penina si Hana kay madamo si Penina sing bata pero si Hana wala. Kada tuig, ginadala ni Elkana ang iya pamilya sa tabernakulo sa Shilo para magsimba. Isa ka bes sang didto sila, nakita niya nga masubo gid si Hana. Nagsiling sia: ‘Indi ka na maghibi Hana. Ari man ako. Palangga ko ikaw.’

Sang ulihi, naglakat si Hana nga sia lang isa para mangamuyo. Sige sia hibi nga nagapakitluoy kay Jehova nga buligan sia. Nagpromisa sia: ‘Jehova, kon hatagan mo ako sing bata nga lalaki, ihatag ko sia sa imo, kag magaalagad sia sa imo sa bilog niya nga kabuhi.’

Nakita sang mataas nga saserdote nga si Eli nga nagakutibkutib ang bibig ni Hana samtang nagahibi, gani abi ni Eli hubog sia. Si Hana nagsiling: ‘Indi, ginuo ko, indi ako hubog. May mabug-at gid ako nga problema kag ginasugid ko ini kay Jehova.’ Sang nabal-an ni Eli nga nagsala sia, nagsiling sia: ‘Kabay nga ihatag sang Dios ang imo ginapangayo.’ Naumpawan si Hana kag naglakat. Wala pa mag-isa ka tuig, nagbata si Hana sang isa ka lalaki kag ginngalanan ini nga Samuel. Maimadyin mo bala kon daw ano ka malipayon si Hana?

Wala malipatan ni Hana ang iya ginpromisa kay Jehova. Sang nalutas na niya si Samuel, gindala niya sia sa tabernakulo para mag-alagad didto. Nagsiling sia kay Eli: ‘Amo ini ang bata nga ginpangamuyo ko. Sa bilog niya nga kabuhi, ihatag ko sia kay Jehova.’ Kada tuig, ginakadtuan ni Elkana kag ni Hana si Samuel kag ginadal-an sia sing bag-o nga bayo nga wala sing pako. Ginhatagan ni Jehova si Hana sing tatlo pa ka bata nga lalaki kag duha ka bata nga babayi.