Ang Soldado kag ang Dalagita

Sa Siria, may isa ka Israelinhon nga dalagita nga malayo sa iya pamilya. Ginkuha sia sang Sirianhon nga mga soldado sa iya pamilya, kag ginhimo nga ulipon sang asawa sang isa ka pangulo sang mga soldado nga si Naaman. Ginasimba sang dalagita si Jehova, bisan pa wala ini ginahimo sang mga tawo sa iya palibot.

Si Naaman may malala nga balatian sa panit kag pirme ini nagasakit. Gusto gid sia buligan sang dalagita. Ginsilingan niya ang asawa ni Naaman: ‘May kilala ako nga makabulig sa imo bana. May manalagna si Jehova sa Israel nga ang ngalan si Eliseo. Mapaayo niya sia.’

Ginsugid sang asawa ni Naaman sa iya bana ang ginsiling sa iya sang dalagita. Gusto testingan ni Naaman ang tanan, gani nagkadto sia sa balay ni Eliseo sa Israel. Ginapaabot ni Naaman nga mangin espesyal gid ang pag-abiabi ni Eliseo sa iya. Pero imbes personal sia nga istoryahon, ginpadala lang ni Eliseo ang iya alagad para kamustahon sia kag isugid ang iya mensahe: ‘Kadto ka kag maligo sing pito ka beses sa Suba Jordan. Dayon magaayo ka.’

Nagalalain gid si Naaman. Nagsiling sia: ‘Abi ko ayuhon ako sini nga manalagna paagi sa pagtawag sa iya Dios kag ayuhon niya ako sa makatilingala nga paagi. Pero, ginsugo niya ako nga magkadto sa isa ka suba sa Israel. Mas maayo pa ang mga suba namon sa Siria. Tani didto na lang ako makadto.’ Naakig si Naaman, kag naghalin sia sa balay ni Eliseo.

Pero ginbuligan si Naaman sang iya mga ulipon nga pamensaron ini sing maayo. Nagsiling sila sa iya: ‘Indi bala himuon mo ang tanan para mag-ayo? Simple man lang ang ginapahimo sini nga manalagna sa imo. Ti, ngaa indi mo ina paghimuon?’ Namati si Naaman sa ila. Nagkadto sia sa Suba Jordan kag nagsalom sing pito ka beses. Pagkatapos sang ikapito, nagtakas si Naaman kag nag-ayo na ang iya balatian. Nalipay gid sia, amo nga nagbalik sia kay Eliseo para magpasalamat. Si Naaman nagsiling: ‘Nabal-an ko na subong nga si Jehova ang matuod nga Dios.’ Ano sa banta mo ang ginbatyag sang Israelinhon nga dalagita sang nagpauli si Naaman nga wala na sing balatian?