Gintuman ni Josias ang Kasuguan sang Dios

Si Josias nangin hari sang Juda sang walo sia ka tuig. Sadto nga tion, ang mga tawo nagahimo sing madyik kag nagasimba sa butig nga mga dios. Sang 16 anyos si Josias, gintinguhaan niya nga hibaluon ang husto nga paagi sa pagsimba kay Jehova. Sang 20 anyos sia, ginguba niya ang mga diosdios kag mga halaran sa bilog nga pungsod. Sang 26 anyos sia, ginpakay-o niya ang templo ni Jehova.

Nakita sang mataas nga saserdote nga si Hilkias ang linukot sang Kasuguan ni Jehova sa templo—mahimo ang linukot nga ginsulat mismo ni Moises. Gindala ni Safan, nga sekretaryo sang hari, ang linukot kay Josias kag ginbasa niya ang Kasuguan sing matunog. Samtang nagapamati si Josias, narealisar niya nga madugay na nga wala ginatuman sang katawhan si Jehova. Si Hari Josias nagsiling kay Hilkias: ‘Naakig gid si Jehova sa aton. Lakat ka kag mamangkot sa iya. Sugiran kita ni Jehova kon ano ang dapat naton himuon.’ Ginsabat sila ni Jehova paagi sa babayi nga manalagna nga si Hulda: ‘Gintalikdan ako sang katawhan sang Juda. Silutan sila pero indi sa panahon sang paghari ni Josias, bangod nagpaubos sia.’

Sang nabatian ni Hari Josias ang mensahe, nagkadto sia sa templo kag ginpatipon ang katawhan sang Juda didto. Dayon ginbasa niya ang Kasuguan ni Jehova sing matunog sa bilog nga pungsod. Nagpromisa si Josias kag ang katawhan nga tumanon nila si Jehova sa bug-os nila nga tagipusuon.

Madugay na nga wala nagaselebrar ang mga Judiyo sing kapiestahan nga ginatawag nila nga Paskua. Pero sang nabasa ni Josias sa Kasuguan nga dapat ini iselebrar kada tuig, ginsilingan niya ang pungsod: ‘Magaselebrar kita sang Paskua para kay Jehova.’ Dayon nagpreparar si Josias sang madamo nga halad kag nagporma sing grupo sang mga manug-amba sa templo. Dayon, nagselebrar ang pungsod sing Paskua, kag ginsundan ini sing Kapiestahan sang Tinapay nga Wala sing Lebadura nga nagalawig sing pito ka adlaw. Wala pa gid sing Paskua nga ginselebrar pareho sadto halin sang panahon ni Samuel. Gusto gid mahibaluan ni Josias ang Kasuguan sang Dios. Nanamian ka man bala magtuon parte kay Jehova?