Si Jesus Nangin Mesias

Si Juan padayon nga nagabantala: ‘Magakari ang isa nga mas daku sangsa akon.’ Sang mga 30 anyos na si Jesus, naghalin sia sa Galilea kag nagkadto sa Suba Jordan, diin ginabawtismuhan ni Juan ang mga tawo. Gusto ni Jesus nga bawtismuhan sia ni Juan, pero si Juan nagsiling: ‘Indi ako dapat ang magbawtismo sa imo. Ikaw dapat ang magbawtismo sa akon.’ Ginsilingan ni Jesus si Juan: ‘Gusto ni Jehova nga bawtismuhan mo ako.’ Gani nagkadto sila sa Suba Jordan, kag gintum-oy ni Juan si Jesus sa tubig.

Sang nagtakas si Jesus, nangamuyo sia. Dayon, nagbukas ang langit, kag ang espiritu sang Dios nagpanaug sa iya kaangay sang salampati. Dayon naghambal si Jehova halin sa langit: “Ikaw ang akon Anak, ang hinigugma; ginakahamut-an ko ikaw.”

Sang nabaton ni Jesus ang espiritu ni Jehova, nangin Cristo sia, ukon Mesias. Amo na ina ang tion nga sugdan niya ang hilikuton nga ginpahimo sa iya ni Jehova sa duta.

Sa tapos mabawtismuhan si Jesus, nagkadto sia dayon sa kamingawan kag nagtener didto sing 40 ka adlaw. Pagbalik niya, nakigkita sia kay Juan. Sang nagapalapit si Jesus kay Juan, si Juan nagsiling: ‘Amo ini ang Kordero sang Dios nga nagakuha sang sala sang kalibutan.’ Ginsiling ini ni Juan para ipahibalo sa mga tawo nga si Jesus ang Mesias. Kabalo ka bala kon ano ang natabo kay Jesus sang didto sia sa kamingawan? Tan-awon naton.