Gintinluan ni Jesus ang Templo

Nagkadto si Jesus sa Jerusalem sang mga Abril 30 C.E. Madamo nga tawo ang nagkadto sa siudad para sa Paskua. Bilang bahin sang selebrasyon, nagahalad sila sing sapat sa templo. Ang iban may dala na nga mga sapat, pero ang iban nagabakal sa Jerusalem.

Sang didto na si Jesus sa templo, nakita niya ang mga nagabaligya sing mga sapat didto. Nagapanguarta sila sa balay mismo sang pagsimba kay Jehova! Ano ang reaksion ni Jesus? Naghimo sia sing latigo nga lubid kag gintabog ang mga karnero kag mga baka paggua sa templo. Ginpamaliskad niya ang mga lamesa sang mga manugbaylo sing kuarta kag ginpang-ula ang ila mga sensilyo. Si Jesus nagsiling sa mga nagabaligya sing mga salampati: “Kuhaa ninyo ini diri! Untati ninyo ang paghimo sa balay sang akon Amay nga isa ka balaligyaan!”

Ang mga tawo sa templo natingala sa ginhimo ni Jesus. Nadumduman sang iya mga disipulo ang tagna parte sa Mesias: ‘Ang kakugi sa balay ni Jehova ara sa akon.’

Sang ulihi, sang tuig 33 C.E., gintinluan liwat ni Jesus ang templo. Indi gid niya pagpasugtan ang bisan sin-o nga indi magtahod sa balay sang iya Amay.