Napatay si Jesus sa Golgotha

Gindala sang puno nga mga saserdote si Jesus sa palasyo sang gobernador. Ginpamangkot sila ni Pilato: ‘Ano ang akusasyon ninyo batok sa sini nga tawo?’ Nagsabat sila: ‘Ginasiling niya nga hari sia.’ Ginpamangkot ni Pilato si Jesus: “Ikaw bala ang Hari sang mga Judiyo?” Si Jesus nagsabat: “Ang akon Ginharian indi bahin sini nga kalibutan.”

Dayon ginpadala ni Pilato si Jesus kay Herodes nga manuggahom sang Galilea, kon bala may makita sia nga sala sa iya. Wala sing nakita nga sala si Herodes kay Jesus gani ginbalik niya ini kay Pilato. Dayon ginsilingan ni Pilato ang mga tawo: ‘Wala kami sing nakita ni Herodes nga sala sa sini nga tawo. Buy-an ko sia.’ Pero ang mga tawo nagsinggit: “Patya sia! Patya sia!” Ginlatigo sang mga soldado si Jesus, ginduplaan, kag ginsumbag. Ginbutangan nila sia sing korona nga tunok kag ginkadlawan nga nagasiling: “Mabuhi ang Hari sang mga Judiyo!” Ginsilingan liwat ni Pilato ang mga tawo: ‘Wala ako sing nakita nga sala sa sini nga tawo.’ Pero nagsinggit sila: “Ibutang sia sa usok!” Gani ginhatag ni Pilato si Jesus sa mga soldado para patyon.

Gindala nila si Jesus sa lugar nga ginatawag Golgotha, kag ginlansang sia sa usok. Si Jesus nangamuyo: “Amay, patawara sila, kay wala sila makahibalo sang ila ginahimo.” Ginhimo nga kaladlawan sang mga tawo si Jesus, kag nagsiling sila: ‘Kon ikaw Anak sang Dios, panaug ka sa usok! Luwasa ang imo kaugalingon!’

Ang isa ka kriminal nga ginlansang man sa tupad niya nagsiling: “Dumduma ako kon magsulod ka sa imo Ginharian.” Si Jesus nagpromisa sa iya: “Mangin kaupod ko ikaw sa Paraiso.” Pagkahapon, tatlo ka oras nga nagdulom sa bug-os nga duta. Ang pila ka disipulo nagtindog malapit sa usok, pati na si Maria nga iloy ni Jesus. Ginsilingan ni Jesus si Juan nga atipanon si Maria kag kabigon sia nga iya iloy.

Sang ulihi, si Jesus nagsiling: “Natuman na!” Dayon nagduko sia, kag nabugtuan sang ginhawa. Sa sini nga tion, naglinog sing mabaskog. Ang madamol nga kurtina sa templo sa tunga sang Balaan kag Labing Balaan napihak. Ang isa ka opisyal sang mga soldado nagsiling: “Matuod gid nga sia amo ang Anak sang Dios.”