LEKSION 23

Ngaa Maayo Gid Kon Tinguhaan Mo nga Magpabawtismo?

Naimprinta nga Edisyon

Si Jesus nagsiling nga dapat magpabawtismo ang mga Cristiano. (Basaha ang Mateo 28:19, 20.) Pero ano ang bawtismo? Kag ano ang dapat himuon sang isa para mabawtismuhan sia?

1. Ano ang bawtismo?

Ang tinaga nga “bawtismo” naghalin sa Griego nga termino nga nagakahulugan “pagpasalop” sa tubig. Sang ginbawtismuhan si Jesus, gintum-oy sia sa Suba Jordan, dayon ‘nagtakas sia sa tubig.’ (Marcos 1:9, 10) Ang matuod nga mga Cristiano ginabawtismuhan man paagi sa pagpasalop ukon pagtum-oy sa ila sa tubig.

2. Ano ang buot silingon kon magpabawtismo ang isa?

Kon magpabawtismo ang isa, ginapakita niya nga nadedikar na niya ang iya kaugalingon kay Jehova nga Dios. Paano ginahimo ang pagdedikar? Antes sia magpabawtismo, nagapangamuyo sia kay Jehova nga gusto niya alagaron Sia sing wala katapusan. Nagapromisa sia nga si Jehova lang ang iya simbahon kag unahon niya sa iya kabuhi ang paghimo sang kabubut-on sang Dios. Gusto man niya nga ‘ipanghiwala ang iya kaugalingon kag padayon nga sundon’ ang gintudlo kag ginhimo ni Jesus. (Mateo 16:24) Kon nakadedikar na sia kag nakapabawtismo, puede na niya mangin malapit nga abyan si Jehova kag ang iban pa nga nagasimba kay Jehova.

3. Ano ang himuon mo antes ka bawtismuhan?

Antes ka bawtismuhan dapat ka anay magtuon parte kay Jehova kag magtuo sa iya. (Basaha ang Hebreo 11:6.) Samtang nagadamo ang imo natun-an kay Jehova kag nagabakod ang imo pagtuo sa iya, mas palanggaon mo pa gid sia. Gani gusto mo isugid ang parte sa iya kag sundon ang iya mga sugo. (2 Timoteo 4:2; 1 Juan 5:3) Kon ang isa ka tawo nagakabuhi nga “takus kay Jehova sa tuyo nga pahamut-an sia sing bug-os,” mahimo nga idedikar niya ang iya kabuhi sa Dios kag magpabawtismo.—Colosas 1:9, 10.a

USISAA PA GID

Usisaon naton kon ano ang matun-an naton sa bawtismo ni Jesus kag kon ano ang makabulig sa isa para mahimo ining importante nga desisyon.

4. May matun-an kita sa bawtismo ni Jesus

Basaha ang Mateo 3:13-17 para mabal-an mo ang iban nga detalye parte sa bawtismo ni Jesus. Dayon binagbinaga ini nga mga pamangkot:

Lapsag bala si Jesus sang ginbawtismuhan sia?
Paano sia ginbawtismuhan? Ginbubuan lang bala sia sang tubig?

Ginsugdan ni Jesus ang asaynment nga ginhatag sa iya sang Dios diri sa duta sang ginbawtismuhan sia. Basaha ang Lucas 3:21-23 kag Juan 6:38, dayon binagbinaga ini nga pamangkot:

Sa tapos nabawtismuhan si Jesus, ano ang gin-una niya sa iya kabuhi?

5. Puede mo tinguhaan nga magpabawtismo

Basi nagahunahuna ka nga mabudlay ang pagdedikar kag pagpabawtismo. Pero samtang nagauswag ka sa imo pagtuon, makadesisyon ka na sa ulihi nga magpabawtismo. Tan-awa ang VIDEO, para makita mo ang pila nga naghimo sini nga desisyon.

VIDEO: Pabakura ang Imo Kaangtanan kay Jehova (1:11)

Basaha ang Juan 17:3 kag Santiago 1:5, dayon binagbinaga ini nga pamangkot:

Ano ang makabulig para mangin handa ang isa sa pagpabawtismo?

A. Babayi nga nagahimo sing personal nga dedikasyon sa Dios paagi sa pangamuyo.

B. Amo gihapon nga babayi nga nagpabawtismo bilang isa sa mga Saksi ni Jehova paagi sa pagtum-oy sa iya sa tubig.

Ang dedikasyon amo ang pagsugid kay Jehova nga gusto naton sia alagaron sing wala katapusan
Ang aton bawtismo nagapakita sa iban nga nakadedikar na kita sa Dios

6. Kon mabawtismuhan kita, mangin bahin kita sang pamilya ni Jehova

Kon mabawtismuhan kita, mangin bahin kita sang nahiusa nga pamilya sa bilog nga kalibutan. Bisan pa lainlain ang aton ginhalinan, isa lang ang aton ginapatihan kag sulundan sa moral. Basaha ang Salmo 25:14 kag 1 Pedro 2:17, dayon binagbinaga ini nga pamangkot:

Kon mabawtismuhan ang isa, ano ang epekto sini sa iya relasyon kay Jehova kag sa iban nga nagasimba man kay Jehova?

Mga piktyur: Nabawtismuhan na nga sister nga malipayon nga nagapamensar sang iya maayo nga relasyon sa iban sa kongregasyon. 1. Nagapautwas sia sa isa ka sister. 2. Ginabuligan niya ang may edad nga sister sa paglakat. 3. Nagakaon sila sang iya mga abyan nga lainlain ang edad. 4. Nagabantala sia sa isa ka tawo upod ang isa pa ka sister. 5. Naga-selfie sia upod sa duha ka Saksi nga lain ang rasa sa isa ka kombension.

KON MAGSILING ANG IBAN: “Indi pa ako handa magpabawtismo.”

Kon amo sina ang ginabatyag mo, maayo bala nga tinguhaan mo gihapon nga magpabawtismo?

SUMARYO

Si Jesus nagsiling nga dapat magpabawtismo ang mga Cristiano. Para mahimo ina, dapat tinguhaan sang isa nga mangin mabakod ang iya pagtuo kay Jehova, sundon ang Iya mga sugo, kag idedikar ang iya kaugalingon.

Rebyu

Ano ang bawtismo, kag ngaa importante ini?
Ano ang buot silingon kon magpabawtismo ang isa?
Ano ang mga dapat himuon sang isa antes sia magdedikar kag magpabawtismo?

Petsa nga natapos ini nga leksion:

Ang Puede Mo Himuon

Tan-awa ang mga checklist sa katapusan sang Seksion 4 nga “Handa Na Bala Ako Magbantala Upod sa Kongregasyon?” kag “Handa Na Bala Ako Magpabawtismo?,” para mabal-an mo kon ano ang imo himuon para mangin handa ka sa ulihi.

Iban pa:

Your other goal

DUGANG NGA IMPORMASYON

Hibalua kon ano ang bawtismo, kag kon ano ang sala nga pagpati parte sini.

“Ano ang Bawtismo?” (Artikulo sa website)

Usisaa kon ano ang himuon sang isa para mabawtismuhan sia.

“Ang Gugma kag ang Pagpasalamat kay Jehova ang Magapalig-on sa Imo nga Magpabawtismo” (Ang Lalantawan, Marso 2020)

Basaha kon ngaa ang desisyon sang isa ka lalaki nga magpabawtismo wala lang nabase sa iya balatyagon.

“Gusto Nila nga Hibaluon Ko Mismo ang Kamatuoran” (Ang Lalantawan, Pebrero 1, 2013)

Basaha kon ngaa maayo gid nga tinguhaan mo nga magpabawtismo, kag ano ang himuon mo para mahandaan ini.

“Should I Get Baptized?” (Questions Young People Ask—Answers That Work, Volume 2, kapitulo 37)

a Kon ang isa nabawtismuhan sa iban nga relihion sang una, ngaa dapat sia magpabawtismo liwat? Kay ina nga relihion wala nagatudlo sang kamatuoran sa Biblia.—Tan-awa ang Binuhatan 19:1-5 kag ang Leksion 13.