Ngaa Dapat Mangin Amo Sina?

NGAA tuman ka lapnag ang pagkawalay katarungan? Ang duha ka kasulatan sa Biblia magabulig sa aton nga masabat ina nga pamangkot. Ang nahauna yara sa Jeremias kapitulo 10, bersikulo 23, kag amo sini ang ginasiling:

“Ang dalanon sang tawo wala sa iya kaugalingon. Wala sa tawo nga nagalakat sa pagmando sang iya mga tikang.”

Ginapakita sini nga ang tawo wala masangkapi agod gamhan ang iya kaugalingon. Ngaa? Una, bangod duna sia nga makasasala. Ang Dios mismo nagsiling: “Ang huyog sang tagipusuon sang tawo malain kutob sang iya pagkabata.” (Genesis 8:21) Kon amo ang mga kasugoan kag mga kustombre sang tawo nagapapabilin sang tanan nga sahi sang pagkaindi palareho. Halimbawa, ginapakamaayo sang iban nga hiloan ang ila kaugalingon sing sigarilyo ukon tukoron ang moderno nga mga hinganiban nga makalaglag sa masa sa baylo nga hatagan sing matinlo, preska nga tubig ukon bastante nga pagkaon yadtong mga nagakinahanglan.

Kulang man ang tawo sing bastante nga kaalam. Gani, subong sa kaso ni Roy, ang mga kasugoan nga gindesinyo nga mangin makatarunganon sarang makadul-ong sa grabe nga pagkawalay katarungan. Bisan pa madamung mga indibiduwal kag mga organisasyon ang nagapangabudlay sing lakas agod paluntaron ang katarungan sa panglawas, pagpanagtag sang kalan-on, kag mga kahimtangan sa ekonomiya, indi nila ini mahimu. Sa madamung kaso, wala gid sila makahibalo kon paano.

Ang kamatuoran amo, ang tawo wala pagdesinyoha nga “tuytuyan,” ukon gamhan ang iya kaugalingon sing kinaugalingon, ukon sing hilway. Gindesinyo sia nga gamhan sang mas mataas nga gahom, sang Dios. Kag bangod, sing maragtason, ginsikway sang kalabanan ang paggahom paagi sa Dios, nagsulod ang isa pa ka gamhanan espirituhanon nga kusog agod impluensiahan sila. Ginpatuhoyan ini nga espiritu sa ikaduha nga kasulatan nga nagabulig sa pagpaathag sang pagkalapnag sang pagkawalay katarungan karon. Nagasiling ini:

“Ang bug-os nga kalibutan yara sa gahom sang malauton.”

Amo ini ang pinamulong ni apostol Juan. (1 Juan 5:19) Sin-o ang “malauton”? Ti, si Satanas nga Yawa, nga gintawag man nga “Dios sining sistema sang mga butang.” (2 Corinto 4:4) Si Satanas kag ang iya mga demonyo mas gamhanan sang sa aton. Wala sila sing interes nga makita ang katarungan nga nagapangibabaw. Sa katunayan, tubtob nagaluntad ang pagkawalay katarungan, ang mga tawo ginaupangan gikan sa pagpangita sa Dios, kag ginabasol pa gani sia sang iban tungod sa pagkawalay katarungan. Gani, ginatuman sang pagkawalay katarungan ang katuyoan ni Satanas.

Ang Biblia nagasiling sa aton: “Si Jehova nagahigugma sang katarungan, kag wala nagabiya sa iya mga matutom.” (Salmo 37:28) Nian, ngaa gintugotan niya ang tawo nga gamhan ang iya kaugalingon kag magpaidalom sa impluensia ni Satanas, kag sa amo nagaantus sing tuman kadamu nga pagkawalay katarungan kag iban pa nga kalautan? Binagbinagon ini sang masunod nga artikulo.