Katarungan Para sa Tanan—Paano Ini Matabo?
NGAA gintugotan ni Jehova ang pagkawalay katarungan nga magbugana sa duta? Bangod amo sina ang luyag sang mga tawo! Sang una, tuhay ini. Sang una sila nga gintuga, sanday Adan kag Eva wala mag-antus sa idalom sang lulan sang pagkadihimpit. Bahin sila sang tinuga nga siling sang Dios mismo “tuman kaayo.” (Genesis 1:31; Deuteronomio 32:4) Dugang pa, wala sing Satanas, kag ang tawo direkta nga ginagamhan sang Dios. Kon amo, sang primero wala sing pagkawalay katarungan.
Apang wala yadto magdugay. Nagrebelde ang isa ka himpit espiritu nga tinuga kag nangin Satanas. Nagpakunokuno nga isa ka man-ug, ginlingaw niya kay Eva ang ideya tuhoy sa kahilwayan. Isa lamang ka pagdumili ang ginhatag sang Dios sa nahaunang tawhanon nga mag-asawa. Dili nila pagkaunon ang bunga sang isa ka kahoy. Kon kaunon nila, mapatay sila. Apang ginsilingan ni Satanas si Eva: “Dili ka mapatay sing totoo. Kay ang Dios nakahibalo nga sa adlaw nga magkaon kamo sa iya nian magamuklat ang inyo mga mata kag mangin kaangay sang Dios kamo, nga nakakilala sang maayo kag malaut.”—Genesis 3:1-5.
Ginlapas ni Eva, kag nian ni Adan, ang kasugoan sang Dios. Luyag nila mangin kaangay sang Dios, nga himuon ang ila kaugalingon nga desisyon tuhoy sa maayo kag malain. Gani, gintalikdan nila ang Dios kag ginbuksan ang dalan para tukoran sang tawhanon nga pagginahom, upod ang tanan nga mga problema sini.
Naagom man nanday Adan kag Eva ang pagbag-o sa pisikal. Ginpakamalaut sila sang Dios sa kamatayon, subong sang ginsiling niya nga himuon niya. Nangin dihimpit sila, kag nagdul-ong ini sa paglain sang bug-os tawhanon nga rasa—sang ila kaanakan. Si apostol Pablo nagpaathag: “Paagi sa isa ka tawo [Adan] nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala.” (Roma 5:12) Sa sining paagi ang gamot nga kabangdanan sang pagkawalay katarungan nag-ulhot.
Apang, aton mabasa: “Paagi sa katarungan ang hari nagapalig-on sang duta.” (Hulubaton 29:4) Ang tawhanon nga katilingban indi bug-os nga ‘maglig-on’ ukon nahamtang sing mayo tubtob ugyonan ang katarungan sa bug-os nga duta. Mahanabo bala ina?
Ang Ginharian sang Dios kag ang Katarungan
Sanglit si Jehova nga Dios “nagahigugma sang katarungan,” makasiguro kita nga mahanabo ini. (Salmo 37:28) Apang paano? Ang ginasiling sang Pangamuyo sang Ginuo nagasugid sa aton. Sing siniglo ang hanuot nga mga Cristiano nangamuyo: “Pakaria ang imo ginharian. Himoa ang imo kabubut-on, kon ano sa langit, amo man sa duta.” (Mateo 6:10) Gani, paagi sa Ginharian sang Dios, himuon sa ulihi diri sa duta kon ano ang luyag sang Dios.
Ang Ginharian sang Dios matuod nga pangulohan. Langitnon ini, busa mas gamhanan sang sa bisan anong tawhanon nga pangulohan. May hari ini nga gintangdo sang Dios, ang Hari subong nga amo si Jesucristo, nga nabalaka katama sa katarungan. (Salmo 72:12-14) Si Jehova nagasaad nga iya pakamaayuhon ining pagginahom sang Ginharian sa idalom ni Cristo, “sa paglig-on sini kag sa pagtib-ong sini sa katarungan kag sa pagkamatarong.”—Isaias 9:7.
Madamung mga tagna nga nagmatuod karon ang nagapamatuod nga ang Ginharian isa na ka katunayan. (Lucas 21:31, 32) Si Jesus isa na ka Hari! Apang paano niya tumanon ang katarungan sa katawhan bangod sang tanan nga mga sablag? Tan-awon naton.
Ginatuyo sang Dios nga ang iya Ginharian sa idalom ni Cristo mangin bug-os kalibutan nga pangulohan. Si Jehova matagnaon nga nagasiling: “Sia [si Cristo] may kagamhanan man kutob sa dagat pa dagat kag kutob sa Suba tubtob sa kaukbongan sang duta.” (Salmo 72:8) Kon matuman ini sa bug-os nga globo, ang daku nga ginhalinan sang walay katarungan madula. Indi na paggamhan sang tawo ang iya kaugalingon. Apang pano ini mahanabo kon tuman kadamu nga pangulohan ang nagaluntad karon, ang tagsa naimon katama sa iya kaugalingon nga pagkasoberano?
Ang katunayan amo, ang Dios nagpahamtang sing limite sa tion kon san-o magapanghikot ang tawhanon nga mga pangulohan, kag ina nga limite sa tion nag-abot na. Nahanungod sa tanan nasyonalistiko nga mga pangulohan sa aton adlaw, si manalagna Daniel nagsulat: “Sa mga adlaw sadto nga mga hari magapatindog ang Dios sang langit sing Ginharian nga dili gid malaglag, ukon ang pagbulut-an sini ibilin sa iban nga katawhan. Kag dugmokon sini kag papason ini tanan nga ginharian, kag ini magapadayon sa gihapon.”—Daniel 2:44.
Sa sining paagi, ang isa ka bug-os kalibutan nga pangulohan, ang Ginharian sang Dios, magabulos sa dili madugay sang karon nasyonalistiko nga mga pangulohan kag gamhan ang tawo sa katarungan. Daw ano kadaku nga pagbalhin para sa mas maayo ina! Apang, ibilin gihapon sini ang problema tuhoy kay Satanas. Paano sia dulaon sang Ginharian sang Dios?
Ang Ginharian sang Dios kag si Satanas
Si Satanas nagluntad sing temprano sa maragtas sang tawo, kag sia amo ang nahauna nga nagpanugda kay Eva sang ideya tuhoy sa pagrebelde batok sa Dios. Busa, sang ginpahibalo ang pamatbat kanday Adan kag Eva tungod sang ila sala, wala pagkalimti sang Dios si Satanas. Gintagna niya ang pagkari sang “binhi” nga magapamatok kay Satanas, kag sa ulihi magalaglag sa iya: “Butangan ko sing kaawayon . . . sa tunga sang imo binhi kag sang iya binhi. Dugmokon ka niya sa ulo kag dugmokon mo sia sa tikod.” (Genesis 3:15) Subong sang natabo, ining ginsaad nga binhi amo si Jesucristo. (Galacia 3:16) Duha ka talalupangdon nga pag-atubangay ang natabo na sa ulot ni Satanas kag ni Jesus bilang bahin nga katumanan sinang dumaan nga tagna.
Ang nahauna daw kadalag-an para kay Satanas. Ginmaniobra niya ang kamatayon ni Jesus sa usok sang pag-antos. Busa ang “tikod” ni Jesus ‘gindugmok.’ Apang wala maglawig ang kadalag-an ni Satanas. Ginbanhaw si Jesus gikan sa minatay kag ginpakataas sa mataas nga posisyon sa langit. (Binuhatan 2:23, 24, 32-36) Didto, ginpurongpurongan sia sang ulihi ni Jehova nga Dios subong Hari sang Ginharian sang Dios. Nian ang isa pa ka maragtason nga pag-atubangay natabo.
Ang mga resulta ginlaragway sa Biblia: “Ginhulog ang dakung dragon, yanang dumaan nga man-ug, nga ginatawag nga Yawa kag Satanas, ang manugdaya sang bug-os nga kalibutan; ginhulog sia sa duta, kag ang iya mga manugtonda ginhulog kaupod niya.” Ang resulta? Kalipay sa langit, nga natinloan na karon sang malaut nga presensia ni Satanas. Apang “kailo sa duta kag sa dagat, kay ang yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.” (Bugna 12:9, 12) Nagakabuhi kita sa sinang “malip-ot nga tion” karon. Madamu sang mga pagkawalay katarungan nga makita naton karon ang tuga sang “dakung kasingkal” ni Satanas.
Apang sa dili madugay magaabot ang isa pa ka pag-atubangay sa tunga ni Satanas kag ni Jesucristo. Ginalaragway man ini sang Biblia: “Gindakup niya ang dragon, yanang dumaan nga man-ug, nga amo ang Yawa kag Satanas, kag gingapus sia sing isa ka libo ka tuig. Kag gintagbong sia sa kadadalman, kag gintakpan ini kag ginpat-inan sa ibabaw niya, agod nga indi na niya pagdayaan ang mga pungsod tubtob nga matapos ang isa ka libo ka tuig.”—Bugna 20:2, 3.
Mahanabo ini sa dili madugay, kon buslan sang Ginharian sang Dios ang nasyonalistiko nga mga pangulohan sining kalibutan. Magadul-ong ini sa ulihi sa katapusan nga pag-atubangay kon, subong sang matagnaon nga ginalaragway sang Biblia, “ang Yawa . . . gintagbong sa linaw nga kalayo kag asupre” padulong sa ila kalaglagan, ang ulihi nga ‘pagdugmok sang iya ulo.’—Bugna 20:10.
Gani, ang isa pa ka upang sa katarungan dulaon. Apang nagabilin gihapon ina sa aton sang problema tuhoy sa dihimpit tawhanon nga kinaugali sang tawo. Ang kalabanan nga pagkawalay katarungan sa kalibutan naghalin sa tawo mismo. Ano ang sarang nga mahimu sang Ginharian sang Dios tuhoy sina?
Ang Ginharian sang Dios kag ang Pagkadihimpit sang Tawo
Ang pagkadihimpit sang tawo nagsugod sang magpakasala sanday Adan kag Eva. (Roma 5:12) Ang tanan nga kaliwat ni Adan, luwas sa isa, makasasala. Ang wala malakip amo si Jesus. Natawo sia sa milagruso nga paagi nga wala sing sala, kag sa bug-os niya nga kabuhi nagpabilin sia nga matutom kag walay sala. (Hebreo 7:26) Gani, sarang sia makahatag sang himpit tawhanon nga kabuhi subong gawad para sa dihimpit nga katawhan. Ginlubad niya ang problema tuhoy sa pagkadihimpit sang tawo. “Kay bangod sa tawo nag-abot ang kamatayon, bangod man sa tawo ang pagkabanhaw.”—1 Corinto 15:22.
Sa ulihi, yadtong nagainsister nga magpanghikot sing dimakatarunganon makasapo nga wala sing duog para sa ila sa matinlo nga duta sa idalom sang Ginharian sang Dios. Apang yadtong nagatuo sa halad ni Jesus magaani sing dakung mga pagpakamaayo. “Ang matadlong magapuyo sa duta, kag ang himpit magapabilin sa sini. Apang ang malauton utdon gikan sa duta, kag ang maluib gabuton sa sini.” (Hulubaton 2:21, 22) Busa ang isa pa ka upang sa katarungan pagakuhaon.
Ang Ginharian sang Dios kag Ikaw
Huo, si Jesus, subong Hari sang Ginharian sang Dios, magadula sa ulihi sang tanan dalagku nga mga upang sa pagtan-aw naton sing katarungan para sa tanan sa duta. Nian makita sang katawhan nga matuman ang saad: “May bag-ong mga langit kag bag-ong duta nga ginahulat naton . . . kag sa sini magapuyo ang pagkamatarong.” (2 Pedro 3:13) Sa sinang matarong nga duta wala na sing duog para sa pagkawalay katarungan.
Sa pagkamatuod, ining mga pagpakamaayo yara sa palaabuton. Apang, bisan karon, ang Ginharian sang Dios sa idalom ni Cristo Jesus aktibo, kag sarang kita makabenepisyo gikan sa sini. Si Jesus mismo nagtagna nga sa aton adlaw “iwali ining maayong balita sang ginharian sa tanan napuy-an nga duta nga panaksi sa tanan nga pungsod.” (Mateo 24:14) Ina nga tagna natuman. Madamu ang nagasabat sa pagbantala kag nagpasakop sang ila kaugalingon sa sinang Ginharian bisan karon. Sa sining paagi katumbas sila sa sining matagnaon nga pinamulong: “Mahanabo nga sa ulihing mga adlaw nga . . . madamung mga katawhan magakadto kag magasiling: ‘Kari kamo, magataklad kita sa bukid ni Jehova, sa balay sang Dios ni Jacob; kag tudloan niya kita sang iya mga dalanon kag magalakat kita sa iya mga banas.’ Kay gikan sa Sion magaguwa ang kasugoan, kag ang pulong ni Jehova gikan sa Jerusalem.”—Isaias 2:2, 3.
Ang minilyon sa bug-os nga duta nga nagapahisuno sa sinang tagna nagatuon sang Biblia kag nagatuon sa pagkabuhi sa paagi nga luyag sang Dios nga igakabuhi nila. Subong man, ginatinguhaan nila nga magkabuhi nahisuno sa nga pulong ni manalagna Miqueas: “Sa paghimu sing katarungan kag sa paghigugma sang kalulo kag sa paglakat sing mapainubuson upod sa Dios.’ (Miqueas 6:8) Busa ginapakita nila ang kahanuot sang ila handum nga magkabuhi sa idalom sang pangulohan sang katarungan. Bisan karon nagaagom sila sing madamung mga pagpakamaayo gikan sa sinang pangulohan subong nga ang tagna ni Isaias natuman: “Toloka! Ang isa ka hari magahari sa pagkamatarong; kag ang mga prinsipe magagahom sa katarungan.”—Isaias 32:1.
Luyag mo bala makita ang kalibutan diin nagapangibabaw ang katarungan? Kon amo, ibutang ang imo pagsalig sa Ginharian sang Dios. Makig-upod karon sa katawhan nga may amo man nga handum. Nian hulata nga may pagsalig ang magkabuhi sing dayon sa idalom sang paggahom sang Dios nga “nagahigugma sang pagkamatarong kag katarungan.”—Salmo 33:5.