Ang Mabuhi sing Dayon—Isa Lamang bala ka Damgo?
ANG danyag amo ang matahom nga uma sa nabagatnan nga Aprika. Isa ka panong sang manok ang nagalibotlibot sa kabungyoran. Sing hinali nagsinalasala sila. Duha ka maitom nga agila ang naghagunos kag nangdagit, samtang ang mga manok, nagsalasala nga nagakutkutak kag nagpangita sing palanagoan. Nakapatay ang isa ka agila kag ginkaon ini. Ang iban nga manok nagkalma kag nangita uli sing kalan-on sa malapit—wala nila pagsapaka ang kamatayon sang ila kaupod.
Duna nga ginatinguhaan nga likawan sang tanan nga kasapatan ang kamatayon, apang masami nga wala sila maapektohi kon ang iban mapatay. Ang pagpatay sang leon kag iban pa nga manunukob sa antelope (daw usa nga sapat) nagatuga sing diutay nga reaksion sa nagkalabilin sang panong. Rutina ini nga hitabo sang karon kabuhi-kag-kamatayon nga siklo.
Tuhay gid ini sa mga tawo! Ang makita ang isigkatawo na napatay isa ka malain nga inagihan—luwas sa pila nga nangin bat-olan na sa kamatayon. Sing normal, ang pagkapatay sang hinigugma amo ang labing makapahuol nga butang nga maagihan sang tawo. Mahimu ini tunaan sang paghikog sang namatyan.
Nagakabuhi kita sa magamo nga dag-on diin ang paghikog nagadugang kag minilyon ka tawo ang nagakabuhi sing miserable. Apang ginahimu sang kalabanan ang bug-os nila nga masarangan agod mabatoan ang ginatawag sang Biblia nga dakung “inaway,” ang kamatayon.—1 Corinto 15:26.
Ang Eliksir sang Kabuhi
Sa madamung siglo, ang mga tawo nga ginatawag alchemists nagtinguha sing lakas nga matukiban ang eliksir sang kabuhi. Amo ini ang misteryuso nga sustansia nga kuno magapasalig nga ang tawo mabuhi sing dayon. Madugay na nga gindamgo kag ginpangita sang madamu ini nga eliksir. Apang, sing hayag, napaslawan ang mga alchemist.
Apang, sining karon lang, ang ginpauswag nga palatukoran sa ikaayong lawas, siensia mediko kag iban pa nagakaigo nga nagpalawig sang kabuhi. Suno sa isa ka balita, “para sa katawhan sa kabilogan, ang kalawigon sang kabuhi nagdoble, kutob sa 30 ka tuig sang 1900 tubtob sa mga kan-uman karon.” Gani sa banta sang iban ang modernong sientipiko mahimu makatukib sang sekreto ukon mga sekreto sa ginpalawig—sa walay katapusan—nga kabuhi. Ikaw bala?
Ano man ang ginalauman sang tawo sa sina, ang kamatuoran nga ginhambal sang nagligad nga milenio naaplikar gihapon:
“Ang mga adlaw sang amon mga tuig kapitoan ka tuig; ukon bisan bangod sang kabakud kawaloan ka tuig, apang ang ila bugal kabudlayan lamang kag kasubo; sa madali nagataliwan ini, kag nagalupad kami.”—Salmo 90:10.
Subong sang napanilagan mo, pila lamang ang nabuhi lampas sa mga 80.
Apang, madamung tigulang ang wala na lamang maghulat sang ila nagahilapit nga kamatayon kundi nawili pa gid sa kabuhi. Sa katunayan, samtang nagatigulang ang ila interes nagadugang. Daku nga ihibalo kag inagihan ang ila natipon kag nakigbahin sila sa madamung mga hilikuton. Sing hinali napauntat sila. Para sa normal, maayo sing panglawas nga tawo, ang kamatayon wala maluyagi, indi natural. Subong sang ginsiling sang isa ka gatuson na ang edad: “Indi ko luyag mapatay bangod mahal ko ang kabuhi.”
Ang Biblia nagahambal tuhoy sa mga sapat subong “natawo nga dakpon kag patyon.” Apang nahanungod sa mga tawo ini nagasiling: “Ang Dios . . . nagbutang sa ila hunahuna sang pagkamapinadayunon.” (2 Pedro 2:12; Manugwali 3:10, 11, Byington) Sa iban nga hambal, ang mga sapat wala pagtuyoa nga mabuhi sing dayon, apang ang tawo gintuyo sa sina. Ang nahaunang mag-asawa wala pagtugaha agod mapatay kundi agod mabuhi sing dayon—lamang nga magmatinumanon sila sa Dios.—Ipaanggid ang Genesis 2:15-17.
Ang kamatuoran amo nga ginapamatod-an ini sang imo utok. Ang utok sang tawo may daku nga ikasarang sa paghibalo; diutay lamang nga bahin ang ginagamit sa karon.
Indi bala ini tanan nagapakita nga ang karon kabuhi-kag-kamatayon nga siklo indi amo ang tuyo sang Dios kag ang mabuhi sing dayon indi lamang isa ka damgo? Daw ano ka makakulunyag nga hulunahunaon! Kon amo, may yara bala matuod nga eliksir sang kabuhi? Para bala sa imo ang mabuhi sing dayon?