Natandog sang Integridad sang mga Saksi ni Jehova

SANG 1978 ginduaw ni Christin E. King ang sanga talatapan sang mga Saksi ni Jehova sa London, Inglaterra. May kahilabtanan sa isa ka tesis nga ginhanda niya sa iya pagkadoktora, nangita sia sing impormasyon nahanungod sa mga inagihan sang mga Saksi sa Alemanya sadtong ikaduhang inaway kalibutanon. Samtang ginatipon ang iya materyal, natandog gid sia katama sa wala nagakompromiso nga tindog sang mga Saksi ni Jehova sa Nazi Alemanya amo kon ngaa namat-od sia nga ihanda kag pasangkaron ang iya tesis agod mabalhag ini subong isa ka libro. Sa tapos mabaton ang iya titulo subong doktora, nagsulat sia sa sanga talatapan: “Natukiban ko ang akon sinulat nahanungod sa mga Saksi ni Jehova nga mahangkaton katama kag gindayaw ko gid ang sabat sang Aleman nga mga Saksi sa mga Nazi: Ginalauman ko nga ang libro ko magapaathag sini.” Ang titulo sang libro ni Dr. King amo ang The Nazi State ang the New Religions: Five Case Studies in Non-Conformity.

Ang pinakatalalupangdon sa natukiban ni Dr. King amo ang kadamuon sang kamatayon kag pagkabilanggo sang mga Saksi ni Jehova. Ginapakita sini nga ang kadamuon nga ginbalhag anay sang mga Saksi diutay katama. Ang ginkuhaan ni Dr. King sining mga estadistika amo ang isa ka tomoa nga ginbalhag sa Munich, Alemanya, ni Michael Kater. “Ang akon pagbasa sa mga rekord sang Hukmanan kag Gestapo,” siling niya, “magasuportar sining mataas nga kadamuon.”

Ano ining mga kadamuon?

“Mga 10,000 ang ginbilanggo, kag sing tingob nakabaton sila sing pamatbat nga may kabug-osan nga 20,000 ka tuig. Isa sa kada duha ka Aleman nga Saksi ang ginbilanggo, isa sa apat ang napatay.

“Walay sapayan sang mabudlay nga kahimtangan,” padayon niya, “ang mga Saksi sa mga kampo nagtipon kag nangamuyo sing tingob, naghimu sing mga literatura kag nangombertir. Ginsakdag sang ila pagpakig-upod, kag indi kaangay sang madamu iban pa nga mga bilanggo, alisto katama sang mga rason kon ngaa yara ina nga mga lugar kag kon ngaa nagaantos sila, ang mga Saksi diutay lamang apang madumduman nga hubon sang mga bilanggo, ginmarkahan sang duag-ube nga trianggulo kag kilala bangod sang ila kaisog kag pagtuo.”

Ginhimu ni Dr. King ining dugang nga pagbanabana: “Ang teolohiko nga mga prinsipio gintuman; ang mga Saksi nagpabilin nga ‘neutral’, bunayag sila kag bug-os nga masaligan kag gani, sing makatilingala, masami nga nagaobra subong mga suluguon sang S.S. (ang organisasyon nga nagapalakat sang mga kampo konsentrasyon). Ang isa ka opisyal sang S.S. nagkomento nga isa ka Saksi ni Jehova lamang ang masaligan sa pagbarbas sa iya agalon sing matalom nga labaha nga indi mapilas.

Sa tapos magkomento nga napahog sang pagginahom sang Nazi ang iban nga mga sekta sa pagkompromiso, si Dr. King nagsiling: “Batok lamang sa mga Saksi nga wala magmadinalag-on ang gobierno, kay bisan napatay nila ang linibolibo, ang hilikuton [nga pagbantala sang Ginharian ni Jehova] nagpadayon kag sang Mayo 1945 ang hublag sang mga Saksi ni Jehova yara gihapon, samtang wala na ang pungsodnon nga Sosyalismo. Nagdamu ang kadamuon sang mga Saksi kag wala sing ginhimu nga mga pagkompromiso. Natigayon sang hublag sang mga martir kag madinalag-on nga nakapakig-away sing isa pa ka inaway sa inaway ni Jehova nga Dios.”

[Footnote]