Kon Ngaa Dapat Kita Mangin Indi Bahin sang Kalibutan
“Indi sila bahin sang kalibutan subong nga ako indi bahin sang kalibutan.”—JUAN 17:16.
1. Ano nga sahi sang pagtratar ang siling ni Jesus nga paabuton sang iya mga sumulunod?
SI Jesucristo ginsikway, gindumtan kag ginhingabot pa gani sining kalibutan. Gani ano ang paabuton sang iya mga sumulunod? Bueno, ginsilingan niya sila: “Kon ang kalibutan nagadumot sa inyo, kilalaha ninyo nga ini nagdumot sa akon sing una sa inyo. Kon kamo iya sang kalibutan, ang kalibutan magahigugma sang iya kaugalingon. Apang bangod nga kamo indi bahin sang kalibutan, kundi ginpili ko kamo gikan sa kalibutan, busa ang kalibutan nagadumot sa inyo. Dumduma ang pulong nga ginsiling ko sa inyo, Ang ulipon indi daku pa sa iya agalon. Kon ginhingabot nila ako, hingabuton man nila kamo; kon ginabantayan nila ang akon pulong, bantayan nila ang inyo man.”—Juan 15:18-20.
2. (a) Ano ang “kalibutan” diin tuhay katama ang mga sumulunod ni Cristo? (b) Sa baylo nga kuhaon gikan sa kalibutan ang mga disipulo ni Cristo, ano ang ginahimu ni Jehova tungod sa ila?
2 Huo, tuhay gid katama ang matuod nga mga sumulunod ni Jesus gikan sa sining kalibutan—ang makasasala nga katilingban sang tawo nga nahamulag gikan sa Dios. Amo sina kon ngaa ang mga disipulo ni Cristo gindumtan kag ginhingabot sining kalibutan. Apang bangod sang pagkadikalibutanon, ginasunod sang mga sumulunod ni Jesus ang iya maayo katama nga halimbawa, kag ginatipigan sila ni Jehova nga Dios nahisuno sa pangamuyo ni Cristo: “Ako wala nagapangamuyo nga kuhaon mo sila sa kalibutan, kundi nga tipigan mo sila gikan sa malauton. Indi sila bahin sang kalibutan subong nga ako indi bahin sang kalibutan. Pakabalaana sila sa kamatuoran; ang imo pulong kamatuoran.”—Juan 17:15-17.
3. Nahanungod sining kalibutan, anong mga pamangkot ang nagakinahanglan sing sabat?
3 Ano ang buot silingon sang mangin “indi bahin sang kalibutan”? Ginapakita bala sini nga dapat likawan sang mga sumulunod ni Jesus ang tanan nga pagpakig-angot sa mga di-Cristiano?
Ang mga Cristiano Wala Nagapain sang Ila Kaugalingon
4. Ano nga hilikuton ang gintangdo ni Jesus sa iya mga sumulunod, nagapaimposible para sa ila nga painon ang ila kaugalingon?
4 Sang pat-od, wala ginapaabot ni Jesus sa iya mga sumulunod nga painon nila ang ila kaugalingon sa eksklusibo nga relihiosong komunidad. Sa baylo, ginhatagan niya sila sing nagalibot sa globo nga hilikuton nga himuon, nga nagasiling: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Ginsugo man niya sila: “Busa lakat kamo kag himuon nga mga disipulo ang mga tawo sang tanan nga kapungsoran, nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo. Kag, toloka! ako kaupod ninyo sa tanan nga adlaw tubtob sa konklusion sang sistema sang mga butang.” (Mateo 28:19, 20) Siempre, samtang “ang mga tawo sang tanan nga kapungsoran” mangin mga disipulo, indi mapaabot nga batunon mismo sang tanan nga kapungsoran ang mga panudlo ni Jesucristo.
5. Paagi sa anong Makasulatanhon awtorisado nga paagi ginkombertir ang mga tawo sa Cristianismo?
5 Apang ang iban basi magkomento: ‘Indi bala nga ang tanan nga kapungsoran nakombertir sa Cristianismo? Kag wala bala sila nagahuman sa kon ano ang nakilala-an nga Cristiandad?’ Bueno, ginpat-od sang pila ka gumalahom sang relihion ang ila mga sinakpan kag wala mangalag-ag tuhoy sa pagpilit sina nga pagpat-od paagi sa mapintas kag mabangis nga metodo. Dugang pa, ang kahadlok nga mag-antos sa himuhimu nga kalayuhon nga impierno posible nga rason sa ginatawag nga pagkombertir sa ginatawag lamang sa ngalan nga Cristiano. (Ipaaggid ang Manugwali 9:5, 10) Apang daw ano kalayo ini gikan sa awtorisado lamang nga paagi sang Kasulatan sa pagpalapnag sa matuod nga Cristianong pagtuo! Inang dungganon nga hilikuton pagahimuon paagi sa aktibo nga pagpanaksi, pagtudlo kag paghimu sing disipulo. Ang mga hermit ukon mga mongha kag mga madre indi gid makahimu sina nga hilikuton ukon makasunod sa sugo ni Cristo nga ‘paiwaga ang imo kapawa sa mga tawo.’ (Mateo 5:14-16) Kag ang pilit nga “pagkombertir” indi pareho sa pagpanaksi, pagbantala kag pagtudlo nga nagbulig sa bunayag tagipusuon nga mga tawo sang tanan nga kapungsoran nga makahimu sing intelihente tinagipusuon nga dedikasyon kay Jehova nga Dios.
Kon Ngaa “Indi Bahin sang Kalibutan”
6. Subong narekord sa Juan 13:35, ngaa masiling nga ang mga Saksi ni Jehova nagakaigo sa paglaragway ni Jesus sa iya mga sumulunod?
6 Ang ngalan “Cristiano” masami napamatod-an nga sayop nga ngalan. Daw ano kadamu nga buhat sang kakagud, pangdaug, pamatay sa inaway kag pagpigos sa mga masa ang mapabangod sa ginatawag nga Cristianong mga tawo kag kapungsoran! Apang tuhay gid ini sa matuod nga mga sumulunod ni Cristo! “Paagi sini mahibal-an sang tanan nga kamo akon mga disipulo,” siling ni Jesus, “kon kamo maghigugmaanay.” (Juan 13:35) Sa pagkamatuod, may mga tawo nga nagakabagay sa sinang paglaragway karon—mga Saksi ni Jehova. Ang ila paghigugmaanay nagakahulugan nga wala sing walay kaluoy nga paindisanay, wala sing kaakig, wala sing makagud nga pamentaha sa isa kag isa, wala sing pagbinahinbahin, nga ‘nahiusa sa isa ka painoino kag panghunahuna.’ (1 Corinto 1:10; 13; 4-8) Naton-an sang mga Saksi ni Jehova ang panghunahuna sang Dios kag ni Cristo kag ginatuytuyan sini. (Roma 12:1, 2; 1 Corinto 2:16) Ang tuman ka importante nga bahin sina nga panghunahuna amo nga ang mga Cristiano dapat mangin “indi bahin sang kalibutan.”—Ipaanggid ang Santiago 1:27.
7. Paano ginapakita sang ginsiling ni Pablo sa Binuhatan 17:30, 31 nga indi nagakaigo para sa mga Cristiano nga mangin bahin sining kalibutan?
7 May yara maayo gid nga mga rason para sa mga sumulunod ni Jesus nga mangin ‘indi bahin sining kalibutan.’ Sa mga 4,000 ka tuig, ang kalabanan nga katawhan ‘wala sing paglaum kag wala sing Dios sa kalibutan.’ (Efeso 2:12) Apang ang malawig nga dag-on nga nahamulag kay Jehova bangod sang tawhanon nga sala indi magapadayon sa walay katubtoban. Sang nagligad nga napulog-siam ka siglo si apostol Pablo nagsiling nga ang Dios “nagatugon sa mga tawo nga sila tanan bisan diin maghinulsul,” kay ‘nagtangdo Sia sing isa ka adlaw nga hukman niya ang kalibutan sa pagkamatarong paagi sa tawo nga iya gintangdoan,’ si Jesucristo. Si Pablo nagdugang nga ang Dios “naghatag sing kalig-onan sa tanan nga tawo paagi sa pagbanhaw (kay Jesus) gikan sa minatay.” (Binuhatan 17:30, 31) Ini nga “adlaw“ sang iya Milenyal nga Paggahom tuman na kalapit. Ang malaut nga kalibutan magataliwan. Pagahukman, pagatagudilian kag pagadulaon sing dayon. Dinagakaigo, nian para sa nagaangkon nga mga Cristiano nga mangin bahin sining kalibutan!
8. Ano nga hilikuton ang nagapakita nga malapit na ang “katapusan,” gani nagahatag sing isa pa ka rason sa mga Saksi ni Jehova nga mangin “indi bahin sang kalibutan”?
8 Kapin sa 1,900 ka tuig ang nagligad kutob sang ginbanhaw si Jesus, kag walay duhaduha nga ang balaan nga paghukom sa apostatang Cristiandad kag sa iban pa sa kalibutan ni Satanas malapit na. (2 Pedro 3:10; 1 Juan 5:19) Samtang, ang mga Saksi ni Jehova nagabantala sang mensahe sang Dios sa bug-os nga duta kag ang “panag-on sang pagpaumpaw” ginaagom sang mahinulsulon, mainapresyahon sa katawhan. (Binuhatan 3:19-21) Nagatuman sa matagnaon nga pinamulong ni Jesus para sa aton adlaw, kapin sa 2,650,000 ka saksi ni Jehova ang nagabantala karon ‘sining maayong balita sang ginharian’ sa 205 ka kadutaan. Kon inang hilikuton magaresulta sing “panaksi sa tanan nga kapungsoran” tubtob sa ginapahanugot sang Dios, “magaabot ang katapusan.” (Mateo 24:14) Sing pat-od, nian bangod ang katapusan sining malaut nga sistema tuman na kalapit, may maayo gid nga rason para sa katawhan ni Jehova nga mangin “indi bahin sang kalibutan.”
9. (a) Sanglit ang kalibutan ni Satanas manugtapos na, paano naton dapat tamdon ang mga intereses kag mga kinahanglanon sang Ginharian? (b) Anong mga pamangkot ang nagakaigo karon nga binagbinagon naton?
9 Sanglit ang kalibutan ni Satanas manugtapos na, daw ano ka importante siguraduhon nga aton gid ginapangita anay ang Ginharian sang Dios! (Mateo 6:33) Bisan ano man ang aton edad, edukasyon ukon kahimtangan sa kabuhi, “tanan kita nagaatubang sa lingkoran nga hukmanan sang Dios.” (Roma 14:10) Gani aton bala ginahimu sa aton kabuhi ang mga ginapatuman sang Ginharian? Ukon nagapanikasog pa bala gihapon kita nga magpahisuno sa sining kalibutan nga nagadumot sa matuod nga mga Cristiano? May yara bala kita kalibutanon nga mga ambisyon kag mga paglaum? Aton bala ginailog ang dimakasulatanhon nga moda sang kalibutan? Kag aton bala ginadayaw ang iya mga idolo? Dumduma nga “ang pagpakig-abyan sa kalibutan kaawayon sa Dios.” (Santiago 4:4) Busa, agod indi kita mangin kaaway sang Dios, paano naton malikawan nga malatnan kita sang kalibutan? Ano ang pila ka butang sa kalibutan nga dapat naton likawan?
Likawi ang Gugma sa Kalibutan
10. Anong tatlo ka butang sa sining kalibutan ang ginasambit sang 1 Juan 2:15, 16 nga dili dapat higugmaon sang katawhan ni Jehova?
10 Si apostol Pablo nagsulat: “Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma tungod sa Amay wala sa iya; kay ang tanan nga yara sa kalibutan—ang kailigbon sang unod kag ang kailigbon sang mga mata kag ang bugal sang kabuhi—indi iya sang Amay kundi iya sang kalibutan.” (1 Juan 2:15, 16) Ginsitar diri ni Juan ang tatlo ka sadsaran nga mga butang sa sining kalibutan nga indi dapat paghigugmaon sang katawhan ni Jehova.
11. Ngaa ang mga Cristiano indi dapat magpadala sa “kailigbon sang unod”?
11 “Ang kailigbon sang unod” magadul-ong sa aton sa madamung masakit kag makamamatay nga mga buhat nga kinaandan katama sa sining malaut nga kalibutan nga napaidalom sa pagkontrol ni Satanas. Ang iban sini amo ang “mga buhat” sang makasasala nga unod—“pagkamakihilawason, pagkahigko, pagkaulag, pagkadiwatahan, pagkababaylan, kaawayon, pagpinuyas, kaimon, kasingkal, pagbinahinbahin, katuhaytuhayan, herejia, pagkahisa, paghuboghubog, magansal nga kinalipay kag ang kaangay sini.” Indi naton mapasapayanan nga indi masilotan ang paandam ni apostol Pablo nga “ang nagahimu sang amo nga mga butang indi makapanubli sang ginharian sang Dios.” (Galacia 5:19-21) Sa pagkamatuod, yadtong dimahinulsulon nga nagabuhat sang “mga buhat sang unod” bahin sining kalibutan kag wala sing bahin sa ginsaad nga Ginharian nga magabindikar sa ngalan ni Jehova kag magahimu sa duta nga paraiso. (Lucas 23:43) Sing maathag, kon amo, ang mga Cristiano indi dapat magpadala sa “kailigbon sang unod.”
12. (a) Ano ang “kailigbon sang mga mata,” kag paano sini maapektohan ang posisyon sang isa sa espirituwal? (b) Nahanungod sa “kailigbon sang mga mata,” ano ang maayo nga ipamangkot naton sa aton kaugalingon?
12 “Ang kailigbon sang mga mata” isa pa ka karakteristiko sadtong bahin sang kalibutan. Samtang nagatipon sila sing manggad kag pagkabutang, daw wala sila maayawi. Ti, bisan ang madamu sang naghatag sing igtalupangod sa kamatuoran sang Biblia nga ginapalapnag sang mga Saksi ni Jehova nagpadala sang ulihi sa “kailigbon sang mga mata” kag, gani wala mag-uswag sa espirituwal. Ang ila pagkaibog sa bag-ong panapton, awto, balay, aplayans kag madamu iban pa nga butang nga nagapahamuot sa mata nangin tuman ka kusog nga, subong sang ginsiling ni Jesus, “ang paglimbong sang manggad kag kaibog sa iban nga mga butang nagasulod kag nagalumos sang pulong kag nangin dimabungahon ini.” (Marcos 4:18, 19) Sing makawiwili, ginsulay ni Satanas si Eva paagi sa pagpaibog sa iya sang butang nga ginadumilian nga makita sang iya mga mata. Apang, indi gid sia bug-os nga madinalag-on sa iya panikasog nga sulayon si Jesus nga magpakasala paagi sa paghingamo sa mga butang nga makita sang mga mata. (Genesis 3:1-6; Lucas 4:5-8) Apang kamusta ikaw? Imo bala ginasunod ang maayo nga halimbawa ni Jesus? Ukon ang pagpaayaw sa “kailigbon sang mga mata” nagkuha bala sang imo tion, igtalupangod kag kusog amo kon ngaa ang intereses sang Ginharian napatumbayaan? Kon ang espirituwal nga mga butang napahigad, maghulag gilayon nga maremedyuhan ina nga kahimtangan!
13. Subong ginpakita ni Pablo kag sang pila ka hulubaton, sa ano magadul-ong ang mahamkunon nga “kailigbon sang mga mata”?
13 Ang mahamkunon nga “kailigbon sang mga mata” sarang magdul-ong sa pagkadibunayag, kahisa, kaibog kag iban pa nga sala nga wala ginakahamut-i sang Dios. Subong sang ginsiling ni Pablo, ang “mga mahamkunon” isa sadtong indi “makapanubli sang ginharian sang Dios.” (1 Corinto 6:9, 10) Sing nagakaigo, man, ang maalam nga hulubaton nagapaandam: “Ang tawo nga matutom mabuganaan sing pagpakamaayo, apang ang nagadali nga magmanggaranon indi makaluwas sa silot. Ang may malaut nga mata nagadalidali sa pagmanggad, kag wala makahibalo nga ang kinawad-on magaabot sa iya.” (Hulubaton 28:20, 21) Kon indi dayon mamigado ang pila ka mahamkunon, mahisaon nga mga indibiduwal, mahimu sila nga mapatay nga wala sing kahamuot sang Dios ukon magadangat sa masubo nga katapusan sa konklusion sining sistema sang mga butang.—Mateo 24:3; Lucas 12:13-21.
14. (a) Paano mapadayag ang “bugal,” pagpadayaw kag pagtinguha sing posisyon? (c) Ngaa batoan ang pagsulay nga ipadayawdayaw ang aton mga naangkon kag mga natigayon?
14 “Ang bugal sang kabuhi” dapat man likawan sang mga alagad ni Jehova. Daw ano ka makasululay nga ipakitakita ang malahalon nga mga naangkon! Inang sayop nga handum masami nagadul-ong indi lamang sa pagtinguha nga makigdungan sa iban kundi sa panikasog man nga maglabaw sa ila sa materyal. May kahilabtanan sa sini amo ang pagpabugal sa kon ano ang ginabanta sang isa ka tawo nga iya natigayon. Nagalaum nga matigayon ang posisyon ukon kahimtangan, ayhan palambuon niya ang pagpakig-abyan kag pagsakdag sa kilala nga mga tawo. Apang yadtong nagapahanugot sang ila kaugalingon nga gamiton sa sining paagi mga buangbuang, kag ang sobra ka ambisyuso nga tawo ayhan sa ulihi mangin kaangay sang “mga didiosnon” sang kaadlawan ni Judas nga ‘nagainto sang mga tawo agod nga makapulus.’ (Judas 4, 16) Ang gamut sining tanan nga panikasog sa tindog kag bugal makasasala nga bugal. (Hulubaton 8:13; 16:18; 21:4) Sa pagkamatuod, nian, dapat naton batuan ang pagsulay nga ipadayawdayaw ang aton naangkon kag ginabanta nga natigayon. Nahisantu sa sini amo ang hulubaton: “Indi maayo ang pagkaon sing madamu nga dugos; gani tama kalain sa mga tawo ang pagpangita sang ila kaugalingon nga himaya, himaya bala ini?” (Hulubaton 25:27) Kag sanglit kalabanan nga tawo nagalakat sa malapad nga dalan nga nagapadulong sa kalaglagan, daw ano ka suno sa tion ang ginsiling ni Jesus, “kailo kamo, kon ang tanan nga tawo magahambal sing maayo nahanungod sa inyo”!—Lucas 6:26.
“Ang Kalibutan Nagataliwan”
15. (a) Anong nahaunang rason ang ginahatag ni apostol Juan agod mangin “indi bahin sang kalibutan”? (b) Sa ano dapat ipatuhoy sang maunungon nga mga Cristiano ang ila pangunang mga panikasog?
15 Si Juan nagahatag sa aton sang nahaunang rason agod mangin “indi bahin sang kalibutan” sang nagsiling sia: “Dugang pa, ang kalibutan nagataliwan kag ang kailigbon sini, apang ang nagahimu sang kabubut-on sang Dios nagapadayon.” (1 Juan 2:17) Ang “kalibutan,” ang dimatarong nga katilingban sang tawo, malapit na matapos sa madasig nagapakari nga “dakung kapipit-an.” (Mateo 24:21) Sa sina nga panag-on sang tion ang tagsa ka agi sang politikal, komersial kag butig nga relihiosong mga elemento sining kalibutan pagalaglagon. Gani paano ang bisan sin-ong matuod nga mga saksi ni Jehova makahugod sang tanan nila nga tion, enerhiya kag manggad sa sining mga elemento nga sa dili madugay pagadulaon? Sa baylo, ginapatuhoy sang maunungon nga mga Cristiano ang ila pangunang mga panikasog sa pagpauswag sa intereses sang Ginharian kag sa mga butang nga mapinadayunon, walay katapusan. Dugang pa, paagi sa pagkamaunungon kag katutom ang katawhan ni Jehova ‘magadaug sa kalibutan’ sang dimatarong nga katilingban sang tawo, subong sang ginhimu anay ni Jesus. (Juan 6:33) Huo, kag makalampuwas sila kon ining kalibutan magataliwan bangod sang paglaglag sang Dios, subong nga sanday Noe kag ang iya panimalay nakalampuwas anay sa Anaw.—2 Pedro 2:5.
16. Anong mga pamangkot ang dapat pa nga binagbinagon naton?
16 Sanglit ining kalibutan nagataliwan, kon amo, paano dapat tamdon sang mga Cristiano ang pagpahilabot sa sosyal nga mga buhat? Ano dapat ang panimuot nila sa edukasyon, pagpakig-angot sa negosyo kag kalingawan? Ang mga pamangkot kaangay sini dapat nga binagbinagon naton sing maayo.
Ano ang Masiling Mo?
◻ Ano ang kalibutan nga sa sini ang matuod nga mga sumulunod ni Jesus indi bahin?
◻ Ang mga disipulo ni Cristo wala nagapain sang ila kaugalingon bangod sang ano nga hilikuton nga gintangdo sa ila?
◻ Ano ang pila ka rason kon ngaa ang mga Saksi ni Jehova “indi bahin sang kalibutan”?
◻ Agod sundon ang laygay sa 1 Juan 2:15-17, anong tatlo ka sadsaran nga mga butang sa kalibutan ang indi dapat higugmaon sang katawhan ni Jehova?
[Piktyur sa pahina 10]
Bisan ang mga Saksi ni Jehova “indi bahin sang kalibutan,” masaku sila sa pagbulig sa mga tawo sang tanan nga kapungsoran sa espirituwal
[Piktyur sa pahina 12]
Kon kita “indi bahin sang kalibutan,” indi kita magpadala sa kailigbon sang unod kag sang mga mata ukon magpabugal sang kabuhi