Report sang mga Manugbantala sang Ginharian
Nagasalig Man Sila kay Jehova
SA ISA KA PUNGSOD diin ginadumilian ang hilikuton sa pagpanudlo sa Biblia sang mga Saksi ni Jehova, ang iban nga mga pamatan-on, nagapamangkot sang ila kaugalingon: “Ano ang katuyoan sang kabuhi? Diin ang isa makakita sing kamatuoran? Ngaa tuman kadamu ang kalautan?” Wala sila makabaton sing makaalayaw nga mga sabat gikan sa iglesia ukon gikan sa ila mga ginikanan. Ang pag-abuso sa alkohol kag droga wala magpalinong sang ila hunahuna. Nahibal-an sang isa sining mga pamatan-on nga nagatuon sa Biblia upod sa mga Saksi ni Jehova ang isa ka abyan, kag namat-od sia nga tambongan ang pagtuon sa Biblia kag “luwason” ang iya abyan paagi sa pagpangita sa mga kaluyahon sining organisasyon. Baliskad ang iya nasapwan—mga sabat sa mga pamangkot nga nagatublag sa iya. Gani nagsugod sia sa pagtuon sa Biblia upod sa mga Saksi ni Jehova. Sang ulihi, ginbag-o sang kamatuoran sa Biblia ang pamatan-on kag nag-untat na sia sa pagpanigarilyo, pagpahubog, kag nangin labi nga interesado sa iya pamilya.
Gin-ipit sia sang iya mga ginikanan nga maglayas sa ila apartment bangod supak sila sa kon ano ang iya ginaton-an. Nian may natabo nga abi nila imposible. Nakakuha sia sing bag-o nga apartment, nga sing kinaandan tinuig ang kinahanglan agod makuha. Nagakomento sa sini, ang pamatan-on nagsiling: “Ang kamatuoran nga nahibal-an ko ang katuyoan sang Dios, kag akon ginaaplikar sa akon kabuhi ang laygay sang Biblia, ang nagpaposible para sa akon nga matigayon uli ang katimbang sing hunahuna kag mapalig-on ang kalipay sang akon pamilya. Ugyon sa akon ang akon asawa, kag mapaabot namon ang palaabuton nga may pagsalig.”
Nahibal-an karon sining pamatan-on ang kahulugan sang Hulubaton 3:5, 6: “Salig kay Jehova sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag magatuytuy sia sa imo mga banas.”
Sa isa pa ka pungsod diin ang hilikuton sang mga Saksi ni Jehova ginadumilian, isa ka tigulang nga babayi ang nasugilanon sang Saksi. Ginsilingan niya ang Saksi nga napaslawan sia sa kabuhi. Napatay ang iya bana, indi matinahuron ang iya kabataan sa iya kag ginahibian niya ang tuhoy sa iya kahimtangan. Apang namati sia sa makapaumpaw nga maayong balita sang Ginharian kag nagpakita sing daku nga interes. Luyag niya nga sugilanonon sang Saksi ang iya anak nga babayi, nga siling niya matig-a sing ulo, pirme hubog, nagapanigarilyo kag nagapamuyayaw.
Ginduaw sang utod nga babayi ang iya anak nga babayi, nga namati sa mensahe sang Ginharian kag narealisar ang daku nga kabilihanan sang kamatuoran. Nagpasugot sia nga magtuon sa Biblia, kag ang gahom sang Kasulatan nagbag-o sang iya dalanon sang pagkabuhi kag gindedikar niya ang iya kaugalingon kay Jehova kag ginbawtismohan. Nahimu niya ini nga una pa sa iya iloy, nga nagahanda pa lang sa paghimu sinang importante nga tikang. Sang ulihi ginaton-an sang anak nga babayi ang tatlo pa ka indibiduwal.
Mahanduraw mo bala kon daw ano ka malipayon karon ang iloy kag ang anak nga babayi? May rason gid sila nga magkalipay bangod nagsalig sila kay Jehova nga Dios kag sa iya mahigugmaon nga aman nga dayon nga kabuhi.—Salmo 56:11.