Ang Imo Kabuhi, ang Imo Integridad kag ang Kard

“KON magaabot ang malaut, ang mahalungon nga tawo ginatago; apang ang kulangkulang magapadayon sa ila kasubo.”—Hulubaton 27:12, Septuagint, ni Charles Thomson.

Ginapakita sinang inspirado nga hulubaton ang balor sang una nga paghunahuna. Ang isa ka ‘kalautan,’ ukon kapahamakan, nga luyag likawan sang mga alagad sang Dios amo ang paglapas sang ila integridad. Tinuig na nga ginahimu ina sing maukod sang mga Saksi ni Jehova may kahilabtanan sa sugo sang Dios nga ang mga Cristiano ‘maglihi sa dugo.’—Binuhatan 15:28, 29.

Nahibal-an sang mga Cristiano nga sa tapos sang aksidente mahimu nga madulaan sila sing pangalibotan ukon indi makahatag sing detalyado nga paathag kon ngaa indi sila sarang makabaton sing pagtughong sang dugo. Bisan pa nga ang nasamad nga Saksi makahambal kag makasiling nga—nahisuno sa prinsipio nga nagpasugot nga may ihibalo—indi niya luyag ipatayhon ang dugo, mahimu magakabalaka ang mga doktor ukon tinawo sa ospital nga mahimu sila idemanda sa ulihi kon indi nila sundon ang talaksan nga pagbulong. Gani tinuig na nga ginadala sang mga Saksi ni Jehova ang Medical Alert nga kard. Isa ini ka napirmahan, napanaksihan nga dokunento nga nagakuha sa mga manugbulong kag mga opisyales sang ospital sing salabton sa bisan ano nga komplikasyon nga mahimu magaresulta gikan sa pagkahibalo nahanungod sa pagpangindi sa dugo. Ang isa ka bag-o nga kard ginapirmahan kag ginapetsahan kada tuig: sa amo, ang dokumento pirme nga bag-o kag mabaton.

Kon luyag mo tumanon ang kasugoan sang Dios sa dugo, pirme mo bala ginadala ang isa sining mga dokumento? Ginapat-od mo bala nga ini bag-o kag, kon mahimu, ginpirmahan sang imo pinakamalapit nga himata? Talupangda gikan sa masunod nga sulat kon ngaa dapat mo ina himuon:

“Kami sang akon bana nagapasalamat sa inyo sing daku bangod sang pag-aman sa amon sing espirituwal nga pagkaon sa nagakaigo nga tion kag sing makatudlo nga materyal nga makabulig sa amon. Luyag ko isugid kon paano ina nga materyal nagluwas sang amon kabuhi.

“Hunyo 6, 1983 sadto, kag nagaulan sadto nga gab-i samtang nagapauli kami gikan sa trabaho. Nagaobra kami subong mga kontratista sa isa ka bag-o nga pagtukod sing pamalay 30 ka milya gikan sa balay kag bag-o lang masugat ang amon tatlo ka magagmay nga kabataan gikan sa eskwelahan. Samtang nagamaneho ang akon bana, nga si John, paaminhan sang haywey sa amon diutay nga trak, ginahambalan namon ang nagapakari nga distrito nga kombension. Nakita ko ang pabagatnan nga traktora-treyler nga trak nga naaberiya, nagliko kag nagbunggo sa nagatunga nga alagyan sing tuman kakusog amo kon ngaa ang lunang kag hilamon naglupad. Sa gilayon sa isa ka pagpamisok sang mata ang trak dumiretso sa debayder kag nagdulog sa atubangan namon kaangay sang daku nga tisa nga pader.

“Pirme namon ginpaligban kon ano ang matabo kon kami ang maaksidente. Nasunod namon ang mga instruksion tuhoy sa pagpakighambal sa amon manugbulong sang pamilya kag sa lokal nga ospital tuhoy sa paggamit sang pagtughong sang dugo. Apang kamusta kon wala kami sing pangalibotan, malayo sa banwa kag indi makadumili sa pagtughong sing dugo? Amo sini nga ang isa sadtong mga bulig sa inyo [Watchtower Society] gin-aman sing mahigugmaon makabulig: ang Medical Alert nga kard. Amon ini pirme ginadala. Nasulatan, napetsahan kag napirmahan ini sing nagakaigo.

“Samtang wala ako sing pangalibotan sa makusog nga kagulob-an, nagdulog ang isa ka babayi nga isa ka rehistrado nga nars. Luyag niya kuhaon ang duha ka bata nga sarang malab-ot, kay ang isa sa ila ginadugo sing grabe bangod sang pilas sa ulo, kag si John nagpasugot. Ang isa pa ka bata nga babayi naipit kaupod nakon tubtob nabuksan ang ganhaan.

“Sang mag-abot ang Emergendy Medical Service, ginpangabay ni John ang attendant nga magradyo sing una sa ospital kag sugiran sila nga bisan ano ang matabo indi nila paghatagan sing dugo ang kabataan. Nagdumili ang attendant, tubtob nga ginpabasa sa iya ni John ang Medical Alert nga kard. Nakombinse sia sini nga iradyo ang mensahe sa ospital.

“Si John grabe, nga nasamad sing daku ang ulo, nabali ang nawala nga pulso kag madamu ang pilas. Apang padayon sia nga nangamuyo nga indi sia madulaan sing pangalibotan tubtob nga makita niya nga ginaatipan ang mga kinahanglanon kag mga luyag sang iya pamilya.

“Nabali ang akon duha ka hawak, ang isa nadugmok, kag nabali ang akon nawala nga hita, nga gintunaan sang pagdugo sa sulod. Sang mag-abot kami sa ospital wala gihapon ako sing pangalibotan. Ginsilingan sang doktor si John nga sa sulod sang masunod nga pila ka oras maubos ang halos katunga sang akon dugo kag mapatay ako kon indi ako pagtughongan sing dugo. Walay sapayan sang kahimtangan ni John, padayon niya nga ginsilingan sila, ‘Wala sing dugo.’ Ginpilit gihapon niya sia, ginsilingan sia nga mahimu nga madula ang iya asawa, kag nagsiling, ‘Sin-o nian ang magadipara sa kabataan?’ Sang ulihi nakita nila ang akon Medical Alert nga kard. Ginpakopyahan ini sang doktor kag ginrekord ini. Subong legal nga dokumento, gintahod nila ini kag nag-untat sa pagtinguha nga ipilit ang pagtughong sang dugo. Anum ka oras sang ulihi naulian ako kag sarang na makahambal para sa akon kaugalingon. Apang ang matahom—bisan pa mahimu hunahunaon sang iban, nga diimportante—diutay nga kard ang nagluwas sa akon nga indi pag-ipilit ang pagtughong sang dugo sa akon samtang wala ako sing pangalibotan.

“Naospital ako sa halos pito ka semana, apang sa akon pamatyag madasig ang pag-ayo bangod, sing bahin, sa indi pagbaton sang iban nga dugo, kag mga komplikasyon sini, nga ginhatag sa akon. Nahiusa kami tanan subong pamilya kag nag-ayo. Salamat kay Jehova bangod sang pag-aman sa amon sinang matahom nga bulig subong sang Medical Alert nga kard. Nagpanghikot gid ini.”

Matigayon sang mga Saksi ni Jehova ining hamili nga mga dokumento gikan sa mga gulang sa ila mga kongregasyon. Ang eksperiensia sa hitaas nagailustrar kon ngaa ikaw kag ang imo pamilya dapat mangin “mahalungon” kag pirme dal-on ang kompleto kag bag-o nga Medical Alert nga kard.—Hulubaton 22:3.