“Tumana sing Bug-os ang Imo Ministeryo”

“Gintulinan ko ikaw sa atubangan sang Dios kag ni Cristo Jesus, nga magahukom sa mga buhi kag mga patay, . . . tumana sing bug-os ang imo ministeryo.”—1 TIMOTEO 4:1, 5.

1. Ano ang kaangtanan sa ulot nanday Pablo kag Timoteo?

SANG ginsulat ni apostol Pablo ang iya ikaduha nga sulat kay Timoteo, si Pablo nagpadayon sa iya lalambuton subong ministro sang Dios sing mga 30 na ka tuig. Nakabaton na sia sing madamung mga pagpakamaayo gikan kay Jehova. (2 Timoteo 1:2) Ginpili ni Pablo si Timoteo nga mangabudlay sing suod sa iya sa nagalakbay nga hilikuton, nga nagaalagad sa mga kongregasyon. Nakaagom sila sing tinuig sang mabungahon nga mga eksperiensia.—Binuhatan 16:1-5.

2. Ano ang importansia sang pinamulong ni Pablo sa 2 Timoteo 4:6-8?

² Karon nag-abot na ang tion para matapos ang ministeryo ni Pablo. Nagsulat sia: “Kay ako ginbubo nga subong sang halad nga ilimnon, kag ang tion sang akon pagtaliwan nag-abot na. Nagapakig-away ako sang maayong pag-away, natapos ko ang dalaganon, natipigan ko ang pagtuo. Kutob karon natigana sa akon ang purongpurong sang pagkamatarong, nga sa sadtong adlaw ihatag sa akon sang Ginuo, ang hukom nga matarong, kag indi sa akon lamang kundi man sa tanan nga nagahigugma sang iya pagpahayag.” (2 Timoteo 4:6-8) Nagapakita ini nga malapit na ang kamatayon ni Pablo. Mahangpan nga si Pablo nag-agom sing kamatayon sa idalom sang paghingabot ni Nero sang 66 C.E. Sang gin-atubang sang kamatayon, ano nga panghunahuna ang nagalabad sa hunahuna ni Pablo? Ayhan amo ini: Nahimu ko bala sing maayo ang akon pag-alagad? Natapos ko bala ang kon ministeryo sing madinalag-on? Huo, sarang mapabutyag ni Pablo ang iya pagtuo nga nahimu niya! Ang iya pagtuo tuman kabakud, kag nagasalig sia nga matigayon niya ang padya sang mataas nga pagtawag. Daw ano ang iya kalipay bangod wala gid sia magtalikod sa iya asaynment!

3. Antes sia mapatay, anong maayo nga butang ang sarang mahimu ni Pablo kay Timoteo?

³ May diutay pa nga tion si Pablo nga nabilin sa paghimu sing maayo. Antes magtulog sa kamatayon, anong maayo nga butang ang mahimu ni Pablo kay Timoteo? Sa idalom sang inspirasyon naghatag sia sing importante nga laygay. Mabasa naton ang iya mga panghunahuna kag mga pinamulong sa tolon-an sang Ikaduhang Timoteo. Amo ini ang iya katapusan nga sinulatan sa Kasulatan nga para man sa aton kaayohan.

4. Ano nga laygay ang ginhatag ni Pablo kay Timoteo?

⁴ Wala pa matapos ni Timoteo ang iya asaynment sa ministeryo, gani ginsulatan sia ni Pablo: “Gintulinan ko ikaw sa atubangan sang Dios kag ni Cristo Jesus, nga magahukom sa mga buhi kag sa mga patay, kag bangod sa iya pagpahayag kag sa iya ginharian, iwali ang pulong, mag-ukod sa panag-on kag sa dipanag-on, magsabdong, magbadlong, kag maglaygay, sa bug-os nga pagbatas kag pagpanudlo. Kay nagaabot ang tion nga ang katawhan indi magbatas sang maayong pagtolon-an, kundi sa may nagakalam nga mga dulunggan magatipon sa ila kaugalingon sang mga manunudlo suno sa ila kaugalingon nga mga kaluyag; kag magapahilayo sang ila mga dulunggan sa kamatuoran kag magaliso sa patopato nga mga sugilanon. Apang, magmalig-on ka sa walay langan, batasa ang pag-antus, himoa ang buluhaton sang ebanghelista, tumana sing bug-os ang imo ministeryo.”—2 Timoteo 4:1-5.

5. Ano nga laygay ni Pablo ang pinasahi nga makawiwili sa aton?

⁵ Mahimu nga nakabenepisyo sing daku si Timoteo sa sina nga laygay, apang kita man bala makabenepisyo sa sini? Nagakabuhi kita sa “katapusan nga mga adlaw” nga tuhoy sa sini nagsulat si Pablo. Madamung mga tawo karon ang ‘may dagway sang diosnon nga debosyon apang nagapanghiwala sang gahom sini.’ (2 Timoteo 3:1-5) Nahuyog sila sa pagpamati sa “mga manunudlo” lamang nga nagapakalam sang ila mga dulunggan. Huo, dugang sa pagwali sang pulong sa kongregasyon, ang matuod nga mga Cristiano may obligasyon nga magwali sa tanan sing dayag, nagapangita sadtong magahulag sa “pulong.” Gani ining laygay mapuslanon karon sa Cristianong mga Saksi ni Jehova.

Kon Paano Tumanon sing Bug-os ang Ministeryo

6. (a) Ngaa dapat naton “iwali ang pulong”? (b) Anong mga pagpakamaayo ang naghalin gikan sa pagtalupangod sa kon paano naton ginahimu ang aton ministeryo?

⁶ Ang ministeryo may nagakalainlain nga bahin; madamu sing hilimuon ang ministro. Una, ginsambit ni Pablo, nga “iwali ang pulong.” Amo ini ang pulong nga ginpakamaayo ni Jehova nga ibuyagyag sa iya mga alagad. Amo ini ang pulong sang kamatuoran nga ginhambal ni Jesus. Ginapahibalo ni Jehova kon ano nga mensahe ang para sa katawhan sa pat-od nga tion, kag ang iya mga saksi sa duta amo ang nagapresentar sang iya bahin sa hulusayon. Ang paagi ni Jehova amo ang paghatag sing mensahe sang paandam antes sia magapanghikot. (2 Cronica 36:15, 16; Isaias 42:9; 43:12; Jonas 3:2-4) Ang iya mensahe magaresulta sa ikaayo sadtong nagapamati sa sini; sarang sila makatigayon sing duog nga wala sing peligro. Yadtong wala namati magabayad sang resulta kon si Jehova magapanghikot agod himuon ang iya paghukom. Dapat nila dalhon ang ila kaugalingon nga responsabilidad. (Binuhatan 20:20, 21, 26, 27) Apang, ang dalanon sang kaalam para sa ministro sang Dios amo: “Andami ang imo kaugalingon kag ang imo pagpanudlo. Magpadayon sa sina, kay sa paghimu sini maluwas mo ang imo kaugalingon kag ang mga nagapamati sa imo.”—1 Timoteo 4:16.

7. Ngaa hilingagawon ini nga hilikuton bisan nga ang kahimtangan daw indi maayo?

⁷ Ang pagbantala nga hilikuton ginhimu sa idalom sang nagakalainlain nga kahimtangan, apang dapat ini mag-abante. “Mag-ukod sa panag-on kag sa dipanag-on,” sulat ni Pablo. Ang mensahe mahimu magkahulugan sing kabuhi para sa katawhan. Busa, sa bisan ano nga kahimtangan nga yara ang matutom nga ministro, ginatamod niya ang mensahe nga hilingagawon katama kag nagapangita sing paagi nga mapabati ang mensahe, bisan pa magautwas ang pila ka pagpamatok sa pagbantala nga hilikuton. Sarang naton ini makita sing maathag sa mga halimbawa ni Jesus kag sa rekord sang tolon-an sang Biblia sa Binuhatan.

8. (a) Ano ang sarang makabulig sa ministro nga mawali ang pulong? (b) Ngaa ang pagbadlong mangin bahin sang ministeryo?

⁸ Agod ibantala ang pulong, sa sulod man ukon sa guwa sang kongregasyon, dapat nga pamilyar ang ministro sa Pulong sang Dios, subong nga estudyante sa sini. Dapat sia maghatag sing tion sa pagtuon, sa pagdumdom kag sa pagpangalaba, nagatinguha nga mahangpan ini sing maayo. Ang panudlo dapat nga napasad sa pagkapamilyar sa mga panudlo sang kamatuoran. Ginsilingan ni Pablo si Timoteo nga ang manugtatap dapat “magpangalig-on sa pulong nga matuod nga suno sa natudlo, agod nga makasarang sia sa pagpanglaygay sa maayo nga pagtolon-an kag sa pagpasanag man sa mga nagasumpong sini.” (Tito 1:9) Ang Pulong sang Dios nagapangalagad subong paagi sa paghatag sing pagbadlong sa mga wala nagapahisuno sa kon ano ang ginakinahanglan ni Jehova, magatadlong sa nakasala para sa iya kaugalingon nga kaayohan. Bahin ini tanan sang bug-os nga pagtuman sa ministeryo.

Kinahanglan ang Laygay

9. Ngaa kinahanglan ang Cristianong laygay?

⁹ Kon kaisa kinahanglan ang pahanumdom para sa mga wala nagahimu sang tanan nga dapat nila himuon ukon kulang sing apresasyon kag kakugi sa pagsimba kay Jehova. Ang Cristianong laygay ginaapresyar gid sadtong nagahigugma kay Jehova. Nalipay sia nga mabatian kon ano ang ginasiling ni Jehova kag nagkabig sa sini subong bugana espirituwal nga pagkaon. (Isaias 55:3; Hebreo 12:5, 6) Busa maayo nga pag-alagad para sa mga masigka manugpangabudlay—kag sa mga tawo man nga nahuyog sa pagsimba kay Jehova—nga laygayan sila sang Pulong sang Dios. Si Pablo mismo naghatag sing madamu nga laygay.—Roma 15:30; 16:17; 1 Corinto 1:10, 11; 1 Timoteo 4:13; 6:11, 12; Hebreo 10:24.

10. Ngaa ginakinahanglan ang pagbatas may kahilabtanan sa paghatag sing laygay?

¹⁰ Dapat mahibaloan sang dedikado nga ministro kon paano man palambuon ang bunga sang espiritu sang Dios. Mahimu ini magakinahanglan sing daku nga pagpailob kag pagbatas agod tinguhaan nga laygayan yadtong wala nagahulag gilayon. Ginapakita gani sang iban ang kakulang sing apresasyon sa mga panikasog nga ginahimu agod laygayan kag palig-unon sila. Apang, dapat ini himuon, labi na sang tanan nga Cristianong mga gulang. Nagapanghikot ang arte sa pagpanudlo. Kon labi nga ginagamit sang mga tawo ang Pulong ni Jehova, labi pa nga maanad sila sa paggamit sini. Kon makilal-an sang isa ka manunudlo ang estudyante, dapat niya ipaambit ang impormasyon sa iya. Ginlaragway sing maayo ni Pablo ang nagakaigo nga metodo sa 1 Tesalonica 5:14: “Nagalaygay kami sa inyo, mga kautoran, nga laygayan ang mga matamad, palig-unon ang mga mahuyang sing tagipusuon, sakdagon ang mga maluya, magmabinatason kami ayon sa tanan.”

Magpahilayo sa mga Apostata

11. Ano ang sarang naton nga himuon tuhoy sa apostata?

¹¹ Luyag ni Pablo nga huptan ni Timoteo ang iya pagkatimbang, ukon huptan niya ang iya mga igbalatyag sa tanan nga mga butang. Indi niya dapat pagtugotan ang iya kaugalingon nga mangin kaangay sadtong wala magpahisuno sa maayo nga pagtolon-an kag nagpahilayo sang ila mga dulunggan sa kamatuoran. Ang matuod nga ministro sang Dios karon wala mabalaka sing dinagakaigo kag matublag sa iya mga hilikuton kon mahibal-an niya nga ang iban nagpahilayo sa Pulong sang Dios kag sa iya maayo nga pagtolon-an. Ginapaandaman na kita nga may yara mga apostata kag mga tawo nga maluyag lamang pakalamon ang ila mga dulunggan. Ang laygay subong sang sa 2 Juan 9-11, 1 Corinto 5:11-13 kag 2 Timoteo 3:5 wala nagahatag sing duog para makig-upod sa mga nagapahilayo sa kamatuoran. Wala kita nagapahilayo sa kamatuoran. Wala kita nagabakal ukon nagabasa sang ila mga sinulatan. Madamu pa nga iban ang maluyag mamati sang kamatuoran, kag upod sa ila nga kita may Cristianong pagpakig-upod.—1 Timoteo 6:20, 21.

12. Ngaa ginhimu sang Cristianong ministro ining malig-on nga tindog?

¹² Si Pablo naglaygay: “Ang malaut nga mga tawo kag mga malimbong magalain kag magalain pa, nga nagadaya kag ginadayaan.” (2 Timoteo 3:13) Sa kapawa sinang abanse nga paandam, ang Cristianong ministro wala nagaupod sa ila. Ginapamatian niya ang maayo nga laygay sang apostol: “Apang, padayon ka sa naton-an mo kag nagasalig sing malig-on, nga nakahibalo kon kay sin-o mo naton-an ini kag kon paano nga kutob sang imo pagkabata nahibaloan mo ang balaan nga kasulatan, nga makapaalam sa imo sa kaluwasan paagi sa pagtuo kay Cristo Jesus. Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagsaway, sa paghanas sa pagkamatarong, agod nga ang tawo sang Dios mahimpit nga masangkapan nga sa tagsa ka maayong buhat.” (2 Timoteo 3:14-17) Dapat ton-an sing regular sadtong nagatinguha nga tumanon ang ila ministeryo ang Pulong sang Dios.

Mga Pagpakamaayo Gikan sa Cristianong Pagpakig-upod

13. Paano ang pagpangabudlay sa ministeryo kaupod ni Pablo nakabulig kay Timoteo, kag paano kita makabenepisyo?

¹³ Matuod gid nga pagpakamaayo kay Timoteo nga nakapakig-upod sia sing tinuig kay Pablo, kag naobserbahan kon daw ano sia katutom, kahamtong nga ministro sang Dios. Gingamit ni Pablo ang ila mga eksperiensia subong maayo nga pahanumdom kay Timoteo: “Karon, napanilagan mo ang akon pagtolon-an, akon paggawi, akon tinutuyo sa kabuhi, akon pagtuo, akon pagpailob, akon gugma, akon pagkalig-on, mga paghingabot sa akon, mga pag-antus nakon, ang nahanabo sa akon sa Antioquia, sa Iconio, sa Listra, ang mga paghingabot nga akon ginbatas; walay spayan sa ila tanan ginluwas ako sang Ginuo. Sa pagkamatuod, ang tanan nga buot magkabuhi sing diosnon kay Cristo Jesus magaantus sing paghingabot.” (2 Timoteo 3:10-12) Bisan pa nga kita karon indi direkta nga makapakig-angot kay Pablo, ang maid-id nga rekord sang iya mga paagi nga masapwan sa Biblia sarang man makabulig sa aton.

14. Ngaa dapat kita mangin handa sa pagbatas sa kalautan?

¹⁴ Ginsambit ni Pablo ang mga paghingabot kag mga pag-antus niya, kag ang iya laygay sa Cristianong ministro amo ang paghanda nga batason ang kalautan. (2 Timoteo 4:5) Masunson nagakaigo nga makaagi sang pila ka sahi sang paghingabot sa pagtuman sing bug-os sang aton ministeryo. Isa ka pribilehiyo nga huptan ang integridad sa idalom sang pagtilaw kag sa pagpahalipay sang tagipusuon ni Jehova. (Hulubaton 27:11) Ang panaksi sarang magaresulta sa kadayawan ni Jehova!

Ang Hilikuton sang Ebanghelista

15. Ngaa dapat pakigbahinan ang pag-ebanghelyo samtang ginatuman naton sing bug-os ang ministeryo?

¹⁵ Ang pag-ebanghelyo may daku nga bahin sa panahon sang matutom nga Cristianong ministro. Si Jesus nagsiling: “Sa tanan nga pungsod ibantala anay ang maayong balita.” (Marcos 13:10) Gin-athag niya nga ang katapusan indi magaabot tubtob ang maayong balita naiwali sing maayo. Si Pablo may pribilehiyo nga ipaambit ang maayong balita sa madamung mga tumuluo sa bug-os nga Romanong Emperyo. Nagresulta ini sa ginhuman nga bag-ong mga kongregasyon kag pagtangdo sa mga manugtatap. Sila man, nakigbahin kaupod sang ila Cristianong kautoran nga lalaki kag babayi sa hilikuton sang pag-ebanghelyo kag sa amo napasangkad ang pagbantala nga hilikuton. Ang kalabanan nga hilikuton ginhimu subong sang paglaragway ni Pablo, ‘pagtudlo sing dayag kag sa pamalaybalay.’ (Binuhatan 20:20) May yara maayo nga mga resulta, kag may yara ekselente nga mga resulta karon kon ang Cristianong pagbantala ginahimu sa bug-os nga kalibutan.—Juan 14:12.

16. Anong pamatuod ang nagapakita nga madamu ang nagaaplikar sa laygay ni Pablo sa 2 Timoteo 4:5?

¹⁶ Bangod sang pagtuo, madamu ang nagahimulos sa kahigayunan nga pasangkaron ang ila hilikuton sa pag-ebanghelyo nga hilikuton. Linibolibo ang nagsulod sa latagon sang pagkamisyonero, kag ginatos ka libo ang nakigbahin sa dagway sang payunir nga pag-alagad. Sa 203 ka kadutaan may yara karon kapin sa 2,845,531 nga nagaalagad subong mga ebanghelista sa kapin sa 47,000 ka kongregasyon, kag ang kadamuon nagadugang pa. Ining matahom nga mga butang pamatuod nga ang dedikado nga mga alagad ni Jehova maukod nga nagatuman sang balaan nga salabton nga ginpahimu sa ila kag ‘nagatuman sing bug-os’ sang ila ministeryo.

Pagtuman sa Hilikuton

17. Ano ang luyag ni Jehova nga makita nga ginahimu sang iya mga alagad nahanungod sa hilikuton nga gintangdo karon sa ila?

¹⁷ Gintangdo ni Jehova ang mga hinaplas sa isa ka ministeryo, kag ang “dakung kadam-an” nagapangabudlay kaupod nila. Sing matagnaon, sa Ezequiel kapitulo 9, ang hilikuton ginpaanggid sa pagbutang sing tanda sa mga agtang sadtong nagahayhay kag nagabakho. Nahibal-an naton gikan sa tagna nga magaabot ang tion nga ang tawo nga may tintirohan magasiling: “Akon nahimu ang ginsugo mo.” Nahamuot si Jehova sa iya mga alagad kon ginahimu nila ang ginsugo niya sa ila.—Ezequiel 9:4, 11; Genesis 6:22; 1 Corinto 4:2.

18, 19. Ano ang pila ka paagi nga sarang mo karon maaplikar ang laygay ni Pablo sa 2 Timoteo 4:1-5?

¹⁸ Samtang aton ginatan-aw ang mga kahimtangan sa kalibutan nga nagakatabo nahisuno sa mga tagna nahanungod sa sining katapusan nga mga adlaw, wala kita sing mahimu kundi magbatyag sang pagkahilingagawon sang pagbantala nga hilikuton nga gintangdo sa aton. Nadalahig ang kabuhi. Ang pagtipon nagakahanabo kag ginapadasig ini ni Jehova sa iya panahon. (Isaias 60:22) Busa, bisan ano man ang imo responsabilidad subong dedikado nga alagad ni Jehova, pangabudlayi ini agod pahamut-an sia. (Colosas 1:10; 3:23, 24) Dumduma ang hilikuton nga ginhatag sa imo nga himuon kag tinguhaa nga himuon ini sing bug-os. Kon imo ginaatipan ang pila ka katungdanan sa Kingdom Hall, himua sing maayo ang hilikuton. Kon gintangdo ka sa mga hilikuton sa isa ka grupo sang Pagtinuon sa Libro sang Kongregasyon, mangabudlay sa sini sing suod kag laygayi kag palig-ona ang isa kag isa. Kon isa ikaw ka payunir ukon misyonero, siguraduha nga pangabudlayan sing lakas nga mahimu ang imo mga tulumuron sa pag-alagad.—Roma 12:6-9.

¹⁹ Sarang mo mapamangkot ang imo kaugalingon, May mahimu pa bala ako sing labi agod buligan ang iban nga mga Cristiano, labi na ang mga bag-ohan sa kongregasyon, agod pabakuron sila? Kon ang mangin gulang sang kongregasyon bahin sang imo ministeryo, hibaloa ang dagway sang “panong” kag atipana sing maayo yadtong nagapakig-upod sa sini. Mamati sing maayo agod wala sing isa ang mangin diaktibo ukon dimabungahon nahanungod sa sibu nga ihibalo sang aton Ginuong Jesucristo. (2 Pedro 1:5-8) Labaw sa tanan, mangin alisto sa kon ano ang imo ginahimu sa hilikuton nga pag-ebanghelyo agod imo ‘matuman ang imo ministeryo.’

Nadumduman Mo Bala?

◻ Ano ang kahimtangan ni Pablo sang ginsulat niya ang Ikaduhang Timoteo?

◻ Ngaa importante nga iwali ang pulong?

◻ Ngaa importante ang laygay?

◻ Paano dapat pakig-angotan ang butig nga mga manunudlo?

◻ Ngaa importante katama karon ang pag-ebanghelyo?

[Piktyur sa pahina 16, 17]

Ang ikaduhang sulat ni Pablo kay Timoteo nagbulig sa iya nga ‘tumanon sing bug-os ang iya ministeyo’