Kahulugan sang Balita

Kataason sang Gutom

Ang isa ka pamatuod sang katapusan nga mga adlaw amo ang gutom. Nagatudlo sa aton tion, gintagna ni Jesucristo ang ‘kakulang sing kalan-on sa nagakalainlain nga lugar.’—Mateo 24:3, 7.

Lapnag karon ang gutom sa madamung mga tawo tabok sa malapad nga dulonan sang naaminhan-sentral nga Aprika kag nagabilin sing daku nga kabudlay kag kamatayon sa minilyon sang magsalakay ini. Apang wala gid mahibal-i nga sang ulot sang 1958 kag 1961 ang malawig nga tig-ilinit, baha kag pamiste naghimu sa mapigaw nga ani sang China nga mangin grabe nga kakulang sing kalan-on. Sa nahauna nga tion, ginkilala sining karon sang mga opisyales sang kadak-an sang China nga kapin sa napulo ka milyon sang iya pumuluyo ang napatay sadtong apat ka tuig nga gutom. Ginkutlo sang manunulat sang Associated Press nga si Jeff Bradley si Xu Gang, nga humalambal sang The State Statistical Bureau, subong nagsiling nga sadto nga mga tinuig “kapin sa 10 ka milyon ka tawo” ang nakaeksperiensia sing dikinaugali nga kamatayon “bangod sang hinimu-tawo nga mga rason kag serioso nga kinaugali nga mga kapahamakan.”

Walay sapayan sang panikasog nga itago ang kamatuoran, ang kataason sang napatay sa gutom sa sining siglo indi matago. Ini tanan nagadugang sa gamhanan nga katumanan sang tagna ni Jesus nahanungod sa ‘tanda sang iya presensia kag sang konklusion sining sistema sang mga butang.’—Mateo 24:3.

“Ano Na ang Natabo sa Aton Katilingban?”

Sing tuman kasunson karon, ang kasingki nagasalakay sa halos wala ginapaabot nga tion kag duog. Halimbawa, ang kalinong sang Domingo sang hapon sa isa ka duog sa Sydney gintublag sing hinali sang ang magkaaway nga “bikie” gang nga naarmasan sing shotgun, riple, kutsilyo, batota, screwdriver kag kadena nag-engkwentrohanay. Sang matapos ang inaway mga 15 minutos sang ulihi, anum ka katapo sang duha ka gang sa motorsiklo kag isa ka 14 anyos nga babayi ang napatay. Sa dili magkubos 20 pa ang nasamaran, ang iban grabe.

Ang pamangkot nga ginpakiana sang madamu nga tawo sa Australia kag sa iban pa sa kalibutan gintingob sa The Australian sang Septiembre 3, 1984: “Ano na ang natabo sa aton katilingban?” Ang mga tawo nga “gintudloan ni Jehova” nakahibalo sang sabat. (Juan 6:45) Ang nasaksihan sang Australia sining karon isa lamang ka bahin sang malawig nga rolyo sang sunodsunod nga buhat sang kasingki nga nakit-an sa bug-os nga kalibutan kutob sang tuig 1914. Wala sing duog sa duta nga wala matandog sang makamamatay nga resulta sang kasingki. Ginapakita sang Biblia ina nga butang subong pamatuod nga ang katawhan nagakabuhi sa “katapusan nga mga adlaw.” Matuod sa matagnaon nga Pulong sang Dios, nakita naton karon ang “nagadugang nga pagkamalinapason” kag ang katilingban nga napun-an sang mga tawo nga “wala sing pagpugong sa kaugalingon, mabangis, wala sing gugma sa kaayohan.”—Mateo 24:12; 2 Timoteo 3:1-3.

Bulag Relihioso nga Pagtuo

“Ang panguna nga pangganyat sang inaway indi na amo ang kakagud kundi ang relihion,” siling sang kolumnista nga si H. Gordon Green, nga nagasulat sa The Toronto Star. Padayon nga ginsitar ni Green kon ano ang yara sa rekord sang mga inaway sa Iran, Ireland kag Natung-an nga Sidlangan. Nagsiling sia nga ang mga kanal ginapaagayan sing dugo “bangod ang mga tawo walay katapusan nga kombinsido nga ang pagtuo nga napanubli sang isa gikan sa iya mga katigulangan amo ang matuod nga pagtuo kag ang tanan pa nga iban sayop kag binuhatan ni Satanas.”

Ining relihioso nga ideya nagdul-ong sa mga tawo nga patyon ang iban nga lain sing ginapatihan, siling ni Green. Sa iban nga mga hitabo, ang mga pamatan-on nga madamu sing ginapatay ginatudloan sang ila relihioso nga mga lider nga ina nga pagpatay kabubut-on sang Dios, kag ang padya sa ila sa paghimu sini amo ang dayon nga kalipay sa langit. Si Ayatolla Khomeini, siling ni Green, nagalaragway sa lamharon nga mga martir nga nagapakig-away tungod sa ila pagtuo subong “mga mangangaway sang Dios,” kag ang kada isa sa ila iya “ginhatagan sing diutay metal nga yabi nga dalhon sa inaway—yabi nga makaabri sa ganhaan sang langit.”

Apang, ina bala nga “pagtuo” amo ang sahi nga magadul-ong sa mga tawo sa dalan pakadto sa walay katapusan nga mga pagpakamaayo gikan sa Dios? Dumduma, ginsilingan ni Jesus ang relihioso nga mga lider sang iya kaadlawan: “Bulag sila nga mga manugtuytoy. Kag kon ang bulag magtuytuy sa bulag, sila nga duha mahulog sa boho.” Si Jesus nagpaandam: “Pabayai ninyo sila.” (Mateo 15:14) Ang sibu nga ihibalo sa Biblia nagabulig sa aton nga likawan ang bulag relihioso nga pagtuo kag alagdon si Jehova nga Dios nga may matinlo nga kamut kag putli nga tagipusuon.—Salmo 24:3, 4.