Ang Natung-an nga Sidlangan—Duog sang Armagedon?
“SAMTANG ang kalibutan nagapalumbaanay sa iya katapusan nga takna sang paindisanay, ang importante nga siudad nga balantayan indi amo ang Nueva York, Moscow, Paris, Peking, ukon Cairo. Ang siudad nga balantayan amo ang Jerusalem!” Amo sina ang ginsiling sang mga teologo nga sanday John F. kag John E. Walvoord sa ila libro nga Armageddon, Oil and the Middle East Crisis.
Madamu sa pagkamatuod ang nagatulok sing makakululba sa Jerusalem kag sa magamo nga duog nga ginahamtangan sini. Siling sang Times sang London, “Ang Natung-an nga Sidlangan nangin labi ka makahaladlok.” Nahadlok ang iban nga ang palaabuton nga pag-inaway sang E.U.-Sobyet didto halos indi malikawan. Sadtong Enero 1984, naglain katama ang kaangtanan sa tunga sang magkaaway nga mga superpower amo kon ngaa ginliso sang Bulletin of the Atomic Scientists ang iya bantog nga “doomsday clock” (isa ka simbulo kon daw ano kalapit ang kalibutan sa nuklear nga kahapayan) sa tatlo ka minuto antes magtungang-gab-i. Siling sang Bulletin: “Busa nagatindog kita sa makahalapay nga tion, sa atangan sang panag-on sang pag-inaway, ang tion nga ang direkta nga pagkasimple sang puwersa nagapahog sa pagdula sang bisan ano nga dagway sang paghambalanay sa tunga sang mga superpower. Isa ini ka hayag nga palaabuton.”
Apang, ginadayaw sang nagadugang nga kadamuon sang pundamentalista nga mga manugwali, mga teologo, kag mga ebanghelisador sa TV ini nga mga hitabo. Ang nagadugang nga mga tension sa Natung-an nga Sidlangan daw nagapamatuod sa ila makatilingala nga mga pakot nga ang Armagedon mahanabo sa dili madugay sa sina nga lugar! Kag paagi sa pagpalanog sang paandam sa mga libro, mga pamulongpulong, kag mga palaguwaon sa telebisyon, nakatipon sila sing madamudamu gawa nga mga sumulunod.
Ini nga mga komentarista nagabaisay tuhoy sa eksakto nga pagkasunodsunod sang mga hitabo. Apang ang tipiko nga ‘sugilanon sa Armagedon’ amo ang kaangay sini: Siling nila, ang pagsugod sang ‘pag-isip sang doomsday,’ amo ang pagkatukod sang Estado sang Israel. Busa nagabatyag sila nga ang ginatawag nga pagsagmit sa ila ukon rapture malapit na. Suno sa ila, sa dili madugay ang matuod nga mga Cristiano hinali nga madula sa duta—subong nga sila pagasagmiton pakadto sa langit. Sadtong masunod nga pito ka tuig sang “kapipit-an,” gintagna gani sang madamu nga mga ebanghelisador nga ang pungsod sang Israel pagakombertihon sa Cristianismo. Apang, ang kalabanan nga tawhanon nga rasa pagadalhon kuno sa idalom sang impluensia sang isa ka karismatik nga diktador (ang “Anticristo”) nga magapanguna sa napulo-ka-pungsod nga pagbuyloganay. Bisan ang Israel, pagpati nila, magaugyon sa iya. Apang, ang pagkomplutanay sang Arabiano nga mga pungsod kag sang iban pa nga ginapangunahan sang Rusya, magalikop sing hinali sa Israel. Apang ang Dios milagruso nga magapauntat sini nga paglikop, siling sining mga pundamentalista. Apang, magasunod sa dili madugay ang isa pa ka pagsalakay gikan sa “Anticristo,” nga nagapukaw sang bug-os nga inaway sa Natung-an nga Sidlangan—ang Armagedon.
Ayhan daw makapalati ini pamatian para sa iban. Kon sa bagay, ang Biblia nagatagna sang pagtipon sang mga pungsod para sa inaway sa “Armagedon.” (Bugna 16:14-16, King James Version) Apang ginapakita gid bala sang Biblia nga ini nga hitabo mahanabo sa Natung-an nga Sidlangan? Kag ano ang importansia sang duog sining inaway?
“ARMAGEDON”—ano ang kahulugan sining ngalan sang Biblia? Sugdan kada pirme sang makahulugan nga panghapin, ipaguwa ang mga serye sang impormatibo nga mga artikulo sa sini nga topiko sa apat ka guwa sang Ang Lalantawan para sa Hulyo kag Agosto 1985. Ginalauman nga ining Makasulatanhon nga paghinun-anon magapahalipay sa imo bangod sang paghibalo kon ano gid ang matuod nga ARMAGEDON.