Ang Pangulohan nga Makahimu sang Indi Mahimu sang Tawo

“Kari, kag tan-awa ang mga binuhatan sang Dios. Ang iya ginahimu ayon sa anak sang mga tawo makakulugmat.”—SALMO 66:5.

1, 2. (a) Paano ginapasundayag sang makita nga uniberso ang makahalawhaw nga ikasarang sang Manunuga? (b) Ngaa dapat naton patihan ang ginasiling sang matagnaon nga Pulong ni Jehova tuhoy sa aton tion?

SI Jehova may ikasarang sa paghimu sang kon ano ang indi mahimu sang tawo. Sa pag-ilustrar: Ang mga tawo nahayanghag sa ikasarang sang nuklear nga bomba; apang ang iya ikasarang ginpakadiutay bangod sang daku nga ikasarang nga yara sa aton adlaw. Apang ang adlaw isa lamang sang mga 200 bilyones ka bituon sa galaksiya sang aton ­Milky ­Way. Ginbanabana sang mga astronomo nga sa bug-os nga uniberso may yara mga 100 bilyones ka galaksiya, ang kada isa may binilyon ka bituon. Daw ano ka makahalawhaw nga ikasarang ang kinahanglan agod himuon ina tanan! (Isaias 40:26) Ining makahalawhaw nga ikasarang sang Manunuga nagapakadiutay sang ikasarang sang tawo.—Isaias 40:15.

² Busa wala sing isa ang magaduhaduha nga sarang mahimu ni Jehova ang ginasiling niya nga himuon niya. (Isaias 46:9, 10; 55:11) Dapat naton patihan sang ang iya matagnaon nga Pulong nagasiling sa aton nga nagahilapit na kita sa katapusan sang latid sang tion nga ginpahanugot niya sa mga tawo nga padayunon ang ila hilway nga paagi. Ginapakita sang maragtas nga ang nahimu sang tawo sa kabuhi sang tawo kag sa sapat kag subong man sa duta mismo, isa ka pasipala, isa ka mantsa sa uniberso sang Dios. Busa, si Jehova makatarunganon gid sa pagdula sa sining mansta sing bug-os.—Oseas 4:1-3; Judas 14, 15.

3. Ano ang ginasiling sang tagna sang Biblia tuhoy sa malapit nga palaabuton?

³ Ang nagakahanabo sa kalibutan karon maathag nga pamatuod nga ining sistema sang mga butang yara na sa ulihi nga bahin sang “katapusan nga mga adlaw” nga gintagna sa 2 Timoteo kapitulo 3. Sa dili madugay pagadugmokon ni Jehova ini nga sistema kag pagapauntaton ang iya ulo, si Satanas nga Yawa. Pagasundan ina sang bug-os bag-o nga sistema sang mga butang sa duta, nga kontrolado sang langitnon nga pangulohan nga gintudlo ni Jesus sa iya mga sumulunod nga ipangamuyo sang magsiling sia: “Pakaria ang imo ginharian. Himoa ang imo kabubut-on, subong sa langit, amo man sa duta.”—Mateo 6:10; Daniel 2:44; Roma 16:20.

Ang Prinsipio sang Pagbakal Uli

4. Paano gingamit ni Jehova ang prinsipio sang pagbakal uli sa dumaan nga Israel?

⁴ Indi madula sang mga pangulohan sang tawo ang sala, balatian kag kamatayon. Apang, himuon sang pangulohan sang Dios ang indi mahimu sang tawo. Makakuha kita sing pila ka paghangop sa kon paano ini mahanabo paagi sa pag-usisa sang pagpakig-angot ni Jehova sa iya katawhan nga dumaan nga Israel. Sadto anay, gingamit sang Dios ang prinsipio sang pagbakal uli, ukon paggawad. Halimbawa, kon ang isa ka Israelinhon mag-imol, mahimu niya ibaligya ang iya kaugalingon subong ulipon sa isa ka di-Israelinhon. Apang sarang sia magawad sang isa ka suod nga himata kon may yara na sia bastante nga inugbayad sa bili.—Levitico 25:47-49.

5, 6. (a) Paano ang prinsipio sang pagbakal uli nagapanghikot sa paghilway sa katawhan sa napanubli nga sala? (b) Awtomatiko bala nga mahilway gikan sa sala ang bisan sin-o?

⁵ Sa amo man nga paagi, ang Dios nag-aman sing pagbakal uli sa katawhan gikan sa pagkaulipon sa sala. Ang bili dapat nga katumbas sa kon ano ang nadula. (Deuteronomio 19:21) Nadula ni Adan ang himpit, dayon tawhanon nga kabuhi. Sanglit wala sing napanag-iyahan ang makasasala nga tawo nga katumbas sa sina nga balor, indi sila “makagawad bisan sa isa ka utod.” (Salmo 49:7) Apang ang Biblia nagtagna sang pagkari sang isa nga makagawad. Inang isa amo si Jesucristo. Ginpahayag nga si Jesus may yara na wala pa matawo nga pagluntad sa langit. Apang ang iya kabuhi ginliton sa taguangkan ni Maria paagi sa gahom ni Jehova. Sa sini nga paagi natawo sia subong isa ka tawo. Apang bangod ang Dios amo ang iya Amay, wala niya mapanubli ang pagkamakasasala nga naglikop sa tanan iban pa nga katawhan.—Mateo 1:18-21; Juan 1:1, 14; 1 Pedro 2:22.

⁶ Kon amo, napanag-iyahan ni Jesus ang lamang nga butang nga katumbas sa balor sang isa ka himpit tawhanon nga kabuhi—isa pa ka himpit nga kabuhi. Apang indi kaangay sang dimatinumanon nga si Adan, si Jesus nagpabilin nga matutom sa Dios. Kag sang ginhatag niya ang iya kabuhi tungod sa tawhanon nga pamilya, ginbaton ini ni Jehova subong nagakaigo nga bili sang pagbakal uli. (Galacia 1:4) Apang nagakahulugan bala ini nga ang kada isa awtomatiko nga nahilway gikan sa sala kag makatigayon sing kahimpitan sa idalom sang pagginahom sang Ginharian? Indi, kay ang Juan 3:16 nagasiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” Kon batunon lamang naton ang aman sa pagbakal uli kag himuon ang pila ka butang tuhoy sini nga makatigayon kita sing pagbag-o sang aton lawas kag hunahuna padulong sa kahimpitan.—Bugna 21:4.

Edukasyon sa Bag-o nga Kahimusan

7, 8. Ano nga posibilidad para sa palaabuton nga pagtuon ang yara sa sulod sang utok sang tawo?

⁷ Ang hunahuna may daku nga posibilidad sa pagtuon, bisan sa karon dihimpit nga kahimtangan sang tawo. Apang bahin lamang ini sang kon ano ang maton-an sini sa bag-o nga kahimusan diin ang sala indi na magaupang sa pagpanghikot sini. Sa The ­Brain ­Book ang awtor nagsiling: “Sa sulod sang aton ulo yara ang isa sang pinakakomplikado nga mga sistema sa uniberso. Ang ikasarang kag pagkamapasibusibuon sini mas labaw pa sang sa bisan anong hinimu sang tawo nga kompyuter.” Sia nagdugang: “Masami ginasiling nga ginagamit lamang naton ang 10 porsiento sang aton bug-os nga ikasarang sa kaisipan. Apang, daw sobra ini nga pagbanabana. Ayhan wala gani naton ginagamit ang 1 porsiento—ayhan mga 0.1 porsiento ukon kubos pa.”

⁸ Handurawa kon ano ang mapahimu sang utok sa tawo kon malab-ot na sini ang iya bug-os nga mahimu sa Bag-o nga Kahimusan. Hunahunaa ang tanan makawiwili nga mga butang nga ginbutang ni Jehova sa sini nga duta diin aton maton-an, subong sang kabuhi sang sapat, isda, kag tanum. Hunahunaa, man, ang pagtuon tuhoy sa makahalawhaw nga uniberso kag sa iya binilyon ka mga galaksiya. Binagbinaga ang tanan nga mga ikasarang nga sarang naton mapauswag sa arte, musika, ­crafts, kag madamu pa iban nga butang.

9. Ano nga sahi sang edukasyon ang magadul-ong sing pinakadaku nga mga benepisyo sa Bag-o nga Kahimusan?

⁹ May isa pa ka sahi sang edukasyon sa Bag-o nga Kahimusan nga magadala sing pinakadaku nga benepisyo sa tanan. Si Jesus nagsiling: “Tudloan sila tanan ni Jehova.” (Juan 6:45) Amo ini ang pinakamataas nga nibel sang edukasyon. Kag matigayon ini sang tanan nga mga sakop sang Ginharian sang Dios, lakip sadtong makalampuwas sa katapusan sining sistema sang mga butang. (Bugna 7:9, 14) Ang iban nga mga sakop sang Dios ginpatuhoyan sa Juan 5:28 kag 29, diin si Jesus nagsiling: “Ang takna magaabot nga ang tanan nga yara sa mga lulubngan magapamati sang iya tingog kag magaguwa.” Ini nga pagbanhaw sa binilyon ka mga patay—imposible gid nga mahimu sang tawo—nagakahulugan nga ang isa ka masangkad nga hilikuton sa pagtudlo pagahimuon tungod sa ila.

10. Paano himuon ang edukasyon sa Bag-o nga Kahimusan?

¹⁰ Karon may yara madamu nagasumpakilay nga mga sistema sa edukasyon. Apang sa Bag-o nga Kahimusan, ang langitnon nga pangulohan sang Dios magaaman sing isa ka tugob-kalibutan nga sistema sang edukasyon agod tudloan ang mga tawo sang kamatuoran nahanungod kay Jehova sa isa ka nahiusa nga paagi. Bahin sini amo ang pagtudlo sa mga tawo tuhoy sa nagakaigo nga tawhanon nga relasyon. Indi na pagaitudlo ang bugal sang rasa, nasyonalidad, ukon sosyal nga tindog. Sa baylo, ang mga pumuluyo sang duta magatuon sa paghigugmaanay sa isa kag isa, nagatahod sa dignidad sang kada isa. Ina nga edukasyon magaresulta man sa maayo nga pagbag-o sa mga personalidad nga magapabanaag sang superyor nga mga kinaiya ni Jehova.—Binuhatan 10:34, 35; Colosas 3:9-12.

11, 12. Paano kita makapat-od nga ina nga edukasyon sa Bag-o nga Kahimusan magamadinalag-on sa iya katuyoan?

¹¹ Ina bala nga edukasyon magamadinalag-on gid? Sigurado kita nga magamadinalag-on ini. Ang isa ka rason amo nga si Jehova, nga indi makabutig, nagasiling nga magamadinalag-on ini. (Tito 1:2) Dugang pa, ini nga sahi sang edukasyon ginahimu na karon! Si Jehova may yara na bug-os kalibutan nga pagtudlo nga nagatudlo sa minilyon ka mga tawo nahanungod sa pangulohan sang iya Ginharian kag sang mga kinahanglanon sini. Natabo ini bangod ang pagginahom sang Ginharian nagpanghikot na kutob sang “katapusan nga mga adlaw” nga nagsugod sang 1914.

¹² Kutob sadto nga tion, ang tagna sang Mateo kapitulo 25 nagakatuman na. Nagapakita ini nga si Jesus nagkari sa kagamhanan sang Ginharian samtang ang mga kaaway sang Dios yari pa sa duta. Ang bersikulo 32 nagasiling: “Tipunon sa atubangan niya ang tanan nga pungsod, kag painpainon niya sila subong sang manugbantay nga nagapain sang mga karnero sa mga kanding.” Ining mga katulad-karnero ginatudloan na karon ni Jehova paagi sa iya nagauswag, makita nga organisasyon. Nagaapresyar sa ila mga naton-an, nagapangabudlay sila agod bag-uhon ang ila mga personalidad sa larawan sang Dios. Kag ang katunayan nga ini nga edukasyon nagaapektar sa minilyon ka tawo para sa kaayohan karon mismo isa ka sigurado nga tanda nga himuon man ini sa mas daku nga kasangkaron sa Bag-o nga Kahimusan sang Dios.

Pagtukod sing Paraiso

13. Anong daku nga hilikuton sa pagpatindog ang mahanabo sa idalom sang pagginahom sang Ginharian?

¹³ Ang isa pa ka sahi sang hilikuton sa idalom sang pagginahom sang Ginharian amo ang paghimu sini nga duta nga isa ka paraiso. Kag ang Paraiso wala nagalakip sa mga iskwater ukon kaimulon. Luyag sang tawo ang matahom nga puluy-an kag ang pila ka lote nga may mga kahoy, mga bulak kag katamnan. Yadtong handa nga tudloan ni Jehova makatigayon gid sina. Ang Isaias 65:21 kag 22 nagatagna: “Kag magapatindog gid sila sing mga balay kag puy-an sila; kag magatanum gid sila sing mga ulubasan kag magakaon sang bunga sini. Indi sila magpatindog kag iban ang magapuyo; indi sila magtanum kag iban ang magakaon. . . . Ang akon mga pinili magakalipay sing malawig sa binuhatan sang ila mga kamut.”

14, 15. Ngaa makasalig kita nga ang mga alagad ni Jehova makapatindog sing isa ka paraiso?

¹⁴ Indi pagpangduhaduhai kon ano ang mahimu sang Dios sa kinabubut-on nga mga tagipusuon kag mga kamut sang iya katawhan sa Bag-o nga Kahimusan. Bisan karon ang kalibutan sang pagpatindog natingala sa kon paano nahimu sang mga Saksi ni Jehova nga ipatindog ang mga tinukod, sing tuman kadali kaangay sang pagpatindog sa mga Kingdom Hall. Sa tapos ang isa sini matukod sa Estados Unidos, ang isa ka editoryal sang pamantalaan nagsiling: ‘Isa pa nga mas hamili sang sa tinukod ang gintukod sadtong 2,000 ka boluntaryo. Dapat tan-awon sing maid-id sang mga lider sibiko kon ano ang natabo sadtong nagligad nga talipusposan sang semana. Ang entusiasmo, dedikasyon kag handum nga malab-ot ang tulumuron gin-updan sing makatilingala nga mga resulta. Kon makontrol lamang sang lokal nga mga grupo ang amo man nga ginhalinan, ang bisan ano nga tulumuron—ayhan pagresiklo, pagtapna sang krimen ukon pagpauswag sa komunidad—sarang malab-ot. Ginpamatod-an sang isa ka hubon sang mga manugpangabudlay kon ano ang posible sa sulod sang kalag kon ang isa ka komunidad nahiusa. Ginalauman namon nga ang Kingdom Hall mangin amo ang duog para inspirasyon sa tuboran sang ekspresyon sang kongregasyon sang mga Saksi. Ang pagluntad sini isa na ka inspirasyon sa amon tanan.’

¹⁵ Ini nga kahanda kag nagadugang nga kalantip sang mga alagad ni Jehova pagagamiton nga may mas labi pa nga benepisyo sa Bag-o nga Kahimusan sang Dios. Kag daw ano ka makalilipay nga buslan sini ang tanan malaw-ay nga mga duog sing matahom nga mga puluy-an kag palibot! Daw ano ka makaalayaw ang paghibalo nga kada adlaw ang imo mga panikasog nagapapalapit sa duta sing isa pa ka adlaw nga mangin tugob-globo nga paraiso!

Isa ka Nahiusa Tugob-globo nga Panimalay

16. Ngaa ang mga pumuluyo sang Bag-o nga Kahimusan indi gid magabatyag nga ginapahog sang kasingki?

¹⁶ Ang mga pumuluyo sang Bag-o nga Kahimusan indi na magabatyag nga ginapahog sang krimen, kinagubot, ukon inaway. Ang Salmo 46:9 nagasiling: “Ang [Dios] nagapatunong sang mga inaway tubtob sa ukbong sang duta.” Ang “Prinsipe sang Paghidait,” si Jesucristo, magapaluntad sing nagapadayon tugob-globo nga paghidait, kay “nahanungod sa pagtuga sang prinsipenhon nga paggahom ang paghidait wala sing katapusan.” (Isaias 9:6, 7) Paagi sa matuod nga paghidait kag paagi sa bug-os tawhanon nga panimalay nga natudloan sa palareho nga mataas nga talaksan, ang tanan mahiusa sa dimabugto nga higut sang gugma. Sa amo, wala na sing bisan anong nagabahinbahin nga pungsodnon nga mga dulonan.

17. Daw ano kasangkad ang paghidait kag paghiusa nga ginatigayon karon sang mga alagad sang Dios?

¹⁷ Ina bala nga mga saad imposible nga magmatuod? Indi, bangod ang paghidait kag paghiusa isa na ka katunayan sa tunga sadtong matutom nga nagapasakop sa pagginahom sang Ginharian! Binagbinaga ini: Kapin sa duha kag tunga ka milyon ka mga saksi ni Jehova ang nalapnag sa palibot sang duta. Apang, ginatuman nila ang Isaias 2:4, nga nagasiling: “Kag ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.” Sa bisan ano nga kahimtangan ang mga Saksi ni Jehova indi hungod nga magakuha sang kabuhi sang ila mga kautoran, ukon ni bisan sin-o, sa bisan diin nga duta. Subong sang ginsiling sang Italyano nga publikasyon nga Il Cor­rie­re di Tries­te: “Handa sila nga atubangon ang kamatayon sa baylo nga lapason ang sadsaran nga prinsipio nga . . . INDI KAMO MAGPATAY!” Bangod sang pagsunod sa mga talaksan sang Dios, ang mga Saksi ni Jehova may matuod nga paghidait kag paghiusa, nga imposible para sa sining kalibutan nga tigayunon. Kag ang katunayan nga minilyon sa ila ang nagaagom sini nga kahimtangan sa tunga sining magamo nga kalibutan nagapamatuod sa kon ano ang pahanabuon kon ang Ginharian sang Dios ang magakontrol sang tanan nga mga hilikuton sa duta.—Juan 13:34, 35; 1 Juan 3:10-12.

18, 19. Ano ang pila sang iban nga benepisyo ang nagaabot sa mga nagatuman sa mataas nga mga talaksan sang Dios?

¹⁸ Dugang sa sining internasyonal nga paghidait kag paghiusa, ang pagtuman sa superyor nga mga talaksan sang Dios nagapatubas sing mga tawo nga nagaulikid sa ila mga isigkatawo kag sa pagkabutang sang ila isigkatawo. Busa sila ‘nagagawi sang ila kaugalingon sing bunayag sa tanan nga butang.’ (Hebreo 13:18) Nahanungod sa sini, ang isa ka Pranses-Canadian nga kolumnista, nagasulat sa Le Jour­nal de Mon­treal, nagsiling tuhoy sa mga Saksi ni Jehova: “Kon sila lamang ang mga tawo sa duta, indi na kinahanglan nga trangkahan kag butangan naton sing alarma para sa kawatan kon gab-i ang aton ganhaan.”

¹⁹ Ining matutom nga mga sakop sang pangulohan sang Dios wala sing problema sa krimen sa tunga nila, samtang indi ini mahimu sa tunga sang kalibutan. Subong man, sanglit ila ginatuman ang mataas nga talaksan sa moral sang Biblia, wala sila nasit-an sang ginapaliton paagi sa sekso nga balatian ukon aborsion nga epidemia sa kada pungsod. Kag ang mga alagad ni Jehova nagatahod sing tudok sa pag-asawahay, kabaliskaran sa matinuguton nga pagtamod sang kalibutan tuhoy sa kahimusan sang pag-asawahay. Ngaa sarang mahuptan sang mga Saksi ni Jehova ina nga talaksan? Bangod si Jehova nagatuytoy sang iya matutom nga mga sumilimba, kag “sa Dios ang tanan nga butang posible.”—Mateo 19:26.

Gintipon sa Matuod nga Pagsimba

20. Ano ang pinakaimportante nga hublag sa moderno nga tion?

²⁰ Nahibaloan man ukon wala sang mga tawo, ang tugob-globo nga pagtipon sa katulad-karnero nga mga tawo pasulod sa organisasyon ni Jehova amo ang pinakaimportante nga hitabo sa moderno nga tion. Nagatuman ini sa talalupangdon nga tagna sang Isaias 2:2, 3: “Kag mahanabo sa ulihi nga mga adlaw nga ang bukid sang balay ni Jehova [ang iya ginbayaw nga matuod nga pagsimba] tukoron sa putokputokan sang kabukiran, kag pakataason sa ibabaw sang kabakoloran; kag magadugok sa iya ang tanan nga mga pungsod. Kag ang madamu nga katawhan magakadto kag magasiling: ‘Kari kamo, magataklad kita sa bukid ni Jehova, . . . kag tudloan niya kita sang iya mga dalanon, kag magalakat kita sa iya mga banas.’”

21. Ano ang ginapalig-on nga himuon sang bunayag sing tagipusuon nga mga tawo?

²¹ Ginapalig-on namon ang tanan nga bunayag sing tagipusuon nga mga tawo nga mangin bahin sining makalilipay nga hublag sa bug-os nga kalibutan padulong sa matuod nga pagsimba kag matarong nga pangulohan. Agoma ang mga pagpakamaayo nga karon mismo nagaabot gikan sa pagpakig-upod sa mga tawo nga gintudloan sang mga kasugoan kag mga prinsipio sang Dios. Matutom nga magpasakop sa pangulohan sang Ginharian nga sa ulihi magasugod sa paghimu sini nga duta nga isa ka paraiso. Magsalig sa sina nga Ginharian kag indi sa mga plano sini nga kalibutan, kag subong sang ginasiling sang Salmo 127:1: “Kon indi si Jehova magpatindog sang balay, nagapangabudlay sa wala sing pulos ang nagapatindog sini.” Sabta ang pangagda sang Salmo 66:5: “Kari, kag tan-awa ang mga binuhatan sang Dios. Ang iya ginahimu ayon sa anak sang mga tawo makakulugmat.” Gani magkari sa Dios nga nagagarantiya sang pinakamaayo nga pangulohan para sa katawhan, ang pangulohan nga makahimu sang indi mahimu sang tawo, ang pangulohan nga sa dili madugay amo lamang ang isa nga tigayunon sini nga duta.

Paano Nimo Sabton?

◻ Ngaa makapat-od kita nga tumanon ni Jehova ang iya mga katuyoan?

◻ Paano ang prinsipio sang pagbakal uli nagapanghikot para sa paghilway sa isa gikan sa sala?

◻ Anong daku nga hilikuton sa pagtudlo kag pagpatindog ang mahanabo sa Bag-o nga Kahimusan?

◻ Ano ang pamatuod karon nga ang paghidait, paghiusa kag gugma magaluntad sa bug-os nga duta sa Bag-o nga Kahimusan?

[Laragway sa pahina 17]

Sa idalom sang pagginahom sang Ginharian, ang mahigugmaon sa kamatuoran nga mga tawo ‘tudloan tanan ni Jehova’

[Laragway sa pahina 19]

Ang paghidait kag paghiusa isa na ka katunayan sa tunga sadtong nagapasakop sa pangulohan sang Ginharian