Determinado nga Magtipon sing Tingob

“ANG pinakamabunok nga ulan sa sulod sang 80 ka tuig nagpatay sang 28,” amo ang mabasa sa pangulo nga dinalan sang madason nga adlaw. Sa sulod lamang sang anum ka oras, sugod 2 s.a. tubtob 8 s.a., mga 10 ka pulgada (25 cm) ang nagtupa sa naaminhan nga Taiwan. Naigo sing grabe amo ang Siudad sang Taipei. Sa sadtong pila ka oras, nagtupa ang kinaandan kuntani anay nga pagguom, nagtuga sing pagbaha nga subong kataas sa 13 pie (4 m) sa iban nga lugar. Apang ang naaminhan nga Taiwan amo ang duog diin ang mga Saksi ni Jehova magatipon sina nga adlaw, kag ang Taipei amo ang siudad nga ang ila asambleya pagahiwaton! Sarang bala gihapon sila makatipon sa ikaduha nga adlaw sang ila makaduha sa isa ka tuig nga sirkito nga asambleya?

Pagbugtaw namon sina nga adlaw, Hunyo 3, 1984, wala namon marealisar sang akon asawa kon daw ano ka grabe ang bagyo. Ang makusog nga ulan kinaandan na sa panag-on sang mon­soon, kag wala gid namon paghunahunaa ini sing maayo. Sing amat-amat, ang dikinaandan nga kalinong nagluntad. Ang mga bus, nga sing kinaandan nagadulog kada pila ka minuto sa apartment nga amon ginaistaran, wala na. Kag sang, 7:30 s.a., nauntat ang elektrisidad, nasugdan namon apresyahon nga indi ini kinaandan nga talithi sa mon­soon. Nabalaka tuhoy sa asambleya nga naeskedyul nga magasugod sa 9:55 s.a., gintawgan ko ang isa nga natungod sa ­sound sa asambleya agod pat-uron nga may yara ginapaandar sang baterya nga kasangkapan sa pagpabaskog sang tingog kag mga flash­light en kaso nga madula ang koryente sa programa.

Sa amo man nga tion, nabatian namon gikan sa amon mga kasilingan kag mga abyan ang tuhoy sa lapnag nga pagbaha sa amon bahin sang siudad. Determinado nga makaabot sa asambleya para sa sesyon sa aga, naghalin kami pagkaligad sang alas 8 s.a. nga sakay sang amon motor­bike agod lakbayon ang kinaandan nga 20 ka minuto nga paglakbay pakadto sa As­sem­bly Hall. Paglab-ot gid namon sa kalye, narealisar namon nga problema ang pag-agi. Ang apat ka lainlain nga ruta nga amon gintilawan napamatod-an nga indi maagihan sang makalab-ot kami sa mas manubo nga bahin. Madamu na nga beses sang nagligad nga nakaagi kami sa tubig nga 12-16 pie (30-40 cm) kadalom samtang nagaduaw sa mga kongregasyon kon tingulan. Apang karon, bisan ang mga bus kag mga trak indi makaagi sa tagahawak nga tubig. Gani gindala namon pauli ang motor­bike kag namat-od nga maglakat. Determinado gihapon kami nga makigtipon upod sa amon espirituwal nga mga kautoran sadto nga adlaw.

Ang paglakat mabudlay man. Bisan wala na sing ulan, ang tubig padayon nga nagadalom. Ang kaki nga tubig nagabukal kaangay sang mga tuboran gikan sa mga kanal kag mga man­hole samtang nagahinampot kami sa ­Ching Mei Riv­er, kay ang nagbaha nga tubig sa likod sang suba mas mataas na sang sa palibot nga duta. Nag-abresitahay kami kag hinay-hinay nga nag-agi sa masulob nga tubig—mahalungon nga nagapat-od sang amon tagsa ka tikang agod indi kami mahulog sa bisan ano nga buho. Sang makalab-ot kami sa ibabaw sang taytay sang suba nga narealisar namon sing bug-os ang pagkagrabe sang sitwasyon. Ang kinaandan anay nga diutay nga suba sa malapad nga pangpang nga ginagamit sa pagtanum sang mga utanon kag sa pagsagud sang mga baboy, mga 49 pie (15 m) sa ubos sang taytay, isa na karon ka makusog nga baha nga nagatabon sang pangpang halos tubtob sa ibabaw sang suba—kag mga 3 pie (1 m) sa ubos sang taytay!

Ang baha sa pihak nga bahin sang taytay mas grabe pa gid. Apang ang iban nga nag-agi diri nagsambit nga ang kahimtangan didto sa dalan indi tuman kalain kag ang mga bus kag mga taksi nagaagi didto. Gani nagkadto kami didto. Apang samtang nagalayo kami, nagakusog pa gid ang tubig. Ang akon asawa, nga mas manubo sa akon, nagakabit sing hugot sa akon agod huptan ang iya balanse. Nian nakaabot kami sa isa ka duog nga daw indi gid maagihan. Gikan sa isa ka bangga, isa ka makusog, madalom, katulad-sang-suba nga baha sang tubig ang nagaguwa. Sing malipayon, duha ka kalat ang ginhigot sa sini nga bahin, kag paagi sa pagpanguyapot sa sini nakaagi kami. Samtang nagapakadto kami sa mas mataas nga lugar ang tubig nagnabaw kag sang ulihi nagdulog kami, nag-ula sang tubig sa amon mga bota kag busa nagpamag-an sang lulan sang amon tiil.

Pag-abot sa nauna wala ginbaha nga dalan, isa pa ka problema ang amon nasumalang sa amon pagpakadto sa As­sem­bly Hall: Ang pila ka mga bus nga nagabiahe puno kaayo kag ang kalabanan nga mga taksi wala na nagapasakay sing pasahero. Apang sang ulihi, ang isa nga may pasahero na, nagdulog sa amon. Pagkatapos sang madamu nga paglibotlibot agod makalikaw sa nagbaha nga mga duog nakalab-ot kami sa As­sem­bly Hall mga lampas alas 10 s.a.

Sa amon kalipay, kalabanan sang mga Saksi yadto na didto kag nagahulat nga magsugod ang asambleya. Ang tanan nanikasog sing daku nga makalab-ot didto, nag-agi sa lainlain nga kadalumon sang tubig, samtang ang mga bus kag mga motorsiklo—nga masami ginagamit sang kalabanan—indi makaagi. Daw ano ka makalilipay nga makita ang ila apresasyon sa programa sang asambleya! Mga 417 lamang ka mga Saksi sa sini nga bahin, apang madamung mga interesado ang nag-atubang man nga may pagbatas sa baha sa ila determinasyon nga makigtipon upod sa ila kag mapasulhayan sang espirituwal nga mga kamatuoran sang Biblia. Ang nagtambong nga 629 sa sesyon sang aga naglab-ot sa 764 sa panguna nga pamulongpulong sang hapon! Kapin sa 30 ka tawo ang napatay bangod sang pagkalunod ukon pagkatiphag sang lunang sa amon duog sang naaminhan nga Taiwan, apang wala sadtong isa nga determinado nga makigtipon ang nakaagom sing bisan ano nga samad. Nagapasalamat sa proteksion ni Jehova, nagkalipay sila sa matahom nga program.

Huo, nagasalig kita nga si Jehova magaamlig sa aton tanan sa aton determinasyon nga makakadto sa asambleya—nga wala gid nagakabalaka sing daku tuhoy sa aton balay kag sa mga pagkabutang didto. Kag sa pagkamatuod, wala sang nagtambong ang nakaagom sing bisan anong serioso nga halit. Apang daku ang amon tanan natigayon bangod sang matam-is nga pagpakig-upod upod sa amon mga masigka Cristiano kag sa talalupangdon nga programa nga ginpresentar. Nagapamatuod ini sa amon nga, bisan mahapos nga ipaiway ang pagkadto sa Cristianong mga miting ukon mga asambleya kon may pila ka kabudlayan, yadtong mga nagapanikasog tunay nga pagapadyaan.—Gin-amot.