Si Jehova—Makapulonaw Apang Mahigugmaon
“SA KAY sin-o bala ipaangay ninyo ako”? pamangkot ni Jehova nga Dios. Bisan ang pinakamataas nga pamulong indi gid makapaliton sang dimapaanggiran nga gahom kag himaya sang Dios. Sia mismo nagaagda sa aton nga binagbinagon ang kahawaan sang kalangitan, nga nagasiling: “Itangla ang imo mga mata kag tan-awa. Sin-o bala ang nagtuga sini sa ila? Sia nga nagapaguwa sang ila kasoldadosan sa isip, ginatawag niya sila tanan sa ngalan. Bangod nga bugana sang dinamiko nga enerhiya, kag makusog man sia sa gahom, wala sing isa nga nakulang.”—Isaias 40:25, 26.
Ang linibolibo ka bituon nga makita sang mata bahin lamang sang 100 bilyones ka bituon nga nagahuman sang aton galaksiya lamang. Apang gin-isip kag ginhingadlan ni Jehova ang tanan nga mga bituon sa bilog nga uniberso! Binagbinaga, man, ang daku nga tomo sang enerhiya nga natago sa tanan sini. Ang aton adlaw may sentro nga temperatura nga 27 milyones degrees Fahrenheit (15 milyones degrees Celsius). Daw ano ka “dinamiko nga enerhiya” ang iya ni Jehova nga matuga ang binilyon sining nuklear nga mga hurnohan!
Busa ang paghangop sing bug-os kay Jehova lampas sa aton limitado nga ikasarang. Si Elihu nagsiling: “Ang Labing Gamhanan, indi kita makatungkad sa iya; lakas gid sia sa gahom . . . Busa nagakahadlok sa iya ang mga tawo.” (Job 37:23, 24) Apang, labi pa ang luyag ni Jehova sang sa aton pagkapunaw ukon pagkahadlok. “Dapat mo higugmaon si Jehova nga imo Dios upod sa imo bug-os nga tagipusuon kag upod sa imo bug-os nga kalag kag upod sa imo bug-os nga kusog,” mando sang Biblia. (Deuteronomio 6:5) Apang sarang bala naton mahigugma ang isa nga indi naton mahangpan sing bug-os? Huo, kay bisan ang puluy-an ni Jehova mataas sa mga langit, nagapakig-angot sia sing mahigugmaon upod sa dihimpit nga mga tawo kag nagapahanugot sa ila nga makatigayon sa indi magkubos sing bahin nga paghangop tuhoy sa iya.—Ipaanggid ang Salmo 113:5-9.
Ang Iya “mga Mata,” “mga Dulunggan,” kag “Nawong”
Ang isa ka paagi nga ginabuligan kita ni Jehova nga mahangpan sia amo ang paglaragway sa iya kaugalingon sa tawhanon nga mga termino. Si apostol Pedro nagsiling: “Ang mga mata ni Jehova nagatamod sa mga matarong, kag ang mga dulunggan nabuksan sa ila mga pangamuyo; apang ang nawong ni Jehova batok sa nagahimu sing malaut.”—1 Pedro 3:12; ipaanggid ang Exodo 15:6; Ezequiel 20:33; Lucas 11:20.
Sa pagkamatuod, malaragwayon ini, nga indi pagahangpon sing literal, subong nga ginatawag sang Kasulatan ang Dios sang “adlaw,” “taming,” ukon “Igang.” (Salmo 84:11; Deuteronomio 32:4, 31) ‘Apang indi bala ang Biblia nagasiling nga ginhimu kita sa iya “larawan”?’ pangatarungan sang iban. (Genesis 1:26, 27) Huo, apang ang pagsiling nga ang Dios may literal nga baba, ilong, kag mga dulunggan nagatuga sing serioso nga mga problema. Ang inugpamati sang Labing Gamhanan nga Dios, halimbawa, latiran bala sang balod sang tunog nga madala sang literal nga mga dulunggan? Indi, kay ginapakita sang Biblia nga “mabatian” sang Dios bisan ang wala sing tingog nga mga ekspresyon nga ginahimu sang tawhanon nga tagipusuon. (Genesis 24:42-45) Ang iya ikasarang sa “pagtan-aw” wala man nagadepende sa balod sang kapawa.—Salmo 139:1, 7-12; Hebreo 4:13.
Busa ginapabanaag sang himpit nga tawo, indi ang pisikal nga bahin, kundi ang mga kinaiya sang Dios subong sang gugma kag katarungan. Labi na nga mapadayag sang mga Cristiano ina nga mga kinaiya kon pamatian nila ang laygay ni apostol Pablo, nga nagapalig-on: “Isuklub ninyo ang bag-o nga personalidad, nga paagi sa sibu nga ihibalo sang Dios ginapabag-o suno sa larawan sang Isa nga nagtuga sini.”—Colosas 3:10.
Mga Palanan-awon sang Himaya
Sang dumaan nga panahon, ang iban nga mga alagad ni Jehova may pribilehiyo nga makabaton sing inspirado nga mga palanan-awon tuhoy sa langitnon nga himaya ni Jehova. Si Ezequiel isa sining mga indibiduwal. (Ezequiel 1:1) Ang iya nakita sa palanan-awon indi malaragway! Ginapaanggid ini ukon ginapareho ini ni Ezequiel, sing masami nagasiling nga ang iya nakita “subong sang” pamilyar nga materyal nga mga butang. Halimbawa, ang manalagna nagsiling:
“Subong sang dagway nga batong sapiro, ang kaangay sang trono. Kag sa kaangay sang trono may kaangay sang dagway sang tawo sa ibabaw sini. Kag nakita ko ang daw nagabaga nga metal, kaangay sang dagway sang kalayo sa sulod sini palibot, kutob sa dagway sang iya mga hawak paibabaw; kag kutob sa dagway sang iya mga hawak paidalom, nakita ko ang daw dagway sang kalayo, kag may kasiga sa palibot niya. Subong sang dagway sang balangaw nga yara sa gal-um sa adlaw sang ulan. Amo ini ang dagway sang kasiga sa palibot. Amo ini ang dagway sang kaangay sang himaya ni Jehova.”—Ezequiel 1:26-28.
Daw ano nga himaya ang ginlaragway ni Ezequiel! Si apostol Juan may kaanggid nga palanan-awon tuhoy kay Jehova, kag nagsulat sia: “Yari karon! may trono sa langit, kay may isa nga nagalingkod sa trono. Nga naglingkod didto kaanggid sang isa ka bato nga jaspe kag cornalina, kag may balangaw sa palibot sang trono kaangay sang esmeralda.” (Bugna 4:1-3) Bisan pa nga si Jehova ginarepresentar sinang mga pagkahalangdon, wala sia ginalaragway subong isa ka mapintas nga Dios. Sa baylo, ang iya kahimtangan malinong, mahidaiton kaangay sang balangaw.—Ipaanggid ang Genesis 9:12-16.
Ang katunayan nga ginapahanugotan sang Dios inang limitado nga mga pagtamod tuhoy sa iya langitnon nga pagkahalangdon nagapakita nga ang iya mga tinutuyo sa katawhan mahidaiton. Sa pagkamatuod, nian, yadtong nagahigugma sa Dios masinaligon nga makapalapit sa iya subong ang mabuot nga “Manugpamati sang pangamuyo.”—Salmo 65:2.
Ang tawo nga si Job nagsiling tuhoy sa Dios: “Yari karon! Ini sila mga higad lamang sang iya mga dalanon, kag daw ano ka diutay nga hutik nga mabatian ta sa iya!” (Job 26:14) May yara, sa pagkamatuod, madamu nga maton-an tuhoy kay Jehova nga Dios, nga nagpakamaayo sang iya mga alagad sang palaabuton nga magkabuhi sing dayon. (Juan 17:3) Apang bisan ang “wala katubtuban” indi bastante para sa aton nga “matungkad ang binuhatan nga ginhimu sang Dios kutob sa ginsugoran bisan tubtob sa katapusan.”—Manugwali 3:11.
Apang, ang nahibaloan ukon naton-an sang mga bunayag sing tagipusuon magapahulag sa ila nga higugmaon kag tumanon si Jehova. (1 Juan 5:3) Amo ka bala sina? Ang pagtuman sa Dios indi pirme mahapos. Apang kon imo gid nakilala si Jehova nga Dios kag ang iya mahigugmaon nga mga paagi, wala sing panikasog ang daw tuman ka daku. Busa, determinado ka bala nga makilala sing labi pa ining makapulonaw apang mahigugmaon nga Dios?
[Laragway sa pahina 6]
Ang mga lalaki kaangay nanday Ezequiel kag Juan may mga palanan-awon nga nagahatag lamang sa aton sing ideya tuhoy sa makapulonaw nga himaya ni Jehova
[Laragway sa pahina 7]
Ang pagtuga kag paghingalan sang Dios sa mga bituon nagahatag sa aton sing pila ka ideya tuhoy sa iya walay latid nga gahom