Mga Pamangkot Gikan sa mga Bumalasa

◼ Kon ginabatyag sang isa ka Cristiano nga ang isa sa kongregasyon indi maayo nga kaupod bangod sang iya pagginawi kag panimuot, personal bala niya nga ‘tandaan’ ina nga indibiduwal nahisuno sa 2 Tesalonica 3:14, 15?

Yadtong nangin bahin sang Cristianong kongregasyon nagahimu sina bangod ginahigugma nila si Jehova kag hanuot nga maluyag magkabuhi nahisuno sa iya mga prinsipio. Mas maayo ang makig-upod sa ila sang sa mga taga-guwa. Mas komportable kita upod sa mga masigka Cristiano, subong nga si Jesus labi nga naghigugma kay apostol Juan kag labi na nga suod sa 3 sang 12. Apang, ginpili niya, interesado, kag ginhigugma sila tanan. (Juan 13:1, 23; 19:26; Marcos 5:37; 9:2; 14:33) Bisan pa nga ang tanan nga mga kautoran may kakulangan diin dapat kita magmahinangpunon kag magmapinatawaron, nahibaloan naton nga sa kalabanan nga bahin ang mga masigka tumuluo maayo nga mga kaupod. (1 Pedro 4:8; Mateo 7:1-5) Ang gugma isa pa ka nagapakilala nga tanda sang Cristianong kongregasyon.—Juan 13:34, 35; Colosas 3:14.

Apang, kon kaisa, ang isa mahimu nga may panimuot ukon pagkabuhi nga wala naton naluyagan sing personal. Si apostol Pablo nagsulat tuhoy sa iban sa Corinto nga ang personal nga mga pagtamod tuhoy sa pagkabanhaw indi husto kag may ‘magkaon, mag-inum, kag magkalipay’ nga panimuot. Ang hamtong nga mga Cristiano sa kongregasyon dapat nga maghalong sa ila, kay si Pablo naglaygay: “Indi magtalang. Ang malain nga kaupdanan nagahalit sa mapuslanon nga mga batasan.”—1 Corinto 15:12, 32, 33.

Ini nga laygay importante man karon. Halimbawa, mahimu masapwan sang Cristianong mag-asawa nga ang ila kabataan malain nga naapektohan kon makig-upod sila sa iban nga mga kabataan nga mahimu wala nagakabig sing serioso sang kamatuoran ukon mahimu nga may kalibutanon nga panghunahuna. Ining iban nga mga kabataan kinahanglan pa nga hanason sing diosnon. Apang tubtob wala pa sing pamat-od sa sina, mahimu nga dumilian sang mag-asawa ang ila kabataan nga makighampang kag magduaw sa ila. Indi ini ‘pagtanda’ subong sang ginahambalan sa 2 Tesalonica kapitulo 3. Ginaaplikar lamang sang mga ginikanan ang laygay ni Pablo nga likawan ang “malain nga kaupdanan.”

Ang mga kahimtangan nga nagakinahanglan sing ‘pagtanda’ mas serioso sang sa halimbawa nga ginsambit sa ibabaw nga nagadalahig sa mga kabataan. Kon kaisa ang isa ka tawo sa kongregasyon nagahimu sing dimakasulatanhon nga dalanon nga tuman ka makatulublag, apang indi pa nagakabagay nga sikwayon subong sang ginasambit sang 1 Corinto 5:11-13. Ina nga pagginawi natabo sa kongregasyon sang dumaan nga Tesalonica, gani si Pablo nagsulat: “Nakabati kami nga ang iban sa inyo nagaginawi sa indi mahim-ong, nga nagatinamad, apang nagapanghilabot sa iban.”—2 Tesalonica 3:11.

Apang ano ang ginahimu sang iban nga mga Cristiano sa Tesalonica? Si Pablo nagsulat: “Nagasugo kami sa inyo, mga kautoran, sa ngalan sang aton Ginuong Jesucristo, nga magpahilayo kamo sa tagsa ka utod nga nagagawi sing tinamad kag indi suno sa tradisyon nga nabaton ninyo sa amon. Mga kautoran, dili kamo magpakaluya sa paghimu sing maayo. Kon ang bisan sin-o wala nagatuman sang amon pulong sa sining sulat, tandai ina nga tawo, kag dili kamo magpasilabot sa iya, agod nga mahuy-an sia. Dili ninyo pagbilangon sia nga kaaway, kundi paandami sia subong nga utod.”—2 Tesalonica 3:6, 13-15.

Busa, wala nagahingalan sa matamad nga mga mahilabtunon, ginbuyagyag ni Pablo sa kongregasyon ang ila sayop nga dalanon. Ang tanan nga mga Cristiano nga nakahibalo kon sin-o ang mga matamad magakabig sa ila nga “gintandaan.” Ang laygay, “tandai sia,” naggamit sang Griegong tinaga nga nagakahulugan “butangi sing tanda,” kon sayuron, ‘talupangdon sing pinasahi ang isa.’ (New World Translation Reference Bible, footnote) Si Pablo nagsiling, “Dili kamo magpasilabot” sa gintandaan “agod nga mahuy-an sia.” Ang mga kautoran indi bug-os nga magalikaw sa iya, kay si Pablo naglaygay sa ila nga: “Paandami sia subong nga utod.” Apang paagi sa paglatid sang ila sosyal nga pagpakig-upod sa iya, mahimu nga mahuy-an sia kag ayhan magabugtaw sa mga kinahanglanon nga magpahisuno sa mga prinsipio sang Biblia. Samtang ang mga kautoran nga lalaki kag mga kautoran nga babayi maamligan gikan sa ila indi maayo nga impluensia.—2 Timoteo 2:20, 21.

Ang Cristianong kongregasyon nagaaplikar man sini nga laygay.a Ang The Watchtower sang Pebrero 1, 1982, pahina 31, nagpadaku nga ang pagtanda indi pagahimuon bangod lamang sang pribado nga mga opinyon ukon kon ang isa ka Cristiano personal nga nagpakamaayo nga likawan ang suod nga pagpakig-upod sa iya. Subong sang ginpakita sa kaso sa Tesalonica, ang pagtanda nagahilabot sang serioso nga paglapas sa mga prinsipio sang Biblia. Una tinguhaan sing liwat kag liwat sang mga gulang nga buligan ang nakalapas paagi sa paglaygay sa iya. Kon ang problema magapadayon, mahimu sila, nga wala nagasambit sang ngalan sang tawo, magahatag sing nagapaandam nga pamulongpulong sa kongregasyon nahanungod sa malain nga pagginawi nga nadalahig, subong sang ginpaandam ni Pablo sa mga taga-Tesalonica. Pagkatapos sina, ang indibiduwal nga mga Cristiano “magatanda” sa nakasala.

Kinahanglan ang maayo nga paghukom sa baylo sang napat-od na nga daan nga mga kasugoan nahanungod sa tagsa ka bahin sang pagtanda. Si Pablo wala maghatag sing detalyado nga mga kasugoan nahanungod sina nga problema sa Tesalonica, subong sang pagpat-od kon daw ano kalawig dapat ang isa indi makig-upod antes sia tandaan. Sing kaanggid, ang mga gulang malapit sa panong kag makagamit sang pagkarasonable kag pagkamahinantupon sa pagpat-od kon bala ang isa ka partikular nga sitwasyon serioso gid kag makatulublag nga nagakinahanglan sing nagapaandam nga pamulongpulong sa kongregasyon.b

Ang isa ka katuyoan sang pagtanda amo ang pagpahulag sa matamad nga Cristiano nga mahuy-an kag untatan ang iya dimakasulatanhon nga dalanon. Ang mga indibiduwal nga nagtanda sa iya, labi na ang mga gulang, padayon nga magapalig-on sa iya kag magapatalupangod sang iya panimuot subong nga sila nagapakig-angot sa iya sa mga miting kag sa mga pag-alagad sa latagon. Kon nakita nila nga ang problema kag panimuot nga nagakinahanglan sing pagtanda nagabalhin, sarang nila matapos ang ila paglatid agod makig-upod uli sa iya.

Gani, ang pagtanda indi dapat pag-igumon sa personal ukon pamilya nga pag-aplikar sang laygay sang Biblia nga likawan ang malain nga kaupdanan. Samtang ang pagtanda indi sing masami kinahanglan, maathag nga ang pagtanda isa ka Makasulatanhon nga tikang nga ginahimu kon ini nagakaigo, nga ginhimu sang aton mga taga-Tesalonica nga mga kautoran.

[Mga footnote]