Report sang mga Manugbantala sang Ginharian

Pagpanaksi sa Eskwelahan

“MAGTINGUHA sing maayo gid sa pagpakita sang imo kuagalingon sa Dios subong nga pinakamaayo, manugpangabudlay nga indi kinahanglan magkahuya, nga nagagamit sing matadlong sang pulong sang kamatuoran,” sulat ni Pablo sa pamatan-on nga si Timoteo. (2 Timoteo 2:15) Madamung mga kabataan sang mga Saksi ni Jehova ang may kahigayunan nga makapanaksi nahanungod sa maayong balita sang Ginharian sang Dios sa eskwelahan. Wala sila mahuya nga himuon ini kag ginaapresyar sila tungod sini sang madamu nga iban pa nga mga estudyante.

◻ Ang isa ka halimbawa sini naghalin sa Martinique. Ang isa ka bata nga babayi nga kilala sa eskwelahan subong isa sang mga Saksi ni Jehova masami nga ginapangayoan sang iya manunudlo sang iya opinyon sa relihioso nga mga topiko. Pirme sia nagapakighambal sa sini nga manunudlo, kag ginbaton sang manunudlo ang pila ka literatura sang Watch Tower.

Isa ka adlaw ginhambalan sa klase ang tuhoy sa sobra nga populasyon sa duta. Sang ginhambalan kon paano punggan ang pagginutok sa duta, ginsambit ang kontrasepsion kag aborsion. Ang iban nga mga estudyante boto sa aborsion kag ang iban batok sa sini. Ginpangabay sang manunudlo ang opinyon sang lamharon nga utod nga babayi. Nagsiling sia nga nalipay sia nga ihatag ang kompleto nga paathag sa masunod nga adlaw. Sadto nga gab-i naghanda sia, kag sang masunod nga adlaw gindala niya sa eskwelahan ang pila ka magasin nga Awake! nga nagahinun-anon sing Makasulatanhon sang topiko tuhoy sa aborsion. Matapos mabasa ang materyal, ginpamangkot niya ang klase, kag sa talipusposan sang paghambalanay ang “bug-os nga klase nagpabutyag nga batok sa aborsion,” siling niya. Ang iban nga mga estudyante nagsuskriber sa magasin nga Awake!

◻ Ang isa pa ka eksperiensia naghalin sa Sweden diin ang mga utod masami nga ginaagda nga maghatag sing mga pamulongpulong sa mga eskwelahan. Ang isa ka espesyal payunir nga ministro sang mga Saksi ni Jehova gin-agda nga maghatag sing pamulongpulong sa isa ka klase. Ang manunudlo nagsiling: “May iban na nga mga pastor nga nagkadto diri, apang nagtokar lamang sila sing gitara kag nagsiling sa mga estudyante nga magmabuot. Amo lang ina,” siling sang manunudlo, “apang luyag ko nga may maton-an ang akon mga estudyante.” Nian gin-areglo niya nga magkari ang Saksi kag maghiwat sing regular nga pagtuon sang Biblia upod sa klase.

Ang mga estudyante sa hulot-klasehan, subong man ang mga tawo bisan diin sa bug-os nga kalibutan karon, madamu sing pamangkot tuhoy sa kahimtangan sang kalibutan ukon pamilya kag sosyal nga mga problema nga luyag nila masabat. Daw ano nga pribilehiyo para sa mga Saksi ni Jehova nga yara pa sa eskwelahan nga mag-ukod pa gid sa personal nga pagtuon kag sa mga miting sa kongregasyon, agod makatigayon sing paghangop sa Biblia kag makabulig sa ila nga maton-an ang mga sabat sa Biblia! Ang Hulubaton sa Biblia nagalaygay: “Dili pagpunggi ang maayo gikan sa ila sa diin naigo ini, kon ini yara sa gahom sang imo mga kamut sa paghimu sini.”—Hulubaton 3:27.