Ginpakamatarong Subong Abyan sang Dios

“‘Si Abraham nagtuo kay Jehova, kag ginkabig ini sa iya nga sa pagkamatarong,’ kag gintawag sia nga ‘abyan ni Jehova.’”—SANTIAGO 2:23.

“NAHAMUOT ang Dios nga ang tanan nga kabug-osan magpuyo sa iya [Cristo], kag paagi sa iya ipasag-uli ang tanan nga butang paagi sa pagpakighidait pasad sa dugo nga iya ginpatulo sa usok sang pag-antos, walay sapayan kon bala mga butang sa duta ukon mga butang sa langit.” (Colosas 1:19, 20) Ining balaan nga katuyoan sa pagpasag-uli nagahingapos na.

² “Ang mga butang sa langit” indi ang espiritu nga mga tinuga, kay ang mga anghel wala ginagawad sang dugo ni Cristo. Sa baylo, sila ang mga tawo nga ginbakal paagi sa dugo sang Kordero agod mangin “isa ka ginharian kag mga saserdote” upod kay Cristo sa “bag-ong mga langit.” Ini sila napakamatarong na sing bug-os paagi sa dugo ni Cristo. Dugang pa, sa sulod sang 50 ka tuig na karon, si Jehova nagapakighidait sa “mga butang sa duta,” ang mga tawo nga mangin bahin sang matarong nga “bag-ong duta.” (Bugna 5:9, 10; 2 Pedro 3:13) Ining pagtipon sang “tanan nga butang,” ang mga butang nga dutan-on kag ang mga butang nga langitnon, “nahisuno sa iya [Jehova] kalipay nga iya gintuyo sa iya kaugalingon.”—Efeso 1:9, 10.

Ang Katuyoan sang Dios Para sa Iya Anak nga si Adan

³ Si Adan gintuga nga isa ka himpit, matarong, tawhanon nga anak sang Dios. (Lucas 3:38) Ang iya pagkamatarong wala ginpadungog sa iya. Kinaugali yadto sa iya. Pasad sa iya pagkawalay sala sa atubangan ni Jehova, indi kinahanglan nga ‘pakamatarungon’ si Adan. Tubtob nagapasakop sia sa paggahom sang Dios, mahuptan niya ang isa ka maayong tindog sa atubangan sang iya Manunuga.

⁴ Apang, wala pa niya mapamatod-i ang iya kaugalingon subong isa nga nagahupot sing integridad kag wala pa sia mahukmi nga takus sang kinamatarong sa kabuhi nga walay katapusan sa duta. Para sa sina, dapat sia magpakita, sa sulod sang isa ka hut-ong sang tion, sing katutom kay Jehova kag paghigugma sa pagkamatarong. Kon napamatod-an niya kuntani ang iya integridad sa idalom sang pagtilaw, nabaton niya kuntani ang kinamatarong sa kabuhi nga walay katapusan sa duta. Kuntani daw subong bala nga gindeklarar sia sang Dios, ukon pasad sa rekord nagsiling, nga si Adan takus sa kabuhi nga walay katapusan. Bilang simbulo sini, wala sing duhaduha nga gindala sia ni Jehova sa “kahoy sang kabuhi” kag gintugutan sia sa pagkaon sang bunga sini.—Genesis 2:9, 16, 17; 3:22.

⁵ Apang napaslawan si Adan sang gintilawan kag gani nadula niya ang kahimpitan, ang pagkamatarong, kag ang pagkaanak para sa iya kaugalingon kag sa iya mga anak. (Roma 5:12) Busa, ang mga kaliwat ni Adan natawo tanan nga nahamulag sa Dios, kinaugali nga dimatarong. (Efeso 2:3; Roma 3:10) Sa amo, ang tawhanon nga tinuga “napasakop sa kaluyahon” apang “pasad sa paglaum,” kag ina nga paglaum nga maluwas gikan sa sala kag kamatayon ginhatag sa gilayon sa tapos sang pagrebelde sa Eden.—Roma 8:20, 21; Genesis 3:15.

Ginpakamatarong sa Atubangan ni Cristo—Paano?

⁶ Ang paglaum sang katawhan nga maluwas gikan sa sala kag kamatayon nasandig sa pagkari sang ginsaad nga “binhi,” ang bugtong nga Anak sang Dios. (Juan 3:16) Sa wala pa ang mahalaron nga kamatayon ni Cristo, wala sing paagi nga ang mga tawo makatigayon sing “kahilwayan kag kabuhi,” ukon sing “pagkamatarong para sa kabuhi.” (Roma 5:18, Revised Standard Version; New World Translation) Walay sapayan, bisan sa wala pa ginbayad ni Cristo ang gawad para sa kaluwasan sang tawo, ang pila ka mga lalaki kag mga babayi nagtuo sa saad sang Dios kag ginsakdag nila ina nga pagtuo paagi sa mga buhat. Bangod sini, maluluy-on nga ginpatawad ni Jehova ang ila sala kag ginbaton sila subong iya mga alagad. Mahigugmaon nga ginkilala niya sila subong relatibo nga wala sing sala, kon ipaanggid sa daku nga bahin sang katawhan nga nahamulag sa Dios. (Salmo 32:1, 2; Efeso 2:12) Ginhatagan niya sila sing isa ka matarong nga tindog, nagapakamatarong sa ila tubtob sa kasangkaron nga nagakaigo sadto nga tion.

⁷ Sa amo, paagi sa pagtuo si Abel ‘napamatod-an nga matarong.’ (Hebreo 11:4) Si Noe “nangin manunubli sang pagkamatarong nga nahisuno sa pagtuo.” (Hebreo 11:7) Walay sapayan sang iya mga kaluyahon, si Job gintawag nga “himpit kag matarong.” (Job 1:1, 22; 7:21) Si Finees nagpakita sing kakugi para sa putli nga pagsimba, “kag yadto gin-isip sa iya nga pagkamatarong.” (Salmo 106:30, 31; Numeros 25:1-13) “Bangod sa pagtuo” kag bangod sang iya mga buhat sang kaluoy sa katawhan sang Dios, ang indi Israelinhon nga makihilawason nga si Rahab nakabaton sing matarong nga tindog, ukon ginpakamatarong.—Hebreo 11:31; Santiago 2:25.

Kon Paano si Abraham Gin-isip nga Matarong

⁸ Ang kaso ni Abraham takus talupangdon. Ang pagpakamatarong sa iya ginsambit sang duha ka manunulat sang Cristianong Griegong Kasulatan, nga lunsay nagsulat sa mga Cristiano sang nahaunang siglo nga gintawag agod mangin bahin sang 144,000 ka katapo sang espirituwal nga Israel.—Roma 2:28, 29; 9:6; Santiago 1:1; Bugna 7:4.

⁹ Sa iya sulat sa mga taga-Roma, nangatarungan si Pablo nga ang mga “gintawag nga mga balaan” (1:7), mga Judiyo kag mga Gentil (1:16, 17), ginpakamatarong “paagi sa pagtuo luwas sa mga buhat sang kasugoan.” (3:28) Agod pamatod-an ang iya pangatarungan, ginbuksan niya ang isa ka malawig nga paathag (4:1-22) kag ginbalikwat niya ang Genesis 15:6 nga nagasiling: “Si Abraham nagtuo kay Jehova, kag gin-isip ini sa iya nga sa pagkamatarong.” Nian, sa nagahinakop nga mga bersikulo sang kapitulo 4, si Pablo nagsiling nga si Jesus “ginpatay tungod sa aton mga paglapas kag ginbanhaw sa pagpakamatarong sa aton [kon sayoron, ‘ang mga balaan’ (Roma 1:7)].” Ang “aton” wala nagalakip kay Abraham, bangod madugay na sia napatay sa wala pa ang kamatayon kag ang pagkabanhaw ni Cristo. Busa, sang ginahambal ni Pablo sa masunod nga mga kapitulo ang mga “magahari” kag ang pagpakamatarong sa ila “para sa kabuhi” agod mangin “mga anak sang Dios” kag “mga masigkamanunubli ni Cristo,” maathag nga ang iya ginhambal tuhay sa pagkamatarong nga gin-isip sang Dios kay Abraham.—Roma 5:17, 18; 8:14, 17, 28-33.

¹⁰ Ginasambit man ni Santiago si Abraham subong isa ka halimbawa sa pagpamatuod nga ang pagtuo dapat pamatod-an sang diosnon nga mga buhat. Sa tapos mahambal nga si Abraham ginpakamatarong, nga ginabalikwat ang Genesis 15:6, nagdugang si Santiago sing komento agod buligan kita sa paghangop sang kasangkaron sang pagpakamatarong kay Abraham. Sia nagsulat: “Natuman ang kasulatan nga nagasiling: ‘Si Abraham nagtuo kay Jehova, kag ginkabig ini sa iya nga sa pagkamatarong,’ kag gintawag sia nga abyan sang Dios.’” (Santiago 2:20-23) Huo, bangod sang iya pagtuo, si Abraham ginpakamatarong subong abyan ni Jehova, indi subong anak nga may kinamatarong sa himpit tawhanon nga kabuhi ukon sa pagkahari upod kay Cristo. Sing makawiwili, sa iya Synonyms of the Old Testament, si Rob­ert Gir­dle­stone nagsulat tuhoy sa pagpakamatarong kay Abraham: “Ining pagkamatarong indi bug-os, subong halimbawa sang pagkamatarong nga magarekomendar kay Abraham sa Dios sing kinamatarong sa pagpanubli sing pagkaanak.”

Ang Iya ni Jehova Tolon-an sang Handumanan

¹¹ Ang pagpadungog sing relatibo nga pagpakamatarong sa matutom nga mga lalaki kag mga babayi sa wala pa si Cristo tanda sang matuod, ukon aktuwal, nga pagkamatarong kag pagkahimpit nga may kaangtanan sa kabuhi nga walay katapusan nga ila matigayon sa bag-ong duta sang Dios. Bangod sang ila ginalauman nga kabuhi, mahimo nga ang ila mga ngalan nasulat sa isa ka tolon-an sang handumanan. (Ipaanggid ang Malaquias 3:16; Exodo 32:32, 33.) Nagaunod ini sang mga ngalan sang ginkabig ni Jehova subong “mga matarong” nga nagpakita sang ila pagtuo paagi sa matarong nga mga buhat, kag nagalinya sa pagbaton sing kabuhi nga walay katapusan sa duta.—Salmo 69:28; Habacuc 2:4.

¹² Apang, ina nga mga ngalan wala pa masulat sa “tolon-an sang kabuhi” ni Jehova. (Bugna 20:15) Kon inang matutom nga mga lalaki kag mga babayi sang una makabalik na sa duta sa ‘pagkabanhaw sang matarong,’ wala sing duhaduha nga batunon nila nga may pagtuo ang aman ni Jehova para sa kabuhi paagi sa halad nga gawad ni Cristo. (Binuhatan 24:15) Sa amo sila mangin bahin sang “iban nga mga karnero” ni Jesus upod sa “dakung kadam-an” nga nakalampuwas sa “dakung kapipit-an.” (Juan 10:16; Bugna 7:9, 14) Paagi sa sina, mahuptan nila ang ila mga ngalan sa iya ni Jehova tolon-an sang handumanan.

Gin-isip nga Matarong Subong mga Abyan Para sa Kaluwasan

¹³ Ginapasulod na karon sang Maayong Manugbantay nga si Jesucristo ang “iban nga mga karnero” nga indi bahin sang “diutay nga panong” sang 144,000 ka “mga balaan” nga ginhatagan sing langitnon nga Ginharian. (Lucas 12:32; Daniel 7:18) Ining “iban nga mga karnero” nagapamati sa tingog sang Maayong Manugbantay. (Juan 10:16) Nagatuo sila kay Jehova kag sa iya Anak. Ginadedikar nila ang ila kabuhi kay Jehova pasad sa halad nga gawad ni Cristo. Ginabawtismohan sila “sa ngalan sang Amay kag sang Anak kag sang balaan nga espiritu” kag ginakilala nila ang kinahanglanon nga palambuon “ang mga bunga sang espiritu.” (Mateo 28:19, 20; Galacia 5:22, 23) Ang ila mga ngalan ginasulat sa iya ni Jehova tolon-an sang handumanan.

¹⁴ Ining “iban nga mga karnero” nga ginatipon sa sining tion sang katapusan magahuman sa “dakung kadam-an” nga nakita ni apostol Juan sa palanan-awon, sa tapos niya makita ang 144,000 ka katapo sang espirituwal nga Israel. (Bugna 7:4, 9) Ginlaragway niya ang “dakung kadam-an” subong “nagbunak sang ila mga panapton nga malaba kag nagpaputi sini sa dugo sang Kordero.” (Bersikulo 14) Bangod sang ila pagtuo sa ginpatulo nga dugo sang Kordero, ang isa ka kasangkaron sang pagkamatarong gin-isip sa ila. Ginlaragway ini sang ila simbuliko nga maputi nga mga panapton nga malaba. May yara sila matinlo nga tindog sa atubangan ni Jehova, kag “amo kon ngaa” ginatugutan niya sila sa ‘paghalad sa iya sing balaan nga pag-alagad sa adlaw kag gab-i sa iya templo.’ (Bersikulo 15) Sa gihapon, dapat nila itu-ad sa adlaw-adlaw ang ila mga sala kay Jehova kag mangayo sing kapatawaran paagi kay Jesucristo.—1 Juan 1:9–2:2.

¹⁵ Nga ang “iban nga mga karnero” mga abyan sang Dios kag bisan sa karon may relatibo nga matarong nga tindog sa atubangan niya ginhimo man nga maathag sang tagna ni Jesus tuhoy sa ‘tanda sang iya presensia,’ nga nagalakip sang ilustrasyon sang mga karnero kag mga kanding. Bangod ang “mga karnero” nagahimo sing maayo sa nagkalabilin sang 144,000 ka “kauturan” ni Cristo nga yari pa sa duta, ginapakamaayo sila sang Amay ni Jesus kag ginatawag nga “mga matarong.” Kaangay ni Abraham, ginaisip sila, ukon ginadeklarar, nga matarong subong mga abyan sang Dios. Ang ila matarong nga tindog magakahulugan man sang ila kaluwasan kon ang “mga kanding” magtaliwan padulong sa “walay katapusan nga kalaglagan.” (Mateo 24:3–25:46) Sila “magaguwa sa dakung kapipit-an” nga magatanda sang katapusan sang malauton nga sistema sang mga butang karon.—Bugna 7:14.

Gindala sa Kahimpitan

¹⁶ Ang “dakung kadam-an,” nga nakalampuwas sa “dakung kapipit-an,” wala pa mapakamatarong para sa kabuhi. Mahangpan naton ini gikan sa kamatuoran nga ang kapitulo nga nagasambit sa ila nagpadayon sa pagsiling: “Ang Kordero, nga yara sa tunga sang trono, magabantay sa ila, kag magatuytoy sa ila sa mga tuburan sang tubig nga nagahatag sing kabuhi.” (Bugna 7:17) Gani, bisan pa gin-isip na sila sang Dios nga matarong kon ipaanggid sa katawhan sa kabilogan kag subong iya mga abyan, nagakinahanglan sila sing dugang pa nga bulig, ukon mga tikang nga himuon, agod mapakamatarong sila para sa kabuhi.

¹⁷ Sa tion sang Milenyo, ang nagalingkod sa trono nga Kordero, si Cristo Jesus, upod sa iya 144,000 ka kaupod nga mga hari kag mga saserdote, magaaplikar sang programa sang espirituwal kag lawasnon nga ‘pag-ayo sa mga pungsod.’ (Bugna 22:1, 2) Ina nga “mga pungsod” humanon sang mga nakalampuwas sa dakung kapipit-an, sang kabataan nga ibun-ag nila sa tapos sang Har–Magedon, kag sang mga buhion liwat sa “pagkabanhaw sang mga matarong kag mga dimatarong.” (Binuhatan 24:15) Ang mga ngalan sang tanan nga nagatuo sa dugo ni Cristo kag nakahimo sing nagakaigo nga “mga buhat” isulat sa ulihi sa “tolon-an sang kabuhi.”—Bugna 20:11-15.

¹⁸ Sa katapusan sang Milenyo nga Paghari ni Cristo, ang mga pumuluyo sang duta nga nakapamatuod nga ila ginbaton ang gawad ni Cristo kag magakabuhi suno sa mga talaksan ni Jehova nabayaw na sa kahimpitan. Mangin kaangay sila ni Adan sa wala pa sia magpakasala. Kaangay niya, sila tilawan sa ila pagkamatinumanon.

“Mahimayaon nga Kahilwayan” Subong “mga Anak sang Dios”

¹⁹ Sa gilayon gid sa tapos sang Milenyo, itugyan ni Cristo sa iya Amay ang himpit nga kaliwatan sang tawo. (1 Corinto 15:28) “Si Satanas hubaran” para sa katapusan nga pagtilaw sa katawhan. (Bugna 20:7, 8) Ang mga ngalan sang mga mapaslawan sa pagtilaw indi ‘masulat sa tolon-an sang kabuhi.’ Sila sing simbuliko ‘itagbong sa linaw nga kalayo,” nga “amo ang ikaduha nga kamatayon.”—Bugna 20:15; 21:8.

²⁰ Ang ngalan sang mga magamatutom kay Jehova isulat nga indi na mapanas sa “tolon-an sang kabuhi,” subong himpit sa integridad kag takus sa kinamatarong sa kabuhi nga walay katapusan sa duta. Nian pakamatarungon na sila ni Jehova sa bug-os nga kahulugan sini. (Roma 8:33) May kinamatarong na sila sa kabuhi nga dayon. (Bugna 20:5) Adoptahon sila sang Dios subong iya dutan-on nga mga anak, kag sila magasulod sa ginsaad nga “mahimayaon nga kahilwayan sang mga anak sang Dios.” (Roma 8:20, 21) Ang paghidait kag kalinong mapasag-uli na sa uniberso. Ang pagpasag-uli sa Dios mangin bug-os na para sa “mga butang sa duta” kag sa “mga butang sa langit.” (Colosas 1:20) Matuman na ang maluluy-on nga kahimusan ni Jehova sa pagpakamatarong. Sa pamangkot, “Ikaw bala matarong sa Dios?” ang tanan nga tinuga sa langit kag sa duta makasabat sing huo kag makadugang: “Sa nagalingkod sa trono kag sa Kordero ang pagpakamaayo kag dungog kag himaya kag kagamhanan tubtob sa walay katubtuban.”—Bugna 5:13.

Tuhoy sa tindog sang “iban nga mga karnero” sa atubangan sang Dios—

◻ Ngaa wala ginpakamatarong si Adan?

◻ Sa anong kasangkaron ginpakamatarong si Abraham kag ang iban pa nga mga lalaki kag mga babayi sa wala pa si Cristo?

◻ Kay sin-o mga ngalan ang ginsulat sa iya ni Jehova tolon-an sang handumanan?

◻ Sa anong kasangkaron ang “iban nga mga karnero” may matarong nga tindog sa karon, kag kon sila mahimpit na?

[Mga Pamangkot sa Pagtinuon]

1, 2. Paano ang “mga butang sa langit” kag ang “mga butang sa duta” ginapasag-uli sa Dios?

3, 4. Ano anay ang tindog ni Adan sa atubangan sang Dios, apang sa ano nga bahin nga kinahanglan gihapon sia nga pakamatarungon?

5. (a) Ano ang nadula ni Adan para sa iya kaugalingon kag para sa iya mga anak? (b) Anong paglaum nga kaluwasan gikan sa sala kag kamatayon ang ginhatag ni Jehova sa tawhanon nga tinuga?

6, 7. (a) Sa anong kasangkaron ang iban nga mga tawo ginpakamatarong sa wala pa ang mahalaron nga kamatayon ni Cristo? (b) Ano ang pila ka halimbawa sang mga alagad ni Jehova sa wala pa ang Cristianismo nga nakabaton sing matarong nga tindog?

8, 9. (a) Kay sin-o pagkamatarong ang panguna nga topiko sang sulat ni Pablo sa mga taga-Roma? (b) Sa anong mga bahin ang pagpakamatarong sa “mga balaan” labaw pa sa iya ni Abraham?

10. Paano si Santiago nagahatag sing kapawa sa kasangkaron sang pagpakamatarong kay Abraham?

11. Kay sin-o mga ngalan ang nasulat sa iya ni Jehova tolon-an sang handumanan, kag ngaa?

12. Ano ang himuon sang “mga matarong” nga ginbanhaw agod mahuptan ang ila mga ngalan sa iya ni Jehova tolon-an sang handumanan?

13. Sin-o karon ang ginapasulod sang Maayong Manugbantay, kag paano ang ila mga ngalan nasulat sa iya ni Jehova tolon-an sang handumanan?

14. Ano ang nagahatag sa “iban nga mga karnero” sing matinlo nga tindog sa atubangan ni Jehova, apang ano ang dapat nila pangayuon sa Dios?

15. (a) Paano ang parabola sang mga karnero kag mga kanding nagapakita nga ang “iban nga mga karnero” may matarong nga tindog sa Dios? (b) Sa anong kasangkaron ginapakamatarong sila sa karon?

16. Paano naton mahibaloan nga ang dakung kadam-an wala ginapakamatarong para sa kabuhi sa wala pa ang “dakung kapipit-an”?

17. (a) Ano ang kahulugan sang ‘pag-ayo sa mga pungsod’? (b) Sin-o ang nagakinahanglan nga masulat ang ila mga ngalan sa “tolon-an sang kabuhi”?

18. Sa anong kahimtangan nabayaw na ang mga pumuluyo sang duta sa katapusan sang Milenyo?

19. (a) Ano sa gilayon ang matabo sa tapos sang Milenyo? (b) Ano ang matabo sa ila nga ang ila mga ngalan wala nasulat sa “tolon-an sang kabuhi”?

20. (a) Sin-o ang pakamatarungon ni Jehova para sa kabuhi, kag ngaa? (b) Paano matuman na sang maluluy-on nga kahimusan ni Jehova para sa pagpakamatarong ang katuyoan sini?