Ibantala ang Ginharian sang Dios

“Baya-i ang mga patay sa paglubong sang ila kaugalingon nga mga patay, apang lakat ka kag ibantala ang ginharian sang Dios.”—LUCAS 9:60.

ANG Ginharian sang Dios—amo ina ang labing importante nga butang sa kabuhi ni Jesus! Amo man sa aton tanan karon nga iya matuod nga mga sumulunod. Bilang mga Cristiano, nagatinguha kita nga sundon sing suod ang mga tikang ni Jesus paagi sa pagkabuhi suno sa Biblia. (1 Pedro 2:21) Apang karon nga tuig sang 1986, kinahanglan bala nga usisaon naton liwat kon ano ang una nga mga butang sa aton kabuhi? Halimbawa, paano mo ipaathag ang ginsiling ni Jesus sa isa ka tawo nga “baya-i ang mga patay sa paglubong sang ila kaugalingon nga mga patay”? Ngaa sa banta mo ginpadaku ni Jesus ang pagkaimportante sang pagbantala sang mensahe sang Ginharian, ipaanggid sa dapat kabalak-an sang pamilya? Ano ang masiling mo?

² Madugay na sa wala pa gingamit ni Jesus ang ekspresyon nga “ginharian sang Dios,” si salmista David nagsulat sa idalom sang pag-inspirar sang Dios: “Si Jehova nagpalig-on sang iya trono sa kalangitan; kag ang iya ginharian nagagahom sa tanan.” (Salmo 103:19) Ang pagkasoberano ni Jehova nagsugod sang magsugod sia sa pagpanuga. Ang sadsaran sang iya trono indi gid mationg. Ang iya kinamatarong sa pagkasoberano sa uniberso indi gid maagaw sa iya. Indi katingalahan nga ang salmista naglaygay: “Ipahayag ang iya himaya sa tunga sang mga pungsod, . . . kay si Jehova daku kag dalayawon sing daku”!—Salmo 96:3, 4; 109:21; Daniel 4:34, 35.

³ Apang, indi tanan nagpadayon sa pagdayaw kay Jehova. Ginhangkat ni Satanas, nga unang apostata, ang paagi sang pagpabutyag kag pagpakita ni Jehova sang Iya pagkasoberano sa Iya mga tinuga sa duta. (Genesis 3:1-5; Job 1:6-12; 2:1-5) Subong resulta, sa duta kag sang ulihi sa langit, ang iban nga mga tinuga nalatnan sang rebelyuso nga panimuot ni Satanas. Gin-impluwensiahan man ni Satanas ang mga tawo sa pagpatindog sing isa ka serye sang tawhanon nga mga ginharian. Gingamit niya ini sa paghangkat sang pagkamatarong sang paggahom sang Dios. (Bugna 13:1-6) Agod mahusay ining hulusayon tuhoy sa pagkasoberano sa uniberso, nagtuyo si Jehova sing butang nga tumalagsahon, nga gintagna sa Daniel 2:44: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. . . . Dugmukon sini kag papason ini tanan nga ginharian kag ini magatindog tubtob sa walay katubtuban.”

Si Jehova Nangin Hari sa Israel

⁴ Nangin maathag karon nga, bisan pa ang pagkasoberano ni Jehova nagsugod sang magsugod sia sa pagpanuga, nagtuyo sia sa paghimo sing isa ka espesipiko nga ekspresyon sang iya paggahom agod husayon sing dayon ang hulusayon tuhoy sa pagkamatarong sang iya pagkasoberano. Ining ekspresyon amo ang langitnon nga Mesianikong Ginharian. Ang dutan-on nga ginharian nga ginpatindog ni Jehova sa pungsod sang Israel nangin isa ka diutay nga laragway sini nga Ginharian “nga indi gid malaglag.” Busa, sang gindala ni Hari David ang arka sang katipan sa siudad sang Jerusalem, sia naghugyaw sa pagsiling: “Magkasadya ang kalangitan, kag magkalipay ang duta, kag magsiling sa tunga sang mga pungsod, ‘Si Jehova nagahari!’” (1 Cronica 16:31) Huo, sa isa ka pinasahi nga kahulugan si Jehova “nagahari” sa Israel. Isa yadto ka tion sang daku nga pagkalipay, kag luyag ni David ibantala yadtong dalayawon nga hitabo!

⁵ Bangod isa anay ka manugbantay sing karnero si Hari David, ang iya pagkahari nangin tumalagsahon sa tunga sang mga hari. Sia isa ka manugbantay kag hari. Ginlaragway sang salmista ang pagpili sang Dios kay David para sa sini nga palangakoan, nga nagasiling: “Ginpili [ni Jehova] si David nga iya alagad kag ginkuha sia sa mga palasudlan sang mga karnero . . . agod mangin manugpahalab kay Jacob nga iya katawhan kag kay Israel nga iya panublion. Kag ginpahalab niya sila suno sa integridad sang iya tagipusuon, kag gintuytuyan sila sang pagkasampaton sang iya mga kamut.”—Salmo 78:70-72.

⁶ Ang pag-atipan ni David sa iya katawhan subong manugbantay nila, ang integridad sang iya tagipusuon sa iya Dios, kag ang iya pagkasampaton subong lider naghimo sa iya nga nagakaigo gid maglaragway sa nagapakari nga Mesias, nga gamiton sa isa ka pinasahi nga paagi agod magpabutyag sang bug-os uniberso nga pagkahari ni Jehova kag agod mangin mahigugmaon nga Manugbantay kag Hari. Ining dalayawon nga pagkatuman sang katuyoan ni Jehova gintagna sang ulihi ni manalagna Ezequiel: “Magabutang ako sing isa ka manugpahalab sa ila [Israel], ang akon alagad nga si David. . . . Kag ako, si Jehova, mangin ila Dios, kag ang akon alagad nga si David prinsipe sa tunga nila. Ako, si Jehova, nagapamulong sini.”—Ezequiel 34:22-24.

Nag-abot ang Gintagna nga Manugbantay kag Hari

⁷ Ang Isa nga gintagna ni Jehova amo ang iya kaugalingon nga Anak, si Jesus. Tuhoy sa iya, si anghel Gabriel nagsiling sa ulay nga si Maria: “Yari karon! magapanamkon ka sa imo tiyan kag magaanak sing lalaki, kag tawgon mo ang iya ngalan Jesus. Mangin daku sia kag tawgon nga Anak sang Labing Mataas; kag ihatag sa iya ni Jehova nga Dios ang trono ni David nga iya amay, kag magahari sia sa panimalay ni Jacob sing dayon, kag ang iya ginharian walay katapusan.” (Lucas 1:31-33) Daw ano ka dalayawon nga ekspresyon sang pagkahari ni Jehova! Sa pagkamatuod, inang nagapakari nga hitabo takus ibantala sa bug-os nga kalibutan: “Si Jehova nagahari!”

⁸ Sa tapos sang milagruso nga pagkabun-ag ni Jesus kag sang iya paghamtong, ginpresentar niya ang iya kaugalingon agod magpabawtismo sa tubig sang suba Jordan. Sadto ginkilala sang Dios si Jesus subong iya Anak paagi sa pagbubo sa iya sing espiritu kag nagsiling: “Ikaw hinigugma ko nga Anak; sa imo nahamuot ako.” (Lucas 3:22) Bangod sa ano ‘nahamut-an’ si Jesus? Ang rekord ni Lucas nagapaathag: “Si Jesus, sang nagsugod sia sa pagpanghikot, mga katloan ka tuig sa panuigon.” (Lucas 3:23; Ref. Bi., foot­note: “Ukon, ‘nagsugod [sa pagpanudlo].’” Ang Revised Standard Version kag ang New International Version nagasiling, “Sang nagsugod sia sang iya ministeryo.” Ano ang ‘hilikuton,’ ukon “ministeryo” ni Jesus? Ano ang iya ‘gintudlo’? Ang manunulat nga si Mateo nagahatag sing sabat: “[Si Jesus] naglibot sa bug-os nga Galilea, nga nagapanudlo sa mga sinagoga nila kag nagawali sing maayong balita sang ginharian kag nagapang-ayo sang tanan nga balatian kag sang tanan nga masakit sa katawhan.”—Mateo 4:23.

⁹ Ginhugod ni Jesus ang iya kabuhi sa ‘pagbantala sang ginharian sang Dios.’ Kaangay sang iya amay nga si David, ginpakita niya ang integridad sang iya tagipusuon paagi sa indi gid pagkompromiso sang iya katutom sa Ginharian ni Jehova. (Lucas 9:60; 4:3-13; Juan 16:33) Ginpamatod-an ni Jesus nga sia yadtong “manugbantay” nga ginsaad ni Jehova. Malipayon sia sa pagpakaon sa espirituwal sang mga ‘ginsamad kag ginpaaplaag [sang relihioso nga mga lider] subong sang mga karnero nga wala sing manugbantay.’ (Mateo 9:36) Tuhoy sa iya sampaton nga pagbantay sa katawhan kag kon paano ini amat-amat nga magasangkad sa mga tuig nga maabot, si Jesus nagsiling: “Ako ang maayong manugbantay, kag kilala ko ang akon mga karnero kag ang akon mga karnero nakakilala sa akon . . . Kag may iban ako nga mga karnero, nga indi sa sini nga toril; sila man dapat ko dalhon, kag magapamati sila sa akon tingog, kag sila mangin isa ka panong, isa ang manugbantay.”—Juan 10:14, 16.

¹⁰ Ano ang reaksion sang mga Judiyo sa pangagda ni Jesus nga mangin subong iya tulad-karnero nga mga sumulunod? Indi palareho ang ila reaksion. Samtang ginausisa naton ang iban sining mga reaksion, binagbinaga kon ano ang imo reaksion sugod sang mabatian mo ang mensahe sang Ginharian sang Dios.

“Mangin Sumulunod Ko”—Ano ang Imo Isabat?

¹¹ Samtang nagaagi si Jesus sa ubay sang Dagat sang Galilea, nakita niya si Simon kag ang iya utod nga si Andres nga nagapangisda. “Si Jesus nagsiling sa ila: ‘Sunod kamo sa akon, kag himuon ko kamo nga mga mangingisda sang mga tawo.’ Kag sa gilayon ginbiyaan nila ang ila mga pukot kag nagsunod sa iya. Kag sang nagapadayon sa uluunhan, nakita niya si Santiago nga anak ni Zebedeo kag si Juan nga iya utod . . . kag . . . gintawag niya sila. Kag ginbayaan nila ang ila amay nga si Zebedeo sa sakayan kaupod sang mga suluguon nga sinuhulan, kag nagsunod sa iya.” (Marcos 1:16-20) Amo man nga reaksion ang ginpakita sang manugsukot sing buhis nga si Levi, ukon Mateo. “[Si Jesus] nagsiling sa iya: ‘Mangin sumulunod ko.’ Kag ginbiyaan niya ang tanan kag nagtindog kag nagsunod sa iya.”—Lucas 5:27, 28.

¹² Apang, indi tanan nagbaton sang pangagda ni Jesus, “Mangin sumulunod ko.” Hunahunaa yadtong tawo nga ginlaragway sa Lucas kapitulo 9, nga nasugata ni Jesus samtang nagalakbay sa minuro kag minuro. Sia nagsiling kay Jesus: “Masunod ako sa imo bisan diin ka makadto.” Ginapakita sang rekord ni Mateo nga isa ka escriba ini nga tawo. Ang mga escriba ginatahod anay sang mga tawo kag ginatawag “Rabbi.” Talupangda karon ang sabat ni Jesus: “Ang talunon nga mga ido may mga lungib kag ang mga pispis sa langit may mga hapunan, apang ang Anak sang tawo wala gid sing ulunlan sang iya ulo.” (Lucas 9:57, 58) Ginsilingan ni Jesus ining tawo nga mabudlayan sia kon mangin sia mangin sumulunod Niya. Ang ginapahangop amo nga ini nga tawo tuman ka matinaastaason sa pagbaton sini nga sahi sang pagkabuhi. Ang walay kasiguruhan ukon sa diin niya ihinguyang ang masunod nga gab-i indi niya mabaton.

¹³ Si Jesus nagsiling sa isa pa ka tawo: “Mangin sumulunod ko.” Apang, nagsabat sia kay Jesus: “Tuguti ako anay sa pagkadto kag sa paglubong sang akon amay.” Talupangda ang sabat ni Jesus: “Baya-i ang mga patay sa paglubong sang ila kaugalingon nga mga patay, apang lakat ka kag ibantala ang ginharian sang Dios.” (Lucas 9:59, 60) Ining balibad sang tawo wala magpahangop nga ang iya amay napatay na. Kon napatay ang iya amay, daw indi mahimo nga didto ang anak sa dalanon nga nagapamati kay Jesus. Wala, pasad sa ginsiling sang tawo daw subong bala nga nagapangayo sia sing tion agod hulaton ang pagkapatay sang iya amay. Indi sia handa sa pag-una sang Ginharian sang Dios sa iya kabuhi sa gilayon.—Mateo 6:33.

¹⁴ Ang rekord nagasugid tuhoy sa ikatlo nga lalaki, nga nagboluntaryo: “Masunod ako sa imo, Ginuo; apang tuguti ako anay sa pagpaalam sa mga yara sa akon balay.” Ini nga tawo daw nagapangayo sing mga kondisyon sa iya pagsunod kay Jesus. Sia, sa epekto, nagsiling kay Jesus: ‘Yari karon! Mangin isa ako sang imo mga sumulunod, kon . . . ’ Ano ang ginsabat ni Jesus? “Wala sing tawo nga nagakapot sa arado kag nagabalikid nga takus sa ginharian sang Dios.” (Lucas 9:61, 62) Kon luyag sang isa ka manug-arado nga magtadlong ang agi sang iya arado sa latagon, dapat sia magtulok sing tadlong sa unhan. Kon magbalikid sia, mahimo gid nga magtiko ang iya inagihan. Mahimo gani nga makabunggo pa sia! Gani amo man sa mga sumulunod ni Jesus; kon magbalikid sila sa sining daan nga sistema sang mga butang, bisan sa makadali lang, makasumalang sila sing palaligban, nga mahimo bangdan sang pagkasandad kag pagsipak sang ila mga tiil gikan sa ‘masipot nga dalan nga nagapadulong sa kabuhi.’—Mateo 7:14; tan-awa ang Lucas 17:31-35.

¹⁵ Nabatian mo bala ang pangagda ni Jesus: “Mangin sumulunod ko”? Ano ang imo sabat? Nagpakita ka bala sing positibo nga reaksion subong sang ginpakita sang mga disipulo nga sanday Simon, Andres, Santiago, Juan, kag Mateo? Kaangay sadtong mga tawo, handa ka bala sa paghimo sing bisan anong sakripisyo nga kinahanglanon agod sundon ang mga tikang sang Agalon? Kon huo ang imo sabat, nian ikaw man makaagom sing indi mabilihan nga pribilehiyo sa pag-ambit sa pagbantala sing maayong balita sang Ginharian sang Dios.

¹⁶ Antes ginpadala ni Jesus ang iya mga disipulo sa pagbantala sing Ginharian, may kalantip nga gintudloan niya sila kon paano ini himuon paagi sa iya mismo personal nga halimbawa. Pagkatapos sini, ginhatagan sila ni Jesus sing detalyado nga mga instruksion kon paano pangitaon ang mga tulad-karnero sa bisan diin nga teritoryo. Ang mga instruksion ni Jesus maaplikar gihapon sa sining ika-20 nga siglo. Usisaon naton ang iban sini nga narekord sa kapitulo 10 sang Mateo.

Mga Instruksion para sa Pagbantala sing Ginharian

¹⁷ Ang tema sang mensahe sang mga disipulo dapat nga pareho man sa ginwali ni Jesus: “Sa nagakadto kamo, magwali, nga nagasiling, ‘Ang ginharian sang mga langit malapit na.’” (Mateo 10:7) Apang, ina nga Ginharian natukod na karon sa langit. Ang Manugbantay kag Hari ni Jehova nga si Jesucristo nagagahom na karon! Busa, mas daku ang kahulugan karon sang mga pulong ni David: “Magkasadya ang kalangitan, kag magkalipay ang duta, kag magsiling sa tunga sang mga pungsod, ‘Si Jehova nagahari!’” (1 Cronica 16:31) Sa karon, indi lamang nga may pribilehiyo kita nga sakdagon ining pinasahi nga pagpabutyag sang bug-os uniberso nga pagkahari ni Jehova kundi nagakalipay man kita sa pagkabuhi sa tion nga ang hulusayon tuhoy sa pagkasoberano ni Jehova husayon sing bug-os.

¹⁸ Ginalaragway sang Mateo 10:8-10 ang panimuot sang mga nagapakigbahin sa pagbantala nga hilikuton. Ang Ginharian sang Dios dapat nga unahon sa ila kabuhi, ang pisikal nga mga kinahanglanon ikaduha. Ngaa? Si Jesus nagsiling: “Kay ang mamumugon takus sa iya kalan-on.” Ang aton langitnon nga Amay magaatipan pirme sa ila nga nagasalig sa iya. Kag ginatos ka libo sang bug-os tion nga mga ministro sang mga Saksi ni Jehova karon ang makapamatuod sa sining kamatuoran.—Numeros 18:30, 31; Deuteronomio 25:4.

¹⁹ Nian nagbilin pa si Jesus: “Bisan diin nga siudad ukon minuro ang inyo sudlan, usisaon ninyo kon sin-o didto ang takus, kag pabilin kamo didto tubtob nga maghalin kamo.” (Mateo 10:11) Takus sa ano? Takus sa pribilehiyo nga abiabihon ining alagad ni Jehova kag pamatian ang mensahe sang Ginharian sang Dios. Sa pagkamatuod, sadto anay mahimo nga ang mga disipulo nagapabilin sa balay sang takus nga tawo kag ginagamit yadto subong base samtang ginasuhod nila ang nabilin nga bahin sang teritoryo agod pangitaon ang mga takus. Sa karon, amo man ang ginahimo sang mga Saksi ni Jehova. Nagahinguyang sila sing minilyon ka oras kag nagagamit sing daku nga panikasog sa pagpangita sa mga takus sa lainlain nga mga teritoryo. Nian, kon masapwan ini sila, ang mga Saksi nagakalipay sing daku sa pagduaw liwat sining mga tagbalay kag sa pagpaathag sa ila sang Pulong sang Dios. Sa amo, sa karon, si Jesus may kalantip nga nagabantay sa iban pa nga mga tulad-karnero padulong sa iya bahin.—Mateo 25:31-33.

²⁰ “Sa nagasulod kamo sa balay, abiabiha ini; kag kon ang balay takus, ang inyo paghidait magdangat sa iya.” (Mateo 10:12, 13) “Kabay nga ining balay may paghidait” amo ang kinaandan nga panamyaw sang adlaw ni Jesus. (Lucas 10:5) Ang mga anghel nag-amba sang tion nga natawo si Jesus: “Himaya sa Dios sa kahitaasan, kag paghidait sa tunga sang mga tawo nga may maayong kabubut-on.” (Lucas 2:14) Naeksperiensiahan sang takus nga panimalay ining gintagna nga paghidait paagi sa pagbaton sang mensahe sang Ginharian nga ginadala sang mga disipulo. Sa karon, ang maayong balita sang Ginharian may pareho man nga epekto. Nagadala ini sa mga tawo padulong sa mahidaiton nga relasyon sa Dios paagi kay Jesucristo, kag nagahatag man ini sing paghidait sa tunga sang mga masigkatumuluo.—2 Corinto 5:20, 21; Filipos 4:7; Efeso 4:3.

²¹ Sining tuig sang 1986 sa kalendaryo, ang mga King­dom Hall sang mga Saksi ni Jehova sa bug-os nga duta nagapasundayag sang teksto nga ginkuha sa Lucas 9:60: “Lakat ka . . . , ibantala ang ginharian sang Dios.” Daw ano ka maayong pahanumdom kag pangpapagsik ini para sa tanan sang matuod nga mga ministro sang Dios nga makigbahin sing regular sa pagbantala sing Ginharian sang Dios! Huo, ina nga Ginharian natukod na kutob sang 1914! Amo ini ang instrumento sang Dios sa mga kamut sang iya Mesianikong Hari sa pagdugmok sa tanan sang kalibutanon nga mga ginharian ni Satanas. Indi katingalahan, nian, nga ang Ginharian sang Dios dapat amo ang labing importante sa kabuhi sang tagsa ka Saksi ni Jehova. Nahibaloan naton nga nagakahulugan ini sang aton kaluwasan padulong sa kabuhi!—1 Timoteo 4:16.

Paano Mo Sabton?

◻ Daw ano kadugay kag kalig-on ang pagkahari ni Jehova?

◻ Anong hulusayon sa bug-os nga uniberso ang kinahanglan nga mahusay karon?

◻ Dapat mangin handa ang tanan nga sumulunod ni Jesus sa paghimo sing ano?

◻ Ngaa ang ekspresyon “Si Jehova nagahari” may daku pa nga kahulugan karon?

◻ Ano ang katuyoan sang tuigan nga teksto sang 1986?

[Mga Pamangkot sa Pagtinuon]

1. Anong importante nga mga pamangkot ang ginpautwas sang ginsiling ni Jesus sa Lucas 9:60?

2. San-o nagsugod ang pagkasoberano ni Jehova, kag daw ano kadugay ini?

3. (a) Ano nga mga hitabo ang nagdul-ong sa paghangkat sang paggahom ni Jehova? (b) Paano ang Dios nagatuyo sa paghusay sang hulusayon tuhoy sa bug-os uniberso nga pagkasoberano?

4. Sa anong kahulugan si David nakasiling nga “si Jehova nagahari,” kag ano ang ginkinahanglan sadto nga hitabo?

5, 6. (a) Paano si David tumalagsahon sa tunga sang mga hari? (b) Sin-o ang ginlaragway ni David, kag sa ano nga bahin?

7, 8. (a) Paano ginpakilala ang gintagna nga Manugbantay kag Hari, kag sa ano takus ang iya pag-abot? (b) Para sa anong katuyoan “ginkahamut-an” si Jesus ni Jehova?

9. Sa anong mga bahin si Jesus kaangay sang iya amay nga si David?

10. Paano kita makatuon gikan sa lainlain nga reaksion sang mga Judiyo sa pangagda ni Jesus nga magsunod sa iya?

11. Ilaragway ang reaksion nanday Simon, Andres, Santiago, Juan, kag Mateo sa pangagda ni Jesus, “Mangin sumulunod ko.”

12. Ano ang problema sang tawo nga nagsiling kay Jesus: “Masunod ako sa imo bisan diin ka makadto”?

13. Ngaa amo sadto ang ginsabat ni Jesus sa isa pa nga kuntani nangin sumulunod niya?

14, 15. (a) Ano ang ginapakita sang pangabay sang ikatlo nga tawo kay Jesus? (b) Anong leksion ang maton-an naton karon gikan sa sabat ni Jesus sa sining tawo?

16. Paano ginhanda ni Jesus ang iya mga disipulo para sa pag-ambit upod sa iya sa pagbantala sing maayong balita?

17. Ipaanggid ang kahulugan sang mensahe sang Ginharian nga ginbantala sang unang siglo sa ginabantala karon.

18. Ano ang ginpadaku ni Jesus sa iya mga sumulunod sa Mateo 10:8-10, kag sin-o labi na ang makaapresyar sini karon?

19. Paano ginahimo karon ang pagpangita sa mga takus, kag sa idalom sang pagtuytoy ni sin-o?

20. Paano ang takus nga panimalay makaeksperiensia sang paghidait nga ginahandum para sa sini sang isa ka manugbantala sang Ginharian?

21. Ngaa nagakaigo gid ang tuigan nga teksto sang 1986?