Ang Kabuhi kag Ministeryo ni Jesus

Pagtudlo sa Isa ka Babayi nga Samariahanon

SA ila dalanon gikan sa Judea pa Galilea, si Jesus kag ang iya mga disipulo nag-agi sa distrito sang Samaria. Nalapyo sa ila paglakbay, sang mga udtong adlaw nagdulog sila agod magpahuway sa luyo sang isa ka bubon malapit sa siudad sang Sicar. Ini nga bubon ginkutkot mga siglo sang una ni Jacob, kag yara gihapon tubtob karon, malapit sa modernong-adlaw nga siudad sang Nablus.

Samtang nagapahuway diri si Jesus, ang iya mga disipulo nagkadto sa siudad agod magbakal sing kalan-on. Sang mag-abot ang isa ka babayi nga Samariahanon agod magsag-ub sing tubig, si Jesus nagsiling: “Paimna ako.”

Sa kabilogan indi maayo ang pagtamdanay sang mga Judiyo kag mga Samariahanon bangod sang tudok nga kaugot sa isa kag isa. Gani, sa katingala, ang babayi namangkot: “Ano bala nga ikaw, nga isa ka Judiyo, nagapangayo sa akon sing mainum, nga ako isa ka babayi nga Samariahanon.”

Si Jesus nagsabat nga kon kilala sia sang babayi mangayo sia sa iya sing “tubig nga buhi.” Ini nga tubig, siling niya, mangin “tuburan sang tubig nga nagaibwal sa pagpaalinton sing kabuhi nga walay katapusan.”

“Ginuo, hatagi ako sining tubig,” sabat sang babayi.

Si Jesus nagsiling karon: “Lakat, tawga ang imo bana.”

“Wala ako sing bana,” sabat niya.

Ginpamatod-an ni Jesus ang iya ginsiling. “Nagasiling ikaw sing husto, ‘Wala ako sing bana.’ Kay may lima ka na ka bana kag ang yara sa imo karon indi mo bana.”

“Ginuo, ginahantop ko nga ikaw manalagna,” siling sang babayi nga may katingala. Sa pagpakita sang iya interes sa espirituwal nga mga butang, nagsiling sia nga ang mga Samariahanon nagasimba sa Bukid Gerizim, apang ang mga Judiyo sa Jerusalem.

Apang, ang duog sang pagsimba indi importante, siling ni Jesus. “Ang Dios espiritu,” paathag niya, “kag ang mga nagasimba sa iya dapat magsimba sa iya sa espiritu kag kamatuoran.”

Nahamuot gid ang babayi. “Nakahibalo ako nga ang Mesias magakari, nga ginatawag Cristo,” siling niya. “Kon sia mag-abot, magapahayag sia sa amon sing tanan nga butang.”

“Ako nga nagapakighambal sa imo amo sia,” siling ni Jesus. Hunahunaa ini! Ining babayi nga nagkari sa udtong adlaw agod magsag-ub sing tubig, ayhan agod likawan ang iya kasimanwa nga mga babayi nga nagatamay sa iya bangod sang iya pagkabuhi ginpaboran ni Jesus sa isa ka makadalayaw nga paagi. Gintu-ad ni Jesus sa iya ang wala niya matu-ad kay bisan sin-o. Ano ang mga resulta? Ipaathag ini sang isa ka artikulo sa amon masunod nga guwa. Juan 4:3-26.

◆ Ngaa nakibot ang babayi nga Samariahanon nga si Jesus nagpakighambal sa iya?

◆ Ano ang gintudlo sa iya ni Jesus nahanungod sa tubig nga buhi kag kon sa diin magsimba?

◆ Paano ginpahayag ni Jesus sa iya kon sin-o sia, kag ngaa makatilingala gid ining pagpahayag?

[Bug-os pahina nga retrato sa pahina 9]