Ikaw Bala “Maabiabihon”?
MAINIT yadto nga adlaw. Isa ka grupo sang mga Saksi ni Jehova, bata kag tigulang, ang nagapangabudlay sing lakas, nagapaninlo, nagapamintura, kag nagahimo sang iban pa nga mga hilikuton sang ginliwat ang isa ka Kingdom Hall. Sang haponhapon na, kinapoy gid sila katama, kag ang iban nagpinungko sa pagpahuwayhuway.
Sa sadto nga tion, nagpalapit ang tatlo ka utod nga babayi nga mga Saksi nga nagabitbit sing sandwich, cookies, cakes, kape, tsa, kag iban pa nga ilimnon. Makalilipay gid nga nakibot yadtong kapoy nga mga kalag! Ang boluntaryo nga pagpabutyag sing pagkamaabiabihon kag gugma sa bahin sang tatlo ka utod nga babayi wala lamang magrepresko sa ila sa pisikal, kundi nag-amot man sing labi sa mainit kag mahigugmaon nga espiritu sa tunga sang bug-os nga paghiliutod sang mga kautoran nga lalaki kag babayi didto sadto nga hapon.
Isa ka Tanda sang Matuod nga Cristianismo
Siempre pa, ang pagkamaabiabihon kag gugma wala ginalatiri sa sinang pinasahi nga mga okasyon. Nahanungod sa iya matuod nga mga sumulunod, ang Tagpasad sang matuod nga Cristianismo, si Jesucristo, nagsiling: “Sa sini ang tanan nga tawo makahibalo nga kamo mga disipulo ko, kon magahigugmaanay kamo.” Subong man, ginlaygayan ni apostol Pablo ang iya mga masigka Cristiano: “Magmaabiabihon.” (Juan 13:35; Roma 12:13) Sa iban nga hambal, ang pagkamaabiabihon nga ginapahulag sang dimakagud nga gugma para sa iban amo ang dalanon sang pagkabuhi para sa matuod nga mga Cristiano.
Apang, ina nga mga kinaiya wala nagaabot sing awtomatiko kon ang isa mangin Cristiano. Sa baylo, dapat pangabudlayan sang isa nga palambuon ini. Amo gid sini labi na sa karon nga kalibutan diin ang gugma sang kalabanan nagabugnaw subong sang ginatagna sang Biblia. (Mateo 24:12) Apang kabaliskaran gid ina kon diin nagaluntad ina nga mga kinaiya! Sa suod katama nga panimalay, ang mga katapo nagakalipay sa pagpakig-upod sa isa kag isa kag nalipay nga mag-updanay sing tingob. Sing kaanggid, kon ang mga katapo sang Cristianong kongregasyon nagapakig-upod sing tayuyon sa mga miting, sa pag-alagad sa latagon, kag sa iban pa nga mga okasyon, nagakilalahay sila sing maayo. Nangin matuod sila nga mga abyan, ayhan mas suod pa sang sa mga katapo sang panimalay. (Hulubaton 18:24) Ining higot sang pag-abyanay sa ulot sang mga masigka saksi ni Jehova isa gid ka makusog nga pangamlig batok sa malain nga impluensia sang kalibutan.
Ang Papel sang Cristianong mga Babayi
Bisan pa ginlaygayan ang tanan nga mga Cristiano nga “magmaabiabihon,” ang Cristianong mga babayi may importante nga papel sa sini nga bagay. Sa katunayan, indi bala kinaandan nga mga babayi, labi na ang mga asawa, ang nagahimo sang kalabanan nga aktuwal nga hilikuton may kahilabtanan sa pagpakita sing pagkamaabiabihon? Kon agdahon sang bana sa balay ang pila sa kongregasyon para sa Cristianong paghiiupod, indi bala nga ang asawa amo ang masami nga nagapaninlo sang balay, nagahanda sang pagkaon kag ilimnon, kag nagapanghimus pagkatapos? Bisan pa nga ang bana kag kabataan makabulig, kag dapat nga mangin handa sila sa pagbulig, indi malikawan nga ang asawa ang nagapas-an sing lulan sa pagpat-od nga ang tanan ginadipara sing maayo.
Sing dalayawon, madamong Cristianong mga asawa ang handa nga manikasog agod ipakita ang matuod nga pagkamaabiabihon sa ila espirituwal nga mga kautoran nga lalaki kag babayi. Binagbinaga, halimbawa, si Dip Yee, isa ka bug-os tion nga payunir nga ministro sa Hong Kong, nga ang bana isa ka gulang sa lokal nga kongregasyon. Bisan pa nga nagakahulugan ini sing daku nga obra kon agdahon nila sa ila balay ang mga kautoran nga lalaki kag babayi, kon kaisa ang bug-os nga grupo sa pagtinuon sa libro, malipayon niya nga ginapakita ang pagkamaabiabihon. “Simple lamang ang pagkaon,” siling niya. “Makapapagsik makita ang kautoran nga nagakalipay sing daku sa paghiliupod, kag mapalig-on sini.” Sa pagkamatuod, paagi sa ila pagkamaabiabihon ang Cristianong mga babayi may tuman ka daku nga papel sa pagpalig-on sang mainit nga espiritu sa kongregasyon.
Bangod sang tanan nga nadalahig sa pagpakita sing pagkamaabiabihon, kinahanglan gid sa pagkamatuod ang kapisan kag pagsakripisyo sa kaugalingon sa bahin sang Cristianong mga babayi. Apang makasalig sila nga ang ila mga pagpangabudlay sa gugma ginaapresyar sing daku sang ila mga bana kag sang iban pa nga mga mapasalamaton. Siempre pa, kon kaisa mahimo nga indi pag-apresyahon sang iban kon ano ang ginhimo para sa ila, apang indi gid ina isa ka kabangdanan nga magkasubo ukon magkaakig, ukon mag-untat sa pagkamaabiabihon. Dumduma, samtang makalilipay nga makabaton sing mga pagpabutyag sing pasalamat gikan sa iban kag mahibaloan nga ang aton mga panikasog ginaapresyar, luyag naton ipakita ang pagkamaabiabihon una bangod ini husto kag mahigugmaon nga butang nga himuon. Labaw sa tanan, nagapahamuot ini kay Jehova nga Dios kon himuon naton.
Pagtigayon sing Timbang nga Pagtamod
Sa sining inadlaw sang pagsaka sang mga bili, ang iban mahimo nga magapangalag-ag sa pagpakita sing pagkamaabiabihon bangod sa banta nila indi sila makasarang sa paghimo sini. Amo ini diri nga importante para sa aton nga magtigayon sing timbang nga pagtamod. Bisan pa nga ang espesyal nga pagkaon kag ilimnon nagadugang sa kasadya sang okasyon, indi ini amo ang pinakaimportante nga bagay. Maalamon nga ginapakita sang Pulong sang Dios ini nga punto: “Maayo pa ang pagkaon nga mga utan diin may gugma sang sa pinatambok nga baka kag may dumot sa sini.” (Hulubaton 15:17) Indi importante kon ano ang yara sa aton ukon ang igaserbe naton. Ang importante kag ginaapresyar amo ang mutuwal makapalig-on nga paghiliupod kag ang espiritu sang gugma nga ginapakita naton.
Binagbinaga ang halimbawa ni Fung Hing, isa ka utod nga babayi nga kuwarentahon na ang edad kag ang bana nagapamatok. Nagapuyo sia sa tuman ka diutay isa ka hulot nga yunit sa isa sang matag-as nga pamalay publiko sa Hong Kong. Indi sia manggaranon. Sa katunayan, dapat sia magtrabaho sing part-time agod makabulig sa kita sang pamilya. Apang, maalwan sia sa kon ano ang yara sa iya. Kon ang mga Saksi sa kongregasyon magaduaw sa iya mga kaingod sa pamalaybalay nga hilikuton sa pagbantala, masami niya nga ginaagda sila sa iya balay para makapamahaw diutay. Inang mahigugmaon nga buhat indi lamang ginaapresyar sang iya mga masigka Cristiano kundi nagapakita man nga ang isa indi dapat mangin manggaranon agod makapakita sing matuod nga pagkamaabiabihon.
Walay sapayan, samtang ginatinguhaan naton nga maghaganhagan sa aton paglingawlingaw, nakita gihapon naton nga nagakabagay ipaiway ang pila ka butang agod mapakita ang pagkamaabiabihon. Takus bala ini? Sa pagkamatuod, kon kita ginapahulag sang matuod nga Cristianong gugma. Kay ano ang gugma kon wala sing sakripisyo? Lunsay si Jehova kag si Jesus nagpakita sang ila gugma sa katawhan paagi sa paghimo sing daku nga mga pagsakripisyo—ginhatag ni Jehova ang iya Anak, kag si Jesus ang iya kaugalingon himpit tawhanon nga kabuhi.—Juan 3:16; 15:13.
Ginsunod man sang dumaan nga mga Cristiano ang mahigugmaon nga buhat. Nahanungod sa mga kautoran sa Macedonia, si apostol Pablo nagsulat: “Sa dakung pagtilaw sa kapipit-an ang pagkabugana sang ila kalipay kag ila daku nga kaimulon nagbugana nga sa kamanggaran sang ila kaalwan. Kay suno sa ila ikasarang, nagasaksi ako, kag labaw pa sa ila ikasarang, naghatag sila sing kinabubut-on nga nagapangabay sa amon nga may dakung pakiluoy nahanungod sining bugay.” (2 Corinto 8:2-4) Ang ila “daku nga kaimulon” kag ang ila paghimo sing “labaw pa sa ila ikasarang” nagpakita sang ila kaalwan nga labi gid ka matuod kag makatalandog.
Apang, imol man ukon manggaranon ang isa, kag walay sapayan sang moderno nga mga kasulhayan, nagakinahanglan sing tion, enerhiya, kag manggad ang magpakita sing pagkamaabiabihon. Sing sadsaran, nian, ang pamangkot amo: Handa bala kita manikasog agod ang iban magaagom sang mga pagpakamaayo sang Cristianong paghiliupod? Dumduma, “ang kalag nga maalwan nagatambok,” siling sang Hulubaton sa Biblia, “kag ang nagabunyag bunyagan man sia.” Malipay man kita sa paghunahuna nga kon kita nagapakita sing pagkamaabiabihon bilang pagtuman sa ginpabutyag nga mando ni Jehova kag bilang pag-ilog sang iya matahom nga halimbawa, sa katunayan kita “nagapahulam kay Jehova.”—Hulubaton 11:25; 19:17.
Sin-o ang Agdahon?
“Kon nagahimo ikaw sing panyaga ukon panihapon,” siling anay ni Jesus, “dili pag-agdaha ang imo mga abyan ukon ang imo mga utod ukon ang imo mga himata ukon ang imo mga kasilingan nga manggaranon.” Ngaa indi? “Basi nga sila magaagda man sa imo kag mahimo sa imo ang balus.” (Lucas 14:12) Indi buot silingon ni Jesus diri nga indi naton pag-agdahon ang aton mga abyan kag mga himata para sa isa ka sinalusalo. Nakigsalo man sia upod sa iya mga abyan kon kaisa, subong sang sa balay ni Maria kag ni Marta. Ang hulunahunaon amo nga ang aton pagpakita sing pagkamaabiabihon indi dapat pahulagon sang panghunahuna nga makatigayon sing balus.
Subong sang dugang nga ginpakita ni Jesus, ang dapat naton binagbinagon sing una nga agdahon amo yadtong makabenepisyo sing labi gikan sa paghiliupod. (Lucas 14:13) Mahimo sila magalakip sadtong nagakinahanglan sing pagpalig-on, yadtong bag-ohan sa kamatuoran, yadtong mahuluy-on kag hipuson, ukon yadtong tigulang. Ang makapalig-on nga epekto sina nga paghiliupod makita gikan sa komento ni Oi Yuk, isa ka tigulang nga utod nga babayi nga tuman ka kakugi apang mapigaw sing panglawas: “Masami ako ginaagda sang mga kautoran sa ila pagtinipontipon kag ginapakitaan ako sing kalulo sa madamo nga paagi. Nagapahalipay gid ini sa akon sing daku nga mangin bahin sang isa ka daku nga panimalay!”
Sing maathag, ang katuyoan sina nga pagtinipontipon indi lamang agod mag-inupdanay. Sa baylo, amo ini ang pagpalig-onay sa isa kag isa kag pagpabakud sa higot sang gugma sa tunga sang mga masigka sumilimba ni Jehova. Busa, ang pagpadaku dapat nga sa paghupot sing makapalig-on kag makapabakud nga palibot sa baylo sang sa bugana nga pagkaon kag ilimnon. Subong man, dapat man hunahunaon ang mga hilikuton kag mga paghinambalanay sa sina nga okasyon. Bisan pa nga indi tanan nga mga hilikuton isentro sa Biblia ukon ang tanan nga paghambalanay tuhoy sa Kasulatan, maalamon kag mahigugmaon nga huptan naton ini pirme nga makapalig-on kag makapabakud. Ang mapaindis-indison nga mga hampang, mga kutsokutso, ukon matimayon nga mga komento dapat likawan.—Efeso 4:29, 31.
Ang Bugana nga mga Padya Nagahulat sa mga Maabiabihon
Bisan pa nga ang isa indi dapat magpakita sing pagkamaabiabihon upod ang panghunahuna nga balusan, wala ini nagakahulugan nga ang maabiabihon nga tawo wala sing padya nga matigayon. Sa kabaliskaran, ang pagpakita sing matuod nga pagkamaabiabihon nagaresulta sing madamo nga padya, bisan pa nga wala ginapangabay. Nagabulig ini sa isa nga makatigayon sing bag-o nga mga abyan, kag ginapabakud sini ang daan nga pag-abyanay. Nagainspirar ini sa iban nga palambuon man ang espiritu sang kaalwan kag pagkamaabiabihon. (Lucas 6:38; Hulubaton 11:25) Labaw sa tanan, ang labing maabiabihon nga Persona sa uniberso, ang aton mahigugmaon nga Manunuga nga si Jehova nga Dios, magapat-od nga ang mga tunay nga maabiabihon indi magaantus sing kapigaduhon, bangod ginaapresyar niya yadtong “maabiabihon” subong nga sia maabiabihon man.